Tnuꞌu vii tnuꞌu vaꞌa Jesucristo ma sukan ni kaxtnuꞌu tee ni yo nani Juan ma
Tnuꞌu Suꞌsi ma ni kii ñayivi
1
Onde xinañuꞌu ma,
iyo Tnuꞌu Suꞌsi ma,
te onde kivi yukan jâ iyo Tnuꞌu Suꞌsi ma jiꞌin Suꞌsi ma,
te Tnuꞌu Suꞌsi ma chi Suꞌsi ma kúu.
2 Te Tnuꞌu Suꞌsi ma iyo jiꞌin Suꞌsi ma onde xinañuꞌu ma.
La Palabra (Juan 1.1-18)
3 Te ja maa Tnuꞌu Suꞌsi ma,
te ni ka kuvaꞌa ndaka ja ka iyo a,
te ñatuu nawa ni kuvaꞌa nú masu ja maa Tnuꞌu Suꞌsi ma.
4 Te ja maa Tnuꞌu Suꞌsi ma te jin koteku ñayii ma,
te maa Tnuꞌu Suꞌsi ma xtnuu nuu ñayii ma.
5 Te ñuꞌu yaꞌa ndúꞌva jajaa nuu nee ma,
te ñatuu nawa kúndee ja ndáꞌva i ñuꞌu ma.
6 Ni kenda in tee ni yo nani Juan.
In tee ni tetniñu Suꞌsi ma kúu de.
7 Tee yaꞌa,
ni kenda de ja ko kuu de testigu,
sukan‑vaꞌa kaꞌan de siki iya kúu ñuꞌu xtnuu vivii ma,
te ndaka ñayii ma jin kandija ja iya yaꞌa saꞌa ja jin ndaniꞌi taꞌvi o ma.
8 Juan ma,
masu ñuꞌu xtnuu nuu ñayii ma kúu de,
suꞌva ni tetniñu Suꞌsi ma de ja kaꞌan de siki ñuꞌu xtnuu vivii ma.
9 Chi vaa maa Tnuꞌu Suꞌsi ma kúu ñuꞌu xtnuu ndija nuu ñayii ma,
te vee ya ñuu ñayivi a.
10 Te maa Tnuꞌu Suꞌsi ma ni kii ñuu ñayivi a,
ñuu ñayivi ni kuvaꞌa ja maa ya ma,
kovaa ñayii ñuu ñayivi a,
masu ni ka ndakuni i ya.
11 Ni kenda ya ñuu ya ma,
kovaa ñayii ñuu ya ma,
masu ni ka jan‑taꞌvi i ya.
12 Kovaa ndaka ñayii ni ka jan‑taꞌvi ya ma te ni ka kandija i ya ma,
ni waꞌa ya tnuꞌu ja jin ko kuu i saꞌya Suꞌsi ma.
13 Te ñayii yaꞌa chi masu sukan ni kuu kii ni kâku o ma,
ni a masu sukan kúu ini maa ñayii ma,
ni a masu sukan ka kuu ini tee ma kúu ja ni ka ndakâku jaa i nuu Suꞌsi ma,
nú masu ja sukan kúu ini maa Suꞌsi ma,
te ni ka ndakâku jaa i,
te ni ka nduu i saꞌya ya ma.
14 Te Tnuꞌu Suꞌsi ma ja kúu maa Jesucristo ma,
ni kii ñayivi ya,
te ni iyo ya neꞌun ndaka o,
te ni ka jini o jayiñuꞌu ya ma,
jayiñuꞌu maa in maa tnuꞌu‑ni Saꞌya Suꞌsi ma,
te ndimaa tnuꞌu vii tnuꞌu mani jiꞌin ja ndaa ni yo kaꞌan,
ni yo kachi ya.
15 Juan ma,
ni kaꞌan de na in kúu Jesús ma,
nuu ni kenda ya nuu ka iyo de ma,
te káyuꞌu de káꞌan de:
―‍Iya yaꞌa kúu iya ni kaꞌan sa ja kii kuee‑ka ya sana saña ma,
te kanuu‑ka ya sana saña,
vaa xiꞌna‑ka ya iyo sana saña ―‍kúu de jiñaꞌa de.
