2 Ina ware,^a “Iꞌa fafilao, hamona ware ba, ‘Iwe rawani ua narani hamatee na ro fei haroo pumanugawe’, 3 ma na mafufuo hamoꞌaa ware ba, ‘Wagieni i paꞌi lalarena ma maunu, uaa na ro fei haroo pumanugawe ma ana na giogio.’ Hamona fanunuꞌapaꞌaa ei hilala haroo pumanugawe maꞌuaa, lomi hamona fanunuꞌapaꞌaa ei hilalaa feni au feni. 4 Aꞌa feni au feni, ei hafeloꞌa, ei lomi rona oafagugu, rona labaginaa hepalo foigia hilala, maꞌuaa lomi. Roꞌaa fanunuaa hepalo ua, fei hilalaa Jonah.” Ma Jesus na diꞌininaa roꞌou ma aunu.

5 Rona aunudiginaa pepei adii fei agi ma ei otalai nenerana, rona madiꞌinia ba ro notomai faraa pidaua. 6 Jesus na warenaa aꞌa roꞌou, “Hamonei omaꞌaa hamuꞌou aꞌa ei fafuafuaa ei Pharisee ma Sadducee.”

7 Rona fiwarewareinia dupuaa roꞌou ma ware, “Haa woro siꞌei ba lomi ona notomai faraa pidaua.”

8 Jesus na apaꞌadigaa ei fiwarewareiaa roꞌou ma na iꞌigai, “Hamuꞌou ena pusuꞌoro weꞌiaa naranara, tani hamoꞌaa fiwarewarei dupuaa hamuꞌou ba lomi hamona paꞌi faraa pidaua? 9 Haa, hamotawe apaꞌia? Lomi hamona nonominaa haipaniei faraa pidaua aꞌa ei haipani pufabaꞌa ma hefiga pa masii duꞌua hamona paia? 10 Ma olorompaloei faraa pidaua aꞌa ei gunaroa pufabaꞌa—hefiga pa masii duꞌua hamona paia? 11 Batanai ei ba lomi hamona apaꞌia ba yau aꞌa ba fi wareaa ei faraa pidaua aꞌa hamuꞌou? Maꞌuaa, hamonei omaꞌaa hamuꞌou aꞌa ei fafuafuaa ei Pharisee ma Sadducee.” 12 Ma ronawe apaꞌia ba, hia, aꞌa ba ifi warewareaa fei fafuafua faraa pidaua maꞌuaa, fei mau feroiaa ei Pharisee ma Sadducee.

13 I nopaꞌamii malalaa Caesarea Philippi Jesus na iꞌigainaa ei otalai nenerana, “Ei ramaꞌa, rona ware ba mei Naꞌuu Ramaꞌa, hia, hini?”

14 Rona ware, “Hefiꞌa, rona ware ba John, mei Pudugufaia; hefiꞌa ba Elijah; ma hefiꞌadiai ba Jeremiah, o hemea ei mamamaꞌa.”

15 Ina iꞌigai ba, “Ma hamuꞌou, hamona ware ba yau, hini?”

16 Simon Peter na ware, “Yoi mei Christ,^b mei Naꞌuu mei Haidaa, mei i oalao.”

17 Jesus na ware, “Ona paꞌi hawegiamu, Simon mena naꞌuu Jonah uaa, aꞌa ba faꞌarewaa hemea ramaꞌa aꞌamu maꞌuaa, faꞌarewaa mei Amau pafea. 18 Ma uꞌei warefanio ba yoi Peter^c ma pafoo feni naꞌa feni a faꞌugaa fei losuu ma ei gigei Hades,^d lomi ba roꞌaa muaipaꞌia.^e 19 A fanio ei gigigii fei haparaia pafea; ma tamanu ona faroroꞌinia yeni malagufu, ana i roroꞌai^f pafea ma tamanu ona alagia yeni malagufu, ana i ala pafea.” 20 Ma ina warefaweꞌi aꞌa ei otalai nenerana ba roneiꞌaa warefanaa nemea ba hia, mei Christ.

21 Aꞌa fei au fei ma nolao, Jesus na warefaꞌarewaia aꞌa ei otalai nenerana ba hia, i dinaa Jerusalem ma tonaa fiꞌina aꞌa watauda manumanu i panii ei bauaniaa gufu, ei famamoaa humuu mei Haidaa mawe ei feroiaa law. Ma hefiꞌa, roꞌaa foꞌafamaꞌeia ma aꞌa fei faꞌoduꞌaiaa arewaa i asiꞌadiai.

22 Peter na dugitataꞌainia ba i warefawanewaneinia, “Paꞌaa lomi, mena Fasu! Hefeni, paꞌaa lomi ba i nomai aꞌamu!”

23 Jesus na momoꞌilao ma warenaa aꞌa Peter, “Dinaa mugiu, mena Satan! Yoi aleꞌena hepalo alabeꞌa aꞌau; lomi ona paꞌi naranaramu aꞌa ei manumanuu mei Haidaa maꞌuaa, aꞌa ei manumanuu ramaꞌa.”

24 Ma Jesus na warenaa aꞌa ei otalai nenerana ba, “Hini ba i nenerau nei aunaa ei naranarana i pu ma harenaa fei hawafolona ma nenerau. 25 Uaa hini ba i urofaa fei harenuana^g iwe paꞌai aꞌana, maꞌuaa hini i fapaꞌainaa fei harenuana aꞌau iwe tonia. 26 Tamanu fei rawaniꞌana nabaa nemea i topedugaa feni malagufu maꞌuaa fei harenuana i paꞌai? O, nemea i filoginaa fei harenuana aꞌa tamanu? 27 Uaa mei Naꞌuu Ramaꞌa, iwe nomai aꞌa fei haweraa mei Amana fipuinaa ei aloꞌalona ma i fani ponoꞌaa hememea ana aleꞌei tamanu ina bigiꞌia. 28 A warefaꞌuai aꞌa hamuꞌou ba hefiꞌa eni rona u yeni, roꞌadoꞌo fanunuaa mei Naꞌuu Ramaꞌa na nomai aleꞌei hemea hapara ei ana roifi werawera.”