8
Maꞌuaa Jesus na dinaa aꞌa fei Maugeni Olive. 2 Mafufuo badu, na udiai i malalaa fei humuu mei Haidaa ma minaa ei ramaꞌa, rona puroroinia ma na guta ba i feroinaa roꞌou. 3 Ei feroiaa law mawe ei Pharisee, rona duginamii aꞌana hemea pifine rona maꞌapaꞌia ei i fiharoharoipaꞌai. Rona faꞌufalarainia i pudaa ramaꞌa 4 ma warenaa aꞌa Jesus, “Mena feroia, meni pifine meni, haiꞌouna panarofia ei i fiharoharoipaꞌai. 5 Fei Law Moses na ware ba onei nafanaa mugoo ei mau pifine aleꞌei. Siꞌei, o ware batanai wagina?” 6 Rona iꞌiginia ba ro faꞌalabeꞌia ma ro ware ba ina warefatata.Maꞌuaa Jesus na fabalonaa pu ma neꞌinaa anaꞌanana malagufu. 7 Rona minaꞌu iꞌigiꞌuaia, hee inawe ufalarai ma warenaa aꞌa roꞌou, “Hini hamuꞌou lomi hafeloꞌana, te, hia doꞌo rawarawa nafaꞌa.” 8 Ina fabalodiai ma neꞌineꞌi pafoo malagufu.
9 Hememea ei rona guainia, ronawe fididiꞌinii, doꞌofamaꞌa ei rona siginaa raudei. Laꞌo uniaa mei pifine aꞌa Jesus. 10 Jesus na ufalarai ma iꞌiginia, “Mena pifine, roꞌou hitani? Lomi hemea na wareio ba ona tata?”
11 Ina ware, “Lomi hemea, mena bauana.”
Jesus na ware, “Hiꞌei, ana lomi a wareio ba ona tata. Nowau ma oneiꞌaa fai bigidinaa ena hafeloꞌa.”
Ei Uꞌugaa Jesus, na Faꞌuai
12 Jesus na warediai aꞌa ei ramaꞌa ba, “Yau, weꞌai feni ano. Hini i nenerau, lomi ba iwe talai laloo fei roromaa, maꞌuaa i paꞌi fei weꞌai, fei i fani harenua.”
13 Ei Pharisee, rona mania, “Eꞌeni, ona uꞌugio; siꞌei ba oi uꞌugaa anaio, lomi na wanewane ei uꞌugamu.”
14 Jesus na ware, “Nabaa na uꞌugaa ana yau, fei uꞌugau na wanewane, uaa una aida ba noramiau hitani ma a dinaia. Maꞌuaa paꞌaa lomi hamona aida ba noramiau hitani o a dinaia. 15 Hamonaꞌu naraꞌuaiaa ei manumanu aleꞌei mau naranaraa ramaꞌa; yau lomi na narafani maumau hemea. 16 Maꞌuaa nabaa una nara aleꞌei, fei naranarau na wanewane, uaa abaa unaa yau. Una ufipui aꞌa mei Ama, mei na aloagiau. 17 Laloo fei Law hamuꞌou na ude fei neꞌia ba nabaa i fiboꞌii uꞌugaa helagui, ina wanewane. 18 Yau, hemea ana fi uꞌugau; ma hemeadiai ana na uꞌugau, mei Ama, mei na aloagiau.”
19 Ma i dii, rona iꞌiginia, “Amaia mei amamu?”
Jesus na ware, “Lomi hamona apaꞌau, o mei Amau. Nabaa hamona apaꞌau, ana hamoꞌaa apaꞌaa mei Amau.” 20 Ina wareaa fei ei fi feroi i malalaa fei humuu mei Haidaa papaa fei bao fana mugoo poꞌi. Maꞌuaa lomi hemea na panarofia, uaa atapaꞌaa fei auna.
21 Jesus na warediai aꞌa roꞌou ba, “Yau, a dii ma hamoꞌaa labaginau, maꞌuaa hamoꞌaa maꞌehugiaa ei hafeloꞌaa hamuꞌou. Fawelei ba a dinaa wagina, lomi ba hamowe nopaꞌilao.
