Fei Warea Hanunuu fei Hananaa Lalaia
22
Jesus na warehanunuidiai aꞌa roꞌou: 2 “Fei haparaia pafea, tawiꞌana aleꞌei hemea hapara, mei na pagipagiaa fei hananaa lalaiaa mei naꞌuna, baduu wawane. 3 Ina aloaa ei nafina ba ronei dinaa aꞌa ei ramaꞌa, ei na wareꞌaudii aꞌa roꞌou ba ronei nomai aꞌa fei hananaa, maꞌuaa rona ware ba lomi ro nomai. 4 “I dii, ina alodinaa hefiꞌa ei nafina ma ware, ‘Ware aꞌa ei una wareꞌaudii aꞌa roꞌou ba una pagiꞌaudigaa fei finei fafi: ei hapeu manulelele ma ei hapeu bauana budumaꞌao, una hawidigaa roꞌou ma minaa ei manumanu namina udedii. Nomai aꞌa fei hananaa.’
5 “Maꞌuaa lomi rona falanaa huoo roꞌou ma rona aunu ua—hemea na dinaa peꞌihapena, hemeadiai aꞌa fei bigiꞌaa mugoo poꞌina. 6 Ma ei dufu, rona patarofaa ei nafii mei hapara ma haperararaiaa roꞌou ma foꞌafamaꞌeaa roꞌou. 7 Ma mei hapara na sibafafelo. Ina aloaa ei ramaꞌaa foꞌaa ma ronaree foꞌafamaꞌepedugaa ei ramaꞌa, ei roꞌaa foꞌafamaꞌeaa ei nafina ma faguꞌaa ei gufuu roꞌou.
8 “Siꞌei na ware aꞌa ei nafina, ‘Fei hananaa lalaia na udedii maꞌuaa, ei una waredii aꞌa roꞌou ba ronei nomai, lomi na rawani ba roꞌaa nomai. 9 Aununaa maꞌaa tala ma ware aꞌa hini eꞌena hamona bapaꞌaa roꞌou ba ronei nomai aꞌa feni hananaa.’ 10 Siꞌei, ei nafi, rona aununaa maꞌaa tala ma dugamiaa minaa ei bapaꞌaa roꞌou, ei rawaniꞌa mawe ei hafeloꞌa ma fei humuu hananaa namina horo.
11 “Maꞌuaa iꞌa waduꞌaimai mei hapara ba imii maꞌa ei ramaꞌaa hananaa, na fanunupaꞌaa hemea lomi na rafeaa fei susuu lalai. 12 Ina iꞌigai, ‘Otafi, ona waduꞌaibatanaimai yeni ma lomi susumu susuu lalaia?’ Lomi na wareware mei ramaꞌa.
13 “Siꞌei mei hapara na ware aꞌa ei paniaa panina, ‘Faroroꞌinaa panina ma pinena ma suminia ano laloo fei roromaa, fei na paꞌi aiꞌaiga ma fiꞌuꞌuiaa difo.’
14 “Una lalaꞌaa watauda maꞌuaa, maꞌida ua rafeiau.”
Fani Mugoo Poꞌi aꞌa Caesar
15 Ma ei Pharisee, rona aununaranara ba batanai rona sifiꞌia ba inei warefatata. 16 Rona alonaa i aꞌana ei otalai neneraa roꞌou mawe ei maroaa Herod. Ma rona ware, “Mena feroia, haiꞌouna aida ba yoi hemea wanewanea ramaꞌa ma onaꞌo feroinaa fei maumau mei Haidaa, fei na neneraa tamanu na wanewane. Lomi ona falanaa huomu ei wareaa ramaꞌa, uaa lomi ona nara ba roꞌou hini. 17 Siꞌei ba onei warefanaa haiꞌou fei naranaramu. Ina wanewane ba o fani mugoo poꞌi aꞌa Caesar, o lomi?”
18 Maꞌuaa Jesus na aidadii fei hafeloꞌa ba roꞌaa bigiꞌia ma na ware, “Hamuꞌou ena wareꞌoni, tamanu paꞌafina ba hamoꞌaa sifiꞌau ba unei warefatata? 19 Famaꞌau fei mugoo poꞌi, fei ronaꞌo fanaa gavaman.” Rona tonamai aꞌana hepalo denarius, 20 ma ina iꞌiginaa roꞌou, “Hanunuu hini feni? Ma neꞌiaa hini?”
