Jesus na Lafulafunaa Anaia
17
I waredigaa fei Jesus, na aranaa pafea ma lafulafu: “Oꞌama, ina nodigimai fei au. Haweginaa mei Naꞌumu ba mei Naꞌumu i fani hawera aꞌamu. 2 Uaa, ona fanidigia fei forafora aꞌa minaa ei ramaꞌa ba nei fanaa fei harenua lomi i pedutoo aꞌa minaa ei fanamu hia. 3 Sifei fei harenua lomi i pedutoo: ba ronei apaꞌio, mena yoi hemea ua Haidaa, mena unaio na faꞌuai mawe Jesus Christ, mei ona aloiagio. 4 Yeni malagufu, una fani hawera aꞌamu uaa una bigidigaa ei ona fanau ba unei bigiꞌia. 5 Ma eꞌeni, Oꞌama, haweginau inamoamu wagii fei hawera unadoꞌo paꞌi i aꞌamu ei atawe mamara feni malagufu.
Jesus na Lafulafunaa ei Otalai Nenerana
6 “Una faꞌarewaioa aꞌa ei ramaꞌa ona fanau wagii feni malagufu. Roꞌou, maroamu; ona fanaa roꞌou aꞌau ma rona neneraa fei wareamu. 7 Ronawe aida ba minaa ei fanamu yau, noramiana aꞌamu. 8 Uaa una fanaa roꞌou ei warea ona fanau ma rona tonia. Ronapaꞌaa aida ba noramiau i aꞌamu ma nara ba paꞌaa faꞌua ba aloamiamu yau. 9 Una lafulafunaa roꞌou. Aꞌa ba una lafulafunaa feni malagufu maꞌuaa, na lafulafunaa ei ona fanau, uaa roꞌou, manumanumu. 10 Minaa ei manumanuu, manumanumu ma minaa ei manumanumu, manumanuu. Ma una to hawerau aꞌa roꞌou. 11 Lomi ba a gutadiai yeni malagufu, maꞌuaa roꞌou ana yeni malagufu ma yau, a nomai aꞌamu. Mena Amau, mena ona apunai, wagiꞌinaa roꞌou aꞌa fei faufau wagii fei haramu—fei hara ona fanau—ba ronei hemeai ua ana aleꞌei agua ba hemea ua. 12 Ei a gutafipui aꞌa roꞌou, una wagiꞌinaa roꞌou aꞌa fei hara ona fanau ba neiꞌaa tonaa roꞌou ei hafeloꞌa. Lomi hemea roꞌou na paꞌai, ana uniaa mei na udedii fei harana ba i paꞌai uaa ba fei neꞌia nei faꞌuai.
13 “Yau fi nomai aꞌamu eꞌeni, maꞌuaa una wareaa eꞌei eni fidoꞌo guta yeni malagufu ba laloo iaa roꞌou nei paꞌi fei baua niꞌeniꞌeau. 14 Una fanidigaa fei wareamu aꞌa roꞌou ma na bidibidi unuu feni ano aꞌa roꞌou, uaa roꞌou abaa ramaꞌaa feni ano, ana aleꞌei ba yau abaa ramaꞌaa feni ano. 15 Fei lafulafuau, abaa onei faꞌasiꞌanaa roꞌou aꞌa feni ano, maꞌuaa, onei wagiꞌinaa roꞌou uaa mei hafeloꞌa. 16 Roꞌou, abaa ramaꞌaa feni ano, ana aleꞌei ba yau, abaa ramaꞌaa feni ano. 17 Papaditainaab roꞌou wagii fei faꞌuaia; fei wareamu na faꞌuai. 18 Ana aleꞌei ona aloagiau yeni ano, ana a alonaa roꞌou aꞌa feni ano. 19 Na papaditainaa ana yau uaa roꞌou ba ana roneipaꞌaa papaditai.
Jesus na Lafulafunaa Minaa ei Narafaweꞌia
20 “Abaa a lafulafunaa roꞌou ua. Ana a lafulafunaa ei rowe narafaweꞌi aꞌau uaa fei uꞌugaa roꞌou 21 ba minaa roꞌou, ronei hemeai ua, Oꞌama, ana aleꞌei yoi i laloo iau ma yau i laloo iamu. Ina rawani ba roꞌou i laloo iaa agua ba feni ano nei aida ba ona aloagiau. 22 Una fanaa roꞌou fei hawera ona fanau ba ronei hemeai ua ana aleꞌei agua ba hemea ua: 23 Yau i laloo iaa roꞌou ma yoi i laloo iau. Ina rawani ba ronei paꞌapaꞌainaa hepalo ua ba feni ano nei aida ba ona aloagiau ma haguaa roꞌou ana aleꞌei ona haguau.
24 “Oꞌama, nunimiau ba na dinaa hitani, ei ramaꞌa fanamu yau, ronei oafipui aꞌau ma fanunuaa fei hawerau, fei ona fanau siꞌei ba ona haguau ei atawe mamaramai feni malagufu.