Fei Warea Hanunuu mei Faroaa ei Lau
4
Jesus fi feroidinaa ei ramaꞌa yei piye ma abaa poꞌo maꞌida ei ramaꞌa. Siꞌei, Jesus na hugi pafoo wa ma na guta pafona laloo agi. Ma ei ramaꞌa, rona guta piye. 2 Jesus na warehanunuinaa watauda manumanu ei fi feroinaa roꞌodu. 3 “Hamuꞌou guai! Na paꞌi hemea ramaꞌa ba i sumai lau i peꞌihape. 4 Ma ei fi suminaa ei lau, hefiꞌa rona pasi papaa tala ma rona fidumai ei manufidufidu ma rafahanaia. 5 Ma hefiꞌa na pasi pafoo fawelei na paꞌi naꞌanaꞌa ma loꞌe namina piꞌodua fei piye, siꞌei ronamina habe maduare ei lau. 6 Ma i notautarerai fei halo, na babai ma na faholeaa roꞌodu ma rona maꞌe, uatani loꞌe na paꞌi waraa roꞌodu. 7 Ma hefiꞌa lau, rona pasi dupuaa ei wowoꞌii, ei rona hogia ma ei wowoꞌii na fifigaa roꞌodu ma siꞌei, lomi rona fuaa. 8 Ma hefiꞌadiai lau na pasi fawelei na paꞌi farawani piye ma ronamina habe mamaugi ma ronamina fuaa farawani. Hefiꞌa, fuaa roꞌodu, odufua paꞌania; hefiꞌa, fuaa roꞌodu oloroa paꞌania; ma hefiꞌa, hefa puꞌu.”9 Na warefanaa roꞌodu Jesus, “Hini na paꞌi adiana nei guainia.”
Tani i Warehanunui Jesus
10 Ma ei doꞌo uniaa Jesus, ei Hefua ma Helagui mawe hefiꞌadiai, rona iꞌigainaa Jesus hanuu fei warehanunuiana. 11 Jesus na warefanaa roꞌodu, “Na unifanidigaa hamuꞌou ei manumanu na udeꞌopaꞌai aꞌa fei haparaiaa mei Haidaa. Ma minaa ei abaa maroaa oꞌodu, rona guaiꞌuaia aleꞌena warea hanunu. 12 Siꞌei ba i aleꞌei,
“‘Ro fanunu ma fanunu maꞌuaa, lomi roꞌaa fanunupaꞌi,
ma ro guguai maꞌuaa loꞌe roꞌaa apaꞌia.
Ma nabaa rona aida, roꞌaa filoginaa ei naranaraa roꞌodu
ma hadiweꞌinaa aꞌa mei Haidaa ma mei Haidaa, i futoaa ei hafeloꞌaa roꞌodu.’”
Ina Piguaa Hanuu fei Warea Hanunuu mei Faroa
13 I dii, Jesus na warenaa aꞌa roꞌodu, “Haa, lomi hamona aida fei warea hanunu? Batanai ba hamoꞌaa apaꞌaa hefiꞌadiai warea hanunu? 14 Mei faroa na fafufuguꞌaa fei warea. 15 Hefiꞌa ramaꞌa, aleꞌena ei lau na pasi maꞌaa tala, fawelei na faro fei warea. Ana ei roꞌaa guainia na nomai Satan ma tosiminaa ei rawaniꞌa warea laloo iaa roꞌodu. 16 Hefiꞌa aleꞌena ei lau na pasi pafoo ei naꞌanaꞌa. Rona tonaa fei rawaniꞌa warea ma ronamina niꞌeniꞌe. 17 Maꞌuaa siꞌei ba lomi na gugu waraa roꞌodu, loꞌe na madii ma i bapaꞌaa roꞌodu ei hafeloꞌa o ei haperararaia wagii fei wareaa mei Haidaa, rona rawaꞌaꞌafai batafa. 18 Hefiꞌadiai, aleꞌena ei lau na pasi dupuaa ei wowoꞌii, ei rona hogia. Rona guainaa fei warea, 19 maꞌuaa ronamina naranara watauanaa fei gutanaa roꞌodu ma naranara watauda ba ronei paꞌi watauda manumanu ma nanamainaa watauda manumanu ma ei manumanu ei, na hawaiꞌonaa fei rawaniꞌa warea ma lomi rona fuapaꞌi. 20 Maꞌuaa hefiꞌa ramaꞌa, aleꞌena ei lau, ei roꞌaa pasi pafoo fei rawaniꞌa piye. Rona guainaa fei warea ma rona tonia. Rona habe ma fuaa. Hefiꞌa, fuaa roꞌodu, odufua paꞌania; hefiꞌa, oloroa paꞌania; hefiꞌa, hefa puꞌu—ei fuaa roꞌodu.”
