Fei Asiꞌanaa Christ
15
Ena lofu, eni ba a fanonominaa hamuꞌou fei rawaniꞌa warea, fei una uꞌufanaa hamuꞌou, fei hamona tonia, fei hamona u i wagina. 2 Aꞌa feni rawaniꞌa warea feni, hamona tela nabaa hamona urofaweꞌinaa feni warea, feni una uꞌufanaa hamuꞌou. Nabaa lomi, fei narafaweꞌiaa hamuꞌou, paꞌaa lomi hanuna. 3 Uaa tamanu una tonia, una fifaninaa aꞌa hamuꞌou, uaa sifei fei napaꞌaa bauanaa laraa hefiꞌadiai manumanu: Christ na maꞌe uaa ei hafeloꞌaa oꞌou, aleꞌei i wareia fei Buꞌu Apuna 4 ma rona agifinia ma ina faꞌasiꞌania wagii fei faꞌoduaiaa arewaa aleꞌei i wareia fei Buꞌu Apuna 5 ma ina faꞌarewa aꞌa Peterb ma nene, aꞌa ei hefua ma helagui. 6 Ma nenee fei, ana aꞌa fei au fei, ina faꞌarewa aꞌa ei lofu, puduu roꞌou na muainaa haipani puꞌu. Ma watauda roꞌodu, ana roi werawera maꞌuaa hefiꞌa, rona maꞌigudii. 7 I dii, ina faꞌarewa aꞌa James ma nene, aꞌa minaa ei apostle 8 ma nenee minaa roꞌodu, inawe faꞌarewa aꞌau. Ana aleꞌei hemea baduu lomi na wanini aꞌa fei au waniniana.
9 Uaa yau na fafau lalau aꞌa minaa ei apostle lomi na rawani ba roꞌaa roroinau hemea apostle, uatani, una haperararaiaa fei losuu mei Haidaa. 10 Maꞌuaa aꞌa fei rawaniꞌaa mei Haidaa yau na oanaa aleꞌeni eni. Ma fei rawaniꞌana aꞌau na paꞌi hanuna uaa na bigifaweꞌinaa yau laraa roꞌodu, abaa ana yau, maꞌuaa fei rawaniꞌaa mei Haidaa, fei na oa aꞌau. 11 Maꞌuaa fei ba hini na uꞌu—roꞌou, o yau, abaa baua manumanu. Haiꞌouna uꞌugia ma hamona narafaweꞌi wagina.
Fei Asiꞌanaa ei Maꞌea
12 Nabaa haiꞌouna uꞌu ba Christ na asiꞌadii aꞌa fei maꞌea, tani roꞌaa ware hefiꞌa hamuꞌou ba lomi na paꞌi asiꞌanaa ei maꞌea? 13 Nabaa lomi na paꞌi asiꞌanaa ei maꞌea, Christ, ana lomi na asiꞌaa. 14 Ma nabaa Christ, lomi na asiꞌaa, fei uꞌugaa haiꞌou, lomi hanuna ma fei weꞌiaa naranaraa hamuꞌou, ana lomi hanuna. 15 Nabaa aleꞌei, oꞌou fi uꞌu ba mei Haidaa na sifisifi, uaa, ona uꞌu ba mei Haidaa na faꞌasiꞌanaa Christ aꞌa fei maꞌea. Uaa lomi ina faꞌasiꞌania nabaa paꞌaa lomi asiꞌanaa ei maꞌea. 16 Maꞌuaa, nabaa faꞌua ba ana rotaa asiꞌaa ei maꞌea, ana lomi na asiꞌaa Christ. 17 Ma nabaa ana lomi na asiꞌaa Christ, fena weꞌiaa naranaraa hamuꞌou paꞌaa lomi hanuna ma ana hamofi oa aꞌa ena hafeloꞌaa hamuꞌou. 18 Ma ei rona maꞌigudii aꞌa Christ, ana roꞌaa paꞌaa paꞌai. 19 Nabaa fei oꞌonaia unuu oꞌodu aꞌa Christ manumanuu eni ua, aꞌa feni tatalaiaa oꞌou feni ano, oneipaꞌaa faloloaꞌinaa ana oꞌou laraa minaa ei ramaꞌaa feni ano.
