Ñaꞌa ni ndasavaꞌa Jesús ma kueꞌe ni ka yo ndoꞌo ña ma, ka chindee ña ya
8
Ja ni jinu sukan ma,
Jesús ma,
kuaꞌan ya ndaka ñuu ma,
te káxtnuꞌu ya tnuꞌu vii tnuꞌu vaꞌa sukan tatnuni Suꞌsi ma.
Te ndi‑uxi uu apóstol ma ka ndikin ya,
2 te suni ka ndikin ñaꞌa jaku ñaꞌa ni ndeneꞌe ya tachi ni ka yo ñunee ini anua ña ma,
jiꞌin ñaꞌa ni ndasavaꞌa ya ma.
Te neꞌun ñaꞌa yukan kuaꞌan María ñaꞌa ka xnani i Magdalena ma ñaꞌa ni ka nde koo uja tachi ma.
3 Suni Juana ñasiꞌi tee kúu Cuza ma tee ni yo tnii kuenda veꞌe Herodes ma,
jiꞌin Susana ma,
jiꞌin kuaꞌa‑ka ñaꞌa ni ka yo ndi ini nawa jin kaa de jiꞌin ya ma.
Ni kaꞌan Jesús ma in tnuꞌu vijin tee ni saka triu ma
4 Kuaꞌa ñayii ñuu ma ni ka ke koo,
ka ndeꞌya i Jesús ma.
Te ni ka ndututu kuaꞌa ñayii.
Sani te ni kaꞌan ya in tnuꞌu vijin:
5 ―In tee,
ni kee de kuan saka de triu.
Te ja ni saka de ma,
jaku ni ka jinkava ichi jika de ma,
te jaku ni ka jiñu ñayii ma,
te jaku ni ka jaa lasaa ma.
6 Jaku‑ka i ni ka jinkava neꞌun yuu ma,
te nuu ni ka jite i ma,
ni ka yichi i,
vaa ñatuu na koꞌyo iyo.
7 Te jaku‑ka ni ka jinkava neꞌun iñu ma.
Suni ni ka jite tna i,
te iñu ma,
ni ka jaꞌni ñaꞌa i.
8 Kovaa jaku tnaꞌa ja ni ka jinkava nuu ñuꞌú vaꞌa ma,
te ni ka jaꞌnu i,
te naꞌnu naꞌnu yoko ni ka kana koo i,
te ni ka chitu vaꞌa i.
Onde cientu triu ma ni ka nduu ja in triu ma.
―Saꞌa jiñaꞌa Jesús ma,
te ni kaꞌan niniꞌi ya:
―Nde ni iyo soꞌo ja koninisoꞌo ni,
te koninisoꞌo vaꞌa ni ―kúu ya káꞌan ya.
Ni kaxtnuꞌu Jesús ma navaꞌa ni kaꞌan ya tnuꞌu vijin ma
9 Te tee ka ndikin ya ma,
ni ka jikan‑tnuꞌu de Jesús ma nawa kúni kaꞌan tnuꞌu vijin yukan.
10 Te jiñaꞌa ya:
―Ndijin chi Suꞌsi ma,
káxtnuꞌu ya naxe tatnuni ya ma.
Kovaa nuu ndaka‑ka ñayii ma chi káꞌan sa tnuꞌu vijin,
sukan‑vaꞌa visi na jin kondeꞌya‑ka i,
kovaa ma jin kuni i,
te visi na jin koninisoꞌo‑ka i,
kovaa ma jin jakuꞌni ini i.
Ni kaxtnuꞌu Jesús ma nawa kúni kaꞌan tnuꞌu vijin tee ni saka triu ja ni kaꞌan ya ma
11 ’Saꞌa kúni kaꞌan tnuꞌu vijin ni kaꞌan sa a:
Triu ma kúu tnuꞌu vii tnuꞌu vaꞌa Suꞌsi ma,
12 te jaku ja ni ka jinkava ichi ma ka kuu ñayii ka jinisoꞌo tnuꞌu vii tnuꞌu vaꞌa ma,
kovaa kénda tachi ma,
te xtandiyo i tnuꞌu ni jakun‑nee ini anua ñayii ma,
sukan‑vaꞌa ma jin kandija i te ma jin ndaniꞌi taꞌvi i.
