11 “Niꞌeniꞌea aꞌa hamuꞌou nabaa ena ramaꞌa, rona warefafeloaa hamuꞌou, haperararaiaa hamuꞌou ma warefasifi ba hamona bigiꞌaa ei maumau hafelo ma rona bigiꞌaa ei manumanu ei aꞌa hamuꞌou, uaa yau. 12 Niꞌeniꞌe ma unuwenuwe, uaa na bauanai fei ponoꞌaa hamuꞌou i pafea, uaa ana rona haperararaiaa ei mamamaꞌa mina.

13 “Hamuꞌou aleꞌei agii feni malagufu. Maꞌuaa nabaa fei agi na paꞌai fei agiꞌagiana, batanai ba i agiꞌagiadiai? Lomidiai bigiꞌana; hepalo ua bigiꞌana ba roꞌaa siminaa ano ma roꞌaa talaihapuninia ei ramaꞌa.

14 “Hamuꞌou aleꞌei weꞌai feni malagufu. Hepalo baua gufu pafoo maugeni, paꞌaa lomi i udeꞌopaꞌaipaꞌi. 15 Ana lomi ba ei ramaꞌa, roꞌaa haꞌinaa ei weꞌai roꞌou ma augia haroo hepalo hagi. Maꞌuaa roꞌaa augia pafoo fei udeꞌudena ma i weꞌainaa minaa ei ramaꞌa laloo fei humu. 16 Ana aleꞌei, faweꞌainaa ei weꞌai hamuꞌodu i pudaa ei ramaꞌa ba roꞌaa fanunupaꞌaa ei rawaniꞌa bigiꞌaa hamuꞌou ma uduginaa mei Amaa hamuꞌou pafea.

17 “Apuna nara ba eni a nomai ba a fapedugaa fei Law o ei Mamamaꞌa; abaa eni a nomai ba a fapedugaa roꞌou, maꞌuaa ba a bigiꞌaa tamanu ronadii wareia. 18 A warefaꞌuai aꞌa hamuꞌou ba, i apaꞌai fei haroo pafea ma feni malagufu, maꞌuaa lomi ba i paꞌai maꞌida neꞌia, o hepalo dibaa neneꞌi wagii fei Law hawina ba minaa ei manumanu lalona na nodigimai. 19 Hini i barafeaa maꞌida ei warea lalona ma feroinaa hefiꞌa ba ronei bigiꞌia aleꞌei, hia, lomi ba i paꞌi harana aꞌa fei haparaia pafea, maꞌuaa hini i feroi ma neneraa eni warea eni, iwe paꞌi baua harana aꞌa fei haparaia pafea. 20 Uaa uꞌei warefanaa hamuꞌou ba nabaa ei wanewaneaa hamuꞌou lomi i muainaa ei wanewaneaa ei Pharisee mawe ei feroiaa law, paꞌaa lomi ba hamoꞌaa waduꞌainaa laloo fei haparaia pafea.

21 “Hamona aida ba ei ramaꞌaa mina, rona guainia ba, ‘Apuna foꞌafamaꞌe, ma hini i foꞌafamaꞌe, i oa aꞌa fei dududua.’ 22 Maꞌuaa uꞌei warefanaa hamuꞌou ba hini i siba aꞌa mei lofuna,^a ana i oa aꞌa fei dududua. Hepalodiai, hini i ware ‘Raca’^b aꞌa mei lofuna, hia, i u i pudaa ei Sanhedrin. Maꞌuaa hini i ware ba, ‘Yoi paꞌaa lomi apaꞌamu!’ i fagiana aꞌa fei hafi lomi i peretoo.

23 “Siꞌei, nabaa oꞌaa augaa ei fanamu aꞌa fei tawahafi na apunai yei humuu mei Haidaa ma yei ona nonominia ba mei lofumu na paꞌi awatana aꞌamu, 24 diꞌaugaa fena fanamu yena i maꞌaa fena tawahafi na apunai. Ma doꞌo aunu ma fawanewaneia aꞌa mei lofumu. Nene, hadiweꞌimai ma fanaa fei fanamu.

25 “Fawanewanebatafainia aꞌa mei i bidi ununa aꞌamu, mei ba i dududuio. Bigiꞌia ei hamuꞌeifi talailao i maꞌaa tala. Nabaa lomi, i aunaa yoi i panii mei fadududua ma mei fadududua i aunaa yoi panii mei ba ipowe aunaa yoi humuu boboꞌaia. 26 A warefaꞌuai aꞌamu, lomi o asiꞌaa hawina ona hodipedugaa ei mugoo poꞌina.^c

27 “Hamona aida ba ei ramaꞌaa mina, rona guainia ba, ‘Oneiꞌaa fiharoharoipaꞌai.’ 28 Maꞌuaa uꞌei warefanaa hamuꞌou ba hini i nanamainaa nemea pifine, ina fiharoharoipaꞌaidii aꞌana laloo fei naranarana. 29 Nabaa fei pudamu pepei maꞌau i fafeloio, walesiminia. Ina rawani ba hepalo ua manumanuu unumu na paꞌai laraa fei ba minaa ei unumu i baroronaa waduhero. 30 Ma nabaa fei panimu pepei maꞌau i fafeloio, famosuia ma siminia. Ina rawani ba hepalo ua manumanuu unumu na paꞌai laraa fei ba minaa ei unumu i baroronaa waduhero.

