Jesus na Faguaa Haipani Pufabaꞌa
6
Nenee fei, Jesus na suafatetenaa piye na raua yei Agii Galilee (ana harana Agii Tiberias) 2 ma hepalo baua gupuu ramaꞌa na nenegia, uaa rona maꞌadigaa ei hilalaa foigia, ei bigiꞌana aꞌa ei rona funu. 3 Jesus na faneaa hepalo maugeni ma gutafipui aꞌa ei otalai nenerana. 4 Fei Hananaa fei Talai Falogiaa ei Jew fi rafiꞌimai.5 I fanunupaꞌia ba fi nomai fei baua gupuu ramaꞌa Jesus, na warenaa aꞌa Philip, “O pono hitani faraa pidaua hanaa eni ramaꞌa eni?” 6 Na iꞌiginaa fei ba i maniꞌuaia, hamatee nadii aida ba i bigiꞌaa tamanu.
7 Philip na warenaa aꞌana, “Ponoꞌaa hemea bigiꞌa laloo fainaroa puda,a lomi i hawiaa ponoꞌaa faraa pidaua ba hememea i hanana!”
8 Hemeadiai ei otalai nenerana, Andrew, mei lofuu Simon Peter na ware, 9 “Meni baduu wawane meni na paꞌi haipani pusuꞌo faraa pidaua barley ma guapalo pusuꞌo nia maꞌuaa, ana ipoꞌo hawiaa eni watauda ramaꞌa eni?”
10 Jesus na ware, “Fagutanaa ena ramaꞌa.” Na paꞌi watauda guana yei ma aleꞌei haipani pufabaꞌa wawane, rona guta. 11 Jesus na tonaa ei faraa pidaua, na ware ‘ta’ ma alaginia aꞌa ei rona guta aleꞌei nunumiaa roꞌou. Ana na bigiꞌia aleꞌei aꞌa gupaloei nia.
12 Roꞌaa hananamagudii, ina warenaa aꞌa ei otalai nenerana, “Paiaa ei masii duꞌua. Lomi ba o simiꞌuaiaa maꞌida.” 13 Siꞌei, rona paifapepesuaa hefua ma guapalo pa aꞌa ei masii ei haipani faraa pidaua barley, ei maguꞌarawaa ei ramaꞌa.
14 Roꞌaa fanunudigaa fei hilalaa foigia bigiꞌaa Jesus, ronawe ware, “Paꞌaa faꞌua ba hia mei Mamamaꞌa, mei ba i nomai yeni malagufu.” 15 Jesus na aidadii ba ropowe panarofagutania ba hia hapara ma siꞌei, ina diꞌininaa roꞌou ma fanedinaa hepalo maugeni ana unaia.
Jesus na Talai Pafoo Agi
16 I nopoilao, ei otalai nenerana, rona upunaloo agi 17 ma hugi pafoo wa ma suanaloo Capernaum. Ina roromadii ma Jesus atawe nomai aꞌa roꞌou. 18 Fei lalarena na agifaweꞌi ma namina weta fei agi. 19 Roꞌaa suadii aleꞌei haipani o oloroa kilometre,b ronawe fanunupaꞌaa Jesus fi nofarafiꞌimai aꞌa fei wa ma talai pafoo agi ma ronamina maꞌau. 20 Maꞌuaa na warenaa aꞌa roꞌou, “Ana yau ua, apuna maꞌau.” 21 Ma nawe rawani naranaraa roꞌou ba roꞌaa fahuginia ma ana ei ua, fei wa na fatetenaa piyee fawelei ba ro dinaa wagina.
22 I noꞌarewadilao, fei gupuu ramaꞌa, fei rona guta pafoo piye omaꞌanaloo fipepei, rona fanunupaꞌia ba hepalo ua wa nadoꞌo peꞌi yei ma ba Jesus, lomi na hugi pafona, uniaa ei otalai nenerana na suaꞌaunu. 23 I dii, hefiꞌa wa, noramiaa roꞌou Tiberias na fatete papaa fawelei roꞌaa hanaiaa ei faraa pidaua nenee i ware ‘ta’ mei Fasu. 24 Roꞌawe apaꞌia fei gupuu ramaꞌa ba Jesus ma ei otalai nenerana lomi yei, rona hugi pafoo ei wa ma suanaa Capernaum ba roꞌaa labaginaa Jesus.
