Fei Narafaweꞌiaa mei Centurion
7
I pedu minaa ei uꞌugaa Jesus aꞌa ei ramaꞌa, na waduꞌainaa Capernaum. 2 Na paꞌi hemea na funu ma anaa i maꞌe. Hia nafii mei centurion, hemea na haꞌeinia mei pidauana. 3 Mei centurion na guainaa fei uꞌugaa Jesus ma na aloaa hefiꞌa bauaniaa ei Jew aꞌana ba ronei iꞌiginia ba nei nomai ma fapedugaa funuaa mei nafina. 4 Roꞌaa dinaa aꞌa Jesus, rona warefaꞌaiꞌai aꞌana. “Na rawani ba o bigiꞌia aꞌa meni ramaꞌa meni, 5 uaa ina haguaa gufuu oꞌodu ma faꞌufalarainaa fei synagogue oꞌou.” 6 Siꞌei, Jesus na aunuhugiaa roꞌou. I rafiꞌidiginaa fei humu, mei centurion na aloaa hefiꞌa tafina aꞌana ma rona wareaa ei wareana ba: “Mena Fasu, apuna naranara watauda ba o waduꞌainaa humuu, uaa yau hafeloꞌa ramaꞌa. 7 Sifei, fei paꞌafina ba lomi na nunumai ba a nomai aꞌamu. Maꞌuaa ware ua ma i pedu funuaa mei nafiu. 8 Uaa yau hemea na bigi haroo hemea na bauanadiai ma ana na paꞌi hefiꞌa foꞌaa rona bigi harou. A warenaa aꞌa mei, ‘Aunu,’ ma i aunu ma hemeadiai ba, ‘Nomai,’ ma i nomai. A warenaa aꞌa hemea nafiu, ‘Bigiꞌaa feni,’ ma i bigiꞌia.”
9 I guainaa fei Jesus, na baꞌarofo aꞌana ma momoꞌinaa aꞌa ei rona nenegia ma ware, “Apaꞌaa warefanaa hamuꞌou ba lomi na fanunupaꞌaa hemea na paꞌi narafaweꞌiana aleꞌei ma ana lomi na fanunupaꞌia aleꞌei aꞌa ei Israel.” 10 Ma ei talaitonaa warea, ronawe hadiweꞌidinaa fei humu ma fanunupaꞌia ba na pedu funuaa mei nafi.
Jesus na Faꞌasiꞌanaa mei Naꞌuu mei Pifine Maꞌesuabea
11 Nenee ei ma ataa madii, Jesus fipui aꞌa ei otalai nenerana ma fei baua gupuu ramaꞌa, rona dinaa hepalo gufu, harana Nain. 12 Anaa i rafiꞌinaa fei poaa fanefanee fei gufu, hefiꞌa rona tabenaa ano hemea baduu wawane maꞌea, naꞌuu hemea pifine maꞌesuabea. Ma fei baua gupuu ramaꞌaa fei gufu, ana roꞌou i aꞌa mei pifine. 13 I fanunupaꞌia mei Fasu, na faloloaꞌinia ma warenaa aꞌana, “Apuna aiꞌai.”
14 Ina aunulao ma idoaa fei bao maꞌea. Ma ei roꞌaa poroꞌia, rona ufamadumu. Ina ware, “Mena baubara, a warenaa aꞌamu, asiꞌaa!” 15 Mei maꞌea na asiꞌaguta ma wareware. Ma Jesus na duginaa hia aꞌa inana.
16 Minaa roꞌou, ronamina maꞌau ma uduginaa mei Haidaa ma ware, “Hemea baua mamamaꞌa na faꞌarewa aꞌa oꞌodu. Mei Haidaa na nomai ba i hadumaa ei gufuna.” 17 Fei uꞌugaa Jesus fei, namina talaipedunaa ei gufu i Judeaa mawe minaa ei gufu i sugatataꞌaia.
Jesus ma John mei Pudugufaia
18 Ei otalai neneraa John, rona uꞌufania eni manumanu eni. Ina harofamiaa helagui 19 ma alonaa lagua aꞌa mei Fasu ba lagunei iꞌiginia aleꞌei, “Yoi hemei ba i nomai, o haiꞌounei doꞌo omaꞌaa nemeadiai?”
20 Laguꞌaa dinaloo aꞌa Jesus, laguna ware, “John, mei pudugufaia na aloamiaa haigua ba haigunei iꞌiginio, ‘Yoi hemei ba i nomai, o haiꞌounei doꞌo omaꞌaa nemeadiai?’”
21 Aꞌa fei au fei, Jesus na farawaninaa watauda na malaꞌuꞌu unuu roꞌou, ei funuaa, ei na waduꞌaa roꞌou spiriti hafelo ma ei pudawerai. 22 Siꞌei, ina warenaa aꞌa laguei talaitonaa warea, “Hadiweꞌai ma uꞌufanaa John ei fanunuguaiaa hamugua: ba ei pudawerai nawe fafanunu, ei afetoo nawe talai, ei watawataib nawe mafo, ei lotoo adia nawe guaipaꞌi, ei maꞌea na asiꞌaa ma ei loꞌe mugoo poꞌi, rona guainaa fei rawaniꞌa warea. 23 Baua niꞌeniꞌea aꞌa mei lomi na pasipaꞌai uaa yau.”
