Rona Ware ba Jesus nei Fatawa
19
I dii, Pilate na dugaa Jesus ba ronei babuinia. 2 Ei ramaꞌaa foꞌaa, rona fifigaa fei wowoꞌii na hogia ba taona ma fahawaiaa tabana. Rona farafenaa hia fei hawaa ugu, pomana purple 3 ma ronaꞌu noꞌualao aꞌana ma ware, “Haiꞌou uduginio, mena haparaa ena Jew!” Ma rona lapagia.4 Pilate na asiꞌadimai ma ware aꞌa ei Jew ba, “Maꞌaia, a noduginamii hia aꞌa hamuꞌou ba a warefaꞌaiaa hamuꞌou ba lomi una labagipaꞌi paꞌafina ba a ware ba ina bigifata.” 5 I asiꞌataonamii fei tao na hogia ma fei baua purple hawaa ugu Jesus, Pilate na warenaa aꞌa roꞌou, “Simeni, meni ramaꞌa.”
6 Ana ei roꞌaa fanunupaꞌia ei famamoaa humuu mei Haidaa mawe ei bauaniaa roꞌou, rona harofaweꞌi ba, “Fatawaia, fatawaia!”
Maꞌuaa Pilate na ware, “Dugia ma fatawaia. Hamatee yau, lomi na labagipaꞌi paꞌafina ba o ware ba ina bigifata.”
7 Ei Jew na warefaweꞌi ba, “Haiꞌouna na paꞌi law haiꞌou ma aꞌa fei law fei, inei maꞌe, uaa ina ware ba hia, Naꞌuu mei Haidaa.”
8 I guainaa fei Pilate, na maꞌauꞌapoidiai 9 ma na waduꞌaidinaa fei baua humu. Ma na iꞌigainaa Jesus, “Noramiamu hitani?”, maꞌuaa lomi na wareaa hepalo manumanu Jesus. 10 Pilate na ware, “Haa, lomi o wareware aꞌau? Lomi ona aida ba na paꞌi faufau ba a alagio, o fatawaio?”
11 Jesus na ware, “Lomi na paꞌi faufaumu ba o bigiꞌaa hepalo manumanu aꞌau nabaa abaa noranarai pafea. Siꞌei, mei na fifaninau panimu, fei hafeloꞌana na rata laraa fei hafeloꞌamu.”
12 Aꞌa fei ma nolao, Pilate ba ifane alaraa Jesus, maꞌuaa ei Jew, ronaꞌu haroharo ua, “Nabaa o alaraa mei ramaꞌa mei, abaa yoi tafii Caesar. Mei i ware ba hia hapara na warefafeloaa Caesar.”
13 I guainaa fei Pilate, na faꞌasiꞌanaa Jesus ano ma hia na guta wagii fei gutanaa mei fadududua, fei Talaa Mugoo (harana warea Aramea, Gabbatha). 14 Fei au fei, arewaa Pagipagiaa fei Hefapagipagiaa fei Talai Falogia ma aleꞌei haloaina.
Pilate na warenaa aꞌa ei Jew, “Simeni, meni haparaa hamuꞌou.”
15 Maꞌuaa rona haropararai, “Nodugawau! Nodugawau! Fatawaia!”
Pilate na iꞌigai, “Haa, a fatawaia, mei haparaa hamuꞌou?”
Ei famamoaa humuu mei Haidaa na ware, “Hemea ua haparaa haiꞌou. Caesar.”
16 Pilate nawe fifaninia panii roꞌou ba ronei fatawaia.
Fei Fatawana
Siꞌei, Jesus nawe udenaa panii ei foꞌaa. 17 Ina fuharenaa fei hawafolona ma aununaa fawelei, harana Guitaba (harana warea Aramea, Golgotha). 18 Ma rona fatawaia yei aꞌa helaguidiai—hemea pepei ma hemea pepei ma Jesus watolaa lagua.
19 Pilate na fabiginaa roꞌou hepalo neꞌia ma rona faugia aꞌa fei hawafolo. Ma fei neꞌia aleꞌei: JESUS, MEI NAZARETH, MEI HAPARAA EI JEW. 20 Wataudaa ei Jew na igoaa fei neꞌia, uaa fawelei i fatawa Jesus na rafiꞌinaa fei baua gufu ma fei neꞌia, warea Aramea, Latin ma Greek. 21 Lomi na rawani aꞌa ei famamoaa humuu mei Haidaniaa ei Jew ma rona warenaa aꞌa Pilate, “Apuna neꞌinia ba, ‘Mei Haparaa ei Jew,’ maꞌuaa onei neꞌi ba ina ware ua ba hia mei haparaa ei Jew.”
22 Pilate na ware, “Tamanu una neꞌinia nei ude.”
23 Roꞌaa fatawadigaa Jesus ei foꞌaa, rona tonaa ei susuna ma alaginia aꞌa hememea ei gunaroa ramaꞌa, maꞌuaa dufuna fei naꞌuu susuna. Fei susu fei, lomi uꞌugina, rona tawinaa aleꞌei hepalo ua, paꞌuduna ma dinaa supuna.
