4 Ma ina talaiꞌailao Samaria. 5 Siꞌei, ina waduꞌainaa hepalo gufu laloo Samaria, harana Sychar na rafiꞌinaa fei malagufuu Jacob, fei na fanaa mei naꞌuna Joseph. 6 Fei agifaa Jacob ranu yei ma na madugu unuu Jesus uaa fei tatalaiana, siꞌei, na guta adii fei ranu. Ei, aleꞌei haloaina.

7 I nomai hemea pifinee Samaria ba i bai ranu, Jesus na warenaa aꞌana, “Na rawani ba odoꞌo fani numau?” 8 (Ei otalai nenerana, rona aunudiginaa aꞌa fei gufu ba ro pono duꞌua.)

9 Mei pifinee Samaria na warefania, “Yoi Jew ma yau Samaria. Tani o iꞌiginau ba nei fani numamu?” (Uaa ei Jew, lomi ronaꞌo fiwarewarei aꞌa ei Samaria.)^a

10 Jesus na warenaa aꞌana, “Nabaa ona aida fei fanaa mei Haidaa ma hini fi iꞌiginio ba fani numana, woro o iꞌiginia ma i fanio fei ranuu loloma.”

11 Mei pifine na ware, “Haguꞌu. Lomi ona paꞌi iba ma fei ranu na walalo. O to hitani fei ranuu loloma? 12 Haa, ona muainaa mei Amaa oꞌou Jacob, mei na fanaa oꞌou feni agifana ranu, mei ana hia ma ei naꞌuna mawe ei hapena manulelele, rona hunu wagina?”

13 Jesus na ware, “Hini i hunumaa feni ranu feni, iwe sigigidiai 14 maꞌuaa hini i hunumaa fei ranu fanau, lomi ifai sigigidiai. Hiꞌi, fei ranu a fania iwe aleꞌei ranuu wediwedi fei i fani harenua lomi i pedutoo.”

15 Mei pifine na warefania, “Mena bauana, fanau fei ranu fei lomi a fai sigigi ba a u hadiweꞌidimai mi bai ranu.”

16 Ina warefania, “Wi dugamii mei haromu ma hadiweꞌimai.”

17 Ina ware, “Lomi harou.”

Jesus na warenaa aꞌana, “Paꞌaa faꞌua wareamu ba lomi haromu. 18 Maꞌuaa, ana paꞌaa faꞌua ba onadoꞌo paꞌi haipani haromu ma mei wawane aꞌamu eꞌeni, abaa haromu. Paꞌaa faꞌua fei doꞌo wareamu.”

19 Mei pifine na ware, “Mena bauana, una fanunuꞌapaꞌia ba yoi hemea mamamaꞌa. 20 Ei amaa haiꞌou, rona losui pafoo feni maugeni, maꞌuaa hamuꞌou Jew na ware ba oꞌounei losui yei Jerusalem.”

21 Jesus na ware, “Mena pifine, onei guainau. Fi nomai fei au ba lomi o losuinaa mei Ama i pafoo feni maugeni, o yei Jerusalem. 22 Hamuꞌou ena Samaria na losuinaa tamanu lomi hamona aida; haiꞌouna losuinaa tamanu haiꞌouna aida, uaa fei talaa telaꞌana, noramiana aꞌa ei Jew. 23 Maꞌuaa fi nomai ma na nodigimai fei au ba ei paꞌaa losuia, rowe losuinaa mei Ama wagii fei spiriti ma fei faꞌuaia, uaa mei Ama na nunuminaa ei mau losuia aleꞌei. 24 Mei Haidaa, hia spiriti ma ei ba roꞌaa losuinia, ronei losuinia wagii fei spiriti ma fei faꞌuaia.”

25 Mei pifine na ware, “Una aida ba mei Messiah” (mei rona ware ba Christ) “fi nomai ma ena na nomai, iwe warefaꞌarewaiaa minaa ei manumanu aꞌa oꞌou.”

26 Jesus na ware, “Yau, meni uꞌei wareware aꞌamu, ana simena.”

27 Ana ei ua, ei otalai nenerana, rona hadiweꞌimai ma baꞌarofo ba na fiwarewarei aꞌa hemea pifine. Maꞌuaa lomi hemea na iꞌiginia ba, “Tamanu nunumiamu?”, o “Tani o fiwarewarei aꞌa mei pifine mei.”

28 I dii, mei pifine mei, na auꞌuaiaa fei ibaa ranu, hadiweꞌinaa gufuna ma warefanaa ei ramaꞌa, 29 “Mi maꞌa mei na uꞌufanau minaa ei una bigiꞌia. Woro simei, mei Christ?”^b 30 Rona asiꞌaa aꞌa fei gufu ma talainaloo aꞌana.

