Mei Omaꞌamaꞌaa mawe ei Hapena Sipsipi
10
“A warefaꞌuai aꞌa hamuꞌou. Mei lomi na waduꞌai wagii fei gigei, fei papaꞌii ei sipsipi ma fanewaduꞌai wagii hepalodiai tala, hia fafanao ma ramaꞌaa topaꞌaia. 2 Mei na waduꞌai wagii fei gigei, hia omaꞌamaꞌaa ei hapena sipsipi. 3 Mei oanananaa i gigiaa fei gigei aꞌana ma ei sipsipi, rona guaipaꞌaa laona. I harofaa haraa ei hapena ma talaiduginaa roꞌou ano. 4 Inaꞌaa talaiduginaa minaa ei hapena i ano, i talailao i maꞌaa roꞌou ma ei hapena sipsipi, roꞌaa nenegia uaa rona guaiꞌapaꞌaa fei laona. 5 Maꞌuaa, paꞌaa lomi ba roꞌaa neneraa mei lomi rona apaꞌia; hiꞌi, roꞌaa ponipaꞌai aꞌana uaa lomi rona guaiꞌapaꞌaa fei uꞌugai lao aleꞌei.” 6 Jesus na warehanunuinia aleꞌei maꞌuaa, lomi rona tonaa fei hanuu ei wareana.7 Siꞌei, na waredilao ba, “A warefaꞌuai aꞌa hamuꞌou ba yau aleꞌei fei gigei wagii ei sipsipi. 8 Minaa ei ronadoꞌo nomai i maꞌau, roꞌou fafanao ma ramaꞌaa topaꞌaia, maꞌuaa, ei sipsipi, lomi roꞌaa guainaa roꞌou. 9 Yau, aleꞌei fei gigei; hini i waduꞌaimai aꞌau, i tela.a I waduꞌai ma asiꞌaa ma iwe labagipaꞌi guana. 10 Mei fafanao, i nomai ba i topaꞌai ma foꞌafamaꞌe ma bigosigosiaa ei manumanu; yau, a nomai ba ei sipsipi nei paꞌi harenua ma neimina rawani ua harenuaa roꞌou.
11 “Yau mei rawaniꞌa omaꞌamaꞌaa ei sipsipi. Mei rawaniꞌa omaꞌamaꞌaa ei sipsipi i fanaa fei harenuana aꞌa ei sipsipi. 12 Mei tamelo, mei i bigitoo ponoꞌana, abaa omaꞌamaꞌaa ma abaa paꞌaa hapena ei sipsipi. Siꞌei, i maꞌapaꞌaa fei ponotoo podu ba fi nomai i ponidiꞌininaa ei sipsipi. Ma fei ponotoo podu na tetetaduaa ei sipsipi ma rona ponibaꞌautorai. 13 Mei ramaꞌa mei, na poni ua hamatee rona ponoꞌuaia ma lomi na narapaꞌaa ei sipsipi.
14 “Yau mei rawaniꞌa omaꞌamaꞌaa ei sipsipi; una apaꞌaa ei hapeu ma ana rona apaꞌau— 15 ana aleꞌei ba mei Ama na apaꞌau ma una apaꞌaia—ma una fanaa fei harenuau aꞌa ei sipsipi. 16 Una paꞌidiai hefiꞌa sipsipi abaa laloo feni papaꞌii eni sipsipi. Unei dugamii roꞌou anaa. Ana rowe guainaa fei laou ma iwe paꞌi hepalo ua gupuu ei sipsipi ma hemea ua omaꞌamaꞌaa. 17 Paꞌafii fei ba mei Amau na haguau sifei ba awe fanaa fei harenuau—ma ana awe tohadiweꞌidinia. 18 Lomi nemea i tonia aꞌau, ana unaa yau a fania. Una paꞌi forafora ba a fania ma tohadiweꞌidinia. Fei warea fei, na tonia aꞌa mei Ama.”
19 Wagii eꞌei warea eꞌei, ei Jew, rona fifalagidiai. 20 Watauda roꞌou na ware, “Ina waduꞌia pigea ma namina poapoai. Tani o guainia?”
21 Maꞌuaa, hefiꞌadiai, rona ware, “Ei warea aleꞌei, abaa wareaa hemea na waduꞌia pigea. Haa, fei pigea ana i fawanewanepaꞌaa hemea pudawerai?”