31 “Ina udedii fei warea ba, ‘Hini mei i diꞌininaa mei harona pifine, inei fania hepalo neꞌifaꞌaia ba laguꞌaa fiꞌalagii.’ 32 Maꞌuaa uꞌei warefanaa hamuꞌou ba hini i fiꞌalagii aꞌa mei harona pifine, nabaa mei pifine mei lomi na fiharoharoipaꞌai, i fapasiaa mei pifine mei, aleꞌei ba hia na fiharoharoipaꞌai ma hini nemea i lalainaa mei pifine, mei i fiꞌalagii aꞌa mei harona, hia, na fiharoharoipaꞌai.

33 “Hamona aida ba ei ramaꞌa mina, rona guaidigia aleꞌei ba, ‘Oneiꞌaa madiꞌinaa ei faꞌunaiamu; maꞌuaa bigiꞌaa tamanu ona warefaꞌuanainia aꞌa mei Fasu.’ 34 Maꞌuaa a warefanaa hamuꞌou ba, apunawe faꞌunainaa hepalo manumanu: aleꞌei fei gufu pafea, uaa fei, gutanaa mei Haidaa; 35 o feni malagufu, uaa feni, labenaa pinena; o faꞌunainaa Jerusalem, uaa fei, gufuu mei Baua Hapara. 36 Apuna faꞌunainaa fei tabamu, uaa lomi ba owe fafilogipaꞌaa hepalo hugoo taba ba i poꞌi o hararapaꞌo. 37 Ma nabaa hamoꞌaa ware ba ‘Hiꞌi’ wagii hepalo manumanu, ware ua ba ‘Hiꞌi’ ma nabaa hamoꞌaa ware ba ‘Loꞌe’, ware ua ba ‘Loꞌe’, nabaa na paꞌidilao warea, fei, noranamai aꞌa mei hafeloꞌa.

38 “Hamona guaidigia ba, ‘Nabaa nemea i waleaa pudaa nemea, ana i waleaa pudana ma nabaa nemea i faꞌaguguaa difoo nemea, ana i faꞌaguguaa difona.’ 39 Maꞌuaa uꞌei warefanaa hamuꞌou ba oneiꞌaa fadugeaa nemea hafeloꞌa ramaꞌa. Nabaa nemea i laparaa manufimu pepei maꞌau, momoꞌaifania pepei anaa. 40 Ma nabaa nemea i dududuio ba i tonaa fei lawalawamu, fania fei hawaa ugumu anaa. 41 Nabaa nemea forafora i fatalainio aleꞌena heai kilometre, talaifipui aꞌana aleꞌena guai kilometre. 42 Fani aꞌa hini i iꞌigainio ma apuna ofadugaa mei ba idoꞌo to aꞌamu ma nene, i hodiꞌia.

43 “Hamona aida ba rona ware aleꞌei mina ba, ‘Haguaa mei gufumu ma fahafelo aꞌa mei bidibidii unumu.’ 44 Maꞌuaa uꞌei warefanaa hamuꞌou: Haguaa ei bidibidii unuu hamuꞌou^d ma lafulafunaa ei rona haperararaiaa hamuꞌou 45 ba hamowe oa aleꞌei naꞌuu mei Amaa hamuꞌou pafea. Ina faꞌasiꞌanaa fei halo aꞌa ei hafeloꞌa mawe ei rawaniꞌa ma faropanaa fei maunu aꞌa ei rona wanewane mawe ei lomi rona wanewane. 46 Nabaa hamona haguaa ena rona haguaa hamuꞌou, tamanu ponoꞌa ba hamoꞌaa tonia? Haa, ei otonaa mugoo poꞌii gavaman, lomi ronaꞌo bigiꞌia aleꞌei? 47 Ma nabaa hamuꞌou farawani ua aꞌa ei lofuu hamuꞌou, batanai ei ba ei maumau hamuꞌou i muainaa hefiꞌa? Haa, ei roromaa, lomi ronaꞌo bigiꞌia aleꞌei? 48 Ei maumau hamuꞌou neiminapaꞌaa fafaꞌarai ua ana aleꞌei ei maumau mei Amaa hamuꞌou pafea.