13 Te triu ni ka jinkava neꞌun yuu ma ka kuu ñayii ni ka jinisoꞌo tnuꞌu vii tnuꞌu vaꞌa ma,
te sii ini ni ka jinisoꞌo i,
kovaa ñatuu ni ka niꞌi yoꞌo vaꞌa i.
Ka kandija i jaku‑ni kivi,
kovaa kénda kivi ja jitotnuni ñaꞌa tachi ma,
te ka ndakakayata i,
te ka xndoo i ichi Suꞌsi a.
14 Te triu ni ka jinkava neꞌun iñu ma ka kuu ñayii ka jinisoꞌo ma,
kovaa ka waꞌa i tnuꞌu ja ka ndi ini xeen i siki ja na jin kuxiku i ma,
jiꞌin ja na jin koo sii ini i ma.
Te sukan,
te ñatuu na ja vii ja vaꞌa ka saꞌa i.
15 Kovaa triu ni ka jinkava nuu ñuꞌú vaꞌa ma ka kuu ñayii inuvaꞌa ini ma,
te ni‑yuꞌu ni‑anua i ka ninisoꞌo i tnuꞌu Suꞌsi ma,
te ka saꞌa i sukan káꞌan tnuꞌu vii tnuꞌu vaꞌa Suꞌsi ma,
te ñatuu ka xndoo i ichi ya a,
te ndimaa ja vii ja vaꞌa ka saꞌa i.
Ni kaꞌan Jesús ma in tnuꞌu vijin siki in ja ndúꞌva ja xtnuu i nuu o
16 ’Masu na in xnduꞌva in ñuꞌu te chísaꞌvi vaꞌa i xi chínee i chii jito i ma chi ñaꞌa.
Suꞌva sónee sukun i,
sukan‑vaꞌa xtnuu i nuu ñayii jin kivi koo ma.
17 Suni maa i kúu ja ndaka ja iyo yuꞌu ma chi ndatuu i,
te ndaka ja iyo yuꞌu ja ñatuu ka jini o ma chi kenda kivi ja jin kuni ndaka o sukan kaa sukan iyo i ma.
18 ’Chukan kúu ja jin koninisoꞌo vaꞌa ni,
vaa ñayii nevaꞌa kuaꞌa‑ka ja vii ja luu ni skutaꞌvi ñaꞌa Suꞌsi ma chi suꞌva niꞌi kuaꞌa‑ka i,
kovaa ñayii ñatuu nawa nevaꞌa i ma chi suꞌva xtandiyo ya onde ja jani ini i ja nevaꞌa i ma ―kúu ya jiñaꞌa ya.
Ni kaꞌan Jesús ma nde ñayii kúu siꞌi ya ma jiꞌin ñani ya
19 Siꞌi Jesús ma jiꞌin ñani ya ma ni ka kenda koo nuu iyo Jesús ma,
kovaa ñatuu kúu jin kivi koo i jin tuꞌva i ya,
chi vaa ka iyo kuaꞌa ñayii ma.
20 Te in ñayii ma jiñaꞌa nuu ya ma:
―Siꞌi ni ma jiꞌin ñani ni ma ka iyo i keꞌe ma,
te ka kuni i ja jin kuni ñaꞌa i ―kúu i jiñaꞌa i.
21 Te ni ndakoneꞌe ya:
―Nú na in koninisoꞌo tnuꞌu káꞌan Suꞌsi ma te saꞌa i sukan káꞌan ya ma,
ñayii yukan ko kuu siꞌi sa ma jiꞌin ñani sa ma ―kúu ya jiñaꞌa ya.
Jesús ma, ni ndasaꞌa nañii ya kajin yiꞌi ma jiꞌin ndute ma
22 In kivi ni kaa Jesús ma in nuu barcu jiꞌin tee ka ndikin ya ma,
te jiñaꞌa ya:
―Jín koo o in‑ka yuꞌu mar ma ―kúu ya jiñaꞌa ya.