24 Rona fiwarei ba, “Oneiꞌaa foraniniꞌia. O bigiꞌaa hepalo uniꞌuni fifigaia ba hemea ua i muaitonia.”
Fei, na nomai ba i fafaꞌuainaa fei neꞌia ba,
“Rona fiꞌalaginaa ei susuu dupuaa roꞌou
ma bigiꞌaa hepalo fifigaia ba hemea i muaitonaa fei susuu.”
Siꞌei, roꞌaa bigiꞌia aleꞌei ei foꞌaa.
25 Ei rona ufalarai nanaꞌaa fei hawafoloo Jesus, mei inana, mei tafii inana, Mary mei haroo Clopas mawe Mary Magdalene. 26 Jesus, i fanunupaꞌaa mei inana mawe mei otalai nenerana, mei hia na haguia na ufarafiꞌi, na warenaa aꞌa mei inana, “Mena pifine, simena, mena naꞌumu,” 27 ma aꞌa mei otalai nenerana, na ware ba, “Simena, mena inamu.” Aꞌa fei au fei ma nolao, mei otalai nenera, mei na fagutania i humuna.
Fei Maꞌeaa Jesus
28 Nene maꞌida, siꞌei ba ina aida ba minaa ei manumanu na nodigimai ma fei Buꞌu Apuna ipowe faꞌuai, Jesus na ware, “Una sigigi.” 29 Na ude hepalo peꞌii vinegar wine yei; siꞌei, rona pudigaa fei fahununu lalona ma fasuia wagii fei haihai hyssop ma roainalao umuu Jesus. 30 I todigaa fei numa Jesus, na ware, “Inawe baibaisio.” Aꞌa fei, ina fabaꞌoduinaa tabana ma rawaꞌaꞌafainaa fei spiritina.
31 Fei arewaa fei, arewaa pagipagia, uaa aleꞌei narani, hepalo baua uꞌugai Sabbath. Siꞌei ba ei Jew, lomi na nunuminia ba ei unuu ramaꞌa nei fatawa ua pafoo ei hawafolo wagii fei Sabbath, rona iꞌiginaa Pilate ba nei meroꞌaa gui pinee roꞌou ma faꞌupuaa roꞌou. 32 Siꞌei, ei foꞌaa, ronamii meroꞌaa gui pinee mei rawarawaa fatawafipuiaa roꞌou aꞌa Jesus ma ei pinee mei lagua. 33 Maꞌuaa roꞌaa nomai aꞌa Jesus ma fanunupaꞌia ba na maꞌedii, lomi rona meroꞌaa gui pinena. 34 Maꞌuaa hemea ei foꞌaa na motoꞌaa huwaa Jesus aꞌa hepalo hio ma na wigiꞌuamai raraa ma ranu. 35 Hemea na fanunuaa fei na uꞌudigia ma paꞌaa faꞌua fei uꞌugana. Ina aida ba ei uꞌugana paꞌaa faꞌua ma na uꞌufanaa hamuꞌou ba ana hamonei narafaweꞌi wagina. 36 Ei manumanu ei na nomai ba fei Buꞌu Apuna nei faꞌuai: “Lomi hepalo guina i amero,” 37 ma ana aleꞌei hepalodiai neꞌia ba, “Rowe fanunuaa mei rona motoꞌia.”
Rona Augaa fei Unuu Jesus Huapu
38 Hinene, Joseph, mei Arimathea na iꞌiginaa Pilate ba i tonaa fei unuu Jesus. Joseph, hia hemea otalai neneraa Jesus, maꞌuaa ina oꞌopaꞌai uaa na mamaꞌau aꞌa ei Jew. Siꞌei ba na ugainia Pilate, ina nomai ba i tonaa fei hudi unu. 39 Ina nohugiamai Nicodemus, mei nadoꞌo nomai aꞌa Jesus hefaa poi. Nicodemus na notonamii ei fihafuiaa roꞌou myrrh ma aloe, awatana aleꞌei odufua paꞌania ma obao kilogram.a 40 Laguna tonaa fei unuu Jesus ma sumia aꞌa ei maninii lawalawa fininaa ei hapipigi. Fei aleꞌei ba i neneraa ei maumau ei Jew, ei ronaꞌo agifai maꞌea. 41 Fawelei roꞌaa fatawaiaa Jesus na paꞌi hepalo peꞌihape ma lalona na paꞌi hepalo manufau huapu waduaa roꞌou naꞌanaꞌa, hepalo rotawe fahainopaa hemea maꞌea lalona. 42 Siꞌei ba fei arewaa fei, arewaa ei Jew ba roꞌaa Pagiꞌaugaa ei Manumanu ma fei huapu ana na rafiꞌi ua, rona fahainopaa Jesus yei.