Fei Warea Hanunuu mei Pifine na Ofasisia
18
Ma Jesus na uꞌufanaa ei otalai nenerana hepalo warea hanunu i famaꞌaiaa roꞌou ba ranimai ronei lafulafu ma roneiꞌaa rawaꞌaꞌafai. 2 Ina ware: “I aꞌa hepalo gufu na paꞌi hemea fadududua lomi na maꞌauaa mei Haidaa o ramaꞌa. 3 Ma na paꞌi hemea pifine maꞌesuabea, mei na u noꞌualao ma wareꞌaiꞌai aꞌa mei fadududua ba, ‘Fawanewaneaa pafoo haigua mei na bidibidi ununa aꞌau.’ 4 “Mina figa iꞌigiana ma lomi na ugainia. Maꞌuaa inawe nara, ‘Faꞌua ba lomi una maꞌauaa mei Haidaa o ei ramaꞌa, 5 maꞌuaa siꞌei ba meni pifine meni, namina fahauaa unuu, hee, unei paꞌaa fawanewaneia ma lomi i fai famatapuaa unuu!’”
6 Ma na ware mei Fasu ba, “Hamonei guainaraiaa ei wareaa mei fadududua, mei lomi na wanewane. 7 Ma nabaa aleꞌei, naraa hamuꞌou ba lomi i fawanewaneaa ei manumanu wagii eꞌei rafeiana mei Haidaa, eꞌei rona aiꞌainaa aꞌana arewaa ma poi? Ana hamona nara ba i ofadugiꞌuaiaa roꞌou? 8 A warefanaa hamuꞌou, iwe fawanewane batafainaa ei pidawaiaa roꞌou. Maꞌuaa ena na nomai mei Naꞌuu Ramaꞌa, ana i maꞌapaꞌi ramaꞌa na narafaweꞌi yeni malagufu?”
Fei Warea Hanunuu mei Pharisee ma mei Otonaa Mugoo Poꞌii Gavaman
9 Ma aꞌa feni warea hanunu feni, Jesus na uꞌugaa hefiꞌa rona oꞌugaa fei wanewaneaa ana roꞌou ma ba hefiꞌadiai, rona hafelo: 10 “Helagui ramaꞌa, laguna tafanewaduꞌainaa humuu mei Haidaa ba laguꞌaa lafulafu. Hemea lagua, hia Pharisee ma hemea, otonaa mugoo poꞌii gavaman. 11 Mei Pharisee na ufalarai ma lafulafu ba hia batanai,a ‘Mena Haidaa, a ware ‘ta’ aꞌamu ba yau, abaa aleꞌei hefiꞌa ramaꞌa—ei fafanao, ei na bigiꞌaa ei hafeloꞌa, ei fiharoharoipaꞌaia, o aleꞌeni meni otonaa mugoo poꞌii gavaman. 12 Unaꞌo fabao aleꞌei guapoa laloo heai hafapagipagia ma naꞌaida au hepalo aꞌa hefua wagii minaa ei finefineu.’
13 “Maꞌuaa mei otonaa mugoo poꞌii gavaman na ufaraua. Ana lomi na aranaa pafea, maꞌuaa na warehafugaa niniwaina, ‘Mena Haidaa, faloloaꞌinau, yau meni hafeloꞌa.’
14 “A warefanaa hamuꞌodu ba mei ramaꞌa mei, na hadiweꞌinaa humuna ma na wanewane i pudaa mei Haidaa laraa mei Pharisee. Uaa hini i poronaa hia pafea, i oanaa pu ma hini i fafafaunaa hia pu, i oanaa pafea.”
Ei Pusuꞌo Baduu ma Jesus
15 Ei ramaꞌa roi dugaloo ei pusuꞌo baduu aꞌa Jesus ba nei idoaa roꞌou. Roꞌaa fanunuia ei otalai nenera, rona hotaꞌaa roꞌou. 16 Maꞌuaa Jesus na harofamii ei baduu aꞌana ma ware, “Faꞌaunuamii ena baduu aꞌau ma apuna pauniaa roꞌou, uaa fei haparaiaa mei Haidaa, paꞌaa manumanuu eni baduu aleꞌeni. 17 A warefaꞌuai aꞌa hamuꞌodu ba hini lomi i tonaa fei haparaiaa mei Haidaa aleꞌei ei baduu, paꞌaa lomi iwe waduꞌai lalona.”
