Jesus na Dinaa aꞌa fei Hananaa ei Pale
7
Nenee fei, Jesus na tatalai yei Galilee ma na nara ba lomi i dinaa Judea uaa ei Jew yei ba roꞌaa foꞌafamaꞌeia. 2 Maꞌuaa i norafiꞌimai fei hananaa ei Jew, fei Hananaa ei Pale, 3 ei lofuu Jesus, rona ware aꞌana ba, “Onei aunu yeni ma dinaa Judea ba ei otalai neneramu, ronei maꞌaiaa ei foigia onaꞌaida bigiꞌia. 4 Nabaa nemea na nunuminia ba hia bauana, lomi ba i opaꞌainaa ei bigiꞌana. Siꞌei ba yoi, oi bigiꞌaa ei manumanu ei, onei famaꞌaio aꞌa feni ano.” 5 Uaa ei lofuna, ana lomi rona narafaweꞌi aꞌana. 6 Siꞌei, Jesus na warenaa aꞌa roꞌou, “Atawe nomai fei paꞌaa auu. 7 Feni ano, lomi ba i bidibidi ununa aꞌa hamuꞌou, maꞌuaa na bidibidi ununa aꞌau uaa unaꞌo uꞌugia ba ei bigiꞌana na hafelo. 8 Hamonei dinaa aꞌa fei Hananaa. Lomi adoꞌo dinaa aꞌa fei Hananaa, uaa atawe nomai fei paꞌaa auu.” 9 I waredigaa fei, na gutadiai i Galilee.
10 Maꞌuaa roꞌaa aunudiginaa fei Hananaa ei lofuna, ana ina aunupaꞌailao. 11 Ma yei aꞌa fei Hananaa ei Jew, rona lalabaginia ma iꞌigai ba, “Amaia mei ramaꞌa mei?”
12 I dupuaa ei gupuu ramaꞌa rona fileleleinia. Hefiꞌa na ware, “Hia, rawaniꞌa ramaꞌa.”
Hefiꞌadiai na ware, “Loꞌe, ina sifiꞌaa ei ramaꞌa.” 13 Maꞌuaa lomi hemea na ware i pudaa ramaꞌa, uaa rona maꞌauaa ei Jew.
Jesus na Feroi aꞌa fei Hananaa
14 I nohesuwilao fei Hananaa, Jesus na dinaa malalaa fei humuu mei Haidaa ma naꞌaa feroi. 15 Ei Jew na baꞌarofo ma iꞌigai, “Ina tobatanainia ei apaꞌana ma lomi na to feroiana wagina?”
16 Jesus na ware, “Fei feroiau abaa manumanuu. Noramiana aꞌa mei i aloagiau. 17 Hini ba i bigiꞌaa ei nunumiaa mei Haidaa neidoꞌo naramaꞌaiaa fei feroiau ba noramiana aꞌa mei Haidaa, o uꞌuꞌuau. 18 Mei i uꞌugaa anaia, fi bigiꞌia ba i paꞌi rawaniꞌa harana maꞌuaa, mei i bigi ba i farawaninaa fei haraa mei na aloia, hia hemea na faꞌuai; lomi hepalo sifiꞌana. 19 Haa, abaa na fanaa hamuꞌou fei Law Moses? Maꞌuaa lomi hemea hamuꞌou na nenegia. Tani ei ba hamoꞌaa foꞌafamaꞌeau?”
20 Fei gupuu ramaꞌa na ware, “Woroo na waduꞌio pigea. Hini ba i foꞌafamaꞌeio?”
21 Jesus na warenaa aꞌa roꞌou, “Una bigiꞌaa hepalo foigia ma hamona baꞌarofo. 22 Maꞌuaa, siꞌei ba na fanaa hamuꞌou fei mau moroꞌaa hudii wawanei (maꞌuaa abaa paꞌaa noramiana aꞌa Moses, uaa ei ama mina), hamonaꞌo moroꞌaa hudii wawanei ei baduu laloo fei Sabbath. 23 Ma nabaa na rawani aꞌa hamuꞌou ba nemea baduu i moro laloo fei Sabbath ba lomi hamoꞌaa barafeaa fei law Moses, tani hamoꞌaa siba aꞌau ba na farawaninaa minaa ei unuu hemea ramaꞌa wagii fei Sabbath? 24 Apuna fafiꞌiꞌuanaa naranaraa hamuꞌou aꞌa tamanu hamona fanunuia. Hamonei naramaꞌaia.”
Jesus, Hia Christ?
25 Aꞌa fei, hefiꞌa ei ramaꞌaa Jerusalem, rona iꞌigai, “Haa, simeni, meni ba roꞌaa foꞌafamaꞌeia? 26 Hia simeni fi wareware i pudaa ei ramaꞌa ma lomi rona wareaa hepalo warea aꞌana. Haa, ei bauana, ronapaꞌaa nara ba hia Christ?a 27 Maꞌuaa, oꞌouna aida ba gufuna hitani; nabaa i nomai mei Christ, lomi nemea i aida ba gufuna hitani.”
