Mei Ramaꞌa na Watawatai Ununa
8
Iꞌa upugio aꞌa fei maugeni, hefiꞌa baua gupuu ramaꞌa, rona nenegia. 2 Hemea na watawatai ununaa na nomai ma faꞌunaa duꞌuna i maꞌana ma na ware, “Mena Fasu, nabaa ina rawani aꞌamu, fafafaꞌarainau.”3 Jesus na roainalao fei panina ma idoaa mei ramaꞌa mei. Ina ware, “Na rawani aꞌau. Inei fafaꞌarai ena unumu!” Ana ei ua, ina pedub ei watawataa ununa. 4 Ma Jesus na warefania, “Apuna warefanaa nemea. Maꞌuaa aunu ma famaꞌaa ena unumu aꞌa mei bauaniaa humuu mei Haidaa ma fanaa tamanu Moses nadii wareia ba onei fani ma fei, aleꞌei uꞌugamu aꞌa roꞌou.”
Fei Weꞌiaa Naranaraa mei Centurion
5 Iꞌa nopaꞌaloo fei gufu Capernaum, hemea centurion na nomai aꞌana ma na iꞌiginia ba inei hadumia. 6 Ina ware, “Mena Fasu, mei nafiu na haino i humu, uaa na maꞌe ununa ma namina tonaa fiꞌina.”
7 Jesus na warenaa aꞌana, “Yau, a dii ma re farawaninia.”
8 Mei centurion mei, na ware, “Mena Fasu, yau abaa rawaniꞌa ramaꞌa ba o waduꞌaimai humuu. Maꞌuaa onei ware ua ma i rawanidiai mei nafiu. 9 Uaa ana yau na paꞌi hemea bauaniau ma yau hemea bauaniaa hefiꞌa ramaꞌaa foꞌaa. A ware aꞌa hemea ba ‘Nowau,’ ma i nolao ma hemeadiai ba, ‘Nomai,’ ma i nomai. A warenaa aꞌa mei nafiu ba, ‘Bigiꞌaa feni,’ ma i bigiꞌia.”
10 Iꞌa guainaa fei Jesus, na maduofo ma na warenaa aꞌa ei ro nenegia ba, “A warefaꞌuai aꞌa hamuꞌou ba lomi una apaꞌaa hemea Israel napaꞌaa weꞌi naranarana aleꞌeni meni. 11 Uꞌei ware aꞌa hamuꞌou ba watauda, rowe nomai i pepei anaa halo ma i pepei pasiaa halo ma to gutaa roꞌou i aꞌa fei baua hananaa aꞌa Abraham, Isaac ma Jacob i aꞌa fei haparaia pafea. 12 Maꞌuaa hefiꞌa naꞌuu fei gufu haparaiaa, rowe oanaa ano laloo fei roromaa fawelei na paꞌi aiꞌaiga ma fiꞌuꞌuiaa difo.”
13 Nawe ware Jesus aꞌa mei centurion mei, “Nowau! A paꞌaa bigiꞌia, ana aleꞌei ona nara ba a bigiꞌia.” Ma mei nafina na rawani ana aꞌa fei au fei.
Jesus na Fapedugaa Funuaa Watauda
14 Iꞌa waduꞌimai i laloo fei humuu Peter Jesus, na fanunupaꞌaa mei inaa haroo Peter na babai ununa ma na haino pafoo tawa. 15 Ina idoaa panina ma na pedu fei babaiaa ununa ma ina asiꞌaa ma fipowe hasufani hanana.
16 I nopoilao, rona noduginaa aꞌana watauda na waduꞌaa roꞌou pigea ma ina fawalaꞌanaa ei spiriti aꞌa ei wareana ma fapedugaa minaa ei funuaa roꞌou. 17 Ei bigiꞌana ei, na fafaꞌuainaa tamanu nadii wareia mei mamamaꞌa Isaiah:
“Ina harenaa ei hafeloꞌa unuu oꞌou
ma tonaa ei funuaa oꞌou.”
