Ni ndasavaꞌa Jesús ma in tee ja ka yinee ñaꞌa tachi
5
Ni ka kenda koo de jiꞌin ya in‑ka yuꞌu mar ma,
in ñuu nani i Gerasa.
Marcos 5:1-20
2 Te nuu ni nuu Jesús ma nuu barcu ma,
te ni jan tuꞌva ñaꞌa in tee ja yinee ñaꞌa tachi.
Tee yaꞌa chi vee de ichi nuu ka yinee ndiyi ma,
3 chi vaa yukan ni yo iyo de.
Ni‑in ñayii ñatuu ni yo kundee ja kuꞌni vaꞌa i de jiꞌin yoꞌo kaa ma.
4 Visi kuaꞌa jichi ni ka yo juꞌni i ndaꞌa de jaꞌa de jiꞌin yoꞌo kaa ma,
kovaa ndimaa ni yo saꞌa kuechi,
ni yo saꞌa likin de.
Te ni‑in ñayii ñatuu ni yo kundee nuu de.
5 Kuaꞌan vee de nduu ma jiꞌin jakuaa ma ichi yuku ma jiꞌin nuu ka yinee ndiyi ma.
Ni yo kayuꞌu de,
ni yo keꞌen de yuu,
te ni yo waꞌa de maa de,
ûni ni yo xtnakueꞌe de maa de.
6 Nuu ni jini de onde jika‑ka ja vee Jesús ma,
te jinu de kuan tnaꞌa de ya,
te ni jinkuiñi jiti de nuu ya,
7 te kayuꞌu de jiñaꞌa de:
―¡Máko kivi nduu ni jiꞌin sa,
Jesús!
¡Te kuechi ja Saꞌya Suꞌsi onde sukun ma kúu ni,
te jikan‑taꞌvi xen‑xeen sa nuu ni ja má xndoꞌo ñaꞌa ni!
―kúu de jiñaꞌa de.
8 Te ni kaꞌan de sukan,
chi vaa Jesús ma,
jiñaꞌa ya:
―Tachi,
xndoo tee yaꞌa.
9 Te Jesús ma,
ni jikan‑tnuꞌu ya:
―¿Naxe nani ro?
―kúu ya jiñaꞌa ya.
Te ni ndakoneꞌe tachi ma:
―Legión nani sa,
vaa kuaꞌa xeen sa kúu ―kúu i jiñaꞌa i.
10 Te jikan‑taꞌvi xeen i nuu Jesús ma ja máko tetniñu ya ndaka tachi ma ja jin ke koo i ñuu yukan.
11 Te yuku yukan ka iyo kuaꞌa chikini,
ja ka yikuu ti ka jaa ti,
12 te ka jikan‑taꞌvi ndaka tachi ma ka jiñaꞌa i:
―Tetniñu ñaꞌa ni nuu ka iyo chikini ma,
te kachi ni,
te jin ndivi koo sa ti ―ka kuu i ka jiñaꞌa i.
13 Te ni waꞌa Jesús ma tnuꞌu,
te ndaka tachi ma,
ni ka nde koo i ini tee yukan,
te ni ka ndivi koo i ini chikini ma.
Te visi uu mil chikini ma ka kuu,
te ka jinu ti ni ka nu koo ti onde nuu ndute mar ma,
te ni ka kê koo ti nuu ndute ma,
te ni ka kandee ti,
te ni ka jiꞌi ti.
14 Te ñayii ka jito ti ma,
ni ka ke koo kunu i,
te kuan koo i ka ndakani i ni‑kaꞌnu ñuu ma sukan ni kuu ma.
Te ñayii ñuu ma,
ni jan koo i ni jan koto i nawa ni kuu ma.
15 Te nuu ni ka kenda koo i nuu iyo Jesús ma,
te ni ka jini i ja núkoo tee ni ka yo yinee ñaꞌa kuaꞌa xeen tachi ma,
ja jâ ni ndinuu de saꞌma de ma,
te jâ ni ndukaji ini de.
Te ñayii ma,
ja ni ka jini i sukan ni kuu ma,
te ni ka yuꞌu i.
