Ni kaji Jesús ma uxi uu tee tetniñu ya ja jin kaxtnuꞌu de tnuꞌu vii tnuꞌu vaꞌa Suꞌsi ma
10
Sani te ni kana Jesús ma uxi uu tee jin kondikin ya ma,
te ni waꞌa ya tnuꞌu ndee tnuꞌu ndatnu ja maa ya,
te kuu jin keneꞌe de tachi ka yinee ini anua ñayii ma,
te kuu jin ndasavaꞌa de ñayii ka kuꞌu ndevaꞌa‑ni kueꞌe ma jiꞌin ndaka nuu inu‑uꞌvi i ma.
2 Te saꞌa ka nani ndi‑uxi uu tee ni kana ya ma,
te apóstol ni xnani ya ndi‑uxi uu de ma,
(te apóstol ma kúni kaꞌan “tee ni tetniñu maa ya ja jin kaxtnuꞌu de tnuꞌu maa ya ma”):
Xinañuꞌu‑ka iyo tee kúu Simón tee ni nukonani Pedro ma,
te iyo tna ñani de Andrés ma,
jiꞌin Jacobo saꞌya Zebedeo ma,
jiꞌin ñani de tee kúu Juan ma,
3 jiꞌin Felipe ma,
jiꞌin Bartolomé ma,
jiꞌin Tomás ma,
jiꞌin Mateo tee ni yo ndakeꞌen yaꞌvi xuꞌun noꞌo ñuu Roma ma,
jiꞌin Jacobo saꞌya Alfeo ma,
suni tna Lebeo ma tee nani tna Tadeo ma,
4 jiꞌin Simón tnaꞌa tee ka nani cananita tee ni ka yo kanaa jiꞌin tee ñuu Roma ma,
jiꞌin Judas Iscariote ma tee keꞌen‑suꞌva Jesús ma.
Ni tetniñu Jesús ma tee ka ndikin ya ma, ja na jin kaxtnuꞌu de tnuꞌu vii tnuꞌu vaꞌa Suꞌsi ma
5 Te ndi‑uxi uu tee yaꞌa ni tetniñu Jesús ma,
te ni tatnuni ya nuu de sukan jin saꞌa de ma,
te jiñaꞌa ya:
―Máko jin koo ni nuu ka iyo ñayii masu ñayii ñuu Israel ya ka kuu i ma,
ni a ñuu ñayii samaritano ma.
6 Suꞌva kuán koo ni ñuu Israel ya nuu ka iyo ñayii ka skenaa maa i sukan ka kuu ndikachi ma.
7 Te ichi kuan koo ni ma te jin kaxtnuꞌu ni ja:
“Jâ ni kuyatni ja sukan tatnuni Suꞌsi ma.”
8 Te ja ni taa Suꞌsi ma ja ni ka kutaꞌvi ni ma,
te jin ndaskutaꞌvi tna ni ñayii ma.
Te jin kakan‑taꞌvi ni nuu ya,
te jin nduvaꞌa ñayii ka kuꞌu ma,
te jin nduvii ñayii ka ndoꞌo kueꞌe lepra ma,
te jin ndaxteku ni ñayii ni ka jiꞌi ma,
te jin keneꞌe ni tachi ka yinee ini anua ñayii ma.
9 ’Má jin kindaꞌa ni xuꞌun oro,
ni a xuꞌun plata,
ni a in‑ka xuꞌun,
10 ni a jin kindaꞌa ni ja jin kuatniñu ni ichi ma,
ni a jin kindaꞌa ni saꞌma ja jin ndaxsama ni maa ni,
ni a ndijan ni ja jin ndaxsama ni,
ni a yutnu jin kindaꞌa ni ja jin kituu ni,
vaa ñayii satniñu ma chi iyo i ja koo ja kaa i nuu kenda i ma.
11 ’Te ndevaꞌa‑ni nde ñuu xi nde yuꞌu ñuu jin kivi koo ni,
te jin ndanduku ni na in iyo ja kuu kuan‑taꞌvi ñaꞌa i,
te jin kendoo ni veꞌe yukan onde kenda kivi jin nde koo ni ñuu yukan.
12 Te nuna jin kivi koo ni veꞌe ma,
te jin kuñaꞌa ni:
“¡Kóo tnuꞌu mani veꞌe yaꞌa!”
13 Te nú ñayii ka iyo veꞌe yukan,
ka iyo i ja kuu koo tnuꞌu mani ma jiꞌin i,
te kéndoo tnuꞌu mani ma jiꞌin i,
te nú ñaꞌa,
te ndákokuiñi tnuꞌu mani yukan,
te jin ndutaꞌvi maa ni.
14 Te nú ñatuu na in kúni ja koninisoꞌo i tnuꞌu ka kaxtnuꞌu ni ma,
jin nde koo ni veꞌe yukan xi ñuu yukan,
te jin kaja niꞌni ni ñuyaka jaꞌa ni ma.