Fei Ponoꞌa Ona Neneraa Jesus
18 I fanunupaꞌaa ei gupuu ramaꞌa papana, ina warenaa aꞌa ei maroana ba hia ma roꞌou, ronei dinaa pepei adii fei ranu. 19 Ma hemea feroiaa law na nomai aꞌana ma na ware, “Mena feroia, ona dinaa hitani, a nenegio.”
20 Jesus na ware, “Ei ponotoo podu, rona paꞌi waduu roꞌou ma ei manufifidau rona paꞌi hofaa roꞌou, maꞌuaa mei Naꞌuu Ramaꞌa, lomi nopana ba i haino.”
21 Hemeadiai ei otalai nenerana na warenaa aꞌana, “Mena Fasu, yau ba adoꞌo aunu ma agifinaa mei amau.”
22 Maꞌuaa Jesus na warenaa aꞌana, “Nenerau. Ei maꞌea ronei iꞌifinaa ana roꞌou.”
Jesus na Famadinoaa fei Lalarena ma fei Lama
23 I dii, na hugi pafoo fei wa ma ei otalai nenerana, rona nenegia. 24 Lomi rona fanunupaꞌia maꞌuaa, na asiꞌaa fei baua lalarena ma ina towetafafelo fei agi ma na fuamaꞌiꞌinaa laloo fei wa. Maꞌuaa Jesus na maꞌigu. 25 Ei otalai nenerana, ronaree funifunia ma ware, “Mena Fasu, fatelaꞌanaa oꞌou! Oꞌaa wawauꞌu!”
26 Ina ware, “Hamuꞌou ena lomi namina weꞌi naranaraa hamuꞌou, tani hamomina maꞌau aleꞌei?” I dii, ina asiꞌaa ma na warefamadinoaa fei lalarena ma fei lama. Ma namina madino fei lama.
27 Ei ramaꞌa, namina nanawala pudaa roꞌou ma rona iꞌigai, “Ramaꞌa bata meni ramaꞌa meni? Te fei lalarena ma fei lama, ana laguna guaipaꞌaa wareana!”
Na Fawalaꞌanaa ei Spiriti Hafelo aꞌa Helagui Ramaꞌa
28 Iꞌa nopaꞌaloo fawelei i pepei Gadara,c na nobapaꞌamii helagui ramaꞌa, noramiaa lagua aꞌa ei huapu ma rona waduꞌaa lagua ei pigea. Siꞌei ba lagunaꞌaida panarofoꞌaa ei ramaꞌa, lomi ba hemea i talailao fawelei. 29 Laguna iwa ba, “Tamanu ei nunumiamu aꞌa haigua, mena Naꞌuu mei Haidaa? Atawe paꞌaa fei au haigua ma ba oꞌamii haperararaiaa haigua?”
30 Raualao maꞌida na paꞌi hefaa baua gupuu ei moimoi roꞌei hanana. 31 Ei pigea, rona iꞌigaifaweꞌi aꞌa Jesus, “Nabaa oꞌaa fawalaꞌanaa haiꞌou, alonaa haiꞌou aꞌa ei moimoi ba haiꞌouꞌaa waduꞌaa roꞌou.”
32 Ina warenaa aꞌa roꞌou, “Nowau!” Siꞌei, rona walaꞌaa ma waduꞌaa ei moimoi ma minaa fei gupuu roꞌou, rona poniꞌupunaa fei adii fei ranu fawelei namina faroꞌai ma pasimaꞌe lalona. 33 Ei omaꞌamaꞌaa ei moimoi, rona ponibaguanaa fei baua gufu ma uꞌugaa minaa ei manumanu ei fininaa tamanu ina bigiꞌia aꞌa laguei na waduꞌaa lagua pigea. 34 Siꞌei, minaa ei ramaꞌa fei baua gufu, rona aunu ba roꞌaa maꞌa Jesus. Ma roꞌaa maꞌapaꞌia, rona iꞌigifaweꞌi aꞌana ba nei diꞌininaa malalaa gufuu roꞌou.