Fanunufarapa aꞌa Hefiꞌa
7
“Apuna fanunufarapa aꞌa hefiꞌa, o mei Haidaa ana i fanunufarapa aꞌamu. 2 Uaa batanai fafanunuamu aꞌa hefiꞌa, ana owe tonia aleꞌei ei mau bigiꞌamu—nabaa puduu fanamu watauda o maꞌida, ana watauda o maꞌida i hadiweꞌimai aꞌamu. 3 “Tani o fanunuaa ei bareuaa pudaa mei lofumu ma lomi ona narapaꞌaa fei hewagu i pudamu? 4 Tani o ware aꞌa mei lofumu aleꞌei ba, ‘Yau, ba a suagisuminaa ei bareuaa pudamu,’ ma ana ona paꞌi hewagu i pudamu? 5 Yoi, mena wareꞌoni, oneidoꞌo tosiminaa fei baua haihai pudamu ma owe fanunufarawani ba oꞌaa huguaa pudaa mei lofumu.
6 “Apuna fanaa ei ponoto ei manumanu na apunai, uaa roꞌaa momoꞌimai ma tadudigedigeo; ma apuna siminaa ei hapemu pearl aꞌa ei moimoi, uaa, ona bigiꞌia aleꞌei, roꞌaa hapuninia haroo pinee roꞌou.
Iꞌigai, Labarai, Fabaꞌabaꞌa aꞌa fei Gigei
7 “Iꞌigai ma hamowe to; labarai ma hamowe labagipaꞌi; fabaꞌabaꞌa aꞌa fei gigei ma iwe gigi aꞌa hamuꞌou. 8 Uaa hini i iꞌigai, i to; mei i labarai, i paꞌi; ma mei i fabaꞌabaꞌa aꞌa fei gigei, i gigi aꞌana.
9 “Nabaa mei naꞌu i iꞌigainaa fei faraa pidaua, hini hamuꞌou i fania hepalo mugoo? 10 O nabaa i iꞌigainaa hepalo nia, i fania hepalo waꞌa? 11 Faꞌua ba hamona hafelo maꞌuaa, hamonaꞌaida fani rawaniꞌa manumanu aꞌa ei naꞌuu hamuꞌou. Ma nabaa aleꞌei, mei Amaa hamuꞌou pafea imina fanidiai watauda rawaniꞌa manumanu aꞌa ei rona iꞌiginia! 12 Siꞌei, wagii minaa ei manumanu, hamonei bigiꞌia aꞌa ei ramaꞌa ana aleꞌei hamona nunuminia ba ronei bigiꞌia aꞌa hamuꞌou, uaa hefeni, feni paꞌaa hanuu fei Law ma ei Mamamaꞌa.
Guapaloei Pusuꞌo ma Lareaa Gigei
13 “Waduꞌai aꞌa fei pusuꞌo gigei. Uaa, na lare fei gigei wagii fei baua tala i dinaa maꞌea ma watauda, rona waduꞌai lalona. 14 Maꞌuaa na pusuꞌoroi fei gigei wagii fei migigii tala i dinaa fawelei na paꞌi harenua ma hefiꞌa ua na labagipaꞌia.
Fei Haihai ma ei Fuana
15 “Wagiꞌinaa hamuꞌou aꞌa ei mamamaꞌa sifisifi. Uaa, rona nomai aꞌa hamuꞌou, maumau roꞌou aleꞌei sipsipi maꞌuaa, paꞌaa maumau roꞌou aleꞌei ponotoo podu. 16 Aꞌa ei fuaa roꞌou, hamoꞌaa fanunuꞌapaꞌaa roꞌou. Ei ramaꞌa, ronaꞌo hufuꞌaa ei hanamoo, o ei nasi dupuaa ei wowoꞌii na hogia ununa? 17 Ana aleꞌei, minaa ei rawaniꞌa haihai na paꞌi rawaniꞌa fuaa roꞌou maꞌuaa, ei hafeloꞌa haihai, lomi na paꞌi rawaniꞌa fuaa roꞌou. 18 Hepalo rawaniꞌa haihai, lomi ba i paꞌi hafeloꞌa fuana ma hepalo hafeloꞌa haihai, lomi ba i paꞌi rawaniꞌa fuana. 19 Tamanu fei haihai lomi na paꞌi rawaniꞌa fuana, rowe reresiminaa hafi. 20 Siꞌei ba aꞌa ei fuaa roꞌou, hamowe fanunuꞌapaꞌaa roꞌou.
Lomi Una u Apaꞌio
21 “Aꞌa ba minaa ei rona ware aꞌau ba, ‘Mena Fasu, mena Fasu,’ ba roꞌaa waduꞌainaa laloo fei haparaia pafea maꞌuaa, ana uniaa mei i bigiꞌaa fei nunumiaa mei Amau i pafea. 22 Aꞌa fei arewaa fei, watauda roꞌaa warenaa aꞌau ba, ‘Mena Fasu, mena Fasu, haa, lomi haiꞌounaꞌodii wareꞌau aꞌa fei haramu aleꞌei ei mamamaꞌa ma abaa haiꞌounaꞌo fawalaꞌanaa watauda pigea ma bigiꞌaa watauda foigia aꞌa fei haramu?’ 23 Ma a warefaꞌarewa aꞌa roꞌou ba, ‘Lomi una apaꞌaa hamuꞌou. Diꞌininau, hamuꞌou ena hamonaꞌu bigiꞌaa ei hafeloꞌa!’
Laguei Poapoa ma Anoꞌano Fadufadua
24 “Siꞌei, hini i guainaa eni wareau ma biginenegia, tawiꞌana aleꞌei mei ramaꞌa na paꞌi apaꞌana, mei na faduaa fei humuna pafoo naꞌa. 25 Na ropa fei maunu, na mere fei lamalamana ma fei lalarena na agifanimaꞌaiaa fei humu; maꞌuaa lomi na worosi uaa fei fasuꞌufufugoina na ude pafoo naꞌa. 26 Maꞌuaa hini i guainaa eni wareau ma lomi na biginenegia, tawiꞌana aleꞌei mei lomi na paꞌi apaꞌana, mei na faduaa fei humuna pafoo piye. 27 Na ropa fei maunu, na mere fei lamalamana, fei lalarena na agifanimaꞌaiaa fei humu ma na pasimemeꞌainaa pu.”