Jesus, fei Faraa Pidaua i Fani Harenua
25 Roꞌaa nobapaꞌalao fipepei omaꞌaloo roꞌou, rona iꞌiginia, “Rabbi, fateteamu haiga yeni?”
26 Jesus na ware, “A warefaꞌuai aꞌa hamuꞌou ba fei paꞌafii labagiaa hamuꞌou yau aꞌa ba fei fanunuaa hamuꞌou ei hilalaa foigia maꞌuaa, ba hamona hanafamagu aꞌa ei faraa pidaua. 27 Apuna bigibigi ba o tonaa ei duꞌua, ei i waragu ua, maꞌuaa ei duꞌua i ude nopaꞌaloo fei harenua lomi i pedutoo, fei ba i fanaa hamuꞌou mei Naꞌuu Ramaꞌa. Mei Haidaa, mei Ama na ugainia ma audigaa fei lalana aꞌana.”
28 Ma rona iꞌiginia, “Batanai ba haiꞌouꞌaa bigiꞌaa ei bigiꞌaa mei Haidaa?”
29 Jesus na ware, “Fei bigiꞌaa mei Haidaa, sifei ba hamonei narafaweꞌi aꞌa mei aloamiana.”
30 Siꞌei, rona iꞌiginia, “O bigiꞌaa tamanu hilalaa foigia ba haiꞌou maꞌaia ma narafaweꞌi aꞌamu? O bigiꞌaa tamanu? 31 Ei upuu haiꞌou, rona hanaiaa ei manna fawelei lomi haihai o guana; ana aleꞌei fei neꞌia: ‘Ina fani hanaa roꞌou faraa pidaua noramiana pafea.’”c
32 Jesus na warenaa aꞌa roꞌou, “A warefaꞌuai ba abaa Moses mei i fani hanaa hamuꞌou faraa pidaua noramiana pafea, maꞌuaa mei Amau, mei i fanaa hamuꞌou fei paꞌaa faraa pidaua noramiana pafea. 33 Uaa fei faraa pidauaa mei Haidaa, ana simei, mei na nogio pafea ma fani harenua yeni malagufu.”
34 Rona ware, “Mena bauana, eꞌeni ma nolao, fanaa haiꞌou fei faraa pidaua fei.”
35 Jesus na ware, “Yau, fei faraa pidaua i fani harenua. Hini i nomai aꞌau, lomi iwe baodiai ma mei i narafaweꞌi aꞌau, lomi iwe sigigidiai. 36 Maꞌuaa ana aleꞌei adii wareia ba hamona fanunudigau ma lomi hamona narafaweꞌi. 37 Minaa ei na fanau mei Ama, rowe nomai aꞌau ma hini i nomai aꞌau, paꞌaa lomi ba a alofatatalainia. 38 Uaa ei a nogio pafea, aꞌa ba a bigiꞌaa ei nunumiau, maꞌuaa ei nunumiaa mei na aloagiau. 39 Ma fei nunumiaa mei na aloagiau sifei ba uneiꞌaa fapaꞌainaa minaa ei fanana yau maꞌuaa, nei faꞌasiꞌanaa roꞌou wagii fei aꞌapoo arewaa. 40 Uaa fei nunumiaa mei Amau sifei ba hini i fanununaa aꞌa mei Naꞌu ma narafaweꞌi aꞌana, iwe paꞌi harenua lomi i pedutoo ma awe faꞌasiꞌania wagii fei aꞌapoo arewaa.”
41 Aꞌa fei, ei Jew, rona bababauꞌunia uaa ina ware, “Yau, fei faraa pidaua noramiana pafea.” 42 Rona ware ba, “Haa, abaa hia Jesus, mei naꞌuu Joseph, mei ona apaꞌaa amana ma inana? Batanai i ware ba ‘Noramiau pafea’?”