16 Ndaka ja vaꞌa xeen nevaꞌa ya ma ni ka ndaniꞌi o,
te sukan ni ka niꞌi o kuaꞌa xeen tnuꞌu vii tnuꞌu mani Suꞌsi ma.
17 Tnuꞌu ni tatnuni Suꞌsi ma chi ni waꞌa ya nuu tee kúu Moisés ma,
te ni yo ndakaxtnuꞌu de nuu ñayii ma.
Kovaa tnuꞌu vii tnuꞌu mani ma jiꞌin ja ndaa ma ni kenda ja maa Jesucristo ma.
18 Ñatuu na in ni jini Suꞌsi ma,
nú masu ja Saꞌya maa in maa tnuꞌu‑ni ya ma,
vaa Suꞌsi kúu maa ya,
te iyo ya jiꞌin Yuva ya ma.
Suu ya kúu iya ni kaxtnuꞌu sukan iyo Suꞌsi ma.
Juan ma káxtnuꞌu na in kúu Jesucristo ma
19 Te chaꞌa kúu ja ni ndakaꞌan tee kúu Juan ma.
Te tee judío ñuu Jerusalén ma,
ni ka tetniñu de sutu ma jiꞌin saꞌya tata Leví ma ja jin kakan‑tnuꞌu de na in kúu Juan ma.
Juan el Bautista identifica al Mesías (Juan 1.19-34)
20 Te ni kaꞌan ndaa Juan ma:
―‍Masu saña kúu Cristo iya tetniñu Suꞌsi ma ―‍kúu de jiñaꞌa de.
21 Ni ka ndakan‑tnuꞌu de in‑ka jichi:
―‍¿Na in kúu ni?
¿Tee kúu Elías ma kúu ni?
―‍ka kuu de ka jiñaꞌa de.
Juan ma,
ni ndakoneꞌe de:
―‍Ñaꞌa.
Masu suu sa.
―‍¿Tee ndákaxtnuꞌu tnuꞌu ni waꞌa Suꞌsi ma ja ka ndetu sa ja kenda de ma kúu ni?
―‍ka kuu de ka jiñaꞌa tuku de.
―‍Ñaꞌa ―‍kúu Juan ma jiñaꞌa de.
22 Te ka jiñaꞌa tuku de:
―‍¿Na in kúu ni vi?
Sukan‑vaꞌa jin kuñaꞌa sa tee ni ka tetniñu ñaꞌa ma.
¿Naxe káꞌan ni?
¿Na in kúu ni?
―‍ka kuu de ka jiñaꞌa de.
23 Juan ma,
ni ndakoneꞌe de:
―‍Saña kúu in ja káyuꞌu nuu masu nawa kuiti iyo a:
“Jin ndasandaa ni ichi kii Iya Tátnuni ma”,
sukan ni kaꞌan Isaías ma tee ni yo ndakaxtnuꞌu tnuꞌu ni yo waꞌa Suꞌsi ma ―‍kúu de jiñaꞌa de.
24 Te tee yukan chi tee ni ka tetniñu tee ka kuu fariseo ma ka kuu de.
25 Te ni ka jikan‑tnuꞌu de:
―‍Nú masu maa Cristo ma kúu ni,
ni a Elías ma,
ni a tee ndákaxtnuꞌu tnuꞌu ni waꞌa Suꞌsi ma kúu ni,
¿navaꞌa skuandute ni ñayii ma?
―‍ka kuu de ka jiñaꞌa de.
26 Juan ma,
ni ndakoneꞌe de:
―‍Saña chi skuandute sa ñayii ma nuu ndute a.
Kovaa neꞌun ndaka ni a iyo iya masu ka jini ni,
27 te iya yaꞌa kúu iya kenda,
te jin kuni o ya.
