Fei Warea Hanunuu ei Hefua Nanao
25
“Aꞌa fei au fei, fei haparaia pafea, tawiꞌana aleꞌei hefua nanao rona tonaloo ei ramai roꞌou ma aunu ba roꞌaa maꞌa mei wawane lalaia. 2 Haipaniei poapoa ma haipaniei anoꞌano nanao. 3 Ei poapoa, rona notonaa ei ramai roꞌou, maꞌuaa lomi rona notoo pao. 4 Maꞌuaa ei anoꞌano, rona notolao ramai ma pao fininaa ei peꞌi. 5 Ma na madii maꞌida fei noramiaa mei wawane lalaia ma na pasiholehole pudaa minaa roꞌou ma rona maꞌigu.6 “Poidifaꞌuꞌu hemea ramaꞌa na haroharo: ‘Simeni, meni wawane lalaia! Asiꞌamai ma mi maꞌaia!’
7 “Ma minaa ei nanao, rona wera ma faweꞌafarawaninaa ei ramai roꞌou. 8 Ei poapoa, rona warenaa aꞌa ei anoꞌano ba, ‘Igifani pao eni ramai haiꞌou; fi pere eni ramai haiꞌou.’
9 “Rona ware ba, ‘Lomi na hawia haiꞌou ma hamuꞌou. Maꞌuaa aununaa aꞌa ei ronaꞌo alo pao ma pono pao hamuꞌou.’
10 “Maꞌuaa ei roifi nolao ba roꞌaa pono pao, mei wawane lalaia na nomai. Ei nanao ei rona omaꞌa, rona waduꞌai ma hananafipui aꞌana fei hananaa lalaia. Ma fei gigei na fareꞌi.
11 “Nene, ei haipanidiai, rona nomai. Rona ware, ‘Mena lalaia! Mena lalaia! Gigifanaa haiꞌou fei gigei!’
12 “Maꞌuaa ina ware, ‘Apaꞌaa warefaꞌuai ba lomi una apaꞌaa hamuꞌou.’
13 “Siꞌei, hamonei omaꞌa, uaa lomi hamona aida fei arewaa, o fei au.
Fei Warea Hanunuu ei Mugoo Poꞌi
14 “Ma ana aleꞌei hemea ba i tatalai gufu raua, mei na harofaa ei nafina ma fanaa ei manumanuna aꞌa roꞌou ba ronei omaꞌaia. 15 Aꞌa hemea ina fanaa haipani mugoo poꞌi.a Aꞌa hemeadiai, na fanaa guapalo ma aꞌa hemeadiai, hepalo; ina fanaa hememea ana aleꞌei na puduaa apaꞌana. Ma ina aunulao aꞌa fei tatalaiana. 16 Mei na tonaa haipani na aunubatafa ma bigi aꞌa ei mugoo poꞌina ma na to haipanidiai. 17 Ana aleꞌei, hemei na tonaa guapalo, ina to guapalodiai. 18 Maꞌuaa mei na tonaa hepalo na aunu ma agiꞌopaꞌainaa fei mugoo poꞌii mei fasuna.
19 “I madilao, na nomai mei fasuu ei nafi ba i fawanewaneaa ei mugoo poꞌi aꞌa roꞌou. 20 Mei tonana haipani na todimai haipani. Ina ware, ‘Mena fasu, onadii faninaa paniu haipani. Maꞌa, una pafoinaa haipanidiai.’
21 “Mei fasuna na ware, ‘Ona bigifarawani mena rawaniꞌa nafiu, ona narapaꞌau! Siꞌei ba ona omaꞌafarawaninaa maꞌida manumanu; a aunaa yoi omaꞌaa watauda manumanu. Mi niꞌeniꞌefipui aꞌau!’
22 “Mei tonana guapalo ana na nomai. Ina ware, ‘Mena fasu, onadii faninaa paniu guapalo. Maꞌa, una pafoinaa guapalodiai.’
23 “Mei fasuna na ware, ‘Ona bigifarawani mena rawaniꞌa nafiu, ona narapaꞌau! Siꞌei ba ona omaꞌafarawaninaa maꞌida manumanu; a aunaa yoi omaꞌaa watauda manumanu. Mi niꞌeniꞌefipui aꞌau!’
24 “I dii, inawe nomai mei tonana hepalo ma ware, ‘Mena fasu, una aidadii ba yoi, hemea onaꞌo nunuminia ba ei ramaꞌa, ronei bigifaweꞌi aꞌamu, onaꞌo hufu fawelei abaa faroamu ma onaꞌo hau fawelei lomi ona sumai lau. 25 Siꞌei, una maꞌau ma na aunuꞌagifipaꞌainaa fei mugoo poꞌimu. Maꞌa, ana sifeni, feni mugoo poꞌimu.’
