Ñayii ka iyo ñuu maa Jesús ma chi masu nde ka kandija i ya
6
Te ni ndee Jesús ma ñuu yukan,
te kuan noꞌo ya ñuu nuu ni yo iyo ya ma,
te tee ka ndikin ya ma,
kuan koo de jiꞌin ya.
Marcos 6:1-29
2 Nuu ni kenda kivi ni tatnuni Suꞌsi ma ja ma jin satniñu ñayii ma,
ni kejaꞌa ya káxtnuꞌu ya ini veñuꞌu luluu ma tnuꞌu ya ma nuu ñayii ma.
Te ka iyo kuaꞌa xeen ñayii,
te ka ninisoꞌo ndaka i tnuꞌu káꞌan Jesús ma,
te ni ka saꞌvi‑nka ini i,
te ka jikan‑tnuꞌu tnaꞌa i:
―¿Ndenu ni kutuꞌva suchi yaꞌa ndaka ja káꞌan i a?
¿Ndenu ni kutuꞌva i ndaka tnuꞌu ndichi káꞌan i a jiꞌin milagru saꞌa i a?
3 ¿Masu suchi yaꞌa kúu carpinteru saꞌya María ma?
¿Te masu ñani i ka kuu Santiago ma,
José ma,
Judas ma,
jiꞌin Simón ma?
¿Te masu yaꞌa ka iyo tna kuꞌva i a neꞌun ndaka o a?
―ka kuu ñayii ma ka kaꞌan i.
Te ni ka ndakiti ini i ja káꞌan ya ma.
4 Kovaa jiñaꞌa Jesús ma:
―Ni‑kaꞌnu ñuu ñayivi a chi ka chiñuꞌu i in tee ndákaxtnuꞌu tnuꞌu ni waꞌa Suꞌsi ma,
kovaa ñuu maa de ma,
jiꞌin neꞌun tnaꞌa de ma,
jiꞌin neꞌun ñayii veꞌe de ma,
masu na nde ka chiñuꞌu i de,
te sukan ka saꞌa ñaꞌa ni vitna ―kúu ya jiñaꞌa ya.
5 Ñatuu ni kuu saꞌa ya milagru,
yika‑ni ja jaku‑ni ñayii ka kuꞌu ma,
ni kuu ni sonee ya ndaꞌa ya siki i ma,
te ni ka nduvaꞌa i.
6 Te ni saꞌvi‑nka ini maa ya ja ñayii yukan,
masu nde ka kandija i ya ma.
Ni tetniñu Jesús ma tee ka ndikin ya ma, ja na jin kaxtnuꞌu de tnuꞌu vii tnuꞌu vaꞌa Suꞌsi ma
Jesús ma chi ni ndakonduu ya ndaka ñuu kuechi ka iyo yatni ma,
káxtnuꞌu ya.
7 Ni kana ya ndi‑uxi uu tee ka ndikin ya ma,
te ni tetniñu ya ndi‑uu ndi‑uu de ja jin koo de jin kaxtnuꞌu de tnuꞌu maa ya ma.
Te ni waꞌa ya tnuꞌu ndee tnuꞌu ndatnu naxe jin tatnuni de nuu tachi ma.
8 Te ni tatnuni ya ja masu nawa jin kindaꞌa de jin koo de ma,
yika‑ni ja in yutnu jin kituu de‑ni.
Má jin kindaꞌa de in bolsa,
ni a jin kaa de ma,
ni a xuꞌun,
9 yika‑ni ja ndijan de ma jin kiꞌi de,
kovaa má jin kindaꞌa de saꞌma ja jin ndaxsama de maa de ma.
10 Te jiñaꞌa ya:
―Nú ni ka kivi koo ni in veꞌe,
te jin kendoo ni yukan onde jin nde koo ni ñuu yukan.
11 Te nú ñatuu ka kachi ñayii ka iyo in ñuu ma ja jin koninisoꞌo i tnuꞌu ka kaꞌan ni ma,
te jin nde koo ni yukan,
te jin skoyo ni ñuyaka jaꞌa ni ma,
sukan‑vaꞌa ñayii yukan,
jín konaꞌa i ja jâ ni ka xtuꞌva ni i ―kúu ya jiñaꞌa ya.
12 Te ni ka ke koo tee ka ndikin ya ma kuan koo de ka kaxtnuꞌu de nuu ndaka ñayii ma ja na jin ndakani jín ndakaꞌvi ini i,
te jín xndoo i ja uꞌvi ka saꞌa i ma,
te jín ndandikin i Suꞌsi ma.
13 Suni ni ka keneꞌe kuaꞌa de tachi ini anua ñayii ma,
te ni ka yo chiꞌi de i aceite,
te sukan ni ka yo nduvaꞌa kuaꞌa ñayii ma.
