Ei Diwareꞌauga ma ei Wareagufu
14
Hamonei neneraa fei mau hagua ma nunuminaa ei fanaa fei Spiriti fininaa refurefua. Fei ba hamonei paꞌaa nunuminia, fei fanaa fei diwareꞌauga. 2 Uaa hini i warenaa wareaa hepapa gufu,a abaa fi warenaa aꞌa ei ramaꞌa, maꞌuaa aꞌa mei Haidaa. Lomi ba hemea i guaiꞌapaꞌaa hanuu ei wareana; uaa fi wareaa ei manumanu na udeꞌopaꞌai aꞌa fei spiritina.b 3 Maꞌuaa hini i diwareꞌaugaa ei ba i nomai nene, fi warenaa aꞌa ei ramaꞌa, ba faweꞌiweꞌi, faꞌunuwenuwe ma fararawanii roꞌodu. 4 Hini mei i warenaa wareaa hepapa gufu, ifi faweꞌinaa anaia. Maꞌuaa, hini i diwareꞌaugaa ei ba i nomai nene, fi faweꞌiaa fei losuu. 5 Nunumiau ba minaa hamuꞌou nei warenaa wareaa hepapa gufu,c maꞌuaa napaꞌaa rawani nabaa hamona diwareꞌaugaa ei ba i nomai hinene. Maꞌuaa, ba i faweꞌiweꞌii fei losuu, mei i diwareꞌaugaa ei ba i nomai nene na muainaa mei i warenaa wareaa hepapa gufud nabaa lomi hemea piguana. 6 Siꞌei, ena lofu, nabaa a nomai aꞌa hamuꞌou ma a warenaa wareaa hepapa gufu, tamanu rawaniꞌana fei noramiau aꞌa hamuꞌou nabaa lomi na faꞌarewaia hepalo manumanu nadoꞌo udeꞌopaꞌai aꞌa mei Haidaa, o fanaa hamuꞌou maꞌida apaꞌa, o faꞌaiaa hefaa diwareꞌauga, o feroinaa hamuꞌou? 7 Ana aleꞌei aꞌa ei flute, o harp o ei manumanu lomi fawewenii roꞌodu. Nabaa hepalo manumanu aleꞌei na paꞌi hepalo ua mau inaiana, batanai o guaipaꞌia ba na wanewaneinaa fei lauga? 8 Ma nabaa fei maniwa na paꞌi hepalo ua mau inaiana, hini i guaipaꞌia ba inei ofafaufau aꞌa fei fifoꞌaia? 9 Ana aleꞌei aꞌa hamuꞌou. Nabaa lomi hamoꞌaa ware aleꞌei ba rona guaipaꞌia hefiꞌadiai, batanai ba hemea i guaiꞌapaꞌaa ei wareaa hamuꞌou? Nabaa aleꞌei, hamoꞌaa wareꞌuanaa fei ilao. 10 Ona aida ba feni ano na paꞌi watauda wareagufu maꞌuaa minaa roꞌou, rona paꞌipedu hanuu roꞌodu. 11 Nabaa yau, lomi una guaiꞌapaꞌaa hemea fi wareware, yau aleꞌei ramaꞌaa hepapa gufu i aꞌana ma hia, aleꞌei ramaꞌaa hepapa gufu aꞌau. 12 Ana aleꞌei aꞌa hamuꞌou. Hamona nunuminaa ei fanaa fei Spiriti maꞌuaa hamonei fagipeaa ei fanaa faweꞌiweꞌii fei losuu.
13 Ma siꞌei, hini i warenaa wareaa hepapa gufu, inei doꞌo lafulafu ba i pigupaꞌaa hanuu ei wareana. 14 Hamatee, nabaa a lafulafuwarenaa wareaa hepapa gufu, fei spiritiu ana fi lafulafu maꞌuaa fei naranarau lomi na bigi. 15 Siꞌei, a batanai? Unei lafulafu fininaa fei spiritiu ma lafulafu fininaa fei naranarau anaa. Unei lalaugi fininaa fei spiritiu ma lalaugi fininaa fei naranarau anaa. 16 Nabaa yoi, o uduginaa mei Haidaa fininaa fei spiritimu, batanai ba hemeadiai dupuaa ei lomi rona guaiꞌapaꞌaa ei wareamue ba i ware “Amen” aꞌa fei warea ‘ta’? 17 Faꞌua ba ona uduginaa mei Haidaa, maꞌuaa lomi na apaꞌaa hanuna mei ramaꞌa mei.
18 Una niꞌeniꞌe aꞌa mei Haidaa ba unaꞌaida wareaa watauda wareaa hepapa gufu laraa minaa hamuꞌou. 19 Maꞌuaa laloo fei humuu losuu, una nunuminia ba a wareaa haipani ua paolaa warea ba i feroinaa hefiꞌa laraa fei ba a wareaa hefua pufabaꞌa paolaa warea wagii fei wareaa hepapa gufu ma lomi rona guaiꞌapaꞌia.
