4 I guainaa fei, Jesus na ware, “Fei funua fei, lomi ba i famaꞌeia. Agia, fei paꞌafina, sifei ba i tonaa hawerana mei Haidaa ba mei Naꞌuu mei Haidaa, ana nei tonaa hawerana wagina.” 5 Jesus na haguaa Martha ma mei tafina mawe Lazarus. 6 Maꞌuaa, i guainia ba Lazarus na funu, na guta ua guaidiai arewaa yei.

7 I dii, inawe warenaa aꞌa ei otalai nenerana, “O dii, o hadiweꞌinaa Judea.”

8 Rona ware, “Rabbi, haiga ua ei ba roꞌaa nafanaa yoi mugoo yei ei Jew. Ma ba o hadiweꞌidilao?”

9 Jesus na ware, “Haa, aꞌa ba na weꞌa aleꞌei hefua ma guai hour laloo hepalo arewaa? Mei na talai laloo fei arewaa, lomi ba i teteiꞌalabe, uaa ina fafanunupaꞌi aꞌa fei weꞌai feni malagufu. 10 Nabaa i talai na poi, iwe teteiꞌalabe, uaa lomi weꞌaina.”

11 I waredigaa fei, ina waredilao aꞌa roꞌou, “Mei tafii oꞌou Lazarus, na maꞌigu, maꞌuaa yau ba a dinaa aꞌana ma funifunia.”

12 Ei otalai nenerana na ware, “Mena Fasu, nabaa ina maꞌigu iwe rawanidiai.” 13 Jesus na hanuinaa fei maꞌeana, maꞌuaa ei otalai nenerana, rona nara ba fi ware ba inapaꞌaa maꞌigu.

14 Siꞌei, inawe faꞌarewaia aꞌa roꞌou, “Lazarus na maꞌe. 15 Ma una niꞌe ba yau lomi yei ba hamonei narafaweꞌi. Maꞌuaa, oꞌaa dinaa aꞌana.”

16 Ma Thomas (ana harana Didymus) na warenaa aꞌa ei otalai nenera, “Ana oꞌaa di ma maꞌefipui aꞌana.”

17 I nopaꞌaloo yei, Jesus nawe apaꞌia ba Lazarus na hainodii laloo huapu aleꞌei obao arewaa. 18 Hafalaree Bethany aꞌa Jerusalem aleꞌei oduai kilometre.^a 19 Ma watauda Jew, rona dinaa aꞌa Martha ma Mary ba roꞌaa faloloaꞌifipui aꞌa lagua wagii fei paꞌaiaa mei agii lagua. 20 I guainia Martha ba fi nomai Jesus, ina asiꞌalao ba iree maꞌaia, maꞌuaa Mary na guta ua humu.

21 Martha na warenaa aꞌa Jesus ba, “Mena Fasu, nabaa yoi yeni, lomi i maꞌe mei agiu. 22 Maꞌuaa, una aida ba ana eꞌeni, mei Haidaa i fanio tamanu o iꞌiginia.”

23 Jesus na warenaa aꞌana, “Mei agimu iwe mamaꞌadiai.”

24 Martha na ware, “Una aida ba iwe mamaꞌadiai aꞌa fei au asiꞌana wagii fei aꞌapoo arewaa.”

25 Jesus na warenaa aꞌana, “Yau ana fei asiꞌana ma fei harenua. Hini i narafaweꞌi aꞌau, iwe paꞌi harenuana nabaa i maꞌe; 26 ma hini i guta ma narafaweꞌi aꞌau lomi iwe maꞌe. Naramu ba faꞌua fei?”

27 Ina warefania ba, “Hiꞌi, mena Fasu. Una nara ba yoi mei Christ,^b mei Naꞌuu mei Haidaa, mei ba na nomai aꞌa feni malagufu.”

28 I waredigaa fei, na hadiweꞌai ma dugiꞌuꞌuginaa mei tafina Mary. Ma na ware, “Mei Feroia, hia yeni ma fi iꞌiginio.” 29 I guainaa fei Mary, na asiꞌabatafa ma dinaa aꞌana. 30 Ma Jesus, atawe waduꞌainaa fei gufu, maꞌuaa hia ana fawelei i diꞌininia Martha. 31 Ei Jew, ei rona gutafaloloaꞌifipui aꞌa Mary laloo fei humu, roꞌaa fanunupaꞌia ba na asiꞌabatafa ma dinaa ano, rona nenegia, uaa rona nara ba i dinaa aꞌa fei huapu ma aiꞌai yei.

32 Mary, i nopaꞌaloo fawelei wagina Jesus ma maꞌapaꞌia, na fapasi pinena ma ware, “Mena Fasu, nabaa yoi yeni, lomi i maꞌe mei agiu.”

33 I maꞌapaꞌia Jesus ba na aiꞌai ma ei Jew, ei roꞌaa nofipuimai aꞌana, ana rona aiꞌai, namina fiꞌi naranarana ma naranara watauda. 34 Ina iꞌigai, “Hamona fahainopia hitani?”