Sukan ni ka jaꞌni i Juan tee ni yo skuandute ñayii ma
14 Te tee kúu rey Herodes ma,
ni jinisoꞌo de ja ka kaꞌan ñayii ma ja kuu Jesús ma,
chi vaa ni‑kaꞌnu ñuu ñayivi ma ni ka jinisoꞌo ndaka i ja vaꞌa ni yo saꞌa Jesús ma.
Te ni jinisoꞌo de ja ka kaꞌan i:
―Jesús ma chi Juan tee ni yo skuandute ñayii ma kúu de,
te jâ ni ndateku de.
Chukan kúu ja saꞌa de milagru.
15 Te in jichi‑ka ñayii ma,
ka kaꞌan i:
―Tee nani Elías ma,
tee ni yo ndakaxtnuꞌu tnuꞌu ni yo waꞌa Suꞌsi ma kúu de.
Suni in jichi‑ka tnaꞌa i ma,
ka kaꞌan i:
―Xi saa in tee ni ka yo ndakaxtnuꞌu tnuꞌu ni yo waꞌa Suꞌsi ma sukan ni ka yo kuu tee ni ki koo xiꞌna‑ka ma kúu de ―ka kuu i ka kaꞌan i.
16 Kovaa Herodes ma,
nuu ni jinisoꞌo de sukan ka kaꞌan i ma,
te káꞌan de:
―¡Nú tee yaꞌa kúu Juan ma!
Te vitna ja maa o ni tatnuni ja jin kaꞌnde i xini de ma,
te vitna,
¡nú ni ndateku de!
―kúu de káꞌan de.
17 Vaa ja kuechi ñaꞌa nani Herodías ma,
te ni tetniñu Herodes ma ja jin tnii i Juan ma,
te ni tatnuni de ja jin kuꞌni vaꞌa i de te jín chinee i de vekaa ma.
Te ñaꞌa nani Herodías ma chi ñasiꞌi tee kúu Felipe ñani tee kúu Herodes ma kúu ña,
kovaa tee kúu Herodes ma,
ni ndakueka de ña.
18 Te Juan ma,
ni yo jiñaꞌa de Herodes ma:
―Masu kuu kondeka ni ñaꞌa jiña,
chi vaa ñasiꞌi ñani ni ma kúu ña,
vaa téku de ma ―ni yo kuu de ni yo jiñaꞌa de.
19 Te ñaꞌa kúu Herodías ma,
ni ndakiti xeen ini ña nuu Juan ma,
te ni yo kuni ña ja na kûu Juan ma.
Kovaa ñatuu nde kundee ña,
20 chi vaa Herodes ma,
ni yo yuꞌu de,
vaa ni yo jini de ja Juan ma chi in tee ñatuu na ja uꞌvi saꞌa kúu de,
te saꞌa de ja vaꞌa ja ndaa.
Te ni yo jito de tee ma,
te ni yo ninisoꞌo de ja ni yo kaꞌan Juan ma.
Kovaa ñatuu ni yo niꞌi ini de nawa saꞌa de,
yika‑ni ja ni yo kusii ini de ni yo ninisoꞌo de ja ni yo kaꞌan Juan ma.
21 Te Herodes ma,
ni saꞌa de in viko ja ni ndiꞌi de kuiya,
te ni waꞌa de ja ni ka jaa ñayii ka satniñu veꞌe de ma,
jiꞌin ñayii ka ndanuu‑ka ñuu Galilea ma.
Te ni jani ini ñaꞌa kúu Herodías ma ja kivi yukan ko kuu kivi kûu Juan ma.
22 Te sasiꞌi Herodías ma,
ni kivi i nuu ka jaa de xita ma,
te ni jitajaꞌa i,
te ni ka jatna ini xeen Herodes ma jiꞌin ndaka ñayii ka nukoo ka jaa xita jiꞌin de ma sukan ni jitajaꞌa i ma.
Te ni jiñaꞌa rey ma nuu suchi siꞌi yukan:
―Kakan nawa kúni ro,
te taa ri ―kúu de jiñaꞌa de.
23 Te ni ndakaꞌan de in uu jichi ja ma ndakani ini de ja kuaꞌa de nawa na kakan i ma.
Visi na kakan i sava ñuu nuu tátnuni de ma chi kuaꞌa de i.
24 Te ni kee i ni jan kakan‑tnuꞌu i siꞌi i ma:
―¿Nawa kakan sa?
―kúu i jiñaꞌa i.
Te ni ndakoneꞌe ña:
―Kakan xini Juan tee skuandute ñayii ma ―kúu ña jiñaꞌa ña.