26 “Ina ware mei fasuna, ‘Yoi, paꞌaa tamafo ma hafeloꞌa nafi! Haa, ona aidadii ba unaꞌo hufu fawelei abaa faroau ma unaꞌo hau fawelei lomi una sumai lau? 27 Ona aida ba yau aleꞌei, na? Nabaa onadii augaa fei mugoo poꞌiu laloo fei humuu mugoo poꞌi, una hadiweꞌimai a todiai maꞌida mugoo poꞌi pafona.
28 “‘Tonaa fei mugoo poꞌi aꞌana ma fanaa mei na paꞌi hefua. 29 Uaa hini na paꞌi, i todiai ma iwe paꞌi watauda. Hini lomi na paꞌi, tamanu maꞌidei hodihodiana, nemea i tohadiweꞌinia aꞌana. 30 Faꞌasiꞌanaa i ano mei hafeloꞌa nafi wagii fei roromaa, fei na paꞌi aiꞌaiga ma fiꞌuꞌuiaa difo.’
Ei Sipsipi ma ei Memee
31 “Ena na nomai mei Naꞌuu Ramaꞌa nofininamii ei hawerana fipuinaa minaa ei aloꞌalona, iwe guta pafoo fei gutanaa hapara wagii fei haweraa fei gufu pafea. 32 Minaa ei gufu tadiweꞌai, roꞌaa figupuimai i maꞌana ma iwe fiꞌalaginaa ei ramaꞌa ana aleꞌei hemei omaꞌamaꞌaa ei sipsipi na fiꞌalaginaa ei sipsipi ma ei memee. 33 Iwe aunaa ei sipsipi raudei maꞌauna ma ei memee raudei mauwina.
34 “I dii, mei Hapara, i warenaa aꞌa ei pepei maꞌauna, ‘Nomai, hamuꞌou ena na haweginaa hamuꞌou mei Amau; tonaa ei ponoꞌaa hamuꞌou, ei na pagidigia mina, wagii fei au i famamaraiaa feni malagufu. 35 Uaa una bao ma hamona faguau, una sigigi ma hamona fani numau, lomi gufuu ma hamona taufaꞌugau, 36 lomi lawalawau ma hamona falalawainau, una funu ma hamona roinau, yau humuu boboꞌaia ma hamonamii maꞌa yau.’
37 “Ma ei wanewanea, roꞌawe warenaa aꞌana ba, ‘Mena fasu, haiga ei haiꞌouna maꞌapaꞌio ba ona bao ma haiꞌouna faguio, o ona sigigi ma haiꞌouna fani numamu? 38 Haiga ei haiꞌouna maꞌapaꞌio ba lomi gufumu ma haiꞌouna taufaꞌugio, o lomi lawalawamu ma haiꞌouna falalawainio? 39 Haiga ei haiꞌouna maꞌapaꞌio ba ona funu, o yoi humuu boboꞌaia ma haiꞌounaree maꞌa yoi?’
40 “Mei Hapara, iwe ware ba, ‘Uꞌeipaꞌaa ware aꞌa hamuꞌou ba ei hamona bigiꞌaa eꞌei aꞌa hemea lofuu, hemea lomi baua harana, ana aleꞌei hamona bigiꞌia aꞌau.’
41 “Ma iwe warenaa aꞌa ei i pepei mauwina ba, ‘Hamuꞌou ena una umuaa hamuꞌou, difaraua aꞌau ma dinaa i aꞌa fei hafi lomi i peretoo, fei di pagiꞌaugau ba hafii mei haniꞌu ma ei aloꞌalona. 42 Uaa, una bao ma lomi hamona faguau, una sigigi ma lomi hamona fani numau, 43 lomi gufuu ma lomi hamona taufaꞌugau, lomi lawalawau ma lomi hamona falalawainau, una funu ma yau humuu boboꞌaia ma lomi hamona roinau.’
44 “Ana roꞌawe ware ba, ‘Mena fasu, haiga ei haiꞌouna maꞌapaꞌio ba ona bao, o ona sigigi, o lomi gufumu, o lomi lawalawamu, o ona funu, o yoi humuu boboꞌaia ma lomi haiꞌouna hadumio?’
45 “Iwe ware, ‘Uꞌeipaꞌaa warefaꞌuai aꞌa hamuꞌou ba tamanu lomi hamona bigiꞌia aꞌa hemea lomi na bauana harana, ana lomi hamona bigiꞌia aꞌau.’
46 “Ma roꞌawe tonaa fei fagianaa lomi i pedutoo, maꞌuaa ei wanewanea, roꞌawe tonaa fei harenua lomi i pedutoo.”