16 Te ñayii ka iyo yukan,
ja ni ka jini i sukan ni kuu jiꞌin tee ni ka yo yinee ñaꞌa tachi ma,
jiꞌin sukan ni ka kuu chikini ma,
ni ka ndakani i nuu ndaka‑ka ñayii ma.
17 Te ndaka ñayii ma,
ni ka jakondee i ka jikan‑taꞌvi i nuu Jesús ma ja na kee ya ñuu yukan te kíꞌin ya.
18 Te nuu ni ndaa ya nuu barcu ma,
te tee ni ka yinee ñaꞌa tachi ma,
te jikan‑taꞌvi de ja na kuaꞌa Jesús ma tnuꞌu ja na kiꞌin de jiꞌin ya.
19 Kovaa Jesús ma,
ña ni waꞌa ya tnuꞌu,
suꞌva jiñaꞌa ya:
―Kuán noꞌo ni veꞌe ni ma jiꞌin nuu tnaꞌa ni ma,
te ndakani ni ndaka ja ni saꞌa ñaꞌa Iya Tátnuni ma,
sukan ni ndakundaꞌvi ini ñaꞌa ya a ―kúu ya jiñaꞌa ya.
20 Te tee yukan chi kuan noꞌo de,
te ni kejaꞌa de ndákani de nuu ndaka ñayii ñuu Decápolis ma sukan ni ndasavaꞌa ñaꞌa Jesús ma.
Te ndaka ñayii ma,
ni ka saꞌvi‑nka ini i.
Ni ndaxteku Jesús ma sasiꞌi tee nani Jairo ma, te ni ndasavaꞌa ya in ñaꞌa
21 Nuu ni ndenda Jesús ma jiꞌin barcu ma in‑ka yuꞌu mar ma,
te ni ka ndututu kuaꞌa ñayii,
te ni kendoo ya yukan.
Marcos 5:21-43
22 Sani te ni kenda in tee tátnuni veñuꞌu luluu ma nani de Jairo,
te ja ni jini de Jesús ma,
te ni jinkoo jiti de,
23 te jikan‑taꞌvi xeen de nuu Jesús ma jiñaꞌa de:
―Sasiꞌi sa ma chi yikuu i jiꞌi i,
te vee sa.
Neꞌe ni,
te jín koo o,
te sonee ni ndaꞌa ni a siki i ma,
sukan‑vaꞌa nduvaꞌa i te koteku i ―kúu de jiñaꞌa de.
24 Te kuaꞌan Jesús ma jiꞌin yuva i ma,
te kuaꞌa xeen ñayii ni ka ndikin ñaꞌa,
te ûni ka jexniꞌni i ya.
25 Neꞌun ñayii ma iyo in ñaꞌa.
Iyo uxi uu kuiya ja kuꞌu ña ja jati ñaꞌa niñi.
26 Te kúxii xeen ini ña ni ka saꞌa tee tatna ma,
vaa ni ndiꞌi ndaka ja nevaꞌa ña ma,
ni jatniñu ña nuu tee tatna ma.
Kovaa ni ñatuu ni nduvaꞌa ña,
suꞌva ve sakaꞌvi‑ka ja ndóꞌo ña ma.
27 Nuu ni jinisoꞌo ña ja ka kaꞌan i ja iyo Jesús ma,
te ni jan tuꞌva ña ichi yata ya ma neꞌun ñayii ma,
te ni kakiꞌi ña saꞌma ndii ya ma,
28 chi vaa ni jani ini ña:
“Visi yika ja na kakiꞌi o saꞌma ndii ya ma,
chi nduvaꞌa o”,
jani ini ña.
29 Te nuu ni kakiꞌi ña saꞌma ya ma,
te ni jinkuiñi ja jati niñi ña ma,
te ni jini yikikuñu ña ma ja jâ ni nduvaꞌa ña ma.
30 Te Jesús ma,
ni jini ya ja maa ya ni saꞌa ja ni nduvaꞌa in ñayii ma,
te ni konenuu ya ndeꞌya ya ñayii ma,
te jikan‑tnuꞌu ya:
―¿Na in kúu ja ni kakiꞌi saꞌma ndii sa a?
―kúu ya jiñaꞌa ya.
31 Te ka jiñaꞌa tee ka ndikin ya ma:
―Jini maa ni ja kuaꞌa ñayii ka iyo a,
te ka jexniꞌni tnaꞌa i.
