5 “Eꞌeni a aununaa aꞌa mei na aloagiau, maꞌuaa lomi hemea hamuꞌou na iꞌigainau ba, ‘O dinaia?’ 6 Hamonamina faloloaꞌi ba una wareaa eꞌei. 7 Maꞌuaa a warefaꞌuai aꞌa hamuꞌou: fei aunuau i farawaninaa hamuꞌou. Nabaa lomi na aunu, ana lomi i nomai mei Aweia; maꞌuaa, nabaa a aunu, awe aloiagio aꞌa hamuꞌou. 8 Ena na nomai, i famarapuaa unuu ei ramaꞌaa feni ano^a wagii ei hafeloꞌa, o wanewanea, o fei dududua: 9 uaa wagii ei hafeloꞌa, lomi roꞌaa narafaweꞌi aꞌau; 10 wagii fei wanewanea, a dinaa aꞌa mei Ama, yei lomi ba hamoꞌaa fanunudinau; 11 ma wagii fei dududua, ipowe to fagianana mei haparaa feni malagufu, uaa na udedii fei warea ba i aleꞌei.

12 “Watauda ei ba a wareia aꞌa hamuꞌou, maꞌuaa, eꞌeni, hamatee ina watauda, na rataiaa hamuꞌou. 13 Maꞌuaa ena na nomai fei Spiritii faꞌuaia, iwe famamonaa hamuꞌou aꞌa minaa ei faꞌuaia. Lomi i wareaa anaia; i wareaa tamanu na guainia ma warefanaa hamuꞌou tamanu itawe nomai. 14 Iwe fani hawera aꞌau, uaa i to aꞌau ma faꞌaiaa hamuꞌou. 15 Minaa ei manumanuu mei Ama, manumanuu. Siꞌei, a ware ba fei Spiriti i to aꞌau ma faꞌaiaa hamuꞌou.

16 “Lomi i madii ma hamoꞌaa maꞌaꞌafoau ma nene maꞌida, hamowe fanunuau.”

17 Hefiꞌaa ei otalai nenerana, rona fiwarei ba, “Tamanu hanuu ei wareana ba, ‘Lomi i madii ma hamoꞌaa maꞌaꞌafoau ma nene maꞌida, hamowe fanunuau.’ ma ‘Hamatee a dinaa aꞌa mei Ama’?” 18 Ronaꞌu iꞌigai ua, “Tamanu hanuu fei, ‘Lomi i madii’? Lomi ona apaꞌia ba ifi wareaa tamanu.”

19 Jesus na aida ba roꞌaa iꞌiginia aꞌa fei, siꞌei, na warenaa aꞌa roꞌou, “Hamoꞌei fiꞌiꞌigii ba tamanu hanuu ei wareau ba, ‘Lomi i madii ma hamoꞌaa maꞌaꞌafoau ma nene maꞌida, hamowe fanunuau’? 20 A warefaꞌuai aꞌa hamuꞌou ba hamoꞌaa aiꞌai ma faloloaꞌi ena na niꞌeniꞌe feni ano. Hamowe faloloaꞌi, maꞌuaa fei faloloaꞌiaa hamuꞌou, i filoginaa niꞌeniꞌea. 21 Hemea pifine ba i waniniaa hemea baduu, imina tonaa fiꞌina, uaa nawe nomai fei auna; maꞌuaa ena na waninidigaa mei naꞌuna mei pifine, i madiꞌinaa ei fiꞌiana uaa na niꞌeniꞌe ba mei naꞌuna na waninimai aꞌa feni malagufu. 22 Ana aleꞌei aꞌa hamuꞌou: Eꞌeni, au faloloaꞌiaa hamuꞌou, maꞌuaa awe fanunudinaa hamuꞌou ma hamopowe niꞌeniꞌe ma lomi nemea i topaꞌainaa fei niꞌeniꞌeaa hamuꞌou. 23 Aꞌa fei arewaa fei, lomi hamoꞌaa iꞌigidinau hepalo manumanu. A warefaꞌuai aꞌa hamuꞌou ba mei Amau, iwe fanaa hamuꞌou tamanu ei iꞌigaiaa hamuꞌou aꞌa fei harau. 24 Nopaꞌamii eꞌeni, hamotawe iꞌiginaa hepalo manumanu aꞌa fei harau. Iꞌigai ma hamowe to ma fei niꞌeniꞌeaa hamuꞌou, ipowe bauanai.

25 “Unadii warehanunuinaa ei manumanu, maꞌuaa iwe nomai fei au ba lomi a fai wareware aleꞌei, maꞌuaa awe faꞌarewaiaa mei Amau aꞌa hamuꞌou. 26 Aꞌa fei arewaa fei, hamowe iꞌigai aꞌa fei harau. Lomi una ware ba awe iꞌigaifani iꞌigaiaa hamuꞌou aꞌa mei Ama. 27 Agia, mei Ama ana na haguaa hamuꞌou, uaa hamona haguau ma nara ba paꞌaa faꞌua ba noramiau aꞌa mei Haidaa. 28 Noramiau aꞌa mei Ama ma una nogio yeni malagufu; eꞌeni ba a diꞌininaa feni malagufu ma hadiweꞌinaa aꞌa mei Ama.”

29 Ma ei otalai neneraa Jesus, rona ware, “Eꞌeni oi warefaꞌarewai ua, lomi ona warehanunui. 30 Eꞌeni haiꞌounawe fanunuꞌapaꞌia ba ona aida minaa ei manumanu ma lomi paꞌafina ba nemea i iꞌigidinio hepalo iꞌigaia. Aꞌa fei, haiꞌounawe nara ba paꞌaa faꞌua ba noramiamu aꞌa mei Haidaa.”

31 Jesus na ware, “Hamonawe aida ba faꞌua!^b 32 Maꞌuaa fi nomai fei au ma ina nodigimai ba hamowe talanenei, hememea aꞌa fei humuna. Hamowe farapa diꞌininau. Maꞌuaa abaa unaa yau, uaa mei Amau, hia aꞌau.

33 “Una warefanidigaa hamuꞌou ba i aꞌau hamoꞌaa tonaa fei gutafarawania. Yeni malagufu, hamowe tonaa ei hafeloꞌa. Maꞌuaa ofafaufau! Una muaidigaa feni malagufu.”