22 Aꞌa fei, ei Jew, rona iꞌigai, “Haa, ba ana i foꞌafamaꞌeaa anaia? Sifei, fei hanuu wareana ba, “Fawelei ba a dinaa wagina, lomi hamowe nopaꞌilao”?
23 Maꞌuaa ina warelao, “Noramiaa hamuꞌou pu, maꞌuaa noramiau pafea. Hamuꞌou, ramaꞌaa feni ano. Yau abaa ramaꞌaa feni ano. 24 Una warefanidigaa hamuꞌou ba hamoꞌaa maꞌehugiaa ei hafeloꞌaa hamuꞌou; nabaa lomi hamona nara ba faꞌua fei wareau ba yau hini,a hamowepaꞌaa maꞌehugiaa ei hafeloꞌaa hamuꞌou.”
25 Rona iꞌigai, “Yoi hini?”
Jesus na ware, “Ana aleꞌei una waredigamai. 26 Na paꞌi watauda wareau ba hamuꞌou ramaꞌa bata wagii ei maumau hamuꞌou. Maꞌuaa, mei na aloagiau, hia napaꞌaa faꞌuai ma tamanu una guainia aꞌana, una uꞌugia yeni malagufu.”
27 Lomi rona apaꞌia ba fi uꞌugaa mei Amana aꞌa roꞌou. 28 Siꞌei, Jesus na ware, “Ena hamona fatawadigaa mei Naꞌuu Ramaꞌa, hamowe aida ba faꞌua fei warau ba yau hini ma lomi ba una bigiꞌaa hepalo manumanu unaa yau, maꞌuaa una wareaa tamanu na feroinau mei Ama. 29 Mei na aloagiau, hia aꞌau; lomi ba i diꞌininau uaa, unaꞌaida bigiꞌaa ei nunumiana.” 30 Ei fi uꞌu, watauda, rona narafaweꞌi aꞌana.
Ei Naꞌuu Abraham
31 Aꞌa ei Jew rona narafaweꞌi aꞌana, Jesus na ware, “Nabaa hamoꞌaa urofaa ei feroiau, hamuꞌou paꞌaa otalai nenerau. 32 Ma hamowe aida fei faꞌuaia ma fei faꞌuaia i alafatalainaa hamuꞌou.”
33 Rona warefania, “Haiꞌou, naꞌuub Abraham ma nopaꞌamii wagieni, lomi hemea na humuwainaa haiꞌou. Tani o ware ba hepalo manumanu i alafatalainaa haiꞌou?”
34 Jesus na ware, “A warefaꞌuai aꞌa hamuꞌou ba hini na bigiꞌaa ei hafeloꞌa, hia humuwa aꞌa ei hafeloꞌa. 35 Mei humuwa, abaa hia paꞌaa pai hepalo maroa maꞌuaa, mei naꞌu, hia pai fei maroana ranimai ranimai. 36 Siꞌei, nabaa mei Naꞌu na alafatalainaa hamuꞌou, hamopowe talaifaꞌaꞌa. 37 Una aida ba hamuꞌou naꞌuu Abraham. Maꞌuaa hamoꞌei omaꞌa ua ba hamoꞌaa foꞌafamaꞌeau, uaa paꞌaa lomi peꞌi ei wareau aꞌa hamuꞌou. 38 A warefanaa hamuꞌou tamanu na maꞌapaꞌia inamoaa mei Amau ma hamuꞌoufi bigiꞌaa tamanu hamona guainia aꞌa ei amaa hamuꞌou.”c
39 Rona ware, “Abraham, amaa haiꞌou.”
Jesus na ware, “Nabaa hamuꞌou naꞌuu Abraham, te, hamoꞌaa bigiꞌaad tamanu Abraham naꞌo bigiꞌia. 40 Maꞌuaa hamuꞌou, ba hamoꞌaa foꞌafamaꞌeau, yau meni na warefanaa hamuꞌou fei faꞌuaia, fei na guainia aꞌa mei Haidaa. Abraham, lomi na bigiꞌaa ei manumanu aleꞌei. 41 Hamonaꞌo bigiꞌaa ei na bigiꞌia mei amaa hamuꞌou.”