20 Maꞌuaa, paꞌaa faꞌua ba Christ na asiꞌadii aꞌa fei maꞌea. Hia, mei rawarawa fuaa aꞌa ei rona maꞌigu. 21 Uaa fei maꞌea, fanoramiaa hemea ramaꞌa, siꞌei, ana hemea ramaꞌa nei fanoramiaa fei asiꞌanaa ei maꞌea. 22 Uaa aꞌa Adam minaa ei ramaꞌa, rona maꞌe ma aꞌa Christ, minaa ei, rowe to harenua. 23 Maꞌuaa, ei maꞌea, rona paꞌi au roꞌou. Christ, hia, mei rawarawa fua ma ena ina hadiweꞌimai, hememea ei maroana iwe asiꞌaa. 24 Ma nenee fei, iwe nomai fei baibaisio ena ina fanimaꞌaiaa ei baua gufu na paꞌi hapara wagina, ei forafora ma fei faufau ei hapara. Ipowe fifaninaa fei haparaia aꞌa mei Haidaa, mei Ama. 25 Uaa inei upanarofaa fei hapara nopaꞌaloo fei arewaa ba i aunaa ei bidibidii ununa haroo pinena. 26 Fei aꞌapoo bidibidii unu ba i fanimaꞌaia, fei maꞌea. 27 Uaa ina “augaa minaa ei manumanu i haroo pinena.” Ma wagii fei ba “minaa ei manumanu” i ude haroo pinena, oneiꞌaa nara ba hanuna sifei ba ana mei Haidaa, hia, haroo pinena. Maꞌuaa, mei Haidaa na augaa minaa ei manumanu i haroo Christ. 28 Ena i bigidigaa ei, mei Naꞌuu Ramaꞌa, anaia, iwe oa haroo hemei inamina augaa ei manumanu harona. Ma mei Haidaa iwe pafeainaa minaa ei manumanu.
29 Nabaa paꞌaa lomi asiꞌana, roꞌaa batanai ei rona pudugufai uaa ei maꞌea? Nabaa ei maꞌea paꞌaa lomi roꞌaa asiꞌaa, tani roꞌaa pudugufai ei ramaꞌa wagii roꞌou? Ma nabaa ei maꞌea, paꞌaa lomi ba roꞌaa asiꞌaa, tani ei ba ronei pudugufai ei ramaꞌa wagii ei maꞌea? 30 Ma aꞌa haiꞌodu, tamanu paꞌafina ba haiꞌounaꞌaida bigi aꞌa ei manumanu ba i fafeloaa haiꞌodu? 31 Fei mau gutanau aleꞌei ba hepapalo arewaa una maꞌe. Feni, ina faꞌua, ena lofu, ana aleꞌei fei faꞌuaia ba aꞌa Christ Jesus, mei Fasuu oꞌou, una warefaꞌaguꞌagu aꞌa hamuꞌou. 32 Ma wagii fei bigiꞌau una fiharei aꞌa ei ramaꞌa yei Ephesus, maꞌuaa tamanu hanuna nabaa una bigiꞌuaiaa ei manumanu yeni aꞌa feni ano? Nabaa lomi roꞌaa asiꞌaa ei maꞌea,
“Te, odii o hanana ma hunu ua,
uaa narani, oꞌaa maꞌe.”
33 Apuna narafatata: “Oa tapuu ei hafeloꞌa ma roꞌaa fafeloaa fei rawaniꞌa naranaraa hamuꞌou.” 34 Hamonei tohadiweꞌinaa fei rawaniꞌa naranaraa hamuꞌou ma apuna bigifafelodiai, uaa hefiꞌa hamuꞌou, lomi rona apaꞌaa mei Haidaa. Na wareaa fei ba hamonei mafa.
Fei Mau Unuu ei Rona Asiꞌaa
35 Ma nabaa hemea ramaꞌa i iꞌigai, “Batanai rona asiꞌaa ei maꞌea? Batanai mau unuu roꞌodu?” 36 Hefei, poapoa iꞌigaia! Tamanu ona faroia, lomi ba i habe nabaa atawe maꞌe. 37 Ei ona faroaa hepalo manumanu, aleꞌei wheat, o hepalodiai manumanu, lomi ba oꞌaa faroaa fei paꞌapaꞌana, uaa ona faroaa fei launa. 38 Maꞌuaa mei Haidaa na fanaa fei paꞌapaꞌana aleꞌei naranarana. Ma aꞌa hepapalo lau ana na paꞌi paꞌapaꞌana. 39 Minaa ei pigio abaa fiminaꞌei. Ei ramaꞌa, rona paꞌi hepalo mau pigio, ei manulelele hepalodiai, ei manufidufidu hepalodiai ma ei nia hepalodiai. 40 Ma ei manumanu pafea, ana rona paꞌi paꞌafii roꞌodu. Maꞌuaa, fei mau paꞌafii roꞌou hepalo ma fei mau paꞌafii ei manumanu malagufu hepalodiai. 41 Fei mau weꞌaa fei halo, hepalo, fei puda hepalodiai ma ei piꞌu, hepalodiai. Ma fei mau weꞌaa hepalo piꞌu na uꞌugai aꞌa hepalodiai piꞌu.
