Fani aꞌa ei Lomi Rona Paꞌi
6
“Hamoneiꞌaa bigiꞌaa ei rawaniꞌa bigiꞌaa hamuꞌou i pudaa ramaꞌa ba ro fanunuia. Nabaa hamona bigiꞌia, lomi ba hamoꞌaa paꞌi ponoꞌaa hamuꞌou aꞌa mei Amaa hamuꞌou pafea. 2 “Siꞌei, nabaa ona fani aꞌa ei lomi rona paꞌi, apuna warefaꞌaiaa ei ramaꞌa aꞌa ei maniwa, aleꞌei ronaꞌo bigiꞌia ei wareꞌoni laloo ei synagogue ma yei maꞌaa tala ba ei ramaꞌa ronei fani maꞌaua aꞌa roꞌou. A warefaꞌuai aꞌa hamuꞌou ba rona todigaa minaa ei ponoꞌaa roꞌou ena rona tenaa roꞌou ei ramaꞌa. 3 Maꞌuaa ena ona fani aꞌa ei lomi rona paꞌi, apuna faꞌaiaa fei panimu pepei mauwi ba tamanu ei bigiꞌaa fei panimu pepei maꞌau 4 ma ei fanamu i udeꞌopaꞌai. Ma mei Amamu, mei i fanunupaꞌaa ei bigiꞌopaiamu, iwe fani ponoꞌamu.
Lafulafua
5 “Ena hamona lafulafu, apuna bigiꞌia aleꞌei ena wareꞌoni, uaa rona nunuminia ba roꞌaa ufalarai ma lafulafu laloo fei synagogue ma i maꞌaa tala ba ei ramaꞌa, roꞌaa fanunupaꞌaa roꞌou. A warefaꞌuai aꞌa hamuꞌou ba rona todigaa minaa ei ponoꞌaa roꞌou. 6 Maꞌuaa ena hamonaꞌo lafulafu, waduꞌinaa humuu hamuꞌou, fareꞌaa fei gigei ma lafulafunaa aꞌa mei Amaa hamuꞌou, mei lomi hamoꞌaa fanunupaꞌia. Ma mei Amaa hamuꞌou, mei i fanunupaꞌaa ei bigiꞌopaꞌaiaa hamuꞌou, iwe fani ponoꞌaa hamuꞌou. 7 Ma ena hamonaꞌo lafulafu, apuna bababauꞌu ua aleꞌei ei ramaꞌaa roromaa, uaa rona nara ba i guaipaꞌaa roꞌou aꞌa ei watauda wareaa roꞌou. 8 Apuna neneraa ei maumau roꞌou, uaa hamotawe iꞌiginia ma mei Amaa hamuꞌou na apaꞌidigaa ei nunumiaa hamuꞌou.
9 “Siꞌei ba ei mau lafulafuaa hamuꞌou nei aleꞌeni feni ba:
“‘Mena Amaa haiꞌou pafea,
fei haramu na honua,
10 fei haparaiamu nei nomai,
ei nunumiamu, haiꞌou bigiꞌia yeni malagufu, ana aleꞌei ronaꞌo bigiꞌia yena gufu pafea.
11 Fani hanaa haiꞌou wagieni
ma laloo minaa ena hepapalo arewaa.
12 Futoaa ei hafeloꞌaa haiꞌou,
ana aleꞌei haiꞌounaꞌo futoaa hafeloꞌaa ei rona fahafelo aꞌa haiꞌou.
13 Oneiꞌaa duginaa haiꞌou aꞌa ei manimania,
maꞌuaa dugitataꞌainaa haiꞌou aꞌa mei hafeloꞌa.’a
14 Uaa, nabaa hamuꞌou futoaa ei hafeloꞌa ena ramaꞌa, ena rona bigifahafelo aꞌa hamuꞌou, mei Amaa hamuꞌou pafea, ana i futoaa ei hafeloꞌaa hamuꞌou. 15 Maꞌuaa, nabaa lomi hamoꞌaa futoaa ei hafeloꞌaa ena ramaꞌa, ei rona bigifahafelo aꞌa hamuꞌou, mei Amaa hamuꞌou pafea, ana lomi i futoaa ei hafeloꞌaa hamuꞌou.