Te kuan koo de jiꞌin ya.
23 Nani ka yaꞌa de nuu ndute ma,
Jesús ma,
ni kixi ya.
Sani te ni kejaꞌa yiꞌi xeen kajin nuu ndute ma,
te barcu ma ve jakuꞌun ndute,
te vala‑nka ja saꞌvi tnu nuu ndute ma.
24 Sani te ni ka xndoto de Jesús ma,
te ka jiñaꞌa de:
―¡Teskuaꞌa!
¡Teskuaꞌa!
¡Jin saꞌvi o nuu ndute a!
―ka kuu de ka jiñaꞌa de.
Jesús ma,
ni ndakoo ya,
te ni tatnuni ya nuu kajin yiꞌi ma jiꞌin nuu ndute ma ja na jin ndunañii i.
Te ndaka ni ndukuee,
te nañii kuiti ni kuu.
25 Sani te jiñaꞌa ya nuu tee ka ndikin ya ma:
―¿Ñatuu jin kukanu ini‑ka ñaꞌa ni?
―kúu ya jiñaꞌa ya.
Kovaa maa de chi ni ka yuꞌu de,
te ni ka saꞌvi‑nka ini de,
te ka jikan‑tnuꞌu tnaꞌa ndi‑in ndi‑in de:
―¿Na in kúu tee yaꞌa,
ja tátnuni de nuu kajin yiꞌi a jiꞌin nuu ndute a,
te ka kandija i a?
―ka kuu de ka kaꞌan de.
Ni ndasavaꞌa Jesús ma in tee ja ka yinee ñaꞌa tachi
26 Sani te ni ka kenda koo de ñuu Gerasa ma ja iyo i in‑ka yuꞌu mar ñuu Galilea ma.
27 Ja ni nuu Jesús ma nuu ñuꞌú ma,
te ni kenda in tee ñuu yukan ja ka yinee ñaꞌa tachi,
te ni jan tuꞌva de ya.
Jâ ni kuu kii ja ñatuu na saꞌma neꞌnu‑ka de ni a koo de in veꞌe‑ka,
suꞌva neꞌun nuu ka yinee ndiyi ma ni yo iyo de.
28 Nuu ni jini de Jesús ma,
ni jinkoo jiti de nuu ya,
te káyuꞌu de jiñaꞌa de:
―¡Máko kivi nduu ni jiꞌin sa,
Jesús,
Saꞌya Suꞌsi onde sukun ma!
¡Jikan‑taꞌvi sa ja má xndoꞌo ñaꞌa ni!
―kúu de jiñaꞌa de.
29 Saꞌa ni jiñaꞌa de,
vaa Jesús ma,
tátnuni ya nuu tachi ma ja na xndoo i de,
vaa kuaꞌa jichi ni yo saꞌa ndevaꞌa i tee yukan.
Te visi ñayii ma,
ni ka yo juꞌni i ndaꞌa de jaꞌa de ma jiꞌin yoꞌo kaa,
sukan‑vaꞌa konuꞌni vaꞌa de,
kovaa ni yo jaꞌnde de.
Te tachi ma,
ni yo saꞌa i ja na kiꞌin de nuu masu nawa iyo kuiti ma,
koo de.
30 Te Jesús ma,
ni jikan‑tnuꞌu ya:
―¿Naxe nani ro?
―kúu ya jiñaꞌa ya.
Te ni ndakoneꞌe tachi ma:
―Legión nani sa ―kúu i jiñaꞌa i.
Saꞌa jiñaꞌa i,
vaa kuechi ja kuaꞌa i ka kuu ja ka yinee ini de ma.
31 Ndaka tachi ma ni ka jikan‑taꞌvi nuu Jesús ma ja má tetniñu ya i nuu kunu nuu nee ma.
32 Te yuku yukan ka iyo kuaꞌa chikini ja ka jaa ti,
te chukan kúu ja ka jiñaꞌa tachi ma ja kuaꞌa ya tnuꞌu,
te jín ndivi koo i chikini ma.
