Jesus na Fawanewaneaa Hemea na Torotonamii fei Pudaweraiana
9
Ei fi talailao na maꞌapaꞌaa hemea na wanini pudawerai. 2 Ei otalai nenerana na iꞌiginia, “Rabbi, hini na bigifafelo, meni ramaꞌa meni, o amana ma inana ma siꞌei i wanini pudawerai?”3 Jesus na ware, “Abaa hia o amana ma inana, rona bigifafelo maꞌuaa, na nomai fei ba fei bigiꞌaa mei Haidaa nei aleꞌei famaꞌamaꞌa wagii fei gutanana. 4 Eni fi arewa, onei bigiꞌaa ei bigiꞌaa mei na aloagiau. I mai fei poi ba lomi nemea i bigi. 5 Ena una guta yeni malagufu, yau meni weꞌai feni malagufu.”
6 I waredigaa fei, na huwiaa fei malagufu, faheduia ma augia i pudaa mei ramaꞌa mei. 7 Ina warenaa aꞌana, “Nowau. Nunuu aꞌa fei Peꞌi Ranu Siloam” (hanuu fei hara ba na alodigia). Siꞌei, naree nunuu ma na nofafanunulao dinaa humuna.
8 Ei gufuna mawe ei ronadoꞌo fanunuia ba hia naꞌo gutanoinoi maꞌaa tala, rona iꞌigai, “Haa, ana simei mei naꞌo gutanoinoi?” 9 Hefiꞌa, rona ware ba hiꞌi, maꞌuaa hefiꞌa ba, “Loꞌe, sifei ua ba na fiminaꞌei fafanunuaa lagua.”
Maꞌuaa mei ramaꞌa na ware, “Ana yau simeni.”
10 Ma rona iꞌigifaweꞌi aꞌana, “Hamatani o fanunupaꞌi?”
11 Ina ware, “Mei rona roroinia Jesus na faheduaa fei malagufu ma augia pudau. Ina warefanau ba nei dinaa Siloam ma nunuu. Siꞌei, naree nunuu ma nawe fanunupaꞌi.”
12 Rona iꞌiginia, “Amaia mei ramaꞌa mei?”
Ina ware, “Lomi una aida.”
Ei Pharisee, roi Labaginaa fei ba Tani i Fafanunupaꞌi
13 Rona duginaa aꞌa ei Pharisee mei na wanini pudawerai. 14 Ma fei arewaa, fei i faheduaa fei malagufu ma fawanewaneaa mei pudawerai Jesus, Sabbath. 15 Siꞌei, ei Pharisee, ana rona iꞌiginia ba tani i fafanunupaꞌi. Ina ware, “Ina au hedu i pudau, una nunuu ma eni na fanunupaꞌi.”
16 Hefiꞌa ei Pharisee, rona ware, “Mei ramaꞌa mei, abaa noramiana aꞌa mei Haidaa, uaa lomi na neneraa fei Sabbath.”
Maꞌuaa, hefiꞌadiai rona iꞌigai, “Batanai ba hemea hafeloꞌa i bigiꞌaa ei hilalaa foigia aleꞌei?” Siꞌei, rona fifalagii.
17 Ma ronawe momoꞌidinaa aꞌa mei pudawerai, “O ware bata aꞌa mei ramaꞌa mei? Hamatee hia na fawanewaneaa pudamu.”
Mei ramaꞌa na ware ba, “Hia hemea mamamaꞌa.”
18 Ei Jew, rona falalaꞌaa amana ma inana uaa, ana lomi rona nara ba inadoꞌo pudawerai ma nawe fanunupaꞌi. 19 Rona iꞌigai, “Naꞌuu hamugua meni? Simeni, meni hamuꞌaa ware ba ina wanini pudawerai? Tani i fanunupaꞌi eni?”
