Rona Haninaa fei Foraforaa Jesus
20
Heai arewaa, ei fi feroinaa ei ramaꞌa i malalaa fei humuu mei Haidaa ma uꞌugaa fei rawaniꞌa warea, ei famamoaa humuu mei Haidaa, ei feroiaa law mawe ei bauaniaa gufu, rona nomai aꞌana. 2 Rona iꞌigai, “Warefanaa haiꞌou, foraforaa hini feni o bigiꞌaa eni manumanu eni. Ma hini na fanio fei forafora?”3 Ina ware, “Ana na paꞌi iꞌigiau. Warefanau, 4 Hefei pudugufaiaa John—noranamai gufuu pafea, o aꞌa ramaꞌa?”
5 Rona fiwarewarei wagina ma ware, “Nabaa ona ware ba, ‘Noramiana pafea,’ i iꞌigai, ‘Hamatani loꞌe hamona nara ba faꞌua ei wareana?’ 6 Maꞌuaa nabaa o ware ba, ‘Aꞌa ramaꞌa,’ minaa ei ramaꞌa roꞌaa nafanaa oꞌou mugoo, uaa rona nara ba John, hemea mamamaꞌa.”
7 Siꞌei, rona ware, “Lomi haiꞌouna aida ba fei pudugufaiana noramiana hitani.”
8 Jesus na ware, “Ana loꞌe a warefanaa hamuꞌou ba hini na fanau fei forafora, fei na biginaa eni manumanu eni.”
Fei Warea Hanunuu ei Omaꞌamaꞌaa Peꞌihape
9 Ina uꞌulao ma na uꞌufanaa ei ramaꞌa feni warea hanunu feni: “Hemea ramaꞌa na bigiꞌaa hepalo peꞌihape fuaa wine ma hefiꞌa faroa, rona fania maꞌida mugoo poꞌi ba rodoꞌo bigibigi wagina. Ma mei amaa fei peꞌihape na aununaa gufu rauaa ma guta famadii maꞌida. 10 I nopaꞌaloo fei au hufuꞌa, ina aloaa hemea nafina aꞌa ei faroa ba ronei fania maꞌida fua aꞌa fei peꞌihape. Maꞌuaa ei faroa, rona babuinia ma alofatatalainia, pani ua. 11 Ina aloaa hemeadiai nafi, maꞌuaa ana aleꞌei, rona babuinia, famamafaia ma rona alofatatalainia, pani ua. 12 Ina alodinaa mei faꞌoꞌoduiaa roꞌou ma rona hafufararaiaa ununa ma bainafaꞌainia ano.
13 “Idii, mei amaa fei peꞌihape nawe ware, ‘A fetanainia feni? Unei aloaa mei naꞌuu, baduu wawane, mei una haguia; woro roꞌaa maꞌauia.’
14 “Maꞌuaa roꞌaa fanunupaꞌia eꞌei faroa, rona fiwarewarei, ‘Simeni, meni ipowe amainaa feni peꞌihape. O dii, oꞌaa foꞌafamaꞌeia ma fei peꞌihape, oꞌaa tonia.’ 15 Siꞌei, rona bainafaꞌainia auguu fei peꞌihape ma foꞌafamaꞌeia.
“Ei naraa hamuꞌou ba mei amaa fei peꞌihape i fetanainaa roꞌodu? 16 I nomai, foꞌafamaꞌeaa ei faroa ma fanaa fei peꞌihape aꞌa hefiꞌadiai.”
Roꞌaa guainaa fei ei ramaꞌa, rona ware, “Paꞌaa lomi na rawani ba fei nei nomai!”
17 Jesus na fanunufaꞌuꞌuaa roꞌodu ma na iꞌigai, “Ana? Hama tamanu feni neꞌia:
“‘Fei mugoo, fei rona suminia ei fadufadua,
i oanaa fafasuiia fei humu’?b
18 Minaa ei rona pasi pafoo fei mugoo, roꞌamina matalatala, maꞌuaa, hini i pasiꞌonia fei mugoo imina marafita.”
Fani Mugoo Poꞌi aꞌa Caesar
19 Ei feroiaa law ma ei famamoaa humuu mei Haidaa, roi labaginaa hefaa tala ba roꞌaa panarofia eꞌeni ua, uaa rona apaꞌia ba ifi hanunuinaa roꞌou. Maꞌuaa rona maꞌauaa ei ramaꞌa.
20 Rona opapaninia ma aloaa hefiꞌa farerefaia ba ronei nosifilao ma susuaninia ba inei warefatata ma ba roꞌaa fifaninia panii ei forafora, ei rona paꞌi faufau roꞌou aꞌa mei gavanaa. 21 Siꞌei, ei farerefaia, rona iꞌiginia, “Mena feroia, Haiꞌouna aida ba ona ware ma feroinaa ei na wanewane ma lomi omina fafefenaa hemea, maꞌuaa ona feroinaa fei talaa mei Haidaa wagii fei na faꞌuai. 22 Ina wanewane nabaa oꞌou fani mugoo poꞌi aꞌa Caesar, o loꞌe?”