21 Rona ware ba, “Caesar.”
Ma na warefanaa roꞌou, “Fanaa Caesar tamanu ei manumanuu Caesar ma fanaa mei Haidaa tamanu ei manumanuu mei Haidaa.”
22 Roꞌaa guainaa fei, ronamina baꞌarofo. Siꞌei, rona diꞌininia ma aunu.
Lalaia wagii Fei Au Asiꞌanaa Maꞌea
23 Ana fei arewaa fei, ei Sadducee, ei rona ware ba lomi asiꞌana, rona nomai aꞌana aꞌa hepalo iꞌigaia. 24 Rona ware, “Mena feroia, Moses nadii warefanaa oꞌou ba nabaa nemea wawane na maꞌe ma lomi naꞌuna, mei lofuna nei lalainaa mei harona ba nei paꞌi naꞌuu mei lofuna, mei na maꞌe. 25 Ma nabaa na paꞌi oloromeai filofui aꞌa oꞌou ma mei umaꞌua na lalai ma na maꞌe ma siꞌei ba lomi naꞌuna, mei harona na lalainaa mei umugina. 26 Ana aleꞌei aꞌa mei umugina ma mei umugii mei umugina, mina aleꞌei nopaꞌaloo mei faꞌoloromeiaiaa roꞌou. 27 I dii, nawe maꞌe mei pifine. 28 Siꞌei, wagii fei au asiꞌana, haroo hini, mei pifine mei, uaa minaa roꞌou, rona lalainia?”
29 Jesus na ware, “Hamona tata, uaa lomi hamona aida fei Buꞌu Apuna, o fei faufau mei Haidaa. 30 Wagii fei au asiꞌanaa ei maꞌea, lomi lalaia, o falalaia; ei ramaꞌa, ro aleꞌei ei aloꞌalo pafea. 31 Maꞌuaa wagii fei asiꞌanaa ei maꞌea, lomi hamona igoaa tamanu mei Haidaa na wareia aꞌa hamuꞌou ba, 32 ‘Yau, mei Haidaniaa Abraham, mei Haidaniaa Isaac ma mei Haidaniaa Jacob’? Hia, abaa Haidaniaa ei maꞌea, uaa Haidaniaa ei rona paꞌi fawewenii roꞌou.”
33 Roꞌaa guainaa fei ei gupuu ramaꞌa, ronamina maduofo aꞌa ei feroiana.
Fei Wareaa mei Haidaa namina Mua
34 Roꞌaa guainia ba Jesus na fababaniniaa ei Sadducee, ei Pharisee, rona figupui. 35 Hemea roꞌou, hemea napaꞌaa apaꞌaa fei law na mania aꞌa feni iꞌigaia feni: 36 “Mena feroia, tamanu fei wareaa mei Haidaa laloo fei Law namina mua?”
37 Jesus na ware, “‘Haguaa mei Fasu, mei Haidaniamu fininaa minaa ei naranaramu ma minaa ei faufaumu ma minaa ei apaꞌamu.’ 38 Sifei, fei rawarawa wareaa mei Haidaa, fei namina mua. 39 Ma fei faguapaloana, ana aleꞌei: ‘Haguaa mei gufumu ana aleꞌei ona haguio.’ 40 Minaa ei Law ma ei Mamamaꞌa, rona urofaa guapaloei wareaa mei Haidaa.”
Mei Christ, Hia Naꞌuu Hini?
41 Roꞌaa gutafipui ei Pharisee, Jesus na iꞌiginaa roꞌou, 42 “Tamanu ei naraa hamuꞌou aꞌa mei Christ?a Hia, naꞌuu hini?”
Rona ware ba, “Hia naꞌuu David.”
43 Ina warefanaa roꞌou, “Nabaa aleꞌei, tani ei ba David, wagii fei faufau fei Spiriti na roroinia ‘Fasu’? Uaa ina ware,
44 “‘Mei Fasu na warenaa aꞌa mei Fasuu:
“Guta i pepei maꞌauu
nopaꞌaloo fei una aunaa ei bidibidii unumu
haroo pinemu.” ’