Jesus na Faꞌoꞌonainaa Unuu ei Otalai Nenerana
14
“Apuna naranara watauda. Narafaweꞌi aꞌa mei Haidaa;a ana narafaweꞌi aꞌau. 2 Laloo fei humuu mei Amau na paꞌi watauda nopa; nabaa abaa aleꞌei, una warefaꞌaidigaa hamuꞌou. Yau ba a dinaa yei ma pagiꞌaufani gutanaa hamuꞌou. 3 Ma nabaa a aunu ma pagiꞌaufanidii gutanaa hamuꞌou, awe hadiweꞌidimai mi dugaa hamuꞌou ba hamonei oafipui aꞌau. 4 Hamona aidadii fei tala i dinaa fawelei ba a dinaa wagina.”Jesus, Hia fei Tala i Dinaa aꞌa mei Ama
5 Thomas na warenaa aꞌana, “Mena Fasu, lomi haiꞌouna aida ba o dinaia ma siꞌei, haiꞌou apaꞌibatanainia fei tala?”
6 Jesus na ware, “Yau ana fei tala, fei faꞌuaia ma fei harenua. Lomi nemea i talawaꞌau ma dinaa aꞌa mei Ama. 7 Nabaa hamona apaꞌifarawaninau, ana hamoꞌaa apaꞌaab mei Amau. Eꞌeni ma nolao, hamona apaꞌia ma hamona fanunudigia.”
8 Philip na ware, “Mena Fasu, famaꞌaiaa haiꞌou mei Ama ma sifei ua i hawiaa haiꞌou.”
9 Jesus na ware, “Haa, minaa fei madii gutanau aꞌa hamuꞌou ma ana otaa apaꞌau, Philip? Hini na fanunudigau, ana na fanunudigaa mei Ama. Tani o ware ba, ‘Famaꞌaiaa haiꞌou mei Ama’? 10 Lomi hamona nara ba yau na oafipui aꞌa mei Ama ma hia i laloo iau? Ei wareau aꞌa hamuꞌou, abaa warea unaa yau ua. Agia, mei Ama, mei na oafipui aꞌau, hia mei fi bigiꞌaa fei bigiꞌana. 11 Hamonei nara ba faꞌua ei wareau ba una oafipui aꞌa mei Ama ma hia laloo iau ma nabaa lomi hamona narapaꞌaa fei, hamonei nara ba faꞌua hamatee na unifanaa hamuꞌou ei foigia. 12 A warefaꞌuai aꞌa hamuꞌou ba hini i narafaweꞌi aꞌau, ana iwe bigiꞌaa tamanu una bigiꞌia. Ma iwe bigiꞌaa hefiꞌa manumanu i muainaa eꞌei, uaa yau, a dinaa aꞌa mei Ama. 13 Ma awe bigiꞌaa tamanu ona iꞌigainia aꞌa fei harau ba mei Naꞌu nei fani hawera aꞌa mei Ama. 14 Na rawani ba hamoꞌaa iꞌigainaa tamanu aꞌa fei harau ma a bigiꞌia.
Jesus na Faꞌunai ba i Aloamii fei Spiriti Apuna
15 “Nabaa hamona haguau, bigiꞌaa tamanu una wareia. 16 Ma awe iꞌiginaa mei Ama ma iwe fanaa hamuꞌou hemeadiai Aweia ba i oafipui aꞌa hamuꞌou minaa ena ranimai— 17 fei Spiritii faꞌuaia. Feni ano, paꞌaa lomi i tonia, uaa lomi na fanunupaꞌia ma ana lomi na apaꞌia. Maꞌuaa hamuꞌou, hamona apaꞌia uaa ina oafipui aꞌa hamuꞌou ma ipowe oac laloo iaa hamuꞌou. 18 Lomi a diꞌininaa hamuꞌou aleꞌei ei baduu lomi ama ma inaa roꞌou; awe nomai aꞌa hamuꞌou. 19 Lomi i madii ma feni ano i maꞌaguguminau, maꞌuaa hamuꞌou, hamoꞌaa fanunupaꞌau. Siꞌei ba una gutaguta, ana hamoꞌaa gutaguta. 20 Aꞌa fei arewaa fei, hamopowe aida ba una oafipui aꞌa mei Ama ma hamuꞌou aꞌau ma Yau, i laloo iaa hamuꞌou. 21 Hini i tonaa ei wareau ma nenegia, simei, mei na haguau. Mei na haguau ana i haguia mei Amau ma Yau ana a haguia ma faꞌarewaiau aꞌana.”
22 I dii, Judas (abaa Judas Iscariot), na ware, “Maꞌuaa, Mena Fasu, tani o faꞌarewaio aꞌa haiꞌou ma aꞌa feni ano lomi?”
23 Jesus na ware, “Hini i haguau, nei neneraa ei feroiau. Mei Amau, iwe haguia ma haiguꞌaa nomai aꞌana ma oafipui aꞌana. 24 Hini lomi na haguau, ana lomi ba i neneraa ei feroiau. Eni warea hamoꞌei guainia, abaa wareau; uaa wareaa mei Ama, mei na aloagiau.
25 “Minaa eni, una wareia ei adoꞌo guta aꞌa hamuꞌou. 26 Maꞌuaa mei Aweia, fei Spiriti Apuna, fei iwe aloiamai aꞌa fei harau mei Ama, iwe feroinaa hamuꞌou minaa ei manumanu ma fanonominaa hamuꞌou minaa ei manumanu, ei unadii warefanidigaa hamuꞌou. 27 Fei gutafarawania, una augia aꞌa hamuꞌou; fei gutafarawaniau una fanaa hamuꞌou. Lomi una fani aleꞌei fei mau fanaa feni ano. Apuna naranara watauda ma apuna maꞌau.
28 “Hamona guaidigau ba, ‘A aunu ma awe hadiweꞌidinamii aꞌa hamuꞌou.’ Nabaa hamona haguau, hamonei niꞌeniꞌe ba a aununaa aꞌa mei Ama, uaa mei Ama na muainau. 29 Ataa nomai fei, maꞌuaa adoꞌo warefaꞌaiaa hamuꞌou ba ena ina nomai, hamonei narafaweꞌi. 30 Loꞌe i madii fiwarewareiaa oꞌou uaa mei haparaa feni ano fi nomai. Paꞌaa lomi i panarofau, 31 maꞌuaa feni ano nei apaꞌia ba una haguaa mei Ama ma nei bigiꞌaa ana ei ina warefanau.
“Nomai; o aunu.