Fei Fanaa mei Pifine Maꞌesuabea
21
I aranaa pafea, Jesus na fanunupaꞌaa ei rona paꞌi watauda mugoo poꞌi, roi augaa ei fanaa roꞌou laloo fei bao mugoo poꞌii humuu mei Haidaa. 2 Ana na fanunupaꞌaa hemea pifine maꞌesuabea, mei lomi na paꞌi mugoo poꞌina na augaa guapaloei paꞌaa pusuꞌo mugoo poꞌi.a 3 Ina ware, “A warefaꞌuai aꞌa hamuꞌou, fei fanaa mei pifine mei, na muainaa ei fanaa minaa ei ramaꞌa. 4 Minaa eni ramaꞌa eni, rona fani aꞌa ei watauda manumanuu roꞌou, maꞌuaa hia na fani aꞌa maꞌidei hia na paꞌi aꞌa fei gutana.” Jesus na Wareaa fei Wataꞌoꞌoaa fei Humuu mei Haidaa
5 Hefiꞌa ei otalai nenerana na fiwarewareinaa ei fananamaiaa mugoo haweraa fei humuu mei Haidaa ma ei fana aꞌa mei Haidaa. Maꞌuaa Jesus na ware, 6 “Tamanu eni fanunupaꞌaa hamuꞌou yeni, iwe nomai fei au ba lomi nepalo mugoo i ude pafoo hepalodiai. Minaa roꞌou i wataꞌoꞌonaa pu.”
Ei Hafeloꞌa Manumanu ma ei Haperaraia
7 Rona iꞌigai, “Feroia, nahaiga roꞌaa nomai ei manumanu ei? Ma tamanu lalana ba roꞌaa nomai?”
8 Ina ware, “Omaꞌaa hamuꞌou ba lomi roꞌaa sifiꞌaa hamuꞌou. Uaa watauda roꞌaa nomai aꞌa fei harau ma ware, ‘Yau, hia,’ ma ‘Na rafiꞌi fei au.’ Hamoneiꞌawe neneraa roꞌou. 9 Ena hamona guainia ba na paꞌi baua fifoꞌaia ma hefiꞌa gufu na paꞌi ei hafeloꞌa na foꞌafipui aꞌa ei bauaniaa gufu, hamoneiꞌaa maꞌau. Ei manumanu ei, idoꞌo nomai maꞌuaa, fei aꞌapoo arewaa loꞌe i nobatafamai.”
10 I dii, ina warenaa aꞌa roꞌou: “Hefaa baua gufu i fifoꞌai aꞌa hepalodiai baua gufu ma hefiꞌa hapara roꞌaa fifoꞌai aꞌa hefiꞌadiai hapara. 11 I paꞌi baua rererea aꞌa feni malagufu, mouabiabia ma hafeloꞌa funua aꞌa hefiꞌa gufu ma hefiꞌa manumanu na famamaꞌau ma hefiꞌa baua hilala i haroo pumanugawe.
12 “Maꞌuaa atawe nomai ei manumanu ei ma roꞌadoꞌo panarofaa hamuꞌou ma haperaraiaa hamuꞌou. Roꞌaa noduginaa hamuꞌou aꞌa ei synagogue ma humuu boboꞌaia, ana roꞌaa faꞌugaa hamuꞌou pudaa ei hapara ma gavaman, uaa fei harau. 13 Ma wagii ei manumanu ei, hamoꞌaa uꞌufanaa roꞌou. 14 Maꞌuaa hamoneidoꞌo narafarawani ba lomi hamoꞌaa naranara watauda ba batanai hamona wareaa pepei aꞌa hamuꞌou. 15 Uaa awe fani warea ma apaꞌaa hamuꞌou ba lomi roꞌaa fadugeia, o fapidawainia. 16 Ana paꞌaa ena ama ma ina ma lofu ma maroa mawe ena tafii hamuꞌodu, ena rowe aloaa hamuꞌou panii ei fadududua ma roꞌaa foꞌafamaꞌeaa hefiꞌa hamuꞌodu. 17 I bidi unuu minaa ei ramaꞌa aꞌa hamuꞌou, uaa yau. 18 Maꞌuaa loꞌe hepalo loaa tabaa hamuꞌodu i paꞌai. 19 Nabaa hamona ofaweꞌi hamoꞌaa to faweweni.
