16
Ma wagii fei ba hamoꞌaa pagiꞌaugaa ena mugoo poꞌii haduhaduu ena apunaia, hamonei bigiꞌia aleꞌei ei wareau aꞌa ei losuu yei Galatia. 2 Aꞌa fei rawarawa arewaa laloo hepapalo hefapagipagia, hememea hamuꞌou nei auꞌuꞌuginaa maꞌida mugoo poꞌina, aleꞌei ba i wareinaa puduna ma naraia ba hefiga inei augia. Ma ena una nomai, lomi ba hamoꞌaa todiai. 3 Ma ena una nomai, awe neꞌinaa ei wareau ba batanai maumau ei ramaꞌa, ei hamona rafeinaa roꞌou. Ma ba hamoꞌaa aloaa roꞌou fininaa fei neꞌiau mawe ei mugoo poꞌi ba ronei dinaa Jerusalem. 4 Nabaa ona nara aleꞌei ba unei nogiaa roꞌodu, te, ronei aunufipui aꞌau.Ei Iꞌigaiaa Paul
5 Una aunudiginaa yei Macedonia, awe nomai aꞌa hamuꞌou maꞌuaa adoꞌo aunuꞌailao Macedonia. 6 Narau ba a gutafipui aꞌa hamuꞌou maꞌida, aleꞌei i nopaꞌaloo fei pedupeduu fei au waiwana ba hamonei hadumau aꞌa fei tatalaiau, fei ba a dinaa wagina. 7 Nabaa a nomai eꞌeni, a guta maꞌida ua aꞌa hamuꞌou. Siꞌei, lomi ba a nomai eꞌeni, uaa nunumiau ba a gutafamadii maꞌida. Siꞌei, awe nomai nefarani nabaa i ugainau mei Fasu. 8 Maꞌuaa uneidoꞌo guta yeni Ephesus nopaꞌalao fei au Pentecost, 9 uaa aleꞌei hepalo baua gigei na gigi aꞌau ba uneiree waduꞌai ma bigi maꞌuaa na paꞌi watauda yei rona siba aꞌau.
10 Nabaa i nomai Timothy, hamonei fagutania aleꞌei ba lomi na paꞌi hepalo manumanu i famaꞌauia, uaa ifi bigiꞌaa fei bigiꞌaa mei Fasu, ana aleꞌei yau. 11 Siꞌei, lomi na rawani ba nemea hamuꞌou i ofadugia. Alofarawaninamii hia aꞌau. Yau fi gutaꞌomaꞌuaia fipuinaa ei lofu.
12 Ma mei lofuu oꞌou Apollos, unamina iꞌigifaweꞌi aꞌana ba nei aunufipuiwau aꞌa ei lofu ma dinaa aꞌa hamuꞌou. Paꞌaa lomi na nunuminia ba i nowau eꞌeni, maꞌuaa iwe nowau nabaa i paꞌi rawaniꞌa auna.
13 Hamonei ofafaufau; ufaweꞌi aꞌa fei weꞌiaa naranaraa hamuꞌou; apuna maꞌau; hamonei ofaweꞌi. 14 Hamonei bigiꞌaa minaa ei manumanu fininaa hagua.
15 Hamona aida ba ei maroaa fei humuu Stephanas, ei rawarawa ramaꞌa tonaa mei Fasu yei Achaia ma rona augaa ana roꞌou ba roꞌaa hadumaa ei apunaia. A iꞌigifaweꞌi aꞌa hamuꞌou, ena lofu 16 ba hamonei guainaa wareaa roꞌou mawe minaa ei rona nomai ba roꞌaa bigifipui wagii fei bigiꞌa. 17 Una niꞌeniꞌe aꞌa fei noramiaa Stephanas ma Fortunatus ma Achaicus, uaa rona fani hefiꞌa manumanu lomi hamona hadumau wagina. 18 Uaa rona farawanidinaa fei spiritiu ma fei spiritii hamuꞌou anaa. Ei mau ramaꞌa aleꞌei, hamonei fahonuanaa roꞌou.
Ei Aꞌapoo Warea
19 Ei losuu yei Asia, rona famafufuoinaa hamuꞌou. Aquila ma Priscilla,a lagunapaꞌaa famafufuoinaa hamuꞌou uaa mei Fasu. Ma na paꞌi hepalo losuu, rona figupui humuu lagua. Ana rona famafufuoinaa hamuꞌou. 20 Minaa ei lofu yeni, rona famafufuoinaa hamuꞌou. Hamonei fihatofii pudaa hamuꞌou fininaa rawaniꞌa naranara.
21 Yau, Paul, na neꞌinaa paniu feni famafufuoia.
22 Hini lomi i haguaa mei Fasu, nei tonaa fei umua. Nomai, Mena Fasu!b
23 Fei rawaniꞌaa mei Fasu Jesus nei oafipui aꞌa hamuꞌou.
24 Feni haguau i dinaa aꞌa minaa hamuꞌou, ena na oafipui aꞌa Christ Jesus. Amen.c