Fabaoa
16 “Ena hamona fabao, apuna fanunufaloloaꞌi aleꞌei fei mau bigiꞌaa ena wareꞌoni, uaa ronaꞌo fanunufaloloaꞌi ba ei ramaꞌa, ronei fanunuꞌapaꞌia ba roꞌei fabao ei. A warefaꞌuai aꞌa hamuꞌou ba rona todigaa minaa ei ponoꞌaa roꞌou. 17 Maꞌuaa ena hamona fabao, igi pao tabaa hamuꞌou ma rapuꞌaa pudaa hamuꞌou 18 ba ei ramaꞌa, lomi roꞌaa fanunuꞌapaꞌia ba hamoꞌei fabao maꞌuaa, unaa mei Amaa hamuꞌou, mei lomi hamona fanunupaꞌia; ma mei Amaa hamuꞌou, mei na fanunupaꞌaa ei bigiꞌopaꞌaiaa hamuꞌou, iwe fani ponoꞌaa hamuꞌou.
Ei Paꞌaa Rawaniꞌa Manumanu i Pafea
(Luke 12:33, 34)
19 “Apuna aumaꞌaa ei paꞌaa rawaniꞌa manumanumu yeni malagufu, yeni na paꞌi pugoꞌa ma poꞌai i fafeloia ma ei fafanao roꞌaa waduꞌai ma topaꞌainia. 20 Maꞌuaa aumaꞌaiaa ei paꞌaa rawaniꞌa manumanumu yei gufu pafea, uaa lomi na paꞌi pugoꞌa ma poꞌai i fafeloia ma lomi na paꞌi fafanao ba roꞌaa waduꞌai ma topaꞌai. 21 Uaa hitani ei augamu ei paꞌaa rawaniꞌa manumanumu, ana na ude yena fena naranaramu.
Fei Weꞌai fei Unu
22 “Fei puda, weꞌai fei unu. Nabaa fei pudamu na rawani, minaa fei unumu, ana imina weꞌa. 23 Maꞌuaa, nabaa fei pudamu na hafelo, minaa fei unumu, ana imina roroma. Siꞌei ba, nabaa fei weꞌai aꞌamu na roro, iminapaꞌaa rorofafelo!
Mei Haidaa ma ei Manumanu
24 “Lomi nemea i nafii aꞌa helagui fasu. Nabaa aleꞌei, i fabidibidinaa ununa nemea ma haguaa nemea, o i bigifaweꞌi aꞌa nemea ma narafafelo aꞌa nemea. Lomi na hawia ba o nafii aꞌa minaa lagua—mei Haidaa ma fei Mugoo Poꞌi.
Apuna Naranara Watauda
25 “Siꞌei, uꞌei warefanaa hamuꞌou, apuna naranara watauda aꞌa fei gutanaa hamuꞌou aleꞌei ba hamoꞌaa hana o hunumaa tamanu; o, aꞌa ei unuu hamuꞌou ba hamoꞌaa rafe tamanu. Haa, fei gutanaa hamuꞌou, manumanuu duꞌua ua? Ma ei unuu hamuꞌou, manumanuu lawalawa ua? 26 Fanununaa ei manufifidau; lomi rona faro, o hufu, o aumaꞌa i laloo leaa roꞌou, maꞌuaa mei Amaa hamuꞌou pafea na faguaa roꞌou. Aꞌa ba fei gutanaa hamuꞌou baua manumanu laraa fei gutanaa roꞌou? 27 Nemea hamuꞌou ana i famalapaꞌia gutanana wagii fei ba i naranara watauda?b
28 “Hamatani hamomina naranara watauda aꞌa ei lawalawaa hamuꞌou? Fanununaa ei lily fei ano ba batanai roꞌei habe. Lomi rona bigifatemu o tawitawi. 29 Maꞌuaa uꞌei warefanaa hamuꞌou ba Solomon aꞌa ei watauda rawaniꞌa hawerana, lomi na lawalawai aleꞌei ei manumanu ei. 30 Nabaa mei Haidaa na fani hawera aꞌa ei guanaa feni ano, ei yeni wagieni ma narani hanaa fei hafi, haa, lomi ba i fanidiai hawera aꞌa hamuꞌou ena lomi na weꞌi naranaraa hamuꞌou? 31 Hee, apuna naranara watauda ma ware aleꞌei ba, ‘Oꞌaa hanaiaa tamanu?’, o ‘Oꞌaa hunumaa tamanu?’, o ‘Oꞌaa haweginaa tamanu?’ 32 Uaa ei ramaꞌaa roromaa, rona ponineneraa minaa ei manumanu ei ma mei Amaa hamuꞌou pafea na aidadii ba hamonei paꞌi ei manumanu ei. 33 Maꞌuaa doꞌo labarainaa fei haparaiana ma fei wanewaneana ma minaa ei manumanu i pafoimai aꞌa hamuꞌou. 34 Siꞌei, apuna naranara wataudanaa fei narani, uaa ei awataa fei narani, manumanuu narani. Ei awataa laloo hepalo arewaa, ana hawii fei arewaa fei.