Te Jesús ma,
ni waꞌa ya tnuꞌu.
33 Sani te tachi ma,
ni ka nde koo i ini tee yukan,
te ni ka ndivi koo i ini chikini ma.
Te chikini ma,
ka jinu ti ni ka nu koo ti nuu ndute mar ma,
te ni ka kê koo ti nuu ndute ma,
te ni ka kandee ti,
te ni ka jiꞌi ti.
34 Te tee ka jito chikini ma,
ni ka jini de ja ni kuu ma,
te ka jinu de ni jan koo de nuu ñayii ñuu ma jiꞌin ñayii ka iyo ichi yuku ma,
te ni ka ndakani de.
35 Te ñayii ma,
ni ka ke koo i ka ndeꞌya i sukan ni kuu ma.
Te ni ka kenda koo i nuu iyo Jesús ma,
te ni ka ndaniꞌi i tee ni ka yo yinee ñaꞌa tachi ma ja núkoo de nuu jaꞌa Jesús ma.
Neꞌnu de saꞌma de ma,
te jâ ni ndukaji ini de.
Te ja ni ka jini i sukan ni kuu ma,
te ni ka yuꞌu i.
36 Te ñayii ka iyo yukan ja ni ka jini i sukan ni kuu ma,
ni ka ndakani i sukan ni nduvaꞌa tee ni ka yo yinee ñaꞌa tachi ma.
37 Ndaka ñayii ñuu Gerasa ma,
ni ka kejaꞌa i ka jikan‑taꞌvi i nuu Jesús ma ja na kiꞌin ya,
te máko koo‑ka ya ñuu yukan,
vaa ka yuꞌu xeen i ja sukan ni kuu ma.
Chukan kúu ja Jesús ma,
ni ndaa ya nuu barcu ma,
te kuan noꞌo ya.
38 Te tee ni ka yinee ñaꞌa tachi ma,
ni jikan‑taꞌvi de ja na kuaꞌa ya tnuꞌu ja na kondikin de ya.
Kovaa Jesús ma,
ni tatnuni ya ja na ndoo de,
te jiñaꞌa ya:
39 ―Kuán noꞌo ni veꞌe ni ma,
te ndakani ni ja ni saꞌa Suꞌsi ma jiꞌin ni a ―kúu ya jiñaꞌa ya.
Te tee yukan,
kuan noꞌo de,
te ni ndakani de nuu ndaka ñayii ñuu ma ja ni ndasavaꞌa ñaꞌa Jesús ma.
Ni ndaxteku Jesús ma sasiꞌi tee nani Jairo ma, te ni ndasavaꞌa ya in ñaꞌa
40 Nuu ni ndenda Jesús ma in‑ka yuꞌu ndute ma,
ñayii ma,
ni ka ndusii ini xeen i,
vaa ndaka i ka ndetu ya.
41 Sani te ni kenda in tee nani de Jairo,
tee jito veñuꞌu luluu ma kúu de.
Te tee yaꞌa chi ni jinkoo jiti de nuu jaꞌa Jesús ma,
te ni jikan‑taꞌvi de ja na kiꞌin ya veꞌe de ma,
42 vaa iyo in sasiꞌi de,
te maa in maa tnuꞌu‑ni i kúu,
te uxi uu kuiya yiꞌi i,
te kuꞌu kaꞌvi i,
te ûni kûu i kúni i.
Nani Jesús ma,
kuaꞌan ya,
te ka jexniꞌni tnaꞌa ñayii ma,
vaa kuaꞌa xeen i ka ndikin ya ma.
43 Te neꞌun ñayii ma kuaꞌan in ñaꞌa ja iyo uxi uu kuiya ja kuꞌu ña,
vaa jati ñaꞌa niñi,
te ni ndiꞌi ndaka ja nevaꞌa ña ma ni jatniñu ña nuu tee tatna ma,
te ñatuu ni kuu nduvaꞌa ña.
44 Te ñaꞌa yaꞌa,
ni jan tuꞌva ña Jesús ma ichi yata ya ma,
te ni tnii ña yuꞌu saꞌma ndii ya ma.
