Jesus ma fei Foigia aꞌa ei Lepoiaa Roꞌou Nia
21
Nenee eꞌei, Jesus na faꞌarewadiai aꞌa ei otalai nenerana papaa fei Agii Tiberias.a Fei faꞌarewana aleꞌei ba: 2 Simon Peter, Thomas (ana harana Didymus), Nathanael, mei na norai Cana i Galilee, laguei naꞌuu Zebedee mawe helaguidiai otalai nenera, rona gutafipui. 3 Simon Peter na warefanaa roꞌou, “Yau a dinaa agi.” Ma rona ware, “Haiꞌouꞌaa aunufipui aꞌamu.” Siꞌei, rona asiꞌaa ma hugi pafoo wa, maꞌuaa aꞌa fei poi fei, lomi rona topaꞌaa hepalo. 4 Mafufuo badu, Jesus na ufalarai piye, maꞌuaa ei otalai nenera, lomi rona aida ba Jesus.
5 Ina haroharonaa aꞌa roꞌou ba, “Ena tafiu, lomi hamona topaꞌaa hepalo?”
Rona ware ba, “Lomi.”
6 Ina ware, “Pudigaa ei lepoo hamuꞌou pepei haroꞌaa ma hamoꞌaa topaꞌi.” Roꞌaa bigiꞌia aleꞌei, lomi rona forapaꞌaa fei lepoo uaa namina watauda ei nia.
7 Ma mei otalai nenera, mei na haguia Jesus, na warefanaa Peter ba, “Ana mei Fasu!” Iꞌa guainaa fei Simon Peter ba, “Ana mei Fasu!” na papainaa fei hawaa uguna (uaa nadoꞌo dudumia) ma na siginaa laloo agi. 8 Mei hemeadiai otalai nenera na suanenegia pafoo wa. Ina suaforaiaa fei lepo, fei na pepesu ei nia, uaa lomi rona raua piye, aleꞌei faimfua paꞌania metre.b 9 Roꞌaa wanonaa piye, rona fanunupaꞌaa fei bafuroo hafi na paꞌi nia pafona ma ana na paꞌi maꞌida faraa pidaua.
10 Jesus na warenaa aꞌa roꞌou, “Tomai hefiꞌa nia, ena tonaa hamuꞌou eꞌeni ua.”
11 Simon Peter na hugi ma adiamii fei lepo piye. Ina pepesu ei baua nia, hefa puꞌu ma haipani paꞌania ma odumanu, maꞌuaa, lomi na waraꞌa fei lepo aꞌa ei watauda nia. 12 Jesus na warenaa aꞌa roꞌou, “Mi hananafipui aꞌau.” Minaa ei otalai nenera na maꞌau ba roꞌaa iꞌiginia ba, “Yoi hini?” Rona aida ba hia mei Fasu. 13 Jesus namii tonaa fei faraa pidaua, fanaa roꞌou ma ana aleꞌei aꞌa ei nia. 14 Hefei, faꞌodupoaa faꞌarewaa Jesus aꞌa ei otalai nenerana nenee fei asiꞌanana aꞌa ei maꞌea.
Jesus na Fahadiweꞌinaa Peter
15 Roꞌaa hananadii, Jesus na warenaa aꞌa Simon Peter, “Simon, mena naꞌuu John, paꞌaa faꞌua ba fei haguamu yau na rata laraa fei haguamu roꞌou?”
Ina ware, “Hiꞌi mena Fasu. Ona aida ba una haguio.”
Jesus na ware, “Faguaa ei hapeu naꞌuu sipsipi.”
16 Jesus na warediai ba, “Simon, mena naꞌuu John, paꞌaa faꞌua ba ona haguau?”
Na ware, “Hiꞌi mena Fasu, ona aida ba una haguio.”
Jesus na ware, “Omaꞌaiaa ei hapeu sipsipi.”
17 Ina warefaꞌodupoai ba, “Simon, mena naꞌuu John, ona haguau?”
Na fiꞌi naranaraa Peter uaa Jesus na iꞌigai faꞌodupoai aꞌana ba, “Ona haguau?” Ina ware, “Mena Fasu, ona apaꞌaa minaa ei manumanu; ona aida ba una haguio.”
Jesus na ware, “Faguaa ei hapeu sipsipi. 18 A warefaꞌuai aꞌamu ba ei oi baubarai, ana yoi rafeaa susumu ma rararapa hitani nunumiamu; maꞌuaa onawe bau, opowe roainaa guei panimu ma hemeadiai i falawalawainio ma talaidugio fawelei lomi ona nunuminia.” 19 Jesus na wareaa fei ba i famaꞌaiaa fei mau maꞌea i tonia Peter, fei ba i fani hawera aꞌa mei Haidaa wagina. Ma ina warefania, “Nenerau!”
20 Peter na diarai ma fanunupaꞌaa mei otalai nenera, mei na haguia Jesus ba na neneraa lagua. (Simei, mei na fapalaginaa aꞌa Jesus wagii fei hananaa, mei na ware ba, “Mena Fasu, hini ba i aloio?”) 21 I fanunupaꞌia Peter, na iꞌigai, “Mena Fasu, hia, batanai?”
22 Jesus na ware, “Nabaa a nunuminia ba inei guta nopaꞌaloo fei noramiau, abaa manumanumu. Onei nenegiꞌuaiau.” 23 Aꞌa fei, rona fileleleinia ei filofui ba mei otalai nenera mei, lomi i maꞌe. Maꞌuaa Jesus, abaa na ware ba lomi i maꞌe; ina ware ua ba, “Nabaa a nunuminia ba inei guta nopaꞌaloo fei noramiau, abaa manumanumu.”
24 Simei, mei otalai nenera, mei fi uꞌugaa eni manumanu eni ma neꞌifapanaꞌia. Ona aida ba ei uꞌugana, paꞌaa faꞌua.
25 Jesus, ana na bigiꞌaa wataudadiai manumanu. Nabaa ro neꞌinaa buꞌu minaa ei bigiꞌana, woro feni malagufu, lomi i hawiaa udeꞌudee ei buꞌu, ei neꞌiaa roꞌou.