23 Ina fanunuꞌapaꞌidigaa fei waresuabaduiaa roꞌou ma warenaa aꞌa roꞌou, 24 “Famaꞌaiau hepalo denarius. Hanunuu hini ma neꞌiaa hini wagina?”
25 Rona ware, “Caesar.”
Ina warenaa aꞌa roꞌou, “Nadii, fanaa Caesar ei manumanuna ma fanaa mei Haidaa ei manumanuna.”
26 Lomi rona guainaa maꞌida tataa ei wareana i pudaa ramaꞌa. Ma rona maduofo aꞌa ei wareana, siꞌei, rona babanini ua.
Fei Asiꞌana ma Fei Lalaia
27 Hefiꞌa ei Sadducee, ei rona ware ba lomi asiꞌana, rona nomai aꞌa Jesus aꞌa hepalo iꞌigaia. 28 Rona ware, “Mena Feroia, Moses na neꞌifanaa oꞌou ba nabaa hemea wawane haro lalai na paꞌi lofuna ma na maꞌediꞌininaa harona ma lomi naꞌuu lagua, mei lofuna nei lalainaa mei pifine ma fuaifani naꞌuu mei lofuna. 29 Ma na paꞌi oloromeai filofui. Mei umaꞌua na lalainaa hemea pifine ma na maꞌe, lomi naꞌuna. 30 Mei umugina na lalainia. 31 I maꞌedii mei umugina, na lalainia mei umugidiai. Ana aleꞌei aꞌa ei oloromeai. Rona maꞌe ma lomi fuaa roꞌou. 32 Ma ana nawe maꞌe mei pifine. 33 Siꞌei, wagii fei asiꞌana, paꞌaa haroo hini mei pifine, uaa ei oloromeai filofui rona lalainia?”
34 Jesus na ware, “Eni ramaꞌa aꞌa feni au feni, ronafane lalai ma falalai. 35 Maꞌuaa ei rona paꞌi haraa roꞌou ba roꞌaa guta wagii fei au na nomai ma aꞌa fei asiꞌanaa ei maꞌea, lomi ba roꞌaa lalai o falalai 36 ma lomi ba roꞌaa maꞌediai, uaa roꞌou aleꞌei ei aloꞌalo. Roꞌou, naꞌuu mei Haidaa, uaa rona asiꞌaa aꞌa fei maꞌea. 37 Maꞌuaa aleꞌei fei uꞌugaa fei haihai, fei lomi na guꞌa wagii fei hafi, Moses na famaꞌaia ba ei maꞌea, rona asiꞌaa, uaa ina harofaa mei Fasu ba, ‘Haidaniaa Abraham ma Haidaniaa Isaac ma Haidaniaa Jacob.’ 38 Abaa hia Haidaniaa ei maꞌea, uaa ei rona gutaguta, uaa i aꞌana minaa ei, rona gutaguta.”
39 Hefiꞌa feroiaa law, rona ware, “Ona warefarawaninia, mena feroia!” 40 Ma lomi hemea na iꞌigidinia hefiꞌa iꞌigaia.
Mei Christ Naꞌuu Hini?
41 I dii, Jesus na warenaa aꞌa roꞌou, “Tani roꞌaa ware ba mei Christ,c hia naꞌuu David? 42 Te, David anaia na ware aꞌa fei Buꞌuu Lauga:
“‘Mei Fasu na warenaa aꞌa mei Fasuu:
“Guta raudei maꞌau
43 nopaꞌaloo fei ba una augaa ei bidibidii unumu
labenaa pinemu.” ’
44 David na harofia ‘Fasu.’ Batanai ba hia, naꞌuna?”
Jesus na Aweinaa Roꞌou aꞌa ei Feroiaa Law
45 Ei roi guguailao ei ramaꞌa, Jesus na warenaa aꞌa ei otalai nenerana, 46 “Omaꞌaiaa hamuꞌou aꞌa ena feroiaa law. Nunumiaa roꞌou ba roꞌaa tatalai fininaa ei maleaa hawaa uguu roꞌou ma ba ei ramaꞌa, ronei fanunuꞌapaꞌaa roꞌodu fawelei rona aloꞌalo manumanu ma tonaa ei gutanaa ei baua ramaꞌa laloo ei synagogue ma aꞌa ei baua hananaa. 47 Rona faꞌamoaa ei humuu ei pifine maꞌesuabea ma lafulafu famalaa i pudaa ramaꞌa. Ma ei ramaꞌa aleꞌei, roꞌaa paꞌaa fagiana.”