Rona ware, “Mi maꞌa, mena Fasu.”

35 Jesus na ai.

36 Ma ei Jew, rona ware, “Maꞌaia, te inapaꞌaa haguia!”

37 Maꞌuaa, hefiꞌa roꞌou, rona ware, “Mei i fawanewaneaa mei pudawerai, tani lomi i bigiꞌia aleꞌei ba mei ramaꞌa mei neiꞌaa maꞌe?”

38 Jesus namina faloloaꞌidiai ma nomai aꞌa fei huapu. Fei huapu aleꞌei walawala aꞌa fei naꞌa ma na paꞌi mugoo i poaa wawaduꞌina. 39 Ina ware, “Pigusiminaa fei mugoo.”

Martha, mei agii mei maꞌea na ware, “Maꞌuaa, mena Fasu, eꞌeni namina wafuu, uaa ina hainodii yei obao arewaa.”

40 Ma Jesus na ware, “Haa, lomi una warefanio ba nabaa ona narafaweꞌi, owe maꞌa fei haweraa mei Haidaa?”

41 Siꞌei, rona pigusiminaa fei mugoo. Ma Jesus na aranaa pafea ma ware, “Oꞌama, a ware ‘ta’ aꞌamu uaa ona guaidigau. 42 Una aidadii ba onaꞌo guainau, maꞌuaa una wareaa fei ba i hadumaa ei rona ufalarai yeni ba ronei aida ba onapaꞌaa aloagiau.”

43 I waredigaa fei, Jesus na warefabauanai, “Lazarus, leleꞌamai!” 44 Mei maꞌea na leleꞌamai. Panina ma pinena, rona sumia aꞌa ei lawalawa ma na paꞌi lawalawa pudana.

Jesus na warenaa aꞌa roꞌou, “Alaraa ei lawalawaa maꞌea ma fatalainia.”

45 Siꞌei, watauda ei Jew, ei rona nomai aꞌa Mary ma maꞌapaꞌaa tamanu na bigiꞌia Jesus, rona narafaweꞌi aꞌana. 46 Maꞌuaa, hefiꞌa roꞌou na dinaa aꞌa ei Pharisee ma uꞌufanaa roꞌou tamanu na bigiꞌia Jesus. 47 Ma ei famamoaa humuu mei Haidaa mawe ei Pharisee, rona harofaa hepalo gutafiwareiaa ei Sanhedrin.

Rona iꞌigai, “Otawe bigiꞌaa hepalo manumanu aꞌana. Mei ramaꞌa mei na bigiꞌaa watauda hilalaa foigia. 48 Nabaa o maꞌaꞌauꞌuaia aleꞌei, minaa ei ramaꞌa ro narafaweꞌi aꞌana ma ei ramaꞌaa Rome, roꞌaa nomai ma tonaa ei bigiꞌaa oꞌou^c ma fei gufuu oꞌou.”

49 Ma hemea roꞌou, harana Caiaphas, hia mei paꞌaa bauaniaa humuu mei Haidaa laloo fei igisimasi fei ma na ware, “Lomi hamona apaꞌaa hepalo manumanu! 50 Lomi hamona aida ba i rawaninaa hamuꞌou nabaa hemea ua i maꞌe laraa fei ba minaa ei ramaꞌaa gufu, roꞌaa maꞌe?”

51 Fei warea fei, abaa paꞌaa wareana, hamatee hia mei paꞌaa bauaniaa humuu mei Haidaa fei igisimasi fei ma siꞌei nadii wareia ba Jesus, iwe maꞌe uaa fei gufuu ei Jew. 52 Ma abaa unaa fei gufu fei, maꞌuaa aꞌa ei naꞌuu mei Haidaa, ana ei rona guta wagii hepapalo gufu ba i papaꞌifipuinaa roꞌou aleꞌei hepalo. 53 Aꞌa fei arewaa fei ma nolao, rona fiwarei ba roꞌaa foꞌafamaꞌeia.

54 Siꞌei, Jesus, lomidiai ba i tatalai i pudaa ei Jew. Maꞌuaa ina diꞌininaa roꞌou ma dinaa fei gufu harana Ephraim, fawelei lomi haihai o guana. Ma na gutafipui aꞌa ei otalai nenerana yei.

55 I norafiꞌimai fei Hananaa fei Talai Falogiaa ei Jew, watauda noramiaa roꞌou rauaa, rona dinaa Jerusalem ba rodoꞌo fesufaꞌarainaa unuu roꞌou aleꞌei fei mau losuiaa roꞌou ma hinene, fei Talai Falogia. 56 Ana roꞌei lalabaginaa Jesus ma ei roꞌei u i malalaa fei humuu mei Haidaa, rona fiꞌiꞌigai ba, “Tamanu naramu? Haa, paꞌaa lomi i nomai aꞌa fei Hananaa?” 57 Maꞌuaa ei famamoaa humuu mei Haidaa mawe ei Pharisee, ronadii wareia ba nabaa nemea i labagipaꞌaa Jesus, inei warefaꞌaiaa roꞌou ba roꞌaa panarofia.