25 Te suchi siꞌi ma,
jinu i ni ndivi i nuu iyo rey ma,
te jiñaꞌa i:
―Kúni sa vitnañuꞌni ja taa ni xini Juan tee skuandute ñayii ma in nuu koꞌo ―kúu i jiñaꞌa i.
26 Te rey ma chi ni kuxii xeen ini de,
kovaa jâ ni kaꞌan de nuu ndaka ñayii ka nukoo jiꞌin de ma ja ma ndakani ini de,
te ñatuu ni kuu kuñaꞌa de i ja ma kuaꞌa de ja jikan i ma.
27 Chukan kúu ja ni tetniñu yachi de in soldado,
te ni tatnuni de nuu tee ma ja na kaꞌnde de xini Juan ma.
28 Te ni jaꞌan soldado ma vekaa ma,
te ni jaꞌnde de xini Juan ma,
te ñunee i in nuu koꞌo kuaꞌan jiꞌin de,
te ni waꞌa de suchi siꞌi ma.
Te suchi yukan chi ni ndakuaꞌa i siꞌi i ma.
29 Nuu ni ka jini tee ka ndikin Juan ma,
te ni ka ndakeꞌen de ñundeꞌyu Juan ma,
te ni jan koo de ni ka chuꞌu de.
Ni saꞌa Jesús ma ja ni ndukuaꞌa xtatila ma jiꞌin tiaka ma, te ni kanda ja ni ka jaa uꞌun mil tee
30 Sani te tee ni tetniñu Jesús ma,
ni ka ndatnaꞌa de jiꞌin ya ma,
te ni ka ndakani de ndaka ja ni ka saꞌa de jiꞌin ja ni ka kaxtnuꞌu de nuu ñayii ma.
Marcos 6:30-56
31 Jesús ma,
jiñaꞌa ya:
―Neꞌe koo ni,
te jín koo o jín ndatatu o vala in nuu kuu jin koo‑ni maa o ―kúu ya jiñaꞌa ya.
Chi vaa kuan koo ve koo ñayii ma ka kuu i,
te ni ñatuu kúu jin niꞌi de tiempu ja jin kaa de xita.
32 Chukan kúu ja Jesús ma jiꞌin tee ni tetniñu ya ma,
kuan koo de jiꞌin ya in nuu barcu in nuu kuu jin koo‑ni maa de jiꞌin ya.
33 Kovaa kuaꞌa ñayii ni ka jini ja kuan koo de jiꞌin ya ma,
te ni ka ndakuni i ja kuan koo de jiꞌin Jesús ma.
Te sani te ndaka ñayii ndaka ñuu ma,
ka jinu i kuan koo i ichi kuaꞌan ya ma,
te xinañuꞌu‑ka i ni ka kenda koo.
34 Ja ni nuu Jesús ma nuu barcu ma,
te ni jini ya kuaꞌa xeen ñayii ma,
te ni kundaꞌvi ini ya i,
chi vaa sukan ka kuu ndikachi kiti ñatuu na tee jito ñaꞌa,
sukan ka kuu i.
Te ni kejaꞌa ya kuaꞌa ja káxtnuꞌu ya.
35 Kovaa nuu ve kukuee‑ka ma,
te tee ka ndikin ya ma,
ni ka jan tuꞌva de ya,
te ka jiñaꞌa de:
―Jâ ve kukuee,
te nuu ka iyo o ya chi in nuu masu nawa iyo kuiti kúu.
36 Ndakuan‑taꞌvi ni nuu ñayii a,
sukan‑vaꞌa jín koo i ichi yuꞌu ñuu a,
na jin kuaan i ja jin kaa i ―ka kuu de ka jiñaꞌa de.
37 Kovaa Jesús ma,
ni ndakoneꞌe ya:
―Jin kuaꞌa maa ni ja jin kaa i ―kúu ya jiñaꞌa ya.
Te ni ka ndakoneꞌe de:
―¿Kúni ni ja jin koo sa jin kuaan sa uu cientu denario xtatila,
sukan‑vaꞌa jin kuaꞌa o ja jin kaa i?
―ka kuu de ka jiñaꞌa de.
38 Jesús ma,
jiñaꞌa ya:
―¿Na saa xtatila ka nevaꞌa ni?
Kuán koo ni kuán koto ni ―kúu ya jiñaꞌa ya.
Te nuu ni ka jini de ma,
te ka jiñaꞌa de:
―Uꞌun xtatila jiꞌin uu‑ni tiaka iyo ―ka kuu de ka jiñaꞌa de.
39 Sani te ni tatnuni ya ja jin kunukoo tutu jaku jaku ñayii ma nuu yiꞌi ma.
40 Te ni ka jinkoo tutu cientu cientu ñayii ma jiꞌin uu xiko uxi (50),
uu xiko uxi (50) ñayii ma.