¿Te navaꞌa jikan‑tnuꞌu ni:
“¿Na in kúu ja ni kakiꞌi saꞌma ndii sa a?”
―ka kuu de ka jiñaꞌa de.
32 Kovaa Jesús ma chi yikuu yikuu‑ni ya ndeꞌya ya ni‑kaꞌnu nuu ka iyo ñayii ma,
sukan‑vaꞌa nde ñayii ni kakiꞌi ñaꞌa ma.
33 Te ñaꞌa yukan chi niꞌi niꞌi‑nka ña ja yuꞌu ña,
chi vaa naꞌa ña ja maa ña ni nduvaꞌa ma.
Te ni jaꞌan ña,
te ni jinkuiñi jiti ña nuu ya ma,
te ni ndakani ndaa ña ndaka.
34 Te jiñaꞌa Jesús ma:
―Saꞌya sa,
ni nduvaꞌa ni,
kuechi ja ni kukanu ini ñaꞌa ni ma.
Kuán noꞌo sii ini ni chi jâ ni nduvaꞌa ni kueꞌe ni ndoꞌo ni ma ―kúu ya jiñaꞌa ya.
35 Te yikuu‑ka Jesús ma káꞌan ya,
te ni ka kenda koo tee ve koo veꞌe tee tátnuni veñuꞌu luluu ma,
te ka jiñaꞌa de nuu tee ma:
―Saꞌya ni ma chi jâ ni jiꞌi i.
Máko xtnaꞌa‑ka ni teskuaꞌa a ―ka kuu de ka jiñaꞌa de.
36 Kovaa Jesús ma chi ñatuu ni keꞌen‑kuenda ya ja ka kaꞌan tee yukan,
te jiñaꞌa ya nuu tee tátnuni veñuꞌu luluu ma:
―Má koyuꞌu ni;
yika‑ni ja kukanu ini ñaꞌa ni ―kúu ya jiñaꞌa ya.
37 Te ñatuu ni kachi ya ja jin kondikin ñaꞌa ñayii ma chi yika‑ni ja Santiago ma,
jiꞌin ñani de Juan ma,
jiꞌin Pedro ma‑ni kuaꞌan jiꞌin ya.
38 Te nuu ni ka kenda koo de jiꞌin ya veꞌe tee tátnuni veñuꞌu luluu ma,
te ni jini ya ja ka kayuꞌu jiꞌin ja ka ndaꞌyu ñayii ma.
39 Te ni kivi ya,
te jiñaꞌa ya:
―¿Navaꞌa ka kayuꞌu ni te ka ndaꞌyu ni sukan?
Suchi siꞌi a chi masu ni jiꞌi i chi yika‑ni ja kixi i ―kúu ya jiñaꞌa ya.
40 Te ndaka ñayii ma chi ni ka jakundee i Jesús ma.
Kovaa Jesús ma chi ni keneꞌe ya ñayii ma keꞌe ma.
Te ni jeka ya yuva suchi ni jiꞌi ma,
jiꞌin siꞌi i ma,
jiꞌin tee ka ndikin ya ma,
te ni kivi ya jiꞌin ndaka tee yukan veꞌe ma nuu kátuu suchi ni jiꞌi ma.
41 Sani te ni tnii ya ndaꞌa i ma,
te jiñaꞌa ya:
―Talita cum ―kúu ya jiñaꞌa ya.
Saꞌa kúni kaꞌan tnuꞌu yaꞌa:
“Roꞌo káꞌan ri,
ndakoo”.
42 Nuu ni jiñaꞌa ya sukan ma,
te suchi yiꞌi uxi uu kuiya ma chi ni ndakoo i,
te ni jakondee i jika i.
Te ndaka ñayii ka iyo ma,
ni ka saꞌvi‑nka ini i ja ni ndateku suchi ma.
43 Kovaa Jesús ma chi saꞌa ni tatnuni ya:
―Máko jin ndakani ni nuu ni‑in ñayii ma ja ni kuu suchi siꞌi a ―kúu ya jiñaꞌa ya.
Sani te ni tatnuni ya ja jin kuaꞌa i ja kaa suchi siꞌi ma.