Fei Paꞌapaꞌa ma ei Rara
15
“Yau fei paꞌaa paꞌapaꞌa ma mei Amau, hia mei bigiꞌaa peꞌihape. 2 Ma minaa ei rara lomi fuana, inaꞌo morosiminaaa roꞌou. Ma aꞌa ei rona fuaa, na famamaꞌaia ba nei fuafarawani. 3 Hamona fafaꞌaraidii, uaa una warefanidigaa hamuꞌou fei warea. 4 Hamonei oa laloo iau ma awe oa laloo iaa hamuꞌou. Lomi hepalo rara ba i fuaa anaia; inei pana aꞌa fei paꞌapaꞌa. Ana lomi ba hamoꞌaa fuapaꞌi nabaa lomi hamona oa laloo iau. 5 “Yau, fei paꞌapaꞌa; hamuꞌou, ei rara. Nabaa nemea i oa laloo iau ma yau i laloo iana, iwe paꞌi watauda fuana; nabaa lomi na oa aꞌau, lomi i bigipaꞌaa hepalo manumanu. 6 Hini lomi na oa laloo iau, hia, aleꞌei fei rara rona siminia ma na maꞌe; ei rara aleꞌei, ronaꞌaida pogisiminaa hafi ma rona guꞌa. 7 Nabaa hamoꞌaa oa i laloo iau ma ei wareau i oa laloo iaa hamuꞌou, iꞌiginaa tamanu nunumiaa hamuꞌou ma awe fanaa hamuꞌou. 8 Sifei fei haweraa mei Amau, ba hamonei fuaa watauda ma aꞌa fei, i famaꞌaia ba hamuꞌou, otalai nenerau.
9 “Mei Ama na haguau, siꞌei, una haguaa hamuꞌou. Ma eꞌeni hamonei oa aꞌa fei haguau. 10 Nabaa hamoꞌaa neneraa ei wareau, hamowe oa aꞌa fei haguau, ana aleꞌei yau na neneraa ei wareaa mei Amau ma oa i aꞌa fei haguana. 11 Una warefanaa hamuꞌou fei ba fei niꞌeniꞌeau nei oa i aꞌa hamuꞌou ma fei niꞌeniꞌeaa hamuꞌou ipowe bauanai. 12 Sifei fei wareau aꞌa hamuꞌou: Hamonei fihagui ana aleꞌei una haguaa hamuꞌou. 13 Lomi hepalodiai mau hagua na muainaa fei ba nemea i maꞌe, uaa ei tafina. 14 Hamuꞌou tafiu nabaa hamoꞌaa bigiꞌaa tamanu una wareia. 15 Lomidiai a ware ba hamuꞌou nafi, uaa mei nafi, lomi na aida ei pelee naraa mei fasuna. Agia. Una ware ba hamuꞌou tafiu, uaa minaa ei una guainia aꞌa mei Amau, na faꞌaiaa hamuꞌou. 16 Aꞌa ba hamona rafeinau, uaa yau na rafeinaa hamuꞌou ma fanaa hamuꞌou fei bigiꞌa ba hamoneiwii fuaa fawatauda—ei fua i udefamadii. Ma mei Ama i fanaa hamuꞌou tamanu hamona iꞌiginia aꞌa fei harau. 17 Sifei fei wareau aꞌa hamuꞌou: Hamonei fihagui.
Feni Ano na Bidibidi Ununa aꞌa ei Otalai Nenerana
18 “Nabaa i bidibidi unuu feni ano aꞌa hamuꞌou, hamonei aida ba nadoꞌo bidibidi ununa aꞌau. 19 Nabaa hamuꞌou neneraa maumau feni ano, feni ano i haguaa hamuꞌou aleꞌei manumanuna. Maꞌuaa aꞌa ba hamuꞌou aꞌa feni ano, uaa una rafeifaꞌasiꞌanaa hamuꞌou wagina. Siꞌei, i bidibidi unuu feni ano aꞌa hamuꞌou. 20 Nonominaa ei wareau aꞌa hamuꞌou: ‘Lomi hemea nafi i muainaa mei fasuna.’ Nabaa rona haperararaiau, ana roꞌaa haperararaiaa hamuꞌou. Nabaa rona neneraa ei feroiau, ana roꞌaa neneraa ei feroiaa hamuꞌou. 21 Roꞌaa bigiꞌia aleꞌei aꞌa hamuꞌou uaa fei harau, hamatee lomi rona apaꞌaa Mei na aloagiau. 22 Nabaa lomi una nomai ma waredii aꞌa roꞌou, ana lomi ro nanamuinia ba rona bigiꞌaa ei hafeloꞌa. Maꞌuaa eꞌeni, lomi roꞌaa paꞌi talaa wareaa roꞌou aꞌa ei hafeloꞌa rona bigiꞌia. 23 Hini na bidibidi ununa aꞌau ana na bidibidi ununa aꞌa mei Amau. 24 Ei bigiꞌau i pudaa roꞌou, paꞌaa lomi na bigiꞌia hemeadiai. Maꞌuaa, siꞌei ba una bigiꞌaa eꞌei i dupuaa roꞌou, lomi na paꞌi talaa wareaa roꞌou wagii ei hafeloꞌaa roꞌou. Rona fanunudigaa ei foigia ma ana roifi bidibidi unuu roꞌou aꞌau ma mei Amau. 25 Maꞌuaa ina aleꞌei ba i fafaꞌuainaa ei neꞌia laloo fei Law roꞌou: ‘Na bidibidi unuu roꞌou aꞌau ma lomi paꞌafina.’