2 Ina harofaa hemea pusuꞌo baduu ma faꞌufalarainia dupuaa roꞌou. 3 Ma ina ware, “A warefaꞌuai aꞌa hamuꞌou, nabaa lomi hamoꞌaa filoginaa maumau hamuꞌou aleꞌei ei pusuꞌo baduu, paꞌaa lomi ba hamoꞌaa waduꞌinaa laloo fei haparaia pafea. 4 Siꞌei hini i fafafaunaa anaia pu aleꞌeni meni baduu meni, hia i pafeai laloo fei haparaia pafea.

5 “Ma aꞌa fei harau, hini i taufagutanaa nemea pusuꞌo baduu aleꞌeni meni, ina taufagutanau.

6 “Maꞌuaa, nabaa nemea i fapasiaa nemea eni pusuꞌo baduu, eni na weꞌi naranaraa roꞌou aꞌau, na rawani ba mei ramaꞌa mei, hepalo baua mugoo nei habe huana ma re famomogu lama roroma.

7 “Na fagiana feni ano uaa na fafeloaa ei ramaꞌa. Ei manumanu aleꞌei, i nomai, maꞌuaa na fagiana mei i nomai aꞌana! 8 Nabaa fei panimu o pinemu na fafeloio, balaisiminia. Ina rawani ba o waduꞌaitonaa harenuamu fininaa latoaa panimu o pinemu laraa fei ba ona paꞌi guapalo pani ma pine ma i siminio laloo fei hafi lomi i peretoo. 9 Ma nabaa fei pudamu na fafeloio, walesiminia. Ina rawani ba o waduꞌaitonaa harenuamu aꞌa hepalo ua puda laraa fei ba ona paꞌi guapalo puda ma i siminaa yoi fei hafii gufu hafelo.

10 “Omaꞌamaꞌaa hamuꞌou ba lomi hamona fanunufafelo aꞌa nemea eni pusuꞌo baduu eni. Uaa uꞌei warefanaa hamuꞌou ba ranimai, ei aloꞌalo pafea, ei omaꞌaa roꞌou, rona fanunuaa fei pudaa mei Amau i pafea. 11\f + \fr 18:11 \ft Hefiꞌa neꞌia ba gufu pafea. 11 Mei Naꞌuu Ramaꞌa na nomai ba i fatelaꞌanaa fei na paꞌai.\f*

12 “Tamanu naraa hamuꞌou? Nabaa nemea na paꞌi hefa puꞌu sipsipi ma hepalo na lelepaꞌai, haa, lomi i diꞌininaa ei faimfua paꞌania ma faimpalo pafoo maugeni ma re labaginaa fei na lelepaꞌai? 13 Ma nabaa i labagipaꞌia, a warefaꞌuai aꞌa hamuꞌou ba imina niꞌeniꞌe aꞌa fei laraa ei faimfua paꞌania ma faimpalo lomi rona lelepaꞌai. 14 Ana aleꞌei, mei Amaa hamuꞌou i pafea, lomi na nunumiai ba nemea eni pusuꞌo baduu eni i paꞌai.

15 “Nabaa mei lofumu i bigifatata aꞌamu,^a dinaa aꞌana ma famaꞌaiaa fei tatana, uniaa hamugua ua. Nabaa i guainio, te, lomi watolaa hamugua. 16 Maꞌuaa, nabaa lomi i guainio, dugaa helaguidiai aꞌamu ba ‘i paꞌi helagui o oꞌodui gutaguaiaa minaa ei awataa.’ 17 Nabaa lomi ina guainaa roꞌou, warefanaa ei losuia; ma nabaa lomi ina guainaa roꞌou, bigiꞌia aꞌana aleꞌei ona bigiꞌia aꞌa nemea roromaa, o nemea otonaa mugoo poꞌii gavaman.

18 “A warefaꞌuai aꞌa hamuꞌou ba tamanu hamona faroroꞌinia^b yeni malagufu, ana i roroꞌai i pafea ma tamanu hamona alagia^c yeni malagufu, ana i ala i pafea.”