Faꞌarewaiaa fei Rawaniꞌa Warea
21 Na warenaa aꞌa roꞌodu Jesus, “Ei hamonaꞌo tonaa fei weꞌai, hamona augia haroo hepalo hagi, o haroo tawa? Loꞌe, hamonaꞌo augia pafoo tawa. 22 Maꞌuaa, tamanu manumanu na opaꞌai, hinene iwe udelelefo. Minaa ena manumanu rona aupaꞌainia ena ramaꞌa, iwe udeꞌarewaꞌua. 23 Hini na paꞌi adiana nei guania.”
24 Na waredilao Jesus, “Naramaꞌaiaa tamanu ei guaiaa hamuꞌodu. Hefiga ei fanamu, ana aleꞌena ona tonia ma wataudadiai. 25 Hini i paꞌi manumanuna, iwe to hefiꞌadiai. Ma mei lomi manumanuna, tamanu maꞌidei na paꞌi, mei Haidaa iwe tonia aꞌana.”
Fei Warea Hanunuu fei Habeaa fei Lau
26 Ma ana ina ware, “Aleꞌeni maumau fei haparaiaa mei Haidaa. Hemea ramaꞌa fi sumaitalaneneneinaa ei lau i peꞌihapena. 27 Minaa ei poi ma arewaa, naꞌaa ina maꞌigu o loꞌe, ei lau, rona nusu ma habe ana roꞌou; ma mei ramaꞌa mei, lomi na aida batanai roꞌei nusu. 28 Fei piye ua, fei i fahabeia—rawarawa fei paꞌapaꞌa na sunai; nene, fei obana; ma laloo fei oba, ei launa. 29 Ma i weꞌidii ei fuana, mei ramaꞌa na balainia ma hufuꞌaa ei fuana, uaa napaꞌaa fei au hufuꞌa.”
Fei Warea Hanunuu fei Lau Mustard
30 Jesus na warediai, “O ware ba tawiꞌaa fei haparaiaa mei Haidaa aleꞌei tamanu? O hanunuinia aꞌa tamanu? 31 Tawiꞌana aleꞌena fei lau mustard, fei na paꞌaa pusuꞌoroi laraa ei lau yeni malagufu. 32 Maꞌuaa, ei roꞌaa faroia, na habe bauanai. Namina bauanaidiꞌininaa minaa ei haihai laloo peꞌihape. Ei rarana namina bauanai. Siꞌei, ei manufidufidu naꞌaida guta aꞌa fei giogiona.”
33 Watauda ei mau warea hanunu Jesus nafane hawawagifanaa ei ramaꞌa, ei na hawia ba roꞌaa apaꞌia. 34 Ma loꞌe ina wareaa hepalo manumanu aꞌa roꞌodu ba loꞌe na hanunuinia. Ei unaa roꞌou ei otalai nenerana, Jesus na wareꞌitalalafuinaa minaa ei manumanu.
Jesus na Famadinoaa fei Lama
35 Fei arewaa fei, i nofafilao, na ware aꞌa ei otalai nenerana ba, “O dii, o dinaa pepei.” 36 Rona diꞌininaa ei watauda ramaꞌa ma fatalenodugaa Jesus pafoo fei wa, fei na hugidii pafona ma aunu. Ma ana na paꞌi hefiꞌadiai wa rona aunufipui aꞌana. 37 Ma ina unaꞌaa fei baua lalarena ma fei agi na fuamaꞌiꞌi ma na rata fei lama ma na fuamaꞌiꞌinaa laloo fei wa ma anaa i lolo. 38 Jesus na maꞌigu i mugi pafoo hepalo duduna. Ma rona funifunia ei otalai nenerana. “Feroia, lomi ona narapaꞌaa oꞌodu ba oꞌaa wawauꞌu?”
39 Na asiꞌaa ma warenaa aꞌa fei lalarena ma fei lama ba “O famadumu.” Fei lalarena na rere ma fei lama namina madino.
40 Siꞌei na warenaa aꞌa ei otalai nenerana ba, “Tani hamoꞌamina maꞌau aleꞌei? Haa, atapoꞌo weꞌi naranaraa hamuꞌodu?”
41 Ronamina maꞌau ma fiꞌiꞌigai ba, “Ramaꞌa bata meni ba fei lalarena ma fei lama, ana na guaipaꞌaa wareana?”