Jesus na Feroinaa Nicodemus
3
Na paꞌi hemea Pharisee harana Nicodemus, hemea maroaa ei bauaniaa ei Jew. 2 Ina nomai aꞌa Jesus hefaa poi ma ware, “Rabbi, haiꞌouna aida ba yoi hemea feroia, noramiamu aꞌa mei Haidaa. Uaa, lomi nemea i bigiꞌaa eꞌei hilalaa foigia, eꞌei oi bigiꞌia nabaa mei Haidaa lomi aꞌana.”3 Jesus na warenaa aꞌana, “A warefaꞌuai aꞌamu ba lomi nemea i maꞌa fei haparaiaa mei Haidaa nabaa lomi i waninidiai.a
4 Nicodemus na iꞌigai, “Batanai ba i waninidiai nemea nabaa na wawaneidii? Paꞌaa lomi ba i hadiweꞌidinaa laloo iaa inana ba i waninidiai!”
5 Jesus na ware, “A warefaꞌuai aꞌamu, lomi nemea ba i waduꞌainaa fei haparaiaa mei Haidaa nabaa lomi i waninidiai aꞌa fei ranu ma fei Spiriti. 6 Waniniaa fei pigio, i nomai aꞌa fei pigio. Waniniaa fei spiriti, i nomai aꞌa fei Spiriti.b 7 Apuna baꞌarofoa aꞌa fei wareau ba, ‘Oneic waninidiai.’ 8 Fei lalarena na aginaa fawelei nunumiana. Ona guainia maꞌuaa, lomi ona aida ba noramiana hitani o i dinaia. Ana aleꞌei aꞌa minaa ei rona wanini aꞌa fei Spiriti.”
9 Nicodemus na iꞌigai, “I batanai fei?”
10 Jesus na ware, “Haa, yoi hemea feroiaa Israel ma lomi ona aida ei manumanu ei? 11 A warefaꞌuai aꞌamu, haiꞌouna wareaa tamanu haiꞌouna aida ma uꞌugaa tamanu haiꞌouna fanunuia maꞌuaa, ana lomi hamona tonaa ei uꞌugaa haiꞌou. 12 Una uꞌufanio ei manumanuu malagufu ma lomi ona nara ba faꞌua; batanai o nara ba faꞌua nabaa a uꞌufanio ei manumanuu fei gufu pafea? 13 Lomi nemea na aunudiginaa pafea maꞌuaa, ana unaiaa mei na norai gufu pafea—mei Naꞌuu Ramaꞌa.d 14 Ana aleꞌei Moses na uduginaa fei waꞌa aꞌa fei hawafolo fawelei lomi haihai o guana, mei Naꞌuu Ramaꞌa, ana ronei uduginia pafea 15 ba hini i narafaweꞌi aꞌana i tonaa fei harenua lomi i pedutoo.e
16 “Uaa, hamatee mei Haidaa namina haguaa feni malagufu, ina aloagii mei hodihodiaaf Naꞌuna baduu wawane ba hini i narafaweꞌi aꞌana, lomi i maꞌe maꞌuaa, iwe paꞌi fei harenua lomi i pedutoo. 17 Uaa, fei paꞌafina ba mei Haidaa na aloagii mei Naꞌuna yeni malagufu, aꞌa ba inei dududuaa feni malagufu, maꞌuaa ba nei fatelaꞌanaa feni malagufu. 18 Hini i narafaweꞌi aꞌana, lomi i tonaa fei dududuana, maꞌuaa mei lomi na narafaweꞌi, na todigaa dududuana, uaa lomi ina narafaweꞌi aꞌa fei haraa mei hodihodiaag Naꞌuu mei Haidaa. 19 Sifeni, feni paꞌaa warea: fei Weꞌai na nodigimai yeni malagufu maꞌuaa, ei ramaꞌa, rona nunuminaa fei roromaa laraa fei weꞌai, uaa ei bigiꞌaa roꞌou na hafelo. 20 Hini i bigiꞌaa ei hafeloꞌa, na bidibidi ununa aꞌa fei weꞌai ma lomi ba i waduꞌainaa fei weꞌai, uaa ina maꞌau ba ei bigiꞌana iwe arewa. 21 Maꞌuaa hini na bigifipui aꞌa fei faꞌuaia, i waduꞌainaa fei weꞌai ba i faꞌarewaia ba ei bigiꞌana, bigiꞌaa mei Haidaa.”h
John, mei Pudugufaia fi Uꞌugaa Jesus
22 Nenee fei, Jesus mawe ei otalai nenerana, rona aununaa sugatataꞌaiaa Judea ma ina gutafipui aꞌa roꞌou yei ma pudugufinaa ei ramaꞌa. 23 John ana na pudugufinaa ei ramaꞌa yei Aenon rafiꞌinaa Salim, uaa na paꞌi watauda ranu ma ei ramaꞌa, ronaꞌu noꞌuamai aꞌana ba nei pudugufinaa roꞌou. 24 (Ei, rotawe boboꞌainaa John.) 25 Hefiꞌa ei otalai neneraa John, rona fiharenii aꞌa hemea Jewi wagii fei maumau fesufesu wagii fei losuu roꞌou. 26 Rona nopaꞌamii John ma warenaa aꞌana, “Rabbi, mei ramaꞌa aꞌamu yei pepei adii fei Ranu Jordan—mei ona uꞌugia—hia fi pudugufai ma minaa ei ramaꞌa, roi dinaa aꞌana.”
27 Aꞌa fei, John na ware, “Lomi hemea ba i tonaa hepalo manumanu nabaa abaa noranarai pafea. 28 Ana uniaa hamuꞌou na aida ba una waredii ba, ‘Yau, abaa mei Christ,j maꞌuaa yau mei neidoꞌo nomai maꞌana.’ 29 Mei pifinee lalaia, manumanuu mei wawane lalaia. Mei tafii mei wawanee lalaia, i gutaguaiꞌomaꞌaia ma imina niꞌeniꞌe na guainaa fei laona. Fei niꞌeniꞌea fei, manumanuu ma unawe todigia. 30 Fei harana nei nobauanailao ma fei harau nei pusuꞌoroilao.
31 “Mei i norai pafea na pafeainaa minaa ei; mei noramiana malagufu, ramaꞌaa malagufu ua ma ei wareana aleꞌei ei wareaa feni malagufu. Mei noramiana pafea, na pafeainaa minaa ei. 32 I uꞌugaa ei fanunuana ma guaiana maꞌuaa, lomi nemea i guaitonaa ei uꞌugana. 33 Mei i guaitodigia na famaꞌaia ba mei Haidaa napaꞌaa faꞌuai. 34 Uaa mei aloamii mei Haidaa, i wareaa ei wareaa mei Haidaa, uaa lomi pedupeduu fei fanaa mei Haidaak ei i fanaa fei Spiriti. 35 Mei Ama na haguaa mei Naꞌu ma na fifanidigaa minaa ei manumanu panina. 36 Hini i narafaweꞌi aꞌa mei Naꞌu, i paꞌi harenua lomi i pedutoo, maꞌuaa hini i fadugeaa mei Naꞌu, lomi ba i fanunuaa fei harenua, uaa fei sibaa mei Haidaa na oa aꞌana.”l