Jesus na Wareaa fei Pasiaa Jerusalem
20 “Ena hamona fanununaa Jerusalem ba rona faweloinia ei foꞌaa, hamowe aida ba na rafiꞌi fei ude halohaloana. 21 Aꞌa fei au fei, ei yei Judea, ronei ponipaꞌainaa aꞌa ei maugeni ma ei aꞌa ei baua gufu, ronei walaꞌaa ma ei yei sugatataꞌaia roneiꞌaa dinaa aꞌa fei baua gufu. 22 Uaa sifei fei au ba i fani lagii ei hafeloꞌa ba nei paꞌaa faꞌuai minaa ei ronadii neꞌinia. 23 Ma aꞌa fei au fei, napaꞌaa famamaꞌau aꞌa ei wareu ma ei roi fasususuu baduu! Iwemina paꞌi baua awataa aꞌa fei gufu ma fei baua sibana i dinaa aꞌa ei ramaꞌa wagina. 24 Roꞌaa maꞌe aꞌa ei wadu ma hefiꞌa ro boboꞌainaa roꞌou aꞌa minaa ei baua gufu. Ei Gentile, roꞌaa hapuniꞌonaa Jerusalem nopaꞌaloo fei au na fapedugaa roꞌou mei Haidaa.
Fei Noramiaa mei Naꞌuu Ramaꞌa
25 “I paꞌi lala aꞌa fei halo, puda mawe ei piꞌu. Yeni ano, ei baua gufu roꞌaa fatemu ma hamamagua wagii fei waniwanina ma memeꞌii unuu fei agi. 26 Ei ramaꞌa roꞌaa maꞌaumemeroi ma naranara watauda aꞌa tamanu fi nomai aꞌa feni ano, uaa ei manumanuu haroo pafea, i taletatata. 27 Aꞌa fei au fei, ropowe fanunupaꞌaa mei Naꞌuu Ramaꞌa fi nomai memewaa hepalo papalei fininaa faufau ma baua hawera. 28 Ena na nomai ei manumanu ei, ufalarai ma aranaa pafea, uaa fei ponohadiweꞌiaa hamuꞌou na rafiꞌi.”
To Feroia aꞌa fei Haihai Figi
29 Ina uꞌufanaa roꞌou feni warea hanunu feni: “Fanununaa fei haihai figi ma hefiꞌadiai haihai. 30 Ena na sunaimai rau roꞌou, hamona fanunuꞌapaꞌia ba fei augai na rafiꞌi. 31 Ana aleꞌei, ena hamona fanunupaꞌaa ei manumanu ei, hamonei aida ba fei au haparaiaa mei Haidaa na rafiꞌi.
32 “A warefaꞌuai aꞌa hamuꞌou ba ei ramaꞌaa feni au feni,b paꞌaa lomi ba roꞌaa maꞌe hawina ba minaa ei manumanu ei na nodigimai. 33 Fei haroo pafea ma feni malagufu i paꞌai, maꞌuaa ei wareau lomi i we paꞌai.
34 “Omaꞌafarawaninaa hamuꞌou. Nabaa loꞌe, ei naranaraa hamuꞌou i faꞌawataia, ei babareia, hunu poapoai ma naranara watauda aꞌa ei manumanuu feni ano ma fei arewaa i nopoponamiaa hamuꞌou. 35 Uaa, i nomai aꞌa ei rona guta aꞌa minaa ei gufu tadiweꞌaia. 36 Ranimai hamonei omaꞌamaꞌa ma lafulafu ba hamoꞌaa telapaꞌi aꞌa tamanu i nomai, ba hamoꞌaa upaꞌi i pudaa mei Naꞌuu Ramaꞌa.”