Fei Maumauna na Filogii
17
Nenee oloroa arewaa, Jesus na nodugaa Peter ma laguei filofui James ma John pafoo fei tarea maugeni, uniaa roꞌou. 2 Ma na filogii fei maumauna yei i pudaa roꞌou. Fei pudana na weꞌa aleꞌei fei halo ma ei lawalawana namina poꞌi aleꞌei weꞌai. 3 Ana ei ua, laguna faꞌarewamai Moses ma Elijah ma laguna fiwarewarei aꞌa Jesus.4 Peter na warenaa aꞌa Jesus, “Mena Fasu, ina rawani ba oꞌou yeni. Nabaa ona nunuminia, a faꞌugaa odumanu pale, hepalo yoi, hepalo Moses ma hepalo Elijah.”
5 Ei fi warewarelao, hepalo agimee papalei na hawainaa roꞌou ma hepalo lao noranarai aꞌa fei papalei na ware, “Simeni, meni Naꞌuu, meni una haguia; ma unamina niꞌeniꞌe aꞌana. Guainaa wareana!”
6 Roꞌaa guainia ei otalai nenerana, rona fapasipoponainaa pu ma rona maꞌaufunurere. 7 Maꞌuaa Jesus na nomai ma idoaa roꞌou. Ina ware ba, “Asiꞌaa. Apuna maꞌau.” 8 Roꞌaa aranaa pafea, lomi rona fanunupaꞌaa hemeadiai, ana unaa Jesus.
9 Ei roi upugio aꞌa fei maugeni, Jesus na warefaꞌaiaa roꞌou, “Apuna warefanaa nemea tamanu hamona fanunuia nopaꞌaloo fei ba mei Naꞌuu Ramaꞌa na asiꞌaa aꞌa fei maꞌea.”
10 Ei otalai nenerana, rona iꞌiginia, “Tani roꞌaa ware ei feroiaa law ba Elijah neidoꞌo nomai?”
11 Jesus na ware, “Faꞌua, Elijah ba i nomai ma mi aufarawaninaa minaa ei manumanu. 12 Maꞌuaa a warefanaa hamuꞌou ba Elijah na nodigimai ma lomi rona fanunuꞌapaꞌia; maꞌuaa, rona bigiꞌaa tamanu rona nunuminia aꞌana. Ma mei Naꞌuu Ramaꞌa ana i tonaa fiꞌina i panii roꞌou.” 13 Ma ei otalai nenerana, ronawe apaꞌia ba hia fi uꞌugaa John, mei Pudugufaia.
Fei Farawaniana Mei Baduu Wawane, Mei na Waduꞌia Pigea
14 Roꞌaa nobapaꞌaloo fei gupuu ramaꞌa, hemea na nomai ma na oꞌoꞌui i maꞌaa Jesus. 15 Ina ware, “Mena Fasu, faloloaꞌinaa mei naꞌuu, baduu wawane. Inaꞌo memeroi ma namina nanamuinia. Inaꞌo pasinaa laloo fei hafi, o laloo fei ranu. 16 Una noduginaa hia aꞌa ei otalai neneramu maꞌuaa, lomi ba rona farawanipaꞌia.”
17 Jesus na ware, “Hamuꞌou ena ramaꞌaa feni au feni, lomi na weꞌi ma ana lomi na wanewane ei naranaraa hamuꞌou. Yau na tamafoidii aꞌa fei gutanau aꞌa hamuꞌou. Ana una tamafoi aꞌa fei maumau hamuꞌou. Dugamii mei baduu wawane aꞌau.” 18 Jesus na warefaweꞌi aꞌa mei pigea ma na walaꞌaa aꞌana ma ana ei ua na rawani mei baduu.
19 Siꞌei, ei otalai nenerana uniaa roꞌou, rona nofagigimai aꞌa Jesus ma iꞌiginia, “Tani lomi haiꞌouna fawalaꞌapaꞌia?”
20 Ina ware, “Hamatee namina pusuꞌoroi fei weꞌiaa naranaraa hamuꞌou. A warefaꞌuai aꞌa hamuꞌou ba nabaa na weꞌi maꞌida ua ei naranaraa hamuꞌou aleꞌei fei pusuꞌo lau mustard, hamoꞌaa ware aꞌa fei maugeni ba, ‘Asiꞌaa faweleni ma dinaa yei’ ma i asiꞌaꞌaunu. Lomi hepalo manumanu ba lomi i maꞌatalaa aꞌa hamuꞌou.” 21\f + \fr 17:21 \ft Hefiꞌa neꞌia ba maꞌatala aꞌa yoi. 21 Maꞌuaa fei mau aleꞌei, i walaꞌaa aꞌa lafulafua ma fabaoa ua.\f*
Jesus na Waredinaa fei Maꞌeana
(Mark 9:30-32; Luke 9:43b-45)
22 Roꞌaa nofipuimai i Galilee, ina warenaa aꞌa roꞌou ba, “Mei Naꞌuu Ramaꞌa, roꞌaa aloia panii ei ramaꞌa. 23 Roꞌaa foꞌafamaꞌeia ma aꞌa fei faꞌoduaiaa arewaa, i asiꞌaa ma fawenaidiai.” Ma ei otalai nenerana, ronamina faloloaꞌi.
Mugoo Poꞌii fei Humuu mei Haidaa
24 Nenee fei noramiaa Jesus ma ei otalai nenerana yei Capernaum, ei otonaa guapalo pusuꞌo mugoo poꞌii fei humuu mei Haidaa, rona nomai aꞌa Peter ma iꞌigai “Ana i au mugoo poꞌiia fei humuu mei Haidaa mei feroiamu?”
25 Peter na ware, “Hiꞌi, i au.”
I waduꞌimai laloo fei humuu Peter, Jesus nadoꞌo ba ware ba, “Tamanu ei naranaramu, Simon? Ei haparaa feni malagufu ronaꞌo to mugoo poꞌi aꞌa hini—aꞌa ei naꞌuu roꞌou o aꞌa hefiꞌadiai?”
26 Peter na ware, “Aꞌa hefiꞌa.”