Ina Waduꞌainaa fei Gufu Aleꞌei Hemea ina Mua
21
Roꞌaa nofarafiꞌimai Jerusalem ma nopaꞌamii Bethphage pafoo Maugeni Olive, Jesus na aloaa helagui ei otalai nenerana 2 ma inadoꞌo warefanaa lagua, “Dinaa aꞌa fei gufu i maꞌaa hamugua ma hamuwe fanunupaꞌaa hepalo donkey na roroꞌai yena ma fena naꞌuna, papana. Alaforamiaa lagua aꞌau. 3 Nabaa nemea i wareaa hepalo manumanu aꞌa hamugua, warefania ba mei Fasu na nunuminaa gueini donkey ma iwe alodinamai.”4 Fei manumanu fei, fi fafaꞌuainaa tamanu nadii wareia mei mamamaꞌa:
5 “Warenaa aꞌa mei Naꞌuu Zion, Baduu Pifine,
‘Fanunu, mei haparamu fi nomai aꞌamu,
ina nowiwidimai pafoo hepalo donkey,
pafoo hepalo naꞌuu manulelele, hepalo naꞌuu donkey.’”
6 Laguna aunu laguei otalai nenerana ma bigiꞌia aleꞌei na wareia aꞌa lagua Jesus. 7 Laguna foramii fei donkey ma fei naꞌuna, augaa ei hawaa uguu lagua pafoo guapaloei ma Jesus na guta pafoo guapaloei. 8 Hepalo baua gupuu ramaꞌa na hafeninaa ei hawaa uguu roꞌou i maꞌaa tala ma hefiꞌa, rona balainaa ei raraa haihai ma hafeninia i maꞌaa tala. 9 Ei gupuu ramaꞌa, ei rona nolao i maꞌana ma ei rona talailao nene, rona haroharo,
“Hosannaa aꞌa mei Naꞌuu David!”
“Ina paꞌi hawegiana mei na nomai aꞌa fei haraa mei Fasu!”
“Hosanna i dinaa pafea!”
10 Iꞌa waduꞌainaa Jerusalem Jesus, minaa ei ramaꞌaa gufu, rona asiꞌaa ma iꞌigai ba, “Hini meni?”
11 Ei gupuu ramaꞌa, rona ware ba, “Meni ramaꞌa meni, Jesus, mei mamamaꞌa, noramiana Nazareth yei Galilee.”
Jesus Yei aꞌa fei Humuu mei Haidaa
12 Jesus na waduꞌainaa malalaa fei humuu mei Haidaa ma na tetefaꞌasiꞌanaa minaa ei roꞌei ponopono ma aloꞌalo yei. Ina haupeduaa ei tawaa ei roꞌei filoginaa ei mugoo poꞌi mawe ei gutanaa ei roꞌei aloaa ei pune. 13 Ina ware, “Rona neꞌinia ba, ‘Rowe ware ba fei humuu, hepalo humuu lafulafu,’ maꞌuaa, hamona bigiꞌia aleꞌei humuu fafanao.’”
14 Ei pudawerai mawe ei afetoo, rona nomai aꞌana i humuu mei Haidaa ma ina farawaninaa roꞌou. 15 Maꞌuaa, rona siba ei famamoaa humuu mei Haidaa mawe ei feroiaa law ei roꞌaa fanunupaꞌaa ei rawaniꞌa bigiꞌana ma aleꞌei ba ei baduu, rona haroharo laloo fei humuu mei Haidaa ba, “Hosanna i dinaa aꞌa mei Naꞌuu David.”
16 Rona iꞌiginia, “Ona guaipaꞌia ba tamanu ei wareaa ei baduu?”
Jesus na ware ba, “Hiꞌi. Haa, lomi hamona igoia,
“‘Aꞌa fei habaꞌumuu ei baua baduu mawe ei pusuꞌo baduu,
ona nunuminia ba ronei uduginio’?”