28 Jesus ana fi feroi i malalaa fei humuu mei Haidaa, ei i warefabauana ba, “Hiꞌi, hamona apaꞌau ma aida ba hitani gufuu. Abaa noꞌuamiau maꞌuaa, mei na aloagiau napaꞌaa faꞌuai. Lomi hamona apaꞌia, 29 maꞌuaa una apaꞌia, uaa noramiau i aꞌana ma ina aloagiau.”
30 Aꞌa fei, ba roꞌaa panarofia, maꞌuaa lomi hemea na panarofia, uaa atawe nomai fei auna. 31 Maꞌuaa watauda i dupuaa ei ramaꞌa, rona narafaweꞌi aꞌana. Rona ware ba, “Nabaa i nomai mei Christ, ana i bigiꞌaa wataudadiai hilalaa foigia laraa meni?”
32 Ei Pharisee na guainaa fei gupuu ramaꞌa ba rona fiwareifagiginia aleꞌei. Ma ei famamoaa humuu mei Haidaa mawe ei Pharisee, rona aloaa ei oanananaa fei humuu mei Haidaa ba ronei panarofia.
33 Jesus na ware, “Lomi i madii gutanau aꞌa hamuꞌou ma a dinaa aꞌa mei i aloagiau. 34 Hamoꞌaa lalabaginau, maꞌuaa lomi ba hamowe labagipaꞌau; ma yei una dinaa wagina, lomi ba hamoꞌaa nopaꞌilao.”
35 Ei Jew, rona fiwarewarei, “Mei ramaꞌa mei ba i dinaia, te ba lomi o labagipaꞌia? Ba i dinaa fawelei ma feroinaa ei Greece ma guta aꞌa ei gufuu oꞌou, ei rona fawawadidi dupuaa ei ramaꞌa yei. 36 Tamanu hanuu ei wareana ba, ‘Hamoꞌaa lalabaginau maꞌuaa, lomi hamowe labagipaꞌau ma hitani a dinaa wagina, lomi hamowe nopaꞌilao’?”
37 Aꞌa fei aꞌapoo arewaa fei Hananaa fei na bauanaidiai laraa ei arewaa famaꞌa, Jesus na ufalarai ma warefabauana, “Hini na sigigi neimii hunu aꞌau. 38 Hini na narafaweꞌi aꞌau, aleꞌeib fei wareaa fei Buꞌu Apuna, iwe paꞌi aleꞌei ranuu loloma laloo iana.” 39 Aꞌa fei, fi hanuinaa fei Spiriti, fei rowe tonia ei rona narafaweꞌi aꞌana. Nopaꞌaloo fei au fei, itawe fanaa roꞌou fei Spiriti, uaa atawe tonaa fei hawerana Jesus.
40 Roꞌaa guainaa fei, hefiꞌa na ware, “Paꞌaa faꞌua ba mei ramaꞌa mei, hia mei Mamamaꞌa.”
41 Hefiꞌa na ware, “Hia mei Christ.”
Ma hefiꞌadiai na iꞌigai, “Haa, mei Christ, ba i nomai Galilee?” 42 Haa, lomi na ware fei Buꞌu Apuna ba mei Christ, hia aꞌa fei paic David ma ba i nomai Bethlehem, fei gufu na guta wagina mina David?” 43 Siꞌei, namina hamamaguaa naranaraa ei ramaꞌa aꞌa Jesus. 44 Hefiꞌa, ba roꞌaa panarofia; maꞌuaa lomi hemea na aunaa panina aꞌana.
Ei Bauaniaa Jew, Lomi Rona Narafaweꞌi
45 Ei famamoaa humuu mei Haidaa ma ei Pharisee, rona iꞌigainaa ei oanananaa fei humuu mei Haidaa, ei roꞌaa hadiweꞌimai aꞌa roꞌou ba, “Tani lomi hamona nodugamai?”
46 Ei oanananaa na ware, “Lomi nemea i wareware aleꞌei ei mau wareaa mei.”
47 Ei Pharisee na ware, “Ei hanuiaa hamuꞌou ba ana ina sifipaꞌaa hamuꞌou? 48 Na paꞌi hemea bauana o Pharisee na narafaweꞌi aꞌana? 49 Paꞌaa lomi! Maꞌuaa fei gupuu ramaꞌa, lomi rona apaꞌaa hepalo manumanu aꞌa fei law—ronei tonaa umua.”
50 Nicodemus, mei nadoꞌo dinaa aꞌa Jesus, mei ana hemea roꞌou na iꞌigai, 51 “Haa, fei law oꞌou, i rataware ua ba na tata hemea ma lomi i doꞌo guainia ba tamanu ei bigiꞌana?”
52 Rona ware, “Haa, ana gufumu Galilee? Fanunufarawaninia uaa lomi ba hemea mamamaꞌa,d noramiana Galilee.”
53 Siꞌei, hememea na dinaa humuna.