Te jâ iyo ya xiꞌna‑ka sana ni kâku sa ma,
te ni a ñií ndijan ya ma masu kaa masu iyo sa ja ndaji sa ―‍kúu de jiñaꞌa de.
28 Ndaka chaꞌa ni ka jini,
ni ka jito ñayii ñuu Betania ma,
ichi in‑ka yuꞌu yute nani Jordán ma,
nuu yikuu Juan ma skuandute de ñayii ma.
Jesús ma, sukan kúu ndikachi jaa ma, sukan kúu ya nuu Suꞌsi ma
29 Kivi xtnee ma Juan ma,
ni jini de Jesús ma,
ja kuan tuꞌva ya de,
te jiñaꞌa de:
―‍¡Jin kondeꞌya ni!
Yaꞌa iyo iya kúu Ndikachi Jaa nuu Suꞌsi ma,
vaa suu ya xtandiyo kuechi ñayii ñuu ñayivi a.
30 Iya yaꞌa kúu iya ni kaꞌan sa ja kenda ya ma,
te jin kuni ñayivi ni ya,
te kanuu‑ka ya sana saña,
vaa jâ iyo ya,
saa ni kenda sa ma.
31 Maa sa,
masu jini sa na in kúu ya nkuu,
kovaa vee sa ja skuandute sa ñayii ma,
te sukan‑vaꞌa ñayii ñuu Israel ya,
jin koo tuꞌva i te jin ndakuni i ya ―‍kúu de jiñaꞌa de.
32 Sani te Juan ma,
ni ndakaꞌan de sukan ni jini de ma:
―‍Ni jini sa Xtumani Ndios ma,
ja ni nuu ya andivi ma sukan kaa in sata,
te ni jinkuiñi ya siki Jesús ma.
33 Saña chi ñatuu kuni‑ka sa nkuu ja Jesús ma kúu iya tetniñu maa Suꞌsi ma,
kovaa Suꞌsi iya ni tetniñu ñaꞌa ja skuandute sa ñayii ma jiꞌin ndute ma,
ni kaꞌan ya nuu sa:
“Na in kuni ni ja nuu Xtumani Ndios ma siki i te koo ya jiꞌin i ma chi iya yukan kúu iya skuandute ñayii ma jiꞌin Xtumani Ndios ma.”
34 Te maa sa ni jini,
te kúu sa testigu ja Saꞌya Suꞌsi ma kúu Jesús ya ―‍kúu de jiñaꞌa de.
Tee ka kuu xinañuꞌu ja ni ka ndikin de Jesús ma
35 Kii xtnee ma Juan ma,
iyo de jiꞌin uu tee ka ndikin ñaꞌa ma.
Los seguidores siguen a Jesús (Juan 1.35-51)
36 Nuu ni jini de ja ni yaꞌa Jesús ma,
Juan ma,
jiñaꞌa de:
―‍¡Jin kondeꞌya ni!
Iya yaꞌa kúu Ndikachi Jaa nuu Suꞌsi ma ―‍kúu de jiñaꞌa de.
37 Nduu tee ka ndikin Juan ma,
ni ka jinisoꞌo de,
te ni ka ndikin de Jesús ma.
38 Jesús ma,
ni ndakonenuu ya,
te ni jini ya ja ka ndikin de ya ma,
te ni jikan‑tnuꞌu ya:
―‍¿Nawa ka nduku ni?
―‍kúu ya jiñaꞌa ya.
Te ni ka ndakoneꞌe de:
―‍Rabí,
¿ndenu iyo ni?
―‍ka kuu de ka jiñaꞌa de.
Te tnuꞌu rabí ma kúni kaꞌan “teskuaꞌa”.
39 Jesús ma,
ni ndakoneꞌe ya:
―‍Neꞌe koo ni,
te jin kuni ni ―‍kúu ya jiñaꞌa ya.
Ni jan koo de,
te ni ka jini de ndenu iyo ya ma,
te ni ka iyo de jiꞌin ya onde ni kunee ma,
vaa jâ ve ñini ma.
40 Te in de ma chi Andrés ñani Simón Pedro ma kúu de,
te ja ni jinisoꞌo de sukan káꞌan Juan ma,
te ni ndandikin de Jesús ma.