43 Jesus na ware, “Apuna bababauꞌu dupuaa hamuꞌou. 44 Lomi nemea i nomai aꞌau nabaa lomi i taudugia mei Ama, mei na aloagiau ma a faꞌasiꞌania aꞌa fei aꞌapoo arewaa. 45 Na ude aꞌa ei neꞌiaa ei Mamamaꞌa ba: ‘Mei Haidaa, iwe feroinaa minaa roꞌou.’ Hini i guainaa mei Ama ma tonaa ei feroiana, iwe nomai aꞌau. 46 Lomi hemea na maꞌa mei Ama maꞌuaa, mei noramiana aꞌa mei Haidaa; ana unaia na maꞌa mei Ama. 47 A warefaꞌuai aꞌa hamuꞌou ba hini i narafaweꞌi, i paꞌi harenua lomi i pedutoo. 48 Yau, fei faraa pidaua i fani harenua. 49 Ei upuu hamuꞌou, rona hanaiaa ei manna yei fawelei lomi haihai o guana maꞌuaa, rona maꞌe. 50 Maꞌuaa yeni, na paꞌi fei faraa pidaua noranarai pafea, fei nabaa nemea i hanaia lomi ba i maꞌe. 51 Yau, fei faraa pidaua na paꞌi harenua, fei noramiana pafea. Nabaa nemea i hanaiaa feni faraa pidaua, iwe guta ranimai ranimai. Feni faraa pidaua feni, feni pigiou, feni ba a fani ba harenuaa feni malagufu.”
52 Ma ei Jew, ronaꞌaa fiharenii ana roꞌou ba, “Batanai ba mei ramaꞌa mei i fanaa oꞌou fei pigiona ba o hanaia?”
53 Jesus na warenaa aꞌa roꞌou, “A warefaꞌuai aꞌa hamuꞌou ba nabaa lomi hamoꞌaa hanaiaa fei pigioo mei Naꞌuu Ramaꞌa ma hunumaa fei rarana, lomi hamoꞌaa paꞌi harenua. 54 Hini i hanaiaa fei pigiou ma hunumaa fei rarau, i paꞌi harenua lomi i pedutoo ma awe faꞌasiꞌania aꞌa fei aꞌapoo arewaa. 55 Uaa, fei pigiou, paꞌaa duꞌua ma fei rarau, paꞌaa hunuma. 56 Hini i hanaiaa fei pigiou ma hunumaa fei rarau, i oafipui aꞌau ma yau aꞌana. 57 Mei Ama, mei i oalao na aloamiau ma una paꞌi harenuau uaa hia. Ma ana aleꞌei, hini i hanaiau, iwe paꞌi harenuana uaa yau. 58 Sifei, fei faraa pidaua noramiana pafea. Ei upuu hamuꞌou, rona hanana manna ma rona maꞌe maꞌuaa, hini i hanaiaa feni faraa pidaua feni, iwe guta ranimai ranimai.” 59 Ina wareaa fei ei fi feroi laloo fei synagogue yei Capernaum.
Watauda Otalai Nenerana na Diꞌininaa Jesus
60 Roꞌaa guainaa fei, watauda ei otalai nenerana na ware, “Fei feroia fei, namina hafafalaꞌai. Hini ba i tonia?”
61 Jesus na aida ba ei otalai nenerana, rona bababauꞌu wagina ma na warenaa aꞌa roꞌou, “Na fafeloaa naranaraa hamuꞌou fei? 62 Tamanu naraa hamuꞌou nabaa hamoꞌaa fanunuaa mei Naꞌuu Ramaꞌa i hadiweꞌinaa pafea aꞌa fei gutanana mina? 63 Fei Spiriti i fani harenua; fei pigioo ramaꞌa, lomi hanuna. Ei wareau aꞌa hamuꞌou aleꞌei spiritid ma na paꞌi harenua. 64 Maꞌuaa hefiꞌa hamuꞌou lomi na narafaweꞌi.” Hamatee Jesus na aidadii ba hini roꞌou lomi na weꞌi naranarana ma hini i aloia panii hefiꞌa. 65 Ina waredilao ba, “Sifei fei paꞌafina a warenaa aꞌa hamuꞌou ba lomi nemea i nomai aꞌau nabaa lomi i hadumia mei Ama.”
66 Aꞌa fei au fei, watauda ei otalai nenerana, rona ofadugia ma lomi rona nenegidinia.
67 Jesus na iꞌiginaa ei Hefua ma Helagui, “Haa, ana ba hamoꞌaa diꞌininau?”
68 Simon Peter na warenaa aꞌana, “Mena Fasu, haiꞌou dinaa aꞌa hini? Ei wareamu na paꞌi harenua lomi i pedutoo. 69 Ina weꞌi ei naranaraa haiꞌou ma haiꞌouna aida ba yoi, mei Apunaiaa mei Haidaa.”