Te maa ora yukan‑ni ni jinkuiñi ja jati ñaꞌa niñi ña ma.
45 Sani te Jesús ma,
ni jikan‑tnuꞌu ya:
―¿Na in kúu ja ni kakiꞌi ñaꞌa ma?
―kúu ya jiñaꞌa ya.
Ndaka ñayii ma ka jiñaꞌa ja ñatuu na in ni kakiꞌi ya,
te chukan kúu ja Pedro ma,
jiñaꞌa de:
―Teskuaꞌa,
ñayii a chi ka tundaꞌa tnaꞌa i,
te ka jexniꞌni tnaꞌa i ―kúu de jiñaꞌa de.
46 Kovaa Jesús ma,
jiñaꞌa jiñaꞌa ya:
―Iyo in ñayii ni tnii yuꞌu saꞌma sa a,
vaa jâ ni jinitnuni sa ja ini anua sa a ni kee tnuꞌu ndee tnuꞌu ndatnu ―kúu ya jiñaꞌa ya.
47 Ñaꞌa ma,
ja ni jini ña ja masu kuu naxe chuꞌu ña ma,
te niniꞌi‑nka ña ni jinkoo jiti ña nuu jaꞌa Jesús ma,
te ni ndakaꞌan ña nuu ndaka ñayii ma navaꞌa ni tnii ña yuꞌu saꞌma ya ma jiꞌin sukan ni nduvaꞌa ña ora yukan‑ni ma.
48 Jesús ma,
jiñaꞌa ya:
―Saꞌya sa,
ja ni kukanu ini ñaꞌa ni a,
te ni nduvaꞌa ni.
Kuáꞌan sii ini ni ―kúu ya jiñaꞌa ya.
49 Yikuu‑ka Jesús ma káꞌan ya,
nuu ni kenda in tee iyo veꞌe tee tátnuni veñuꞌu luluu ma,
te jiñaꞌa de nuu tee ma:
―Saꞌya ni ma,
jâ ni jiꞌi i.
Má xtnaꞌa‑ka ni teskuaꞌa a ―kúu de jiñaꞌa de.
50 Kovaa Jesús ma,
ni jinisoꞌo ya,
te jiñaꞌa ya:
―Má koyuꞌu ni.
Yika‑ni ja kukanu ini ñaꞌa ni,
te saꞌya ni ma chi kaku i ―kúu ya jiñaꞌa ya.
51 Ja ni ka kenda koo de jiꞌin ya veꞌe de ma,
ñatuu ni waꞌa ya tnuꞌu ja na in kivi‑ka,
yika‑ni ja Pedro ma,
jiꞌin Juan ma,
jiꞌin Santiago ma,
jiꞌin yuva suchi ni jiꞌi ma,
jiꞌin siꞌi i ma.
52 Ndaka ñayii ma,
ka ndaꞌyu i ja ka kuxii ini i ja ni jiꞌi suchi siꞌi ma.
Kovaa Jesús ma,
jiñaꞌa ya:
―Máko jin kondaꞌyu‑ka ni.
Suchi siꞌi a,
masu ni jiꞌi i chi kixi i ―kúu ya jiñaꞌa ya.
53 Sani te ndaka ñayii ma,
ni ka jakundee i ya,
vaa jâ ka jini i ja jâ ni jiꞌi suchi yukan ma.
54 Sani te Jesús ma,
ni tnii ya ndaꞌa i ma,
te ûni niniꞌi ni kaꞌan ya saꞌa:
―¡Suchi jaa,
ndakoo!
―kúu ya jiñaꞌa ya.
55 Sani te ni ndateku i,
te ni ndakoo kunu i.
Te Jesús ma,
ni tatnuni ya ja na jin kuaꞌa de ja kaa i.
56 Te yuva i ma,
ni ka saꞌvi‑nka ini de.
Kovaa Jesús ma,
ni tatnuni ya ja má jin ndakani de nuu ni‑in ñayii ja sukan ni kuu ma.