Ei Fanaa fei Spiriti
12
Ena lofu, nunumiau ba hamoneiꞌaa polatabai aꞌa ei fanaa fei Spiriti Apuna. 2 Ei doꞌo hamuꞌou ramaꞌaa roromaa, rona fasuauganaa hamuꞌou ba hamonei neneraa ei haidaa sifisifi, ei umuloo manumanu. 3 Siꞌei, a warefanaa hamuꞌou ba lomi nemea na paꞌi fei Spiritii mei Haidaa i aꞌana i ware ba, “Jesus, una umuio,” ma lomi nemea i ware ba, “Jesus, hia mei Fasu,” nabaa lomi na paꞌi aꞌana fei Spiriti Apuna.4 Ina uꞌugai hefiꞌa ei mau fana maꞌuaa hepalo ua Spiriti. 5 Ina uꞌugai ei ba oꞌaa bigiꞌia aꞌa mei Fasu maꞌuaa hemea ua Fasu. 6 Ina uꞌugai ei mau bigiꞌa maꞌuaa ana mei Haidaa ua i bigiꞌaa minaa roꞌou aꞌa minaa ei ramaꞌa.
7 Ma fei uniꞌunii fei Spiriti i dinaa aꞌa hememea ba i hadumaa minaa oꞌou. 8 Aꞌa fei Spiriti, mei Haidaa na fanaa fei uꞌugaa anoꞌanoia aꞌa hemea ma aꞌa ana fei Spiritii fei, ina fanaa fei uꞌugaa apaꞌa aꞌa hemeadiai. 9 Ana aꞌa fei Spiriti fei, na fanaa fei weꞌiaa naranara aꞌa hemea ma ana fei hepalo ua Spiriti fei, ina fanaa hemeadiai fei ba i fapedugaa ei funua. 10 Aꞌa hemea ina fanaa fei faufau fei foigia, aꞌa hemeadiai na fanaa fei ba i diwareꞌaugaa fei ba i nomai hinene, aꞌa hemeadiai na fanaa fei ba i fanunuꞌapaꞌaa ei maumau ei spiriti, aꞌa hemeadiai na fanaa fei ba i wareaa ena warea hepapa gufua ma aꞌa hemeadiai na fanaa fei ba i guaipaꞌaa ena wareagufu ma warefaꞌarewaiaa ei hanuna. 11 Ma minaa roꞌou, bigiꞌaa hepalo ua Spiriti. Ma wagii fei nunumiana na fanaa hememea.
Hepalo Ua Paꞌafi Maꞌuaa Watauda Maroa
12 Fei paꞌafi, hepalo ua; maꞌuaa ina paꞌi watauda maroana. Ma ei watauda maroana ei, rona paꞌafinaa hepalo ua. Ma ana aleꞌei aꞌa Christ. 13 Uaa minaa oꞌou na pudugufai aꞌab hepalo ua Spiriti ba aleꞌena hepalo ua paꞌafi—nabaa oꞌou Jew o Greece, humuwa o abaa humuwa—ina fanaa minaa oꞌou hepalo ua Spiriti ba o hunu wagina.
14 Ma fei paꞌafi, abaa hepalo ua maroana maꞌuaa watauda. 15 Nabaa fei pinai i ware ba, “Siꞌei ba abaa yau pani, yau abaa maroaa fei paꞌafi,” hefei, abaa aleꞌei ba hia abaa maroaa fei paꞌafi. 16 Nabaa fei adia i ware ba, “Siꞌei ba abaa yau puda, yau abaa maroaa fei paꞌafi,” hefei, abaa aleꞌei ba hia abaa maroaa fei paꞌafi. 17 Nabaa minaa fei paꞌafi aleꞌei puda ua, i guainaa tamanu? Nabaa minaa fei paꞌafi adia ua, i hatonaa tamanu? 18 Maꞌuaa mei Haidaa na aufipuinaa minaa ei maroaa fei paꞌafi ana aleꞌei nunumiana. 19 Nabaa minaa eꞌei fiminaꞌei ua, i bigibatanai fei paꞌafi? 20 Ina watauda maroa maꞌuaa hepalo ua paꞌafi.
21 Lomi i ware fei puda aꞌa fei pani ba, “Lomi bigiꞌamu aꞌau!” Ma lomi i ware fei taba aꞌa fei pine ba, “Lomi bigiꞌamu aꞌau!” 22 Agia. Uaa ei maroa, ei rona fawawaniniaa unu nei paꞌi aꞌa fei paꞌafi. 23 Ma ei maroa ona nara ba lomi honuaa roꞌou, onei fahonuaa roꞌou. Ma ei maroa ba ronei udeꞌopaꞌai, ona hawainaa roꞌou ma falanaa huoo oꞌou wagina. 24 Maꞌuaa ei manumanuu lelefoa, aꞌa ba manumanuu opaꞌaia ba omina falanaa huoo oꞌou wagina. Maꞌuaa, mei Haidaa na aufipuinaa ei maroaa fei paꞌafi ma fahonuaa ei maroa, ei lomi rona honua 25 ba ineiꞌaa paꞌi fiꞌiꞌareia aꞌa fei paꞌafi ma ba ei maroa, ronei fihadumii. 26 Nabaa hepalo maroa na tonaa fiꞌia, minaa ei, roꞌaa fiꞌifipui aꞌana. Nabaa hepalo na paꞌi honuana, minaa ei, roꞌaa niꞌeniꞌefipui aꞌana.
27 Ma hamuꞌou aleꞌei paꞌafii Christ ma hememea hamuꞌou, aleꞌei maroana. 28 Ma aꞌa fei losuu, mei Haidaa na doꞌo rafeinaa ei apostle ma faguapaloaa rafeiana, ei mamamaꞌa, faꞌodumanuana, ei feroia, nene, ei bigiꞌaa ei foigia ma ei ramaꞌa farawaninaa funua anaa. Ma ei rona hadupaꞌaa hefiꞌadiai, ei ramaꞌa omaꞌaa bigiꞌa, ei rona warenaa uꞌugai warea hepapa gufu. 29 Haa, minaa roꞌou apostle? Minaa roꞌou mamamaꞌa? Minaa roꞌou feroia? Minaa roꞌou, rona bigiꞌaa ei foigia? 30 Minaa roꞌou, rona paꞌi fei fana ba i farawaninaa ei funua? Minaa roꞌou rona warenaa uꞌugai warea hepapa gufu?c Minaa roꞌou, rona aida guaipaꞌaa ena wareaa hepapa gufu ma warefaꞌarewaiaa ei hanuna aꞌa hefiꞌadiai? 31 Maꞌuaa hamoneid refununuminaa ei baua fana.
Hagua
Ma eꞌeni a famaꞌaa hamuꞌou fei