Mei Bauana na Watauda Mugoo Poꞌina
18 Na paꞌi hemea bauana na iꞌiginia, “Mena rawaniꞌa feroia, a bigiꞌaa tamanu ba a to harenua lomi i pedutoo?”
19 Jesus na ware, “Tani o ware ba yau rawaniꞌa? Lomi hemea na rawani. Paꞌaa unaiaa mei Haidaa ua. 20 Yoi na apaꞌidigaa fei law: ‘Oneiꞌaa fiharoharoipaꞌai, foꞌafamaꞌe, fafanao, fanaa fei sifisifi uꞌuga aꞌa nemea ma onei maꞌauaa amamu ma inamu.’”
21 Ina ware, “Minaa ena na fanimaꞌaia ei ui badui nopaꞌamii wagieni.”
22 I guainaa fei Jesus, na warenaa aꞌana, “Dufudiamu hepalo manumanu. Aloaa minaa ena ona paꞌi ma fanaa ei lomi rona paꞌi. Ma owe paꞌi manumanumu i pafea. Nenee fei, mi nenerau.”
23 I guainaa fei, namina faloloaꞌi, uaa na watauda manumanuna. 24 Jesus na fanununaa aꞌana ma ware, “Na mina waiwai aꞌa ei na paꞌi watauda manumanu ba roꞌaa waduꞌainaa fei haparaiaa mei Haidaa! 25 Hiꞌi, na madutainaa fei camel ba i waduꞌainaa fei walawalaa fei tawi laraa mei na paꞌi watauda manumanu ba i waduꞌainaa fei haparaiaa mei Haidaa.”
26 Eꞌei roꞌaa guainaa fei, rona iꞌigai, “Hama paꞌaa hini i tela?”
27 Jesus na ware, “Tamanu lomi na maꞌatalaa aꞌa ramaꞌa na maꞌatalaa aꞌa mei Haidaa.”
28 Peter na warenaa aꞌana, “Haiꞌouna diꞌininaa minaa ei haiꞌouna paꞌi ba haiꞌou nenegio!”
29 Jesus na warenaa aꞌa roꞌodu, “Apaꞌaa warefaꞌuai aꞌa hamuꞌodu. Hini i diꞌininaa gufuna, o harona, o lofuna, o amana ma inana, o naꞌuna uaa fei haparaiaa mei Haidaa, 30 i tonaa wataudadiai wagii feni au feni ma wagii fei au i nomai, i tonaa fei harenua lomi i pedutoo.”
Jesus Nadii Wareꞌaugaa fei Maꞌeana
31 Jesus na dugitataꞌainaa ei hefua ma helagui ma warefanaa roꞌou, “Oꞌou, o aununawii Jerusalem ma minaa ei neꞌiaa ei mamamaꞌa mei Naꞌuu Ramaꞌa, ipowe faꞌuai. 32 Roꞌaa fifaninia panii ei Gentile. Ma roꞌaa warefafeifeinia, warefafeloia, huwia, babuinia ma foꞌafamaꞌeia. 33 Ma aꞌa fei faꞌoduiaa arewaa, iwe asiꞌadiai.”
34 Ei otalai nenera, lomi rona apaꞌifarawaninaa fei. Fei hanuna na udeꞌopaꞌai aꞌa roꞌodu. Ma lomi rona apaꞌaa tamanu fi wareia.
Mei Noinoi Pudawerai na Fanunupaꞌi
35 I nofarafiꞌinaa Jericho Jesus, hemea pudawerai na guta noinoi papaa tala. 36 I guainaa fei gupuu ramaꞌa roi nolao, na iꞌigai ba tamanu fei. 37 Rona warefania, “Jesus, mei Nazareth fi nolao.”
38 Ina haroharo, “Jesus, mena Naꞌuu David, poꞌo faloloaꞌinau!” 39 Ei rona talailao maꞌa, rona hotaꞌia ma ware aꞌana ba nei babanini. Maꞌuaa, namina haropararai ua, “Mena Naꞌuu David, poꞌo faloloaꞌinau!”
40 Jesus na u ma ware ba ronei dugiamai aꞌana. I nofarafiꞌimai, Jesus na iꞌiginia, 41 “Tamanu nunumiamu ba a bigiꞌia aꞌamu?”
Ina ware, “Mena Fasu, nunumiau ba a fanunupaꞌi.”