15 Te ja ndaa káꞌan sa ja kivi ndakan Suꞌsi ma kuenda ma chi jin ndoꞌo xeen‑ka ñayii ñuu yukan sana ñayii ñuu Sodoma ma jiꞌin Gomorra ma.
Kuaꞌa tnundoꞌo jin kuni ñayii ka kandija Jesús ma nuu ndaꞌa ñayii ñatuu ka kandija ya ma
16 ’Yaꞌa te tétniñu ñaꞌa sa sukan ka kuu ndikachi ma nuu ka iyo ndivaꞌu ma,
te chukan kúu ja jin kuni ni nawa jin saꞌa ni sukan saꞌa koo ma,
ja nú ni jini ti ja iyo yika ti ma chi ñama‑ni kuaꞌan ti,
te jin ko kuu tna ni sukan ka kuu sata ma ja masu na ja uꞌvi ka saꞌa ti ma.
17 ’Te jin ko koto vaꞌa ni maa ni nuu ñayii ma,
vaa jin koo i jin xsiaꞌa ñaꞌa i nuu ka iyo tee ka netniñu ma,
te ini veñuꞌu lilikin ma jin kuaꞌa ñaꞌa i.
18 Ja kuechi maa sa te jin koo i jin xsiaꞌa ñaꞌa i nuu tee ka netniñu ñuu teyu ni ma jiꞌin nuu tee ka kuu rey ma,
sukan‑vaꞌa jin kaxtnuꞌu ni na in kúu sa nuu tee yukan jiꞌin nuu ñayii masu ñuu Israel ka kuu i ma.
19 Kovaa nuna jin koo i jin xsiaꞌa ñaꞌa i yukan,
máko jin ko ndi ini ni nawa jin kuñaꞌa ni,
vaa maa ora yukan‑ni,
te maa Suꞌsi ma saꞌa ja jin niꞌi ini ni nawa jin kaꞌan ni,
20 vaa masu maa ni jin kaꞌan,
chi vaa maa Xtumani Yuva o ma kaxtnuꞌu naxe jin kaꞌan jin kachi ni ora yukan.
21 ’Te jin koo tee ja jin xtekuechi de ñani de ma,
sukan‑vaꞌa jin kaꞌni ñayii ma ñani de ma,
te suni jin koo tna tee ma ja sukan jin saꞌa de jiꞌin sayii de ma,
te suni jin koo tna sayii tee ma ja jin ndakanaa i jiꞌin yuva i ma,
te jin saꞌa i ja jin kaꞌni ñayii ma yuva i ma.
22 Te ja kuechi ja ka kandija ñaꞌa ni maa sa a te jin saxiko ñaꞌa ndaka ñayii ma ndijin,
kovaa nú na in na kanda onde jinu ma chi ndaniꞌi‑taꞌvi i.
23 Nú ka sondikin ñaꞌa i ñuu yaꞌa,
te jin koo ni in‑ka ñuu ma,
vaa ja ndaa káꞌan sa ja masu ndiꞌi jin ndakonduu ni ndaka ñuu Israel ya,
te ndenda sa ja kúu sa iya vee ñayivi ñuu ñayivi a.
24 ’Ñatuu ni‑in tee ja yika yikuu de kútuꞌva de nawa kaxtnuꞌu tee skuaꞌa ñaꞌa ma,
te jini‑ka de sana tee skuaꞌa ñaꞌa ma,
te ñayii jinukuechi ma,
masu kanuu‑ka i sana tee kúu jitoꞌo i ma.
25 Kovaa nú tee yika yikuu kútuꞌva ma,
te skuaꞌa ñukuun de chi kenda de ja ko kuu de sukan kúu tee skuaꞌa ñaꞌa ma.
Te suni ja vaꞌa xeen kuu nú ñayii jinukuechi ma,
te kenda i ko kuu i sukan kúu jitoꞌo i ma.
Te chukan kúu ja má jin sanuu ni,
vaa nú saña,
te ni ka xnani ñaꞌa i Beelzebú ja nani suchi tátnuni nuu ndaka‑ka tachi ma,
te kuiti kuaꞌa‑ka ja uꞌvi jin kaꞌan i ja jin kuu ni ja ka kuu ni tee ka ndikin ñaꞌa maa sa a.
Na in jin koyuꞌu o
26 ’Chukan kúu ja másu ko jin koyuꞌu ni,
vaa masu nawa iyo ja kuu koo yuꞌu,
suꞌva ndaka ndatuu,
te ñatuu nawa iyo yuꞌu ja masu jin kuni o.
27 Te tnaꞌa ja káꞌan sa nuu maa ni a vitna ja ñatuu na ñayii ka ninisoꞌo a,
te jin ndakaꞌan ni nuu ka ndatnaꞌa ñayii ma,
te tnaꞌa ja káꞌan yuꞌu sa nuu ni a,
te onde xini veꞌe ma te jin kayuꞌu ni ja jin ndakaꞌan ni,
sukan‑vaꞌa jín kuni ñayii ma.