24 Laguꞌaa didii laguei talaitonaa wareaa John, Jesus nawe uꞌugaa John aꞌa fei gupuu ramaꞌa: “Ei hamona dinaa fawelei lomi haihai o guana, ba hamoree maꞌa fei guana, fei na gugufainia fei lalarena? 25 Nabaa abaa sifei, paꞌaa tamanu fei hamoꞌaree maꞌaia—hemea na maurawani hawerana? Lomi. Ena ramaꞌa na maurawani haweraa roꞌou, ei na paꞌipedu manumanu, rona guta laloo ei baua humuu hapara. 26 Maꞌuaa hamona aunu ba hamoꞌaa maꞌa tamanu? Hemea mamamaꞌa? Hiꞌi, maꞌuaa a warefanaa hamuꞌou ba hia, abaa mamamaꞌa ua. 27 Simei, mei rona uꞌugia laloo ei neꞌia:
“‘Guainau! A we aloamai mei talaitonaa wareau maꞌamu,
mei i raꞌafanaa fei talamu.’
28 A warefanaa hamuꞌodu ba lomi hemea dupuaa ei waniniaa ei pifine i muainaa John; maꞌuaa mei paꞌaa lomi harana haroo fei haparaiaa mei Haidaa i muainia.”
29 (Minaa ei ramaꞌa ma ei otonaa mugoo poꞌii gavaman anaa, roꞌaa guainaa ei wareaa Jesus, ronawe ware ba fei talaa mei Haidaa na wanewane, uaa rona pudugufai aꞌa John. 30 Maꞌuaa ei Pharisee ma ei rona paꞌi apaꞌaa roꞌou aꞌa fei law, rona ofadugaa fei bigiꞌa, fei na fanaa roꞌodu mei Haidaa, uaa lomi rona pudugufai aꞌa John.)
31 “Yau, a hawawaginaa eni ramaꞌaa feni au feni aꞌa tamanu? Batanai maumau roꞌou? 32 Roꞌou aleꞌei ei baduu na guta yei humuu aloꞌalo ma fiharoharofii:
“‘Haiꞌouna hafugaa fei haꞌifa
ma lomi hamona palapala;
haiꞌouna laugaa hepalo laugaa maꞌea,
maꞌuaa lomi hamona aiꞌai.’
33 Uaa, John, mei pudugufaia lomi na nohanamai faraa pidaua ma hunu wine ma hamona ware, ‘Na waduꞌia pigea.’ 34 Ma Mei Naꞌuu Ramaꞌa na nohanamai ma hunu ma hamona ware, ‘Hia pugua ma na hunu poapoai; hia tafii ei otonaa mugoo poꞌii gavaman mawe “ei hafeloꞌa”.’ 35 Maꞌuaa ei rona biginaa fei apaꞌaa mei Haidaa, rona faꞌarewaia ba na wanewane.”
Mei Hafeloꞌa Pifine na Ipinaa Jesus fei Dufaa Pao.
36 Ma hemea Pharisee na iꞌiginaa Jesus ba nei hananafipui aꞌana. Siꞌei, na dinaa humuu mei Pharisee ma gutafapalagi ditataa fei tawa. 37 Na paꞌi hemea pifine na hafelo bigiꞌana aꞌa fei gufu fei. Ma i guainia ba Jesus i hanana humuu mei Pharisee, ina tonamai hepalo pusuꞌoro peꞌi dufaa pao 38 ma ei fi uwawasusu mugina na farorofanaa pinena fei ranuu pudana. Ma nawe huguaa pinena aꞌa fei loaa tabana. Na hatofaa pinena ma ipiaa fei dufaa pao pafoo pinena.
39 I fanunuia mei Pharisee, mei na fagutanaa Jesus, na bababauꞌu naranarana, “Nabaa meni ramaꞌa meni, hia mamamaꞌa, i apaꞌidigia hini i idoia ma hia pifine bata—ba hafeloꞌa pifine.”
40 Jesus na warenaa aꞌana, “Simon, na paꞌi wareau aꞌamu.”
Ma na ware, “Nadii, warefanau, mena feroia.”
41 “Helagui ramaꞌa, laguna to mugoo poꞌi aꞌa hemea naꞌo fani mugoo poꞌi. Hemea lagua na tonaa haipani puꞌu denariusc aꞌana ma hemea lagua na tonaa haipani paꞌania. 42 Minaa lagua, lomi na hodipaꞌia, siꞌei na famaꞌeꞌuaiaa ei tonaa lagua. Amaia lagua na bauana haguana aꞌa mei i fani mugoo poꞌi?”
43 Simon na ware, “Narau ba mei i to watauda mugoo poꞌi ma na famaꞌeꞌuaiaa ei tonana mei na fani.”
Jesus na ware, “Ona narapaꞌia.”
44 Siꞌei, na momoꞌinaa aꞌa mei pifine ma warenaa aꞌa Simon, “Ona maꞌaia meni pifine meni? Una waduꞌaimai humumu ma lomi ona gufifani fesufesuu pineu, maꞌuaa ina fesunaa pineu ranuu pudana ma hugunaa loaa tabana. 45 Lomi ona hatofaa pudau, maꞌuaa, meni pifine meni, ana fi waduꞌaiꞌuamai lomi na fafaa hatofaa pineu. 46 Lomi ona ipi pao tabau, maꞌuaa, hia na ipinaa tabau fei dufaa pao. 47 Siꞌei a warefanio, ena watauda hafeloꞌana na futo, uaa na bauana fei haguana. Maꞌuaa hini na futo maꞌida ua hafeloꞌana, ana maꞌida ua haguana.”
48 Siꞌei, Jesus na warenaa aꞌana, “Ei hafeloꞌamu, na futo.”
49 Hefiꞌadiai rona guta yei, rona fiwarewarei, “Hia hini ba i futoaa ei hafeloꞌaa ei ramaꞌa?”
50 Jesus na warenaa aꞌa mei pifine, “Fei narafaweꞌiamu na fatelaio; aunufaꞌaꞌa ua.”