19 “Hepalodiai, a warefanaa hamuꞌou ba nabaa helagui hamuꞌou yeni malagufu, hamuna fiꞌugai ba hamuꞌaa iꞌigainaa hepalo manumanu, mei Amau i pafea, i bigiꞌia aꞌa hamugua. 20 Uaa hitani helagui, o oꞌodui, roꞌamii gutafipui wagii fei harau, yau ana aꞌa roꞌou.”

21 I dii, Peter na nomai aꞌa Jesus ma iꞌiginia, “Mena Fasu, figa au a futoaa ei hafeloꞌa na bigiꞌia aꞌau mei lofuu? Inei aleꞌena olorompalopoa?”

22 Jesus na ware, “A warefanio, aꞌa ba olorompalopoa maꞌuaa, oloromfua paꞌania ma olorompalopoa.^d

23 “Siꞌei, fei haparaia pafea, tawiꞌana aleꞌei hemea hapara, mei ba i fawanewaneaa ei ponoꞌaa ei nafina. 24 Ei ba i fawanewaneaa ei mugoo poꞌi, hefiꞌa, rona duginaa aꞌana hemea nadoꞌo tonaa hefua paꞌania pufabaꞌa mugoo poꞌi aꞌana.^e 25 Siꞌei ba lomi na paꞌi mugoo poꞌi, mei hapara na warefaweꞌi ba hia, mei harona, ei naꞌuna mawe minaa ei manumanuna, ronei aloaa roꞌou ba hodiꞌaa ei mugoo poꞌina.

26 “Mei nafi na fapasinaa duꞌuna i maꞌana. Ina iꞌigifaweꞌi aꞌana, ‘Doꞌo fawiwiꞌainau ma awe hodipedugaa minaa ei mugoo poꞌi.’ 27 Mei fasuu mei nafi na faloloaꞌinia ma na famaꞌeꞌuaiaa minaa ei tonana ma alofatalainia.

28 “Maꞌuaa ei fi asiꞌalao mei nafi, ina nobapaꞌalao hemeadiai nafi na bigifipui aꞌana, hemea nadoꞌo tonaa hefa puꞌu denarius^f aꞌana. Ina panarofia ma guafaa gimona ma warefaweꞌi aꞌana, ‘Hodiꞌaa tamanu ona tonia aꞌau!’

29 “Mei nafi, mei na bigifipui aꞌana na fapasinaa duꞌuna ma na iꞌigifaweꞌi aꞌana, ‘Doꞌo fawiwiꞌainau ma awe hodiꞌaa minaa ei mugoo poꞌimu.’

30 “Maꞌuaa ina ware ba lomi. Ma idii, inaree aunaa hia humuu boboꞌaia hawina ba na hodipedugaa ei mugoo poꞌi. 31 Roꞌaa fanunuia aleꞌei hefiꞌadiai nafi, ronamina naranara watauda ma ronaree warefanaa mei fasuu roꞌou minaa ei rona fanunuia.

32 “Siꞌei, mei fasu na lalaꞌaa mei nafi ma ware, ‘Yoi, hemea paꞌaa hafeloꞌa nafi. Unamina famaꞌeꞌuaiaa minaa ei onadoꞌo tonia aꞌau, uaa onamina iꞌigaifaweꞌi aꞌau. 33 Haa, lomi ba oꞌaa faloloaꞌinaa mei hamugua aleꞌei a bigiꞌia aꞌamu?’ 34 Mei fasuna namina siba ma fifaninaa hia panii ei omaꞌamaꞌaa humuu boboꞌaia ba ronei fanimaꞌaia hawina na hodipedugaa ei mugoo poꞌi.

35 “Mei Amau pafea iwe bigiꞌia aleꞌei aꞌa hememea hamuꞌou nabaa lomi hamona futoaa ei hafeloꞌaa ei lofuu hamuꞌou laloo naranaraa hamuꞌou.”