Rona fiharei aꞌana ba, “Abaa haiꞌou naꞌuu tala. Haiꞌouna paꞌi hemea ua ama, ana unaa mei Haidaa.”
Ei Naꞌuu mei Haniꞌu
42 Jesus na warenaa aꞌa roꞌou, “Nabaa mei Haidaa Amaa hamuꞌou, hamoꞌaa haguau, uaa noramiau aꞌa mei Haidaa ma eꞌeni yau yeni. Abaa noꞌuamiau; maꞌuaa aloagiana. 43 Tani lomi na arewa aꞌa hamuꞌou ei wareau? Hamatee, na loto adiaa hamuꞌou. 44 Hamuꞌou, naꞌuu mei amaa hamuꞌou, mei haniꞌu ma ba hamoꞌaa bigiꞌaa ei nunumiaa mei amaa hamuꞌou. Aꞌa fei rawarawa ma nolao hia ramaꞌaa foꞌafamaꞌea. Lomi na urofaa fei faꞌuaia uaa, paꞌaa lomi maꞌida faꞌuaia aꞌana. Ena na warefasifi, fipaꞌaa wareaa fei wareagufuna, uaa hia sifisifi ma amaa ei sifisifi. 45 Maꞌuaa siꞌei ba una warefaꞌuai aꞌa hamuꞌou, lomi hamona nara ba faꞌua ei wareau! 46 Na paꞌi hemea hamuꞌou ba ipaꞌaa wareꞌuniaa fei hafeloꞌau? Nabaa na warefaꞌuai, tani hamoꞌaa nara ba abaa faꞌua ei wareau? 47 Hini i oafipui aꞌa mei Haidaa, i guainaa tamanu na wareia mei Haidaa. Fei paꞌafina ba lomi hamoꞌaa guai, sifei ba lomi hamona oafipui aꞌa mei Haidaa.”
Ei Wareaa Jesus ba Hia Hini
48 Ei Jew, rona warenaa aꞌana, “Haa, lomi na wanewane ei wareaa haiꞌou ba yoi hemea Samaria ma na waduꞌio pigea?”
49 Jesus na ware, “Lomi na waduꞌau pigea, maꞌuaa una fani honua aꞌa mei Amau ma lomi hamona fani honua aꞌau. 50 Abaa a labarai haweraa ana yau; maꞌuaa na paꞌi hemea ba i lalabaginia ma hia mei fadududua. 51 A warefaꞌuai aꞌa hamuꞌou ba hini i aunaa naranarana ei wareau, lomi ba iwe maꞌa fei maꞌea.”
52 Aꞌa fei, ei Jew, rona ware, “Haiꞌounawe aida ba napaꞌaa waduꞌio pigea! Abraham na maꞌe ma ei mamamaꞌa anaa, maꞌuaa ona ware ba nabaa nemea i aunaa naranarana ei wareamu, lomi ba i nanamuinaa fei maꞌea. 53 Haa, ona muainaa mei amaa haiꞌou Abraham? Ina maꞌe ma ei mamamaꞌa anaa. Ei naramu ba yoi hini?”
54 Jesus na ware, “Nabaa una uduginaa ana yau, lomi hanuu fei udugiau. Mei Amau, mei hamona ware ba Haidaniaa hamuꞌou, ana simei na fani hawerau. 55 Lomi hamona apaꞌia maꞌuaa, una apaꞌia. Nabaa una ware ba lomi na apaꞌia, una warefasifi aleꞌei hamuꞌou maꞌuaa, unapaꞌaa apaꞌia ma neneraa ei wareana. 56 Mei amaa hamuꞌou Abraham, fei naranarana na refu ba i maꞌa fei au noramiau; ina maꞌadigia ma na niꞌeniꞌe.”
57 Ei Jew, rona warenaa aꞌana, “Otawe paꞌi haipani paꞌania igisimasi—haa, ona maꞌapaꞌaa Abraham!”