31 Ma ei, ei otalai nenerana, roi warenaa aꞌana ba, “Rabbi, onei hanana.”

32 Maꞌuaa ina warenaa aꞌa roꞌou, “Na paꞌidii duꞌua ba a hanaia, fei lomi hamona aida.”

33 Ma ei otalai nenerana na fiwarewarei ba, “Haa, na paꞌi ramaꞌa naree fani hanana?”

34 Na ware Jesus, “Fei hanau, sifei ba unei bigiꞌaa ei nunumiaa mei na aloagiau ma fapedugaa fei bigiꞌana. 35 Haa, lomi hamonaꞌo ware ba, ‘Obaodiai puda ma i nomai fei au hufuꞌa’? A ware ba hamonei werainaa pudaa hamuꞌou ma maꞌaiaa ei peꞌihape! Ina weꞌidii ei duꞌua ba o hufuꞌia. 36 Ana eꞌeni ua mei hufuꞌa fi tonaa fei ponoꞌana. Ana eꞌeni ua ifi hufuꞌaa ei fuaa fei harenua lomi i pedutoo ba mei faroa ma mei hufuꞌa, lagunei niꞌeniꞌefipui. 37 Ma siꞌei, fei warea ba ‘Hemea i faro ma hemea i hufu’, napaꞌaa faꞌuai. 38 Una aloaa hamuꞌou ba hamonei hufuꞌaa tamanu lomi hamona bigi wagina. Hefiꞌadiai, rona bigifaweꞌi ma hamonaree toꞌuaiaa ei rawaniꞌa wagii ei bigiꞌaa roꞌou.”

39 Watauda Samaria aꞌa fei gufu fei, rona narafaweꞌi aꞌana uaa na uꞌu mei pifine ba, “Ina uꞌufanau minaa ei bigiꞌau.” 40 Siꞌei, roꞌaa nomai aꞌana ei Samaria ma iꞌiginia ba nei gutafipui aꞌa roꞌou, ina guta heguai arewaa. 41 Ma siꞌei ba ei wareana, wataudadiai nawe narafaweꞌi.

42 Rona warenaa aꞌa mei pifine ba, “Abaa wagii ei uꞌugaꞌuamu ba haiꞌouna narafaweꞌi. Maꞌuaa haiꞌounawe guaiꞌaraia ma haiꞌounawe aida ba paꞌaa faꞌua ba meni ramaꞌa meni, paꞌaa mei ba i fatelaꞌanaa feni malagufu.”

43 Nenee guai arewaa ina asiꞌaa ba i dinaa Galilee. 44 (Ana Jesus nadii wareia ba hemea mamamaꞌa, lomi roꞌaa maꞌauia ei gufuna.) 45 I noꞌumai i Galilee, ei ramaꞌa yei, rona taufagutania. Rona maꞌadigaa minaa ei bigiꞌana yei Jerusalem aꞌa fei Hananaa fei Talai Falogia uaa roꞌou, ana yei.

46 I didiai, na hadiweꞌinaa Cana i Galilee, fei gufu ina filoginaa wine fei ranu. Ma na paꞌi hemea bauana yei ma mei naꞌuna na funuhaino i Capernaum. 47 I guainia mei ramaꞌa mei ba Jesus na gutadii Galilee, noramiana Judea, ina dinaa aꞌana ma iꞌigifaweꞌi aꞌana ba neimii fapedugaa funuaa naꞌuna, mei anaa i maꞌe.

48 Jesus na warenaa aꞌana, “Nabaa lomi hamona fanunuaa hefiꞌa hilalaa foigia ma fananawalaa puda, paꞌaa lomi hamoꞌaa narafaweꞌi.”

49 Mei bauana na ware, “Haguꞌu. Upumai ba neiꞌaa maꞌe mei naꞌuu.”

50 Jesus na ware, “Nowau. Lomi ba i maꞌe mei naꞌumu.”

Mei ramaꞌa na nara ba faꞌua ei wareaa Jesus ma na asiꞌaa. 51 Ei fi talailao, ei nafina, ronamii bapaꞌia ma uꞌufania ba na rawanidii mei naꞌuna. 52 I iꞌigai ba rawaniꞌana haiga mei naꞌuna, rona warefania, “Na asisi babaiaa ununa minoa aleꞌei heai idoꞌo.”

53 Aꞌa fei, mei ama nawe narapaꞌia ba sifei fei paꞌaa au Jesus na warefania ba, “Mei naꞌumu, lomi ba i maꞌe.” Siꞌei, hia ma minaa ei maroana, rona narafaweꞌi.

54 Sifei fei faguaiaa hilalaa foigia bigiꞌaa Jesus ei i diꞌininaa Judea ma amaꞌanaa Galilee.