17 Ma ina asiꞌaa aꞌa roꞌou ma diꞌininaa fei gufu fei ma aununaa Bethany ma na maꞌigu yei.
Fei Haihai Figi na Hole
18 I nomafufuoilao, fi hadiweꞌinaa fei baua gufu ma na bao. 19 Ina fanunupaꞌaa hepalo haihai figi i papaa fei tala ma na nolao wagina ma lomi na fanunupaꞌaa hepalo fuana unaa ei rauna. Ma na warenaa aꞌana, “Fai lomi ba o fuadiai!” Ana ei ua, fei haihai na hole.
20 Roꞌaa fanunuaa fei ei otalai nenerana, ronamina baꞌarofo ma iꞌigai, “Tani ei ba fei haihai figi namina holebatafa?”
21 Jesus na ware, “A warefaꞌuai aꞌa hamuꞌou ba nabaa na weꞌi naranaraa hamuꞌou ma lomi hamona hamamagua, aꞌa ba una fei ba hamoꞌaa bigiꞌia aꞌa fei haihai figi, maꞌuaa ana hamowe warenaa aꞌa feni maugeni ba, ‘Wi siminio agi,’ ma iwe guainaa hamuꞌou. 22 Nabaa na weꞌi naranaraa hamuꞌou, hamowe tonaa tamanu hamona iꞌiginia aꞌa ei lafulafuaa hamuꞌou.”
Rona Haninaa fei Foraforaa Jesus
23 Jesus na waduꞌainaa malalaa fei humuu mei Haidaa ma fi feroi, ei famamoaa humuu mei Haidaa mawe ei bauaniaa gufu, rona nomai aꞌana. Rona iꞌigai, “Tonamu hitani fei forafora ba oꞌaa bigiꞌaa eni manumanu eni? Ma hini na ugainio?”
24 Jesus na ware, “Yau ana a iꞌiginaa hamuꞌou hepalo iꞌigaia. Naꞌaa hamoꞌaa warefanau, a warefanaa hamuꞌou ba tonau hitani fei forafora ba a bigiꞌaa eni manumanu eni. 25 Fei pudugufaiaa John—noramiana hitani? Noramiana pafea, o aꞌa ramaꞌa?”
Rona fiwarewareinia dupuaa roꞌou ma ware, “Nabaa o ware ba, ‘Noramiana pafea,’ iwe iꞌigai, ‘Nabaa aleꞌei, tani lomi hamona nara ba faꞌua wareana?’ 26 Maꞌuaa, nabaa o ware ba, ‘Noramiana aꞌa ramaꞌa’—oꞌouna maꞌauaa ei ramaꞌa, uaa minaa roꞌou, rona nara ba John, hemea mamamaꞌa.”
27 Siꞌei, rona warenaa aꞌa Jesus, “Lomi haiꞌouna aida.”
Ma ina ware, “Ana lomi ba a warefanaa hamuꞌou ba tonau hitani fei forafora ba a bigiꞌaa eni manumanu eni.”
Fei Warea Hanunuu Laguei Naꞌu
28 “Tamanu naraa hamuꞌou? Na paꞌi hemea ramaꞌa na paꞌi helagui naꞌuna. Ina dinaa aꞌa mei umaꞌua ma na ware, ‘Onaꞌuu, re bigi i peꞌihape wagieni.’
29 “Ina ware, ‘Lomi ba a bigi,’ maꞌuaa nenee fei, na filoginaa naranarana ma na aunu.
30 “I dii, mei ama na dinaa aꞌa mei umugi ma ana aleꞌei wareana aꞌana. Ina ware, ‘Awe dii,’ maꞌuaa lomi na dii.
31 “Amaia lagua na bigiꞌaa nunumiaa amana?”
Rona ware ba, “Mei umaꞌua.”