41 Sani te ni keꞌen Jesús ma uꞌun xtatila ma jiꞌin uu tiaka ma,
te ni ndonenuu ya ichi andivi ma,
te ni ndakuan‑taꞌvi ya nuu Suꞌsi ma ja iyo ja jin kaa de ma,
te ni taꞌvi ya xtatila ma.
Sani te ni waꞌa ya tee ka ndikin ya ma,
sukan‑vaꞌa jin kuaꞌa de ja jin kaa ñayii ma.
Te ni sakuechi ya nduu tiaka ma,
te ni waꞌa ya ja jin kaa ndaka ñayii ma.
42 Ndaka ñayii ma,
ni ka jaa i onde ni ka ndutu chii i ma.
43 Te suꞌva ni ndoo‑ka,
te ni ka ndachitu uxi uu‑ka chika taꞌvi xtatila ma jiꞌin tiaka ma.
44 Te ñayii ni ka jaa ma chi uꞌun mil tee ma ni yo kuu.
Jesús ma, ni jika ya nuu ndute mar ma
45 Nuu ni jinu ma,
te ni saꞌa Jesús ma ja tee ka ndikin ya ma,
ja jin nda koo de nuu barcu ma,
sukan‑vaꞌa xiꞌna‑ka jin yaꞌa de nuu ndute ma ichi ñuu Betsaida ma,
sana kiꞌin ya nani ndakuan‑taꞌvi ya nuu ñayii ma.
46 Te nuu ni jinu ni ndakuan‑taꞌvi ya nuu ñayii ma,
te kuaꞌan ya ichi yuku ma ja ndatnuꞌu ya jiꞌin Yuva ya Suꞌsi ma.
47 Te nuu ni kunee ma,
te barcu ma chi yika sava‑ni nuu ndute ma kuan noꞌo tnu.
Te Jesús ma,
ni kendoo maa in‑ni ya nuu ñuꞌú ma.
48 Te ni jini ya ja ndendee tee ka yindaꞌa yutnu ka xtanuu de ndute ma,
vaa yiꞌi kajin ma,
te suꞌva vee i ichi kuan nu koo de ma.
Nuu ve ndii ma,
te Jesús ma,
jika ya kuaꞌan ya nuu ndute ma ichi nuu ka iyo de ma,
te ni saꞌa ya ja ni yaꞌa ndita ya.
49 Kovaa nuu ni ka jini de ya ja jika ya nuu ndute ma,
te ni ka jani ini de ja in ñiꞌna kúu,
te ni ka kayuꞌu de,
50 chi vaa ndaka de ni ka jini,
te ni ka yuꞌu de.
Kovaa sani te ni kaꞌan ya te jiñaꞌa ya:
―Jin konevaꞌa ni tnuꞌu ndee tnuꞌu ndatnu chi maa sa kúu,
te má jin koyuꞌu ni ―kúu ya jiñaꞌa ya.
51 Sani te ni kaa ya nuu barcu ma,
te ni ndukuee kajin yiꞌi ma,
te ni ka saꞌvi‑nka ini de,
52 chi vaa ñatuu jin jakuꞌni‑ka ini de milagru ni saꞌa ya jiꞌin xtatila ma,
chi vaa ka iyo nee‑ka janitnuni de ma.
Jesús ma, ni ndasavaꞌa ya ñayii ka kuꞌu ja ka iyo i ñuu Genesaret ma
53 Ni ka yaꞌa de jiꞌin ya nuu ndute ma,
te ni ka kenda koo de ñuu Genesaret ma,
te ni ka juꞌni de barcu de ma yuꞌu ndute ma.
54 Nuu ni ka nu koo de jiꞌin ya nuu barcu ma,
te ni ka ndakuni ñayii ma Jesús ma.
55 Te ka jinu ndaka ñayii ñuu yukan kuan koo i ndenu ni ka jinisoꞌo i ja iyo Jesús ma,
te ka yindaꞌa i jito nuu ka yoxtnee ñayii ka kuꞌu ma.
56 Ndevaꞌa‑ni nuu ni yo kivi ya ini ñuu kuechi ma,
xi ini ñuu naꞌnu ma,
xi yuku ma,
ni ka yo jakin‑tuu i ñayii ka kuꞌu ma ichi kuaꞌan ya ma.
Te ni ka yo jikan‑taꞌvi i nuu ya ja na kuaꞌa ya tnuꞌu ja na jin kakiꞌi ñayii ka kuꞌu ma yuꞌu saꞌma ndii ya ma.
Te ndaka ñayii ni ka yo kakiꞌi yuꞌu saꞌma ndii ya ma chi ni ka yo nduvaꞌa i.