Jesus na Fesuaa Pinee ei Otalai Nenerana
13
Eꞌeni, anaa i paꞌaa fei Hananaa fei Talai Falogia. Jesus na aida ba na nodigimai fei au ba i diꞌininaa feni malagufu ma dinaa aꞌa mei Ama. Ina haguaa ei maroana yeni malagufu ma eꞌeni i famaꞌaiaa roꞌou ba namina bauana fei haguana roꞌou.a 2 Roi hasumaa ei finei fei fafi ma mei haniꞌu na fanidii naranaraa Judas Iscariot mei naꞌuu Simon ba nei aloaa Jesus. 3 Jesus na aidadii ba mei Ama na audigaa minaa ei manumanu haroo fei faufauna ma ba hia, noramiana aꞌa mei Haidaa ma ba iwe hadiweꞌinaa aꞌa mei Haidaa; 4 siꞌei ina asiꞌaa aꞌa fei hananaa, dudumaa fei hawaa uguna ma moꞌinaa fei huguu unu walana. 5 Nenee fei, ina igi ranu laloo hepalo peꞌii ranu, na fesuaa pinee ei otalai nenerana ma huguaa pinee roꞌou wagii fei moꞌiana huguu unu.
6 Ina dinaa aꞌa Simon Peter ma Peter na ware aꞌana ba, “Mena Fasu, ba o fesuaa pineu?”
7 Jesus na ware, “Lomi ona aida ba a bigiꞌaa tamanu, maꞌuaa hinene owe aida.”
8 Na ware Peter, “Loꞌe. Paꞌaa lomi ba owe fesuaa pineu.”
Jesus na ware, “Nabaa lomi a fesuaa pinemu, ana lomi yoi aꞌau.”
9 Simon Peter na ware, “Nadii, mena Fasu, abaa unaa fei pineu, maꞌuaa paniu ma tabau anaa.”
10 Jesus na ware, “Nabaa nemea na nunudii, inei fesu ua pinena; minaa ei ununa na fafaꞌaraidii. Hamona fafaꞌarai, maꞌuaa aꞌa ba minaa hamuꞌou.” 11 Uaa, ina aida ba hini iwe aloia ma siꞌei i ware aleꞌei ba aꞌa ba minaa roꞌou na fafaꞌarai.
12 I fesudigaa pinee roꞌou, na rafeaa fei hawaa uguna ma hadiweꞌidinaa fei gutanana. Ina iꞌiginaa roꞌou, “Hamona aida ba tamanu fei a bigiꞌia aꞌa hamuꞌou? 13 Hamona harofau ba, ‘Feroia’ ma ‘Fasu’ ma na wanewane fei, uaa yau aleꞌei. 14 Siꞌei ba yau Fasu ma Feroiaa hamuꞌou, una fesuaa pinee hamuꞌou. Ma hamonei fesuaa pinee ana hamuꞌou. 15 Una bigiꞌaa fei i pudaa hamuꞌou ba hamonei bigiꞌia aꞌa ana hamuꞌou ana aleꞌei a bigiꞌia aꞌa hamuꞌou. 16 A warefaꞌuai aꞌa hamuꞌou ba mei tamelo, lomi i muainaa mei fasuna ma mei talaitonaa warea, lomi i muainaa mei na aloia. 17 Eꞌeni hamona aidadii eꞌei ma hamowe to hawegia nabaa hamoꞌaa bigiꞌia.
18 “Aꞌa ba uꞌeimina warenaa minaa hamuꞌou; una aida ba hini ei rafeiau. Maꞌuaa hefeni ba i fafaꞌuainaa fei Buꞌu Apuna: ‘Mei i hananafipui aꞌa fei hanau faraa pidaua na fadugeau.’
19 “A warefaniꞌaugaa hamuꞌou eni atawe migimigii uaa ena nawe sufudai, hamowe apaꞌia ba yau Mei. 20 A warefaꞌuai aꞌa hamuꞌou ba hini i ugainaa mei i aloagiau, ana na ugainau ma hini i ugainau, ana na ugainaa mei i aloagiau.”
Jesus nadii Ware ba Hemea, i Aloia
21 I waredigaa fei Jesus, namina fiꞌi laloo spiritina ma na ware ba, “A warefaꞌuai aꞌa hamuꞌou ba hemea hamuꞌou i fifaninau panii hefiꞌa.”
22 Ei otalai nenerana, rona fifanunui ma paꞌaa lomi rona aida ba fi wareaa hini roꞌou. 23 Hemea roꞌou, mei na haguia Jesus, ina gutafapalagi papana. 24 Simon Peter na fabiyeinaa tabana aꞌa mei ma ware, “Iꞌiginia ba hini.”
25 Ina farafiꞌidilao aꞌa Jesus ma iꞌiginia, “Mena Fasu, hini mei?”
26 Jesus na ware, “Mena una fania feni faraa pidaua ena na pudigia laloo fei peꞌi.” Ma i pudidigaa fei faraa pidaua, na fanaa Judas Iscariot, mei naꞌuu Simon. 27 Ana ei i tonaa fei faraa pidaua Judas, na waduꞌia Satan.
Jesus na warefania, “Fei ba o bigiꞌia, bigibatafainia.” 28 Maꞌuaa lomi hemea aꞌa fei hananaa na aida ba tani i ware aleꞌei aꞌana Jesus. 29 Siꞌei ba Judas naꞌo omaꞌaiaa ei mugoo poꞌi, rona nara hefiꞌa ba Jesus fi warefania tamanu nei ponoꞌia wagii fei Hananaa, o ba nei fani manumanu aꞌa ei lomi rona paꞌi. 30 I todigaa fei faraa pidaua, na asiꞌanaa ano. Ma poi ei.
Fei Manufau Law
31 I aunudii, Jesus na ware, “Eꞌeni mei Naꞌuu Ramaꞌa i tonaa fei hawera ma mei Haidaa ana i to hawera aꞌana. 32 Nabaa mei Haidaa na to hawerana uaa hia,b ana iwe haweginaa mei Naꞌu ma i haweginia eꞌeni ua.
33 “Ena naꞌuu, lomi i madii gutanau aꞌa hamuꞌou. Hamowe lalabaginau ma ana aleꞌei ei wareau aꞌa ei Jew, eni a warefanaa hamuꞌou: Fei ba a dinaa wagina, lomi hamowe nopaꞌilao.
34 “Hepalo manufau warea a fanaa hamuꞌou: Hamonei fihagui. Ana aleꞌei una haguaa hamuꞌou, hamonei fihagui. 35 Aꞌa fei, minaa ei ramaꞌa, rowe aida ba hamuꞌou otalai nenerau; nabaa hamona fihagui.”
Jesus nadii Wareaa fei Suabaduaa Peter
36 Simon Peter na iꞌiginia, “Mena Fasu, o dinaia?”
Jesus na ware, “Fei ba a dinaa wagina, lomi hamoꞌaa nenerau eꞌeni, maꞌuaa hamowe nomai hinene.”
37 Peter na iꞌigai, “Mena Fasu, tani lomi a nenegio eni? Loꞌe manumanu nabaa a maꞌe uaa yoi.”
38 Jesus nawe ware, “Haa, paꞌaa faꞌua ba oꞌaa maꞌe uaa yau? A warefaꞌuai aꞌamu ba i odupoai wareamu ba lomi ona apaꞌau ma hinene i ai fei aꞌaroo!