Jesus na warenaa aꞌa roꞌou, “A warefaꞌuai aꞌa hamuꞌou ba ei otonaa mugoo poꞌii gavaman mawe ei pifinee tala, roꞌei waduꞌainaa fei haparaiaa mei Haidaa, i maꞌaa hamuꞌou. 32 Uaa John na nomai aꞌa hamuꞌou ba i famaꞌaa hamuꞌou fei talaa wanewanea ma lomi hamona guainaa wareana maꞌuaa, ei otonaa mugoo poꞌii gavaman mawe ei pifinee tala, rona guainia. Ma hamoꞌaa fanunudigaa fei, ana lomi hamona filoginaa ei naranaraa hamuꞌou ma guainia.
Fei Warea Hanunuu ei Omaꞌamaꞌaa fei Peꞌihape
33 “Guaidiai hepalo warea hanunu: Na paꞌi hemea na faroaa ei wine laloo peꞌihapena. Ina nonoinia, agifaa fei huapuu wine ma na faꞌugaa fei palee ei gutaꞌomaꞌaa fei peꞌihapena. Siꞌei, nadii fanaa hefiꞌa ba ronei omaꞌaa fei peꞌihapena ma na aunu ba i tatalai gufu raua. 34 Iꞌa norafiꞌinaloo fei au hufuꞌa, ina aloaa ei nafina ba ronei dinaa aꞌa ei roꞌaa omaꞌaa fei peꞌihape ma re tomai ei alagiꞌaugaa roꞌou hanana fua.
35 “Ei omaꞌamaꞌaa fei peꞌihapena rona panarofaa ei nafina; babuinaa hemea, foꞌafamaꞌeaa hemea ma nafaꞌaa mei faꞌoꞌoduaiaa roꞌou aꞌa ei mugoo. 36 Siꞌei, na alodinaa hefiꞌadiai nafina aꞌa roꞌou, rona wataudadiai aꞌa ei rawarawa ma ei omaꞌamaꞌaa fei peꞌihapena rona bigiꞌia aꞌa roꞌou ana aleꞌei bigiꞌaa roꞌou famaꞌa. 37 Nenee minaa ei, nawe aloaloo mei naꞌuna aꞌa roꞌou. Ma ina ware, ‘Roꞌawe maꞌauaa mei naꞌuu.’
38 “Maꞌuaa, ei roꞌaa fanunupaꞌaa mei naꞌuna ei omaꞌamaꞌa, rona fiwarewarei ana roꞌou, ‘Simeni, meni ba i tonaa feni peꞌihapee amana. O dii, o foꞌafamaꞌeia ma tonaa fei peꞌihapena.’ 39 I dii, rona panarofia, faꞌasiꞌania aꞌa fei peꞌihape ma foꞌafamaꞌeia.
40 “Nabaa i nomai mei amaa fei peꞌihape, i bigiꞌaa tamanu aꞌa ei omaꞌamaꞌaa fei peꞌihapena?”
41 Rona ware, “I paꞌaa fanimaꞌaa ei wawaꞌai poa, tonaa fei peꞌihapena ma fanaa hefiꞌadiai omaꞌamaꞌaa, ena rowe fania hefiꞌa ei fuaa fei peꞌihapena aꞌa fei au hufuꞌa.”
42 Na ware aꞌa roꞌou Jesus, “Haa, lomi hamona igoia laloo fei Buꞌu Apuna:
“‘Fei mugoo, fei lomi rona nunuminia ei fadufadua,
i powe oanaa fasuꞌufufugoi.b
Mei Fasu na bigiꞌaa feni,
ma namina fafanunufarawani pudaa oꞌou’?
43 “A warefanaa hamuꞌou ba fei haparaiaa mei Haidaa i tonia aꞌa hamuꞌou ma fanaa ei ramaꞌa, ei rowe fafuafarawaninia. 44 Hini i pasinaa pafoo feni mugoo i matala, maꞌuaa hini i pasiꞌonia fei mugoo i marafita.”c