20 Amana ma inana, laguna ware, “Haiguna aida ba naꞌuu haigua ma haiguna aida ba na wanini pudawerai. 21 Maꞌuaa, tani i fanunupaꞌi eni o hini na fawanewaneia, lomi haiguna aida. Iꞌiginia. Ina wawaneidii; ana hia i uꞌu.” 22 Amana ma inana, laguna ware aleꞌei uaa, laguna maꞌau aꞌa ei Jew hamatee rona waredii ba hini i ware ba Jesus, hia Christ,a roꞌaa faꞌasiꞌania aꞌa fei synagogue. 23 Sifei fei paꞌafina laguꞌaa ware amana ma inana ba, “Ina wawaneidii; iꞌiginia.”
24 Rona lalaꞌidinaa mei na wanini pudawerai. Rona ware, “Uduginaa mei Haidaa.b Haiꞌouna aida ba mei ramaꞌa mei, hia hafeloꞌa.”
25 Ina ware, “Lomi una aida ba hia hafeloꞌa, o loꞌe. Hepalo ua manumanu una aida, ba unadoꞌo pudawerai ma nawe fanunupaꞌi eni!”
26 Ma rona iꞌiginia, “Ina bigiꞌaa tamanu aꞌamu? Ina fawanewane batanainia fei pudamu?”
27 Ina ware, “Hei, una warefanidigaa hamuꞌou ma lomi hamona guai. Tani ei ba hamoꞌaa guaidinia? Ba ana hamoꞌaa talainenegia?”
28 Ma rona warefafeloia ma ware, “Yoi hemea otalai nenerana! Haiꞌou, otalai neneraa Moses! 29 Haiꞌouna aida ba mei Haidaa na wareware aꞌa Moses maꞌuaa, mei ramaꞌa mei, ana lomi haiꞌouna aida ba noramiana hitani.”
30 Mei ramaꞌa na ware, “Fei, paꞌaa poapoa manumanu! Lomi hamona aida ba noramiana hitani maꞌuaa, ina fawanewaneaa pudau. 31 Oꞌouna aida ba mei Haidaa, lomi i guainaa wareaa ei hafeloꞌa. I guaiꞌuaiaa ei maroana, ei rona bigiꞌaa nunumiana. 32 Lomi hemea na u guainia ba na paꞌi ramaꞌa na fawanewaneaa hemea na wanini pudawerai. 33 Nabaa mei ramaꞌa mei, abaa noramiana aꞌa mei Haidaa, lomi ba i bigipaꞌaa hepalo manumanu.”
34 Aꞌa fei, rona ware, “Yoi, ona pepesudii aꞌa ei hafeloꞌa ei oi wanini; yoi hini ba o feroinaa haiꞌou!” Ma rona porosiminia ano.
Na Pudawerai Naranaraa Ramaꞌa
35 Jesus na guainia ba rona porosiminia ano ma i nobapaꞌalao, ina ware, “Ona narafaweꞌi aꞌa mei Naꞌuu Ramaꞌa?”
36 Mei ramaꞌa na iꞌigai, “Hia hini? Warefanau ba a narafaweꞌi aꞌana.”
37 Jesus na ware, “Ona maꞌadigia ma ana meni fi warewarefipui aꞌamu.”
38 Mei ramaꞌa na ware, “Mena Fasu, na weꞌi fei naranarau.” Ma na losuinia.
39 Jesus na ware, “Paꞌafii fei noramiau yeni malagufu ba yau aleꞌei fadududua, ba ei pudawerai, ronei fanunupaꞌi ma ei rona fanunupaꞌi, rowe pudawerai.”
40 Hefiꞌa Pharisee i aꞌana, rona guainaa fei wareana fei ma iꞌigai, “Tamanu? Ana haiꞌouna pudawerai?”
41 Jesus na ware, “Nabaa hamona pudawerai lomi ba i marapu unuu hamuꞌou aꞌa ei hafeloꞌa; maꞌuaa, hamatee hamona ware ba hamona fanunupaꞌi, ana fi marapu unuu hamuꞌou.