3 “Nopaꞌaloo faimpalo idoꞌo, ina aunu ma fanunupaꞌaa hefiꞌadiai rona u i humuu aloꞌalo, lomi bigiꞌaa roꞌou. 4 Ina warenaa aꞌa roꞌou, ‘Ana hamoneiree bigi wagii fei peꞌihapeu ma awe fawanewaneaa ei ponoꞌaa hamuꞌou.’ 5 Siꞌei, rona dii.

“Ina aunudiai haloaina ma fei faꞌoduaiaa idoꞌo ma bigiꞌia ana aleꞌei. 6 I nopaꞌaloo haipani idoꞌo, na aunu ma fanunupaꞌaa hefiꞌadiai, ana roꞌei ufalarai ua. Ina iꞌiginaa roꞌou, ‘Tani hamuꞌou ufalarai ua yeni minaa feni arewaa feni ma lomi hamona bigiꞌaa hepalo manumanu?’

7 “Rona ware, ‘Hamatee lomi hemea na ponoꞌaa haiꞌou.’

“Ina warenaa aꞌa roꞌou, ‘Ana hamoneiree bigi wagii fei peꞌihapeu.’

8 “I nororolao, mei amaa fei peꞌihape na warenaa aꞌa mei paniaa panina, ‘Apainamii ena bigibigiꞌa ma fani ponoꞌaa roꞌou. Doꞌo ponoꞌaa ei we noramiaa roꞌou ma nene, ei rawarawa.’

9 “Ei bigibigiꞌa ronaꞌaa bigi aꞌa fei haipani idoꞌo, hememea roꞌou na tonaa hepalo denarius. 10 Siꞌei, ei rawarawa bigiꞌa, rona nara ba i bauanadiai ponoꞌaa roꞌou. Maꞌuaa hememea roꞌou, ana na tonaa hepalo ua denarius. 11 Roꞌaa todigia, rona bababauꞌu aꞌa mei amaa fei peꞌihape. 12 Rona ware, “Eꞌei ramaꞌa we fabigiꞌuamu nene, lomi rona bigifamadii ma ponoꞌaa roꞌou, fiminaꞌei aleꞌei haiꞌou ma haiꞌounamina bigifatemu haroo fei baua halo.’

13 “Maꞌuaa ina warefanaa hemea roꞌou ba, ‘Otafi, lomi una bigifatata aꞌamu. Haa, lomi ba onadoꞌo uga ba ponoꞌamu, hepalo denarius? 14 Tonaa fei ponoꞌamu ma aunu. Una nunuminia ba ponoꞌaa mei aꞌapoo dugamiau, i fiminaꞌei aꞌa fei ponoꞌamu. 15 Haa, lomi na wanewane ba una bigiꞌaa tamanu nunumiau aꞌa ei mugoo poꞌiu? O, yoi, ona punepune hamatee yau, una baubaurawani?’

16 “Siꞌei ba mei i nomai nene, iwe dinaa maꞌa ma mei i nomai maꞌa i dinaa nene.”

17 Ei fitalaidinaa Jerusalem, Jesus na dugitataꞌainaa ei hefua ma helagui otalai nenerana ma warenaa aꞌa roꞌou, 18 “Oꞌou, oa dinaa Jerusalem ma mei Naꞌuu Ramaꞌa, roꞌaa aloia panii ei famamoaa humuu mei Haidaa mawe ei feroiaa law. Rowe ware ba inei maꞌe 19 ma rowe fifaninia panii ei Gentile ba roꞌaa hapepeinia, babuinia ma fatawaia. Ma wagii fei faꞌoduaiaa arewaa iwe asiꞌatodiai harenuana!”

20 I dii, mei inaa laguei naꞌuu Zebedee na nofipuimai aꞌa ei naꞌuna, dinamii aꞌa Jesus, faꞌunaa duꞌuna ma iꞌiginia hepalo nunumiana.

21 Ma Jesus na iꞌiginia, “Tamanu fei nunumiamu?”

Ina ware, “Uga ba hemea lagueni naꞌuu i guta pepei maꞌaumu ma hemea mauwimu wagii fei haparaiamu.”

22 Jesus na warefanaa roꞌou, “Lomi hamona aida ba tamanu hamoꞌei iꞌiginia. Hamoꞌaa hunupaꞌi aꞌa fei bara ba a hunumia?”

Rona ware ba, “Haiꞌou hunupaꞌi.”

23 Jesus na warenaa aꞌa roꞌou, “Paꞌaa faꞌua ba hamoꞌaa hunu aꞌa fei barau maꞌuaa, fei ba hini ba i guta i pepei maꞌauu, o mauwiu, abaa yau mei ba a ugainia. Ei gutana ei, pagiꞌaugaa mei Amau, gutanaa ei di rafeiana.”

24 Roꞌaa guainaa fei ei hefua, ronamina siba aꞌa laguei filofui. 25 Jesus na harofipuinaa roꞌou ma ware, “Hamona aida ba ei bauaniaa ei Gentile, rona fasuinaa ana roꞌou mawe ei paniaa panii roꞌou, rona paꞌi foraforaa roꞌou aꞌa ei ramaꞌa. 26 Abaa aleꞌei aꞌa hamuꞌou. Agia, hini ba hia bauana aꞌa hamuꞌou, nei aleꞌei nafii hamuꞌou 27 ma hini ba i rawarawa nei aleꞌei humuwaa hamuꞌou— 28 ana aleꞌei ba mei Naꞌuu Ramaꞌa, abaa ei i nomai ba ei ramaꞌa, ronei nafii aꞌana maꞌuaa, ba i nafii aꞌa roꞌou ma ba i fanaa fei harenuana aleꞌei ponoꞌaa watauda.”

29 Jesus ma ei otalai nenerana, ba roꞌaa diꞌininaa Jericho, hefaa baua gupuu ramaꞌa, rona nenegia. 30 Helagui pudawerai, laguna guta i papaa fei tala ma laguꞌaa guainia ba Jesus fi falogilao nanaꞌaa lagua, laguna haroharo, “Mena Fasu, mena Naꞌuu David, faloloaꞌinaa haigua!”

31 Fei gupuu ramaꞌa na warefasiba aꞌa lagua ba lagunei babanini maꞌuaa, laguna haropararai apoidiai, “Mena Fasu, mena Naꞌuu David, faloloaꞌinaa haigua!”

32 Jesus na u ma na haroꞌiꞌiginaa lagua, “Tamanu nunumiaa hamugua ba a bigiꞌia aꞌa hamugua?”

33 Laguna ware, “Mena Fasu, ba haiguꞌaa fanunupaꞌi.”

34 Jesus na faloloaꞌinaa lagua ma na idoaa pudaa lagua. Ana ei ua, laguna fanunupaꞌi ma nenegia.