Na Fawanewaneaa Unuu Hemea Adii fei Ranu
5
Nenee eꞌei, Jesus na fanedinaa Jerusalem ba i dinaa hepalo hananaa ei Jew. 2 Ma yei Jerusalem papaa fei Gigei ei Sipsipi, na paꞌi hepalo ranu, harana warea Aramea, Bethesdaa ma na paꞌi haipani pale yei. 3 Watauda hafeloꞌa unu na haino yei—ei pudawerai, ei afetoo mawe ei na maꞌe hepapa unuu roꞌou. 4\f + \fr 5:4 \ft Hefiꞌa neꞌia (lomi awataa roꞌou) na neꞌi ba unuu roꞌou—ma rona omaꞌaia ba i tatawei fei ranu. 4 Hepapalo au hemea aloꞌaloo mei Fasu na nogio ma fataweinaa fei ranu. Mei rawarawa peꞌia lalona nenee fei, i pedu funuana.\f* 5 Hemea yei, lomi na tatalai laloo odufua paꞌania ma fainaroa igisimasi. 6 I fanunuia Jesus ba na haino yei ma guainia ba fei gutanana aleꞌei namina madii, ina iꞌiginia, “Nunumiamu ba o rawani?”7 Mei lomi na talaipaꞌi na ware, “Mena bauana, lomi hemea ba i pudigau laloo fei ranu nabaa i tatawei. Nabaa a upunaa lalona, na upudii hemea.”
8 Ma Jesus na warenaa aꞌana, “Asiꞌaa! Tonaa fei hafenaa unumu ma talai.” 9 Ana ei ua, ina rawani ma na tonaa fei hafenaa ununa ma talai.
Fei arewaa i bigiꞌaa fei, Sabbath 10 ma siꞌei, ei Jew, rona warenaa aꞌa mei na pedu fei ibaꞌibana ba, “Sabbath wagieni; fei law na ware ba oneiꞌaa poroꞌaa hafenaa unumu.”
11 Maꞌuaa ina ware, “Mei i farawaninau na ware ba, ‘Tonaa fei hafenaa unumu ma talai.’”
12 Siꞌei rona iꞌiginia, “Hini mei na warefanio ba onei tonaa fei hafenaa unumu ma talai?”
13 Mei na pedu ibaꞌibana, paꞌaa lomi na aida ba hini, uaa Jesus na fahela dupuaa fei gupuu ramaꞌa yei.
14 Hinene, Jesus na bapaꞌia aꞌa fei humuu mei Haidaa ma warefania, “Maꞌaia, na rawani unumu. Apuna bigidinaa ei hafeloꞌa o iwe tonio manumanu na hafelodiai.” 15 Mei ramaꞌa na aunu ma warefanaa ei Jew ba Jesus mei i farawaninia.
Fei Harenua aꞌa mei Naꞌu
16 Hamatee siꞌei ba Jesus na bigiꞌaa eꞌei laloo fei Sabbath, ei Jew, rona haperararaia. 17 Jesus na warenaa aꞌa roꞌou, “Mei Amau, ranimai imina bigibigi nopaꞌamii wagieni ma yau ana fi bigi eꞌeni.” 18 Aꞌa fei, ei Jew roimina labarai tala ba roꞌaa foꞌafamaꞌeia uaa ina barafeaa fei Sabbath ma ana na ware ba mei Haidaa, Amana. Hanuna ba hia na fiminaꞌei aꞌa mei Haidaa.
19 Jesus na warenaa aꞌa roꞌou ba: “A warefaꞌuai aꞌa hamuꞌou ba mei Naꞌu, lomi i bigiꞌaa hepalo manumanu unaia; i bigiꞌuaiaa tamanu na fanunuia ba mei Amana na bigiꞌia; uaa tamanu na bigiꞌia mei Ama, mei Naꞌu ana i bigiꞌia. 20 Uaa mei Ama na haguaa mei Naꞌu ma naꞌaida famaꞌaiaa tamanu ina bigiꞌia. Hiꞌi, hamoꞌaa baꞌarofo maꞌuaa, iwe famaꞌaia hefiꞌadiai manumanu na muainaa eꞌei. 21 Uaa aleꞌei ba mei Ama, i famamaꞌaiaa ei maꞌea ma fani harenuaa roꞌou ana aleꞌei mei Naꞌu i fani harenua aꞌa mei nunumiana. 22 Ma hepalodiai, mei Ama, lomi i dududuaa nemea, maꞌuaa na fanidigaa fei dududua i panii mei Naꞌu 23 ba minaa ei ramaꞌa, ronei maꞌauaa mei Naꞌu ana aleꞌei rona maꞌauaa mei Ama. Mei lomi na maꞌauaa mei Naꞌu, lomi na maꞌauaa mei Ama, mei i aloiarai.