42 Ana aleꞌei fei asiꞌanaa ei maꞌea. Fei unu i iꞌifai fininaa hafeloꞌa, maꞌuaa i asiꞌaa fininaa hawera; 43 Fei mau unu na iꞌifai ina hafelo, maꞌuaa fei unu i asiꞌaa, i paꞌi hawerana. Fei na iꞌifai, lomi faufauna, maꞌuaa fei i asiꞌaa na paꞌi faufauna. 44 Ina iꞌifainaa hefei ununa unuu ramaꞌa maꞌuaa i asiꞌaa fei ununa, unuu spiriti.
Nabaa na paꞌi ununa, unuu ramaꞌa, ana na paꞌi ununa, unuu spiriti. 45 Ma siꞌei, ana aleꞌei rona neꞌidigia ba: “Mei rawarawa ramaꞌa, Adam, ina to fawewenina”; mei aꞌapoo Adam, hia hemea na paꞌi spiriti ma ana i fani faweweni. 46 Mei ramaꞌa spiriti aꞌa ba na nomai farawarawa, uaa mei ramaꞌa ua, idoꞌo nomai ma nene, mei ramaꞌa spiriti. 47 Mei rawarawa ramaꞌa mamarana wagii fei poraa malagufu. Mei fahelaguiaa ramaꞌa noranarai pafea. 48 Ei unuu ei ramaꞌaa malagufu, ana aleꞌei mei ramaꞌa mamarana wagii fei malagufu. Ei unuu ei ramaꞌa rona dinaa pafea, ana aleꞌei fei unuu mei ramaꞌa noranarai pafea. 49 Ma ana aleꞌei ba ona torotonaa fei mau mei ramaꞌaa malagufu, ana owec tonaa fei mau mei ramaꞌa noranarai pafea.
50 A faꞌarewaia aꞌa hamuꞌou, ena lofu, ba fei pigio ma fei namo, lomi ba i waduꞌainaa fei haparaiaa mei Haidaa ma fei ba i maroro ana lomi ba i tonaa tamanu ei ba lomi i marorotoo. 51 Guainia. A warefanaa hamuꞌou hepalo manumanu na udeꞌopaꞌai. Lomi ba oꞌamina maꞌigu maꞌuaa minaa oꞌou, owe filogii 52 aꞌegimeꞌai, aleꞌei usida, o bigoaa puda, aꞌa fei aꞌapoo aigaa fei maniwa. Uaa fei maniwa, iwe ai, ei maꞌea, rowe asiꞌaa ma lomi ba roꞌaa wafuu ma owe filogii. 53 Uaa eni hudi unuu oꞌou, roꞌawe wafuu maꞌuaa opowe tonaa ei hudi unu lomi ba ro fai wafuu. Ma eni hudi unuu oꞌou eꞌeni roꞌaa maꞌe maꞌuaa hinene, owe tonaa ei lomi roꞌawe maꞌetoo. 54 Nefarani, fei ba i maroro, iwe tonaa tamanu lomi i marorotoo ma fei ba i maꞌe, iwe tonaa fei lomi iwe maꞌetoo. Ena na nodigimai fena au fena, ipowe nofaꞌuaimai fei neꞌia ba: “Fei asiꞌana na muainaa fei maꞌea.”
55 “Fena maꞌea, hitani fei faufaumu ba ona mua?
Fena maꞌea, hitani fei fiꞌiamu?”
56 Fei fiꞌiaa maꞌea, ponoꞌaa ei hafeloꞌa. Ma ei hafeloꞌa na to faufauna aꞌa fei Law. 57 Maꞌuaa onei ware ‘ta’ aꞌa mei Haidaa ba aꞌa mei Fasuu oꞌou Jesus Christ, ina famuainaa oꞌou.
58 Siꞌei, ena rawaniꞌa lofuu, ufaweꞌi. Apuna fanoramii hepalo manumanu ba i toiginaa hamuꞌou. Ranimai hamoneimina fanaa hamuꞌou aꞌa fei bigiꞌaa mei Fasu, uaa hamona aida ba aꞌa mei Fasu, ei bigiꞌaa hamuꞌou, ipowe paꞌi fuana.