20 Ena lofu, hamoneiꞌaa naradiai aleꞌei mau ei baduu. Aꞌa ei hafeloꞌa bigiꞌa, hamonei aleꞌei ei baduu, maꞌuaa naranaraa hamuꞌou nei aꞌu. 21 Ina paꞌi fei neꞌaia wagii fei Law ba:
Mei Fasu na ware ba,
“Aꞌa ei ramaꞌa na uꞌugai wareagufuu roꞌou
ma aꞌa ei habaꞌumuu ei ramaꞌaa hepapa gufu,
a warenaa aꞌa eni ramaꞌa eni
maꞌuaa ana lomi roꞌaa guaipaꞌaa wareau.”
22 Siꞌei, ei wareagufu abaa aleꞌei lala aꞌa ei narafaweꞌia maꞌuaa lala aꞌa ei abaa narafaweꞌia. Maꞌuaa ei diwareꞌauga, manumanuu ei narafaweꞌia, aꞌa ba manumanuu ei abaa narafaweꞌia. 23 Siꞌei, nabaa minaa fei losuu na papaꞌifipui ma minaa roꞌou, rona warenaa wareaa hepapa gufu ma nabaa hefiꞌa lomi roꞌaa guaiꞌapaꞌiaf o hefiꞌa abaa narafaweꞌia, rona waduꞌaimai laloo fei losuu, lomi roꞌaa nara ba hamona poapoai? 24 Maꞌuaa, nabaa i waduꞌaimai nemea abaa narafaweꞌia, o nemea lomi na apaꞌaa hanuu ei wareaa hamuꞌoug ena hamofi diwareꞌaugaa ei ba i nomai i nene, i powe faꞌapaꞌia ba hia na hafelo ma minaa roꞌou, roꞌawe narafafelo aꞌana, 25 ma ei naranarana, ei na udeꞌopaꞌai, iwe areꞌare. Siꞌei, iwe oꞌoꞌuinaa pu ma uduginaa mei Haidaa ma ware ba, “Mei Haidaa, hia paꞌaa inamoaa hamuꞌou!”
Fei Paꞌaa Mau Losuia
26 Ena lofu, o ware batanai? Ei hamoꞌaa papaꞌifipui, hemea na paꞌi lauga, o feroia, o warefalelefoaa ei na doꞌo udeꞌopaꞌai, o wareagufu, o piguaa wareaa hepapa gufu. Eꞌei manumanu eꞌei, ronei bigiꞌia, uaa ba faweꞌiweꞌii fei losuu. 27 Nabaa hefiꞌa roꞌaa warenaa wareaa hepapa gufu, te, hawii helagui o oꞌodui ua roꞌaa ware, ei na ware hemea, nemea neidoꞌo omaꞌa ma mei fi ware nei paꞌi hemea piguana. 28 Nabaa lomi na paꞌi pigua, mei ba i ware, inei ofamadumu laloo fei losuu ma ware ana unaia aꞌa mei Haidaa.
29 Helagui o oꞌodui mamamaꞌa, ronei ware ma minaa ei ramaꞌa, ronei italalafuimaꞌaiaa ei wareaa roꞌou. 30 Ma nabaa i bailarofimai aꞌa hemea fi guta fei warefalelefoaa fei na udeꞌopaꞌai, mei fi wareware neidoꞌo baꞌofaa wareana. 31 Uaa ina paꞌi au hememea hamuꞌou ba i diwareꞌaugaa ei ba i nomai hinene ba minaa ei ramaꞌa, ronei feroi ma faꞌunuwenuweaa roꞌou wagina. 32 Ei spiritii ei mamamaꞌa na udenaa ana panii ei mamamaꞌa. 33 Uaa mei Haidaa, abaa hia Haidaniaa ei bibiyei ua, uaa Haidaniaa fei gutafarawania.
Laloo minaa ei losuu ei apunaia, 34 ei pifine, ronei babanini ma roneiꞌaa wareware laloo ei losuu, maꞌuaa ronei fafafaunaa ana roꞌou, aleꞌei i ware fei Law. 35 Nabaa roꞌaa iꞌigilabarainaa hepalo manumanu, ronei iꞌiginaa ei haroo roꞌou i humu, uaa manumanuu mamafaa nabaa nemea pifine i wareware laloo fei losuu.
36 Fei wareaa mei Haidaa, noramiana aꞌa hamuꞌou? Uniaa hamuꞌou, hamona tonia? 37 Nabaa hemea i nara aleꞌei ba hia mamamaꞌa, o na paꞌi fanaa fei Spiriti aꞌana, te, inei ware ba ei neꞌifanau hamuꞌou, paꞌaa wareaa mei Fasu. 38 Nabaa i fanunuꞌauꞌuaialao feni wareau, hia, ana roꞌaa fanunuꞌauꞌuialao.h