3 Ina warenaa aꞌa roꞌou, “Haa, lomi hamona igoaa tamanu David mawe ei maroana rona bigiꞌia ei roꞌaa bao? 4 Ina waduꞌainaa fei humuu mei Haidaa ma fipui aꞌa ei maroana, rona hanaiaa fei faraa pidaua na apunai, fei auꞌuꞌugaiaa roꞌou, fei ba wagii fei law roneiꞌaa hanaia, maꞌuaa, unaa ei bauaniaa humuu mei Haidaa ronei hanaia. 5 Ma ana lomi hamona igoia laloo fei Law ba aꞌa fei Sabbath, ei bauania laloo fei humuu mei Haidaa, ronaꞌaida bigi ma siꞌei rona fafeloaa fei arewaa maꞌuaa, ana lomi rona tata. 6 Uꞌei warefanaa hamuꞌou ba mei^a na muainaa fei humuu mei Haidaa, hia yeni. 7 Lomi ba hamoꞌaa ware ba rona bigifatata ei rawaniꞌa ramaꞌa nabaa hamona aidadii hanuu feni warea feni, ‘Una nunuminaa faloloaꞌia, abaa ei fana.’ 8 Uaa mei Naꞌuu Ramaꞌa, Fasuu fei Sabbath.”

9 Iꞌa diꞌininaa fei gufu fei, na waduꞌainaa laloo fei synagogue roꞌou 10 ma hemea ramaꞌa na maꞌe hepapa panina, ana hia yei. Siꞌei ba roꞌaa labarai talawareaa roꞌou ba na tata Jesus, rona iꞌigainia, “Ina rawani aꞌa fei law ba oꞌaa farawaninaa ei funua aꞌa fei Sabbath?”

11 Ina warenaa aꞌa roꞌou, “Nabaa nemea hamuꞌou na paꞌi hapena sipsipi ma ina pasinaa hepalo huapu aꞌa fei Sabbath, lomi oꞌaa taufaꞌasiꞌania? 12 Hemea ramaꞌa na awatadiai laraa hepalo sipsipi! Siꞌei, ina rawani aꞌa fei law ba oꞌaa bigiꞌaa ei rawaniꞌa manumanu aꞌa fei Sabbath.”

13 Siꞌei, ina warenaa aꞌa mei i maꞌe hepapa panina, “Roainalao fei panimu.” Hee, ina roainia ma namina rawanidiai, ana aleꞌei raudei i rawani. 14 Maꞌuaa ei Pharisee, rona aunu ma fiwarewarei ba batanai roꞌaa foꞌafamaꞌeaa Jesus.

15 Jesus na aida fei ma na diꞌininaa fei gufu fei. Watauda, rona nenegia ma ina farawaninaa minaa ei funuaa roꞌou 16 ma na warefaweꞌi aꞌa roꞌou ba roneiꞌaa uꞌu ba hia hini. 17 Hefei, ba i fafaꞌuainaa tamanu nadii wareia Isaiah, mei mamamaꞌa:

22 I dii, rona noduginamii aꞌana hemea ramaꞌa na waduꞌia pigea, mei na pudawerai ma umuloo ma Jesus na fawanewaneia aleꞌei ba inei warepaꞌi ma fanunupaꞌi. 23 Minaa ei ramaꞌa, ronamina baꞌarofo ma rona ware, “Haa, simeni, meni Naꞌuu David?”

24 Maꞌuaa roꞌaa guainia ei Pharisee, rona ware, “Aꞌa fei faufau Beelzebub,^b mei haparaa ei pigea, meni ramaꞌa meni, na fawalaꞌanaa ei pigea.”

25 Jesus na apaꞌaa ei naranaraa roꞌou ma na ware, “Minaa ei gufuu ei hapara, nabaa roꞌaa fifalagii, roꞌaa borosi ma minaa ei baua gufu, o humu, nabaa roꞌaa fifalagii, lomi roꞌaa ufalarai. 26 Nabaa Satan na fawalaꞌanaa ana Satan, ina fifalagii anaia. Ma batanai ba fei haparaiana i ufalarai? 27 Ma nabaa faꞌua ba una fawalaꞌanaa ei pigea aꞌa fei faufau Beelzebub, ei ramaꞌa gufuu hamuꞌou, roꞌaa fawalaꞌanaa ei pigea aꞌa fei faufau hini? Siꞌei, ana roꞌou ua, roꞌaa ware ba ei wareaa hamuꞌou na tata. 28 Maꞌuaa, nabaa una fawalaꞌanaa ei pigea aꞌa fei Spiritii mei Haidaa, te, fei haparaiaa mei Haidaa na nodigimai aꞌa hamuꞌou.

29 “Ma hepalodiai, batanai ba hemea i waduꞌaiporopaꞌainaa ei manumanu humuu hemea faufau ramaꞌa nabaa lomi nadoꞌo roroꞌai mei faufaua? Maꞌuaa, nabaa i roroꞌinia, ipowe topaꞌainaa ei manumanuu humuna.