41 Andrés ma,
sani te ni ndanduku de ñani de Simón ma,
te jiñaꞌa de:
―‍Ni ka ndaniꞌi ri Mesías ma ―‍kúu de jiñaꞌa de.
Te tnuꞌu Mesías ma kúni kaꞌan “Cristo iya ni tetniñu Suꞌsi ma”.
42 Sani te Andrés ma,
kuan koo de jiꞌin ñani de Simón ma nuu iyo Jesús ma.
Nuu ni jini Jesús ma de,
te jiñaꞌa ya:
―‍Ndijin kúu Simón saꞌya Jonás ma,
kovaa konani ni Cefas ―‍kúu ya jiñaꞌa ya.
Te tnuꞌu Cefas ma kúni kaꞌan “Pedro”.
Jesús ma, ni kana ya Felipe ma jiꞌin tee kúu Natanael ma
43 Kivi xtnee ma Jesús ma,
ni jani ini ya ja kiꞌin ya ñuu Galilea ma.
Ni ndaniꞌi ya Felipe ma,
te jiñaꞌa ya:
―‍Kondikin ñaꞌa ni ―‍kúu ya jiñaꞌa ya.
44 Te ñuu Betsaida ma kúu ñuu Felipe ma jiꞌin Andrés ma jiꞌin Pedro ma.
45 Felipe ma,
ni ka ndatnaꞌa de jiꞌin Natanael ma,
te jiñaꞌa de:
―‍Ni ka ndaniꞌi sa tee ni tee Moisés ma nuu tutu ndee tnuꞌu Suꞌsi ma,
suni ni ka tee tna tee ni ka yo ndakaxtnuꞌu tnuꞌu ni yo waꞌa Suꞌsi ma.
Te suu de kúu Jesús saꞌya José ma,
te tee ñuu Nazaret ma kúu de ―‍kúu de jiñaꞌa de.
46 Jiñaꞌa Natanael ma:
―‍¿Xi kuu kee in ja vaꞌa ñuu Nazaret ma?
―‍kúu de jiñaꞌa de.
Felipe ma,
ni ndakoneꞌe de:
―‍Neꞌe ni,
te kuni ni ―‍kúu de jiñaꞌa de.
47 Nuu ni jini Jesús ma ja kuan tuꞌva tee kúu Natanael ma,
te jiñaꞌa ya:
―‍Yaꞌa vee in tee ndija ñuu Israel ya,
in tee masu xndaꞌvi ñayii ma kúu de ―‍kúu ya jiñaꞌa ya.
48 Natanael ma,
ni jikan‑tnuꞌu de:
―‍¿Naxe jini ñaꞌa ni?
―‍kúu de jiñaꞌa de.
Jesús ma,
ni ndakoneꞌe ya:
―‍Jâ ni jini ñaꞌa sa xiꞌna‑ka sana ni kana ñaꞌa Felipe a,
nuu iyo ni kati tnu higo ma ―‍kúu ya jiñaꞌa ya.
49 Natanael ma,
jiñaꞌa de:
―‍Rabí,
¡ndijin kúu Saꞌya Suꞌsi ma!
¡Ndijin kúu rey ñuu Israel ya!
―‍kúu de jiñaꞌa de.
50 Jesús ma,
ni ndakoneꞌe ya:
―‍¿Ni kandija ni kuechi ja ni kaꞌan sa ja ni jini ñaꞌa sa kati tnu higo ma?
Suꞌva kuaꞌa‑ka ja kuni ni sana chaꞌa ―‍kúu ya jiñaꞌa ya.
51 Suni jiñaꞌa Jesús ma:
―‍Ja ndaa ja ndaa káꞌan sa ja onde vitna,
te jin kuni ni andivi ma ja ndanune,
te ángel Suꞌsi ma jin nda koo jin nu koo siki sa ja kúu sa iya ni kenda ñayivi ñuu ñayivi a ―‍kúu ya jiñaꞌa ya.