13
Nabaa a warenaa wareaa hepapa gufu,a o warenaa wareaab ei aloꞌalo maꞌuaa lomi na paꞌi hagua aꞌau, yau aleꞌei hepalo haꞌifa rona hafugia, o hepalo manumanu na baꞌabaꞌa ua.2 Nabaa a diwareꞌaugaa fei ba i nomai nene ma apaꞌifarawanimaꞌaiaa minaa ei manumanu na udeꞌopaꞌai ma minaa ei apaꞌa ma nabaa una paꞌi fei weꞌiaa naranara ba i toigipaꞌaa Afuana ba neiree momogu i agi maꞌuaa lomi una paꞌi fei hagua aꞌau, paꞌaa lomi hanuu.3 Nabaa yau, a fanaa minaa ei manumanuu aꞌa ei lomi manumanu ma fei paꞌafiu una faguꞌaia aꞌa fei weguweguanac maꞌuaa lomi una paꞌi hagua aꞌau, paꞌaa lomi ba a tonaa neꞌa manumanu.
4 Fei hagua na paꞌi fawiwiꞌaia ma firawania. Lomi i paꞌi punepunea, warefaꞌaguꞌagua, o mamagugua. 5 Lomi aguꞌagua, lomi fei naranara ba minaa hia ua, ina walalo fifiꞌii ununa, lomi i naraiaa ei hafeloꞌaa hefiꞌa. 6 Fei hagua, lomi na niꞌeniꞌe aꞌa ei manumanu hafelo maꞌuaa aꞌa ei manumanu na faꞌuai. 7 Inaꞌaida wagiꞌinaa ei ramaꞌa, inaꞌaida narafarawani aꞌa roꞌodu, inaꞌaida fani oꞌonaia unuu ramaꞌa ma ofasisia.
8 Fei hagua, lomi iwe faꞌasisi. Maꞌuaa, ei diwareꞌauga, rowe pedu. Minaa ei wareagufu, rowe pedu. Fei apaꞌa, ana iwe pedu. 9 Uaa oꞌodu, ona aida maꞌida ua ma ona diwareꞌaugaa maꞌida ua, 10 maꞌuaa ena na nomai fei fapopoꞌia, ei lomi na poꞌaifarawani i apaꞌai. 11 Ei ui badui, warewareau aleꞌei wareaa baduu ma apaꞌau aleꞌei apaꞌaa baduu ma fei naranarau aleꞌei naranaraa baduu. Uꞌapowe wawanei, una fapedugaa fei maumau baduu. 12 Eꞌeni na tapora fafanunuaa oꞌou, aleꞌei ona igoaa fei hanunu wagii fei abagua. Nefarani, owe fafanunufarawani. Eꞌeni, una apaꞌaa maꞌida ua. Nefarani, awemina apaꞌifarawani minaa ei manumanu ana aleꞌei ba na apaꞌifarawaninau mei Haidaa.
13 Ma eni, dufu, odumanu manumanu: weꞌiaa naranara, oꞌonaia unu ma hagua. Maꞌuaa fei na pafeainaa roꞌodu, hagua.