30 “Hini lomi na oa aꞌau, ana lomi na nunuminau ma hini lomi na haufipui aꞌau, ina larosumai. 31 Siꞌei, uꞌei warefanaa hamuꞌou ba minaa ei hafeloꞌa ma ei rona warefafeloaa mei Haidaa, mei Haidaa i futoia maꞌuaa, lomi ba i futoia nabaa rona warefafeloaa fei Spiriti. 32 Hini i warefafeloaa mei Naꞌuu Ramaꞌa, mei Haidaa, i futoia, maꞌuaa hini i warefafeloaa fei Spiriti Apuna, lomi ba i futoia aꞌa feni au feni, o fena au ataa nomai.

33 “Farawaninaa fei haihai ma ei fuana i rawani, o fafeloaa fei haihai ma ei fuana i hafelo, uaa oꞌaa fanunuꞌapaꞌaa fei haihai aꞌa ei fuana. 34 Hamuꞌou ena naꞌuu waꞌa hafelo, batanai ba hamuꞌou ena hafeloꞌa, hamoꞌaa wareaa ei rawaniꞌa warea? Uaa, tamanu na pepesu laloo ei naranara, fei poa i wareia. 35 Mei rawaniꞌa ramaꞌa i wareaa ei rawaniꞌa, ei na ude laloo naranarana ma mei hafeloꞌa i wareaa ei hafeloꞌa, ei na ude i laloo naranarana. 36 Maꞌuaa uꞌei warefanaa hamuꞌou ba aꞌa fei arewaa dududua, ei ramaꞌa, roꞌaa to aree roꞌou aꞌa minaa ei warefalaraa roꞌou. 37 Uaa wagii ei paolaa wareaa hamuꞌou, hamoꞌaa to aree hamuꞌou, o loꞌe.”

38 I dii, hefiꞌa ei Pharisee mawe ei feroiaa law, rona warenaa aꞌana, “Feroia, haiꞌouna nunuminia ba onei bigiꞌaa hepalo hilalaa foigia i pudaa haiꞌou.”

39 Ina ware, “Hamuꞌou ena ramaꞌa hafelo, ena lomi na oafagugu aꞌa feni au feni, hamona iꞌiginau ba unei bigiꞌaa hepalo hilalaa foigia! Lomi ba a famaꞌaia, maꞌuaa, sifeni ua ba a famaꞌaia, fei hilalaa mei mamamaꞌa Jonah. 40 Uaa ana aleꞌei ba Jonah na oa oduꞌai arewaa ma oduꞌai poi i laloo iaa fei baua nia ma ana aleꞌei, mei Naꞌuu Ramaꞌa, iwe oa oduꞌai arewaa ma oduꞌai poi i laloo feni malagufu. 41 Aꞌa fei arewaa dududua, ei Nineveh, roꞌawe ufipui aꞌa taweni ma roꞌaa dududuaa roꞌou; uaa rona filoginaa naranaraa roꞌou aꞌa ei uꞌugaa Jonah ma eꞌeni na paꞌi hemea^c yeni na muainaa Jonah. 42 Aꞌa fei arewaa dududua, mei Pifine Hapara noramiana Haraꞌuu, i asiꞌafipui aꞌa taweni ma dududuaa roꞌou; uaa noranamai susuweꞌii gufu ba i guainaa fei apaꞌaa Solomon ma eꞌeni ina paꞌi hemea yeni na muainaa Solomon.

43 “Nabaa hepalo spiriti hafelo^d i walaꞌaa aꞌa nemea ramaꞌa, i dinaa aꞌa ei gufu na hapera ba i labarainaa gutafawenaiana, lomi na labagipaꞌi. 44 I dii, ipowe ware, ‘Yau, a hadiweꞌinaa aꞌa fei humu una diꞌininia.’ Iꞌa hadiweꞌimai, na fanunupaꞌia ba lomi hemea na guta lalona ma na apagidii fei humu ma minaa ei manumanu lalona na udelafui. 45 I dii, ina dugamai olorompalodiai spiriti rona hafelodiai lara hia ma rona waduꞌaiguta yei. Ma fei gutanaa mei ramaꞌa mei, namina hafeloꞌapoi laraa fei gutanana famaꞌa. Ana aleꞌei hinene aꞌa feni hafeloꞌa taweni.”

46 Ei ifi warewarelao aꞌa fei gupuu ramaꞌa Jesus, mei inana mawe ei lofuna, rona u ano ba roꞌaa wareware aꞌana. 47 Hemea na warefania, “Mei inamu mawe ei lofumu, rona u ano ba roꞌaa wareware aꞌamu.”^e

48 Ina warefania, “Hini mei inau ma ei lofuu?” 49 Ina uninaa fei panina aꞌa ei otalai nenerana ma na ware, “Siꞌeni, eni inau mawe eni lofuu. 50 Uaa hini i bigiꞌaa ei nunumiaa mei Amau pafea, hia, lofuu, agiu ma inau.”