24 “A warefaꞌuai aꞌa hamuꞌou ba hini i guainaa ei wareau ma narafaweꞌi aꞌa mei na aloagiau, i paꞌi harenua lomi i pedutoo ma lomi ba i tonaa fei dududua; ina talawaꞌainaa fei maꞌea ma na nodigimai aꞌa fei harenua. 25 A warefaꞌuai aꞌa hamuꞌou ba fei au iwe nomai ba ei maꞌea rowe guainaa fei lao mei Naꞌuu mei Haidaa ma ei rona guainia, roꞌaa mamaꞌa. 26 Uaa, siꞌei ba mei Ama na paꞌi harenua i aꞌana, ana na ugainaa mei Naꞌu ba nei paꞌi harenua aꞌana. 27 Ma na fania fei forafora ba nei fadududu, uaa hia mei Naꞌuu Ramaꞌa.
28 “Hamoneiꞌaa baꞌarofo aꞌa fei, uaa fi nomai fei au ba minaa ei laloo huapu, rowe guainaa fei laona 29 ma mamaꞌadiai—ei rona bigiꞌaa ei rawaniꞌa, roꞌaa asiꞌaa ma to harenua ma ei rona bigiꞌaa ei hafeloꞌa, roꞌaa asiꞌaa ma to dududua. 30 Ana unaiau, lomi a bigiꞌaa hepalo manumanu; una dududuꞌuaiaa tamanu una guainia ma fei dududuau na wanewane, uaa abaa una bigiꞌaa fei nunumiau maꞌuaa nunumiaa mei na aloagiau.
Hefiꞌa, Rona Uꞌugaa Jesus
31 “Nabaa una uꞌugaa ana yau, fei uꞌugau lomi i awata. 32 Na paꞌi hemea na uꞌugau ma una aida ba fei uꞌugana yau, na awata.
33 “Hamona alodigaa hefiꞌa aꞌa John ma ina uꞌufanidigaa hamuꞌou fei faꞌuaia. 34 Aꞌa ba una tonaa ei uꞌugaa ramaꞌa; maꞌuaa una wareaa fei ba hamoꞌaa tela. 35 John aleꞌei fei ramai na guꞌafani weꞌai ma doꞌofamaꞌa hamona niꞌeniꞌe aꞌana.
36 “Una paꞌi hefaa uꞌuga na awatadiai laraa fei uꞌugaa John. Uaa fei bigiꞌa na fanau mei Ama ba unei fapedugia, fei uꞌei bigiꞌia eni, ana na faꞌarewaia ba yau, aloagii mei Ama. 37 Ma mei Ama, mei na aloagiau, ana hia na uꞌugau. Hamotawe guai laona o fanunu maumauna. 38 Ma ana lomi na oa laloo iaa hamuꞌou fei wareana, uaa lomi hamona narafaweꞌi aꞌa mei aloanarai. 39 Hamonaꞌaida igoꞌigofaweꞌia wagii fei Buꞌu Apuna, uaa hamona nara ba wagii fei, hamoꞌaa paꞌi harenua lomi i pedutoo. Ma fei Buꞌu Apuna na uꞌugau, 40 maꞌuaa paꞌaa lomi hamona nomai aꞌau ba hamoꞌaa to harenua.
41 “Lomi una nunuminaa ei udugiaa ramaꞌa, 42 maꞌuaa una apaꞌaa hamuꞌou. Una aida ba fei haguaa mei Haidaa, lomi laloo iaa hamuꞌou. 43 Una nomai aꞌa fei haraa mei Amau ma lomi hamona nunuminau; maꞌuaa, nabaa nemeadiai i nomai ana aꞌa fei harana, hamoꞌaa tonaa mei ramaꞌa mei. 44 Hamoꞌaa narafaweꞌi batanai nabaa nunumiaa hamuꞌou ba hamoꞌaa uduginaa ana hamuꞌou, maꞌuaa lomi hamona nunuminaa fei udugia noranamai aꞌa mei hemea ua Haidaa?b
45 “Maꞌuaa apuna nara ba yau a uniꞌuniaa hamuꞌou i pudaa mei Ama. Moses, mei na oꞌonai unuu hamuꞌou aꞌana, hia mei i uniaa hamuꞌou. 46 Nabaa hamona nara ba faꞌua ei wareaa Moses, ana hamoꞌaa nara ba faꞌua ei wareau. 47 Maꞌuaa, siꞌei ba lomi hamona nara ba faꞌua ei neꞌiana, batanai ba hamoꞌaa nara ba faꞌua ei wareau?”