“Nabaa na pasi aꞌa ei hafeloꞌa mei lofumu, warefaweꞌi aꞌana ma nabaa i filoginaa naranara, onei futoaa ei hafeloꞌana.” 4 Nabaa i bigiꞌaa olorompalo tata aꞌamu laloo heai arewaa ma na hadiweꞌimai olorompalopoa aꞌamu ma ware, ‘Na filoginaa naranarau,’ onei futoaa ei hafeloꞌana.”

5 Ei apostle, rona warenaa aꞌa mei Fasu, “Fagipeaa fei weꞌiaa naranaraa haiꞌou!”

6 Ina ware, “Nabaa namina pusuꞌo aleꞌei lau mustard ei weꞌiaa naranaraa hamuꞌou, hamoꞌaa warenaa aꞌa feni baua haihai mulberry, ‘Onei afue ma wi pasi agi,’ ma i guainaa hamuꞌou.

7 “Nabaa hemea hamuꞌou na paꞌi nafina, mei fi bigi peꞌihape, o omaꞌaa ei sipsipi, ana i ware aꞌa mei nafi ei na baguamai podu ba, ‘Nomai, mi gutahanana’. 8 O i ware aꞌana ba, ‘Babagifani hanau, wi nunuu, mi hasufani hanau ma tofanimai numau ma nenee fei, wi hanana ma hunu’. 9 Ana lomi i ware ‘ta’ aꞌa mei nafi uaa ina bigiꞌaa tamanu wareana ba nei bigiꞌia. 10 Ma hamuꞌou ana aleꞌei. Ena hamona bigiꞌaa minaa ei manumanu, ei hamona guainia ba hamonei bigiꞌia, hamonei ware, ‘Haiꞌou, nafi ua. Haiꞌou bigiꞌuaiaa ei bigiꞌaa haiꞌou.’”

11 Ifi tatalailao dinaa Jerusalem, Jesus na neneraa fei tala watolaa Samaria ma Galilee. 12 Ifi aunulao aꞌa hepalo gufu, hefua watawatai^a na uꞌomaꞌaia. Rona ufaraua 13 ma harofabauanamai, “Jesus, mena Fasu, faloloaꞌinaa haiꞌou!”

14 I fanunupaꞌaa roꞌou na ware, “Nowau, wi famaua aꞌa ena bauaniaa humuu mei Haidaa.” Ma ei roi talailao nawe fafaꞌarai hudi unuu roꞌou.

15 Hemea roꞌou, i fanunuia ba fei hudi ununa na fafaꞌarai, na hadiweꞌilao ma warefabauana ma uduginaa mei Haidaa. 16 Ina fapasi igoaa Jesus ma ware ‘ta’ ma hia, hemea Samaria.

17 Jesus na iꞌigai, “Abaa roꞌou hefua namina fafaꞌarai? Ma roꞌou hitani, ei faimemea? 18 Lomi hemea roꞌou i hadiweꞌimai ma uduginaa mei Haidaa? Ana simeni ua, meni hepapa gufu?” 19 Siꞌei, na warenaa aꞌana, “Asiꞌaꞌaunu; fena weꞌiaa naranaramu na farawaninio.”

20 Hefarani, ei Pharisee na iꞌiginia ba nahaiga i nomai fei haparaiaa mei Haidaa. Jesus na ware, “Fei haparaiaa mei Haidaa, loꞌe ba hamuꞌou fanunupaꞌia ba na nodigimai 21 ma ana lomi ro ware ei ramaꞌa ba ‘Oo sifeni, na ude yeni,’ o ‘Sifei yei,’ uaa fei haparaiaa mei Haidaa na ude i laloo iaa^b hamuꞌou.”

22 Ma na warenaa aꞌa ei otalai nenerana, “I nomai fei au ba hamowe nunuminaa hepalo ei arewaa mei Naꞌuu Ramaꞌa, maꞌuaa lomi hamowe fanunupaꞌia. 23 Roꞌaa warefanaa hamuꞌodu ei ramaꞌa ba ‘Simei. Hia, yei!’ o ‘Simeni. Hia, yeni!’ Apuna ponineneraa roꞌou. 24 Uaa mei Naꞌuu Ramaꞌa aꞌa fei arewana,^c hia aleꞌei fei usida, fei na usidai ma faweꞌainaa fei pumanugawe fipepei amaꞌanaa fipepei. 25 Maꞌuaa neidoꞌo tonaa watauda fiꞌina ma ei ramaꞌaa feni au feni ro ofadugia.

26 “Fei au Noah ana aleꞌei fei au mei Naꞌuu Ramaꞌa. 27 Ei ramaꞌa, rona hanana, hununu, lalai ma falalai nopaꞌaloo fei arewaa ba Noah na waduꞌainaa fei baua wa. Ma fei mamaua suwela nawe nomai ma fawawauꞌumaꞌeaa minaa roꞌodu.

28 “Ana aleꞌei aꞌa fei au Lot. Ei ramaꞌa, rona hanana, hununu, ponopono, aloꞌalo, farofaro duꞌua ma fadufadu. 29 Maꞌuaa fei arewaa i diꞌininaa Sodom Lot, fei hafi ma ei babaiaa mugoo na pasirai pumanugawe ma sidafamaꞌeaa minaa roꞌodu.

30 “Ana i aleꞌei aꞌa fei arewaa na faꞌarewa mei Naꞌuu Ramaꞌa. 31 Aꞌa fei arewaa fei, nabaa nemea i pafoo humuna, ineiꞌaa upu ba i waduꞌainaa humuna ba i to manumanuna. Ana aleꞌei, nabaa nemea yei peꞌihapena, ineiꞌaa bagua ba i to hepalo manumanu. 32 Hamonei nonominaa mei haroo Lot! 33 Uaa hini ba i fatelaiaa fei fawewenina, i paꞌai aꞌana, maꞌuaa hini i fapaꞌainaa fei fawewenina aꞌau, i tohadiweꞌidinia. 34 A warefanaa hamuꞌodu ba i aꞌa fei poi fei, helagui ramaꞌa, laguꞌawe haino pafoo tawa. Hemea i apaꞌai ma hemea ana yei. 35 Helagui pifine, laguꞌaa uꞌufipui grain; hemea i apaꞌai ma hemea ana yei.” 36\f + \fr 17:36 \ft Hefiꞌa neꞌia ana yei. 36 Helagui wawane, lagua peꞌihape; hemea i apaꞌai ma hemea ana yei.\f*

37 Rona iꞌigai, “Yei hitani, mena Fasu?”

Ina ware, “Hitani na paꞌi maꞌea, yei ei roꞌudo, roꞌaa hoania.”