Na Waiwai Tabaa ei Jew
22 Yei Jerusalem inawe nopaꞌaloo fei au Hananaa wagii fei humuu mei Haidaa.b Fei au fei, au waiwana ma lalarena 23 ma Jesus yei malalaa fei humuu mei Haidaa fi tatalai papaa ei Palee Solomon. 24 Ei Jew, rona hoaninia ma ware, “Namina madii fei fawansufaiamu naranaraa haiꞌou? Nabaa yoi mei Christ,c faꞌarewaia aꞌa haiꞌou.”
25 Jesus na ware, “Una warefanadigaa hamuꞌou maꞌuaa, lomi hamona nara ba faꞌua. Ei foigia una bigiꞌia aꞌa fei haraa mei Amau, na uꞌufanaa hamuꞌou ba yau hini 26 maꞌuaa, lomi hamona narafaweꞌi uaa, hamuꞌou, abaa hapeu sipsipi. 27 Ei hapeu sipsipi, rona guainaa fei laou; una apaꞌaa roꞌou ma rona nenerau. 28 Aꞌa roꞌou, una fani harenua lomi i pedutoo ma paꞌaa lomi roꞌaa paꞌai; lomi nemea i raputarapaꞌaa roꞌou i paniu. 29 Mei Amau, mei na fanaa roꞌou aꞌau, na muainaa minaa ei manumanu,d lomi nemea i raputarapaꞌaa roꞌou i panii mei Amau. 30 Yau ma mei Ama, haigua hemea ua.”
31 Ei Jew, ronaꞌaa haudinaa ei mugoo ba roꞌaa nafaꞌia 32 maꞌuaa, Jesus na warefanaa roꞌou, “Una bigidigaa watauda rawaniꞌa foigia noramiaa roꞌou aꞌa mei Ama. Afaia aꞌa ei foigia ba hamoꞌaa nafaꞌau wagina?”
33 Rona ware ei Jew ba, “Lomi haiꞌouꞌaa nafaꞌio wagii hepalo ei, maꞌuaa, siꞌei ba ona warefafeloaa mei Haidaa. Uaa yoi, ramaꞌa ua maꞌuaa, ona ware ba yoi mei Haidaa.”
34 Jesus na warefanaa roꞌou, “Rona neꞌinia laloo fei Law hamuꞌou ba mei Haidaa na ware aleꞌei ba, ‘Una ware ba hamuꞌou haidaa’. 35 Hamona aida ba lomi hepalo tata laloo fei Buꞌu Apuna. Ma nabaa ei rona tonaa fei Buꞌu Apuna, ina ware ba roꞌou aleꞌei ‘haidaa’, 36 loꞌe manumanu nabaa mei Ama na ware aleꞌei aꞌa mei auꞌuꞌugaiana ba paꞌaa manumanuna, mei aloagiana yeni malagufu. Siꞌei, tani hamuꞌou ware ba una warefafeloaa mei Haidaa siꞌei ba una ware ba, ‘Yau Naꞌuu mei Haidaa’? 37 Apuna nara ba faꞌua ei wareau nabaa lomi una bigiꞌaa tamanu ana na bigiꞌia mei Amau. 38 Una bigiꞌaa eꞌei ma lomi hamona narafaweꞌi aꞌau. Maꞌuaa, ei bigiꞌau foigia uniꞌunina ba hamonei aida ma apaꞌia ba mei Ama, hia laloo iau ma yau aꞌana.” 39 Rona manidinia ba roꞌaa panarofia, maꞌuaa ina biꞌaꞌafaa roꞌou ma ponidiꞌininaa roꞌou.
40 Ma i dii, Jesus na hadiweꞌidinaa pepei Jordan fawelei i pudugufinaa ei ramaꞌa wagina mina John. Ma ina guta yei 41 ma watauda ramaꞌa, rona nomai aꞌana. Rona ware, “John, lomi na bigiꞌaa hepalo hilalaa foigia, maꞌuaa minaa ei uꞌugana meni ramaꞌa meni, paꞌaa faꞌua.” 42 Ma yei fawelei, watauda, rona narafaweꞌi aꞌa Jesus.