Jesus mawe John, mei Pudugufaia
11
Iꞌa feroidigaa ei hefua ma helagui otalai nenerana Jesus, ina diꞌininaa fawelei ma aunulao ba i feroi ma uꞌu aꞌa ei gufu yei Galilee.a 2 John, i laloo humuu boboꞌaia ma iꞌa guainaa tamanu ei bigiꞌaa Christ, ina alonaa ei otalai nenerana aꞌana 3 ba roneiree iꞌiginia, “Haa, yoi mei ba i nomai, o haiꞌou omaꞌaa hemeadiai?”
4 Jesus na ware, “Nowau ma uꞌufanaa John tamanu hamona guainia ma fanunuia: 5 ei pudawerai, rona fanunudiai, ei afetoo, rona talaidiai, ei watawatai,b rona rawanidiai, ei lotoo adia, rona guaidiai, ei maꞌea, rona asiꞌaa ma ina uꞌugaa fei rawaniꞌa warea aꞌa ei lomi manumanu. 6 Ina paꞌi hawegiana mei lomi na pasi uaa yau.”
7 Roꞌaa asiꞌaa ba ro aunu ei otalai neneraa John, Jesus nawe warefanaa fei gupuu ramaꞌa fei uꞌugaa John, “Tamanu fei ba hamoꞌaa fanunuia fawelei abaa wawawau ramaꞌa? Ba hamoꞌaa fanunuaa fei tarea guana na gufifababaia fei lalarena? 8 Nabaa lomi, tamanu fei hamoree fanunuia? Hemea na susuinaa ei rawaniꞌa susu? Loꞌe, ei rona rafeaa ei rawaniꞌa susu, rona guta i laloo ei humuu ei hapara. 9 Paꞌaa tamanu fei hamoꞌaree fanunuia? Hemea mamamaꞌa? Uꞌei warefanaa hamuꞌou ba hiꞌi. Maꞌuaa hia, abaa mamamaꞌa ua. 10 Simei, mei roꞌadii neꞌiꞌuꞌugia:
“‘Awe aloaa mei talaitonaa wareau i maꞌamu,
mei ba i pagipagiꞌaugaa fei tala i maꞌamu.’
11 A warefaꞌuai aꞌa hamuꞌou ba: aꞌa minaa ei waniniaa ei pifine, lomi hemea na muainaa John, mei pudugufaia; maꞌuaa, mei hia abaa mau ramaꞌa ma na oa laloo fei haparaia pafea, ina muainaa John. 12 Aꞌa fei au John, mei Pudugufaia, nopaꞌamii wagieni, fei haparaia pafea, ifimina fagipelao, lomi hepalo manumanu i lawagia ma ei didigii ramaꞌa, rona urofia. 13 Uaa minaa ei mamamaꞌa ma fei Law, nadii wareꞌaugia, nopaꞌamii fei au John. 14 Ma nabaa na rawani aꞌa ei naranaraa hamuꞌou, a warefanaa hamuꞌou ba hia, Elijah, mei ba i nomai. 15 Hini na paꞌi adiana, inei guai.
16 “Uꞌa hawawaginaa hamuꞌou taweni aꞌa tamanu? Roꞌou, aleꞌei ei baduu rona guta i fawelei rona aloꞌalo ma rona haroharonaa aꞌa hefiꞌa ba,
17 “‘Haiꞌouna hugufaa fei flute
ma hamuꞌou, lomi hamona palapala;
haiꞌouna laugaa hepalo laugaa faloloaꞌia
ma lomi hamona faloloaꞌi.’
18 Uaa John na nomai ma lomi na hanana o hunu ma rona ware ba, ‘Ina tauia pigea.’ 19 Ina nohunumai ma hananamai mei Naꞌuu Ramaꞌa ma rona ware ba, ‘Ina puguai ma hunupoapoai ma hia, tafii ei otonaa mugoo poꞌii gavaman mawe ei “ramaꞌa hafelo.” ’ Maꞌuaa fei apaꞌa, ana na famaꞌaiaa oꞌou tamanu na wanewane wagii fei bigiꞌana.”
Rona Fagiana ei Baua Gufu Lomi Rona Filoginaa Naranaraa Roꞌou
20 I dii, siꞌei ba lomi rona filoginaa naranaraa roꞌou, Jesus fipowe wareaa ei tataa ei baua gufu, ei gufu ina bigiꞌaa watauda foigia aꞌa roꞌou laraa hefiꞌadiai gufu. 21 “Ona fagiana yoi, Korazin! Ona fagiana yoi, Bethsaida! Ei foigia una bigidigia aꞌa hamugua, nabaa una bigiꞌia yei Tyre ma Sidon, laguna filogidigaa minaa ei naranaraa lagua aꞌa ei madigee lawalawa ma ei maduhafi. 22 Maꞌuaa uꞌei warefanaa hamugua ba aꞌa fei arewaa dududua, na bauanadiai fei aree hamugua laraa Tyre ma Sidon. 23 Ma yoi, Capernaum, i poronaa yoi pafea? Loꞌe, yoi o momogunaa fei walaloa.c Ei foigia una bigidigia aꞌamu, nabaa una bigiꞌia aꞌa Sodom, ana ifi udemai wagieni. 24 Maꞌuaa uꞌei warefanio ba aꞌa fei arewaa dududua, na bauanadiai fei lagimu laraa Sodom.”
Guta Fawenaiaa ei Rona Temu
(Luke 10:21, 22)
25 Aꞌa fei au fei, Jesus na ware, “Una uduginio, Oꞌama, mena Fasuu fena pafea ma feni malagufu, uaa ona opaꞌainaa ei manumanu ei aꞌa ei anoꞌano mawe ei rona tonaa baua feroia maꞌuaa, ona faꞌarewaia aꞌa ei pusuꞌo baduu. 26 Hiꞌi, Oꞌama, onapaꞌaa nunuminia ba inei aleꞌei.
27 “Minaa ei manumanu ei, inadii aunaa paniu mei Amau. Lomi hemea na apaꞌaa mei Naꞌu, ana unaa mei Ama; ma lomi hemea na apaꞌaa mei Ama, ana unaa mei Naꞌu mawe ei ina nunuminia mei Naꞌu ba i faꞌarewaia aꞌa roꞌou.
28 “Nomai aꞌau minaa hamuꞌou, ena hamona temu ma na paꞌi rarabaa hamuꞌou ma a fagutafawenainaa hamuꞌou. 29 Hupuꞌaifipui aꞌau ma to apaꞌaa hamuꞌou aꞌau uaa fei maumauu namina rawani ua ma lomi una mamagugu ma hamuꞌou, hamowe gutafawenainaa ena naranaraa hamuꞌou. 30 Uaa, nabaa hamoꞌaa hupuꞌaifipui aꞌau, lomi ba hamoꞌaa temu ma lomi hamoꞌaa harenaa hefiꞌa awataa manumanu aꞌau.”