3 Hefiꞌa Pharisee, rona nomai aꞌana ba roꞌaa mania. Rona iꞌigai, “Na wanewane aꞌa fei law ba nemea wawane i fiꞌalagii aꞌa mei harona ma lomi rawaniꞌaa paꞌafina?”

4 Ina ware, “Haa, lomi hamona igoia ba famaꞌa, mei Famamaraia na bigiꞌaa lagua ‘wawane ma pifine,’ 5 ma ware ba, ‘Sifei, fei paꞌafina ba nemea wawane nei diꞌininaa amana ma inana ma gutafipui aꞌa mei harona ma laguwe pigioinaa hepalo’? 6 Siꞌei, aꞌa ba lagua fai helagui, uaa hemea. Siꞌei, tamanu na fihupuꞌinia mei Haidaa, nemea neiꞌaa alagia.”

7 Rona iꞌigai, “Nabaa faꞌua, tani i ware Moses ba nemea nei fani hepalo neꞌiaa fiꞌalagia ma alofatalainia?”

8 Jesus na ware, “Moses na ugainia ba hamoꞌaa diꞌininaa ei haroo hamuꞌou hamatee namina waiwai tabaa hamuꞌou. Maꞌuaa doꞌofamaꞌa abaa aleꞌei. 9 A warefanaa hamuꞌou ba hini i diꞌininaa mei harona ba i lalaidiai ma mei harona lomi na fiharoharoipaꞌai, mei ramaꞌa mei, na bigiꞌaa fei fiharoharoipaꞌaia.

10 Ei otalai nenerana, rona ware, “Nabaa aleꞌei aꞌa hemea wawane ma mei harona, ina rawani ba lomi lalalaia.”

11 Jesus na ware, “Abaa minaa ei ramaꞌa, roꞌaa tonaa fei warea fei, uniaa ei una fanaa roꞌou. 12 Uaa hefiꞌa, lomi ba roꞌaa lalai, uaa rona waninimai aleꞌei ma hefiꞌadiai, ei ramaꞌa na morosiminaa wawanei roꞌou ba aleꞌei ma hefiꞌadiai, rona ware ua ba lomi roꞌaa lalai^a uaa rona naranaraꞌuaiaa fei haparaia pafea. Mei ba na rawani aꞌana, inei tonia.”

13 I dii, rona duginamii aꞌa Jesus ei pusuꞌo baduu ba nei augaa panina pafoo roꞌodu ma lafulafunaa roꞌou. Maꞌuaa ei otalai nenerana, rona pauninaa ei rona dugamii roꞌou.

14 Jesus na ware, “Fanoramiaa ei baduu pusuꞌo i aꞌau ma apuna lawaraa roꞌou, uaa fei haparaia pafea, manumanuu ei aleꞌeni eni.” 15 Iꞌa audigaa guei panina pafoo roꞌou, ina diꞌininaa fei gufu fei.

16 Ma hemea na nomai aꞌa Jesus ma na iꞌigai, “Feroia, a bigiꞌaa tamanu rawaniꞌa manumanu ba a tonaa fei harenua lomi i pedutoo?”

17 Na ware Jesus, “Tani o iꞌiginau ba tamanu na rawani? Unaa Hemea ua na rawani. Nabaa o nunumiai ba oꞌaa waduꞌaitonaa harenuamu, onei neneraa ei law mei Haidaa.”

18 Ina iꞌigai, “Tamanu ei?”

Jesus na ware, “‘Apuna foꞌafamaꞌe, apuna fiharoharoipaꞌai, apuna fafanao, apuna warefasifi, 19 maꞌauaa amamu ma inamu,’^b ma ‘haguaa mei gufumu aleꞌei onaꞌo haguio.’”

20 Mei baubara na ware, “Minaa ena, unamina nenegidigia. Tamanudiai fei lomi una bigiꞌia?”

21 Jesus na ware, “Nabaa ona nunuminia ba oꞌaminaa fafaꞌarai, wi aloaa ena manumanumu ma fanaa ei lomi manumanuu roꞌou ma owe paꞌi manumanumu i pafea. Nenee fei, mi nenerau.”

22 Iꞌa guainaa fei mei baubara, ina aunufaloloaꞌilao, uaa na paꞌi watauda manumanuna.

23 I dii, Jesus na warenaa aꞌa ei otalai nenerana, “A warefaꞌuai aꞌa hamuꞌou ba namina waiwai ba nemea na paꞌi watauda mugoo poꞌina i waduꞌainaa fei haparaia pafea. 24 A warediai ba na madutainaa fei camel ba i waduꞌainaa fei maꞌahiꞌu laraa fei ba nemea na paꞌi watauda mugoo poꞌina i waduꞌainaa fei haparaiaa mei Haidaa.”

25 Roꞌaa guainaa fei ei otalai nenerana, ronamina hawainaa poaa roꞌou ma iꞌigai, “Nabaa aleꞌei, hini ba i tela?”

26 Jesus na fanunulao aꞌa roꞌou ma ware, “Aꞌa ramaꞌa lomi na maꞌatalaa, maꞌuaa aꞌa mei Haidaa minaa ei manumanu na maꞌatalaa.”

27 Peter na warenaa aꞌana, “Haiꞌouna diꞌininaa minaa ei manumanuu haiꞌou ba haiꞌou nenegio! Siꞌei, haiꞌouꞌaa tonaa tamanu?”

28 Jesus na warenaa aꞌa roꞌou, “A warefaꞌuai aꞌa hamuꞌou ba aꞌa fei au ba i manufaudiai minaa ei manumanu, ena na guta fininaa ei hawerana mei Naꞌuu Ramaꞌa pafoo gutanaa mei hapara, hamuꞌou ena hamona nenerau, ana hamowe guta pafoo ei hefua ma guapalo gutanaa ei hapara ma dududuaa ei hefua ma guapalo pai Israel. 29 Ma hini ei rona diꞌininaa ei humu, o lofu, o agi, o ama ma ina,^c o naꞌu, o peꞌihape uaa yau, rowe to aleꞌei hefa puꞌudiai ma ropowe tonaa fei harenua lomi i pedutoo. 30 Maꞌuaa watauda ei rona nomai nene, rowe dinaa maꞌa ma ei ro nomai maꞌa ro dinaa nene.