28 Te má jin koyuꞌu ni ñayii kuu kaꞌni ñaꞌa ma,
vaa yika‑ni ja yikikuñu ni a‑ni kuu kaꞌni i,
kovaa ini anua ni ma,
masu kuu kaꞌni i.
Suꞌva jin koyuꞌu ni iya ndakan kuenda nuu ni ma nawa ni ka yo saꞌa ni ka yo kuu ni ma,
vaa maa ya chi kuu chunee ñaꞌa ya nuu andeya ma te xnaa ya anua ni a jiꞌin yikikuñu ni a.
29 Vaa jâ ka jini ni ja uu lasaa ma,
jaku‑ni xuꞌun ka ndee yaꞌvi ti.
Kovaa visi masu kiti ka ndee yaꞌvi ka kuu ti,
kovaa nú masu kuaꞌa maa Yuva o Suꞌsi ma tnuꞌu chi masu kuu jin kun‑kava ni‑in ti nuu ñuꞌú a.
30 Te sukan kúu ya jiꞌin ni,
vaa onde ixi xini o a chi naꞌa ya na saa kúu.
31 Chukan kúu ja má jin koyuꞌu ni chi ndijin chi ka ndee yaꞌvi xeen‑ka ni sana in lasaa ma.
32 Ndevaꞌa‑ni na in ma koyuꞌu te ndakaꞌan i nuu ñayii ma ja kándija ñaꞌa i maa sa a,
suni ndakaꞌan tna sa nuu Yuva o Suꞌsi iya iyo andivi ma ja iyo sa jiꞌin i.
33 Kovaa ndevaꞌa‑ni na in na kuñaꞌa nuu ñayii ma ja masu kándija ñaꞌa i maa sa a,
suni saña tna ndakaꞌan sa nuu Yuva o Suꞌsi iya iyo andivi ma ja masu iyo sa jiꞌin i.
Ñayii ñatuu ka kandija Jesús ma chi masu jin ketnaꞌa‑ka ini i jiꞌin ñayii ka kandija ya ma
34 ’Má jin kani ini ndijin ja ni kijaa sa ñuu ñayivi a,
te jin koo mani ndaka ñayii a.
Vaa ja ni kijaa sa ya masu jin koo mani ndaka i,
chi suꞌva suꞌva jin ko kuu i.
35 Vaa ja ni kenda sa a,
chi ñayii masu ka kandija tnuꞌu káꞌan sa a chi suꞌva suꞌva jin ndakiti ini i nuu tnaꞌa i ma,
te tee ma kanaa de jiꞌin yuva de ma,
te ñaꞌa ma jiꞌin siꞌi ña ma,
te suni sukan jin ko kuu tna ñaꞌa kúu janu ma jiꞌin siꞌi xiso ña ma.
36 Te chukan kúu ja tnaꞌa ni ñayii ka iyo veꞌe ni ma ka kuu ñayii masu jin kunimani nuu ni ma ja kuechi ja ni kandija ñaꞌa ni ma.
37 Nú na in kútoo‑ka yuva i ma jiꞌin siꞌi i ma sana saña,
chi masu iyo i ja kuu kondikin ñaꞌa i maa sa.
Te nú na in kútoo‑ka saꞌya i ma sana saña,
masu iyo i ja kuu kondikin ñaꞌa i maa sa.
38 Te nú ma kachi i ja ndoꞌo neni i,
sukan ndóꞌo ñayii jiso krusi i ma te kuaꞌan i nuu kûu i ma,
masu iyo i ja kuu ko kuu i ñayii kondikin ñaꞌa i maa sa.
39 Nú na in ndí ini ja koo vaꞌa i ñuu ñayivi ya te ma kuan‑taꞌvi ñaꞌa i maa sa chi skenaa i maa i.
Kovaa nú na in visi na jin kaꞌni ñaꞌa i ñuu ñayivi ya ja kuechi ja ndikin ñaꞌa i maa sa chi ndaniꞌi‑taꞌvi i.
Sukan ndaskutaꞌvi Suꞌsi ma ñayii saꞌa ja vaꞌa ma
(Mr 9:41)
40 ’Te nú na in na kuan‑taꞌvi ñaꞌa veꞌe i ma ndijin,
suni jan‑taꞌvi ñaꞌa i maa sa.
Te nú na in na kuan‑taꞌvi ñaꞌa maa sa chi suni jan‑taꞌvi i iya ni tetniñu ñaꞌa ma.
41 Te nú na in na kuan‑taꞌvi veꞌe i ma in tee ndákaxtnuꞌu tnuꞌu ni waꞌa Suꞌsi ma vaa kuechi ja tee ndákaxtnuꞌu tnuꞌu ni waꞌa Suꞌsi ma kúu de,
te ñayii yaꞌa,
inuu jin niꞌi i jiꞌin tee yaꞌa ja skutaꞌvi ñaꞌa Suꞌsi ma.
Te nú na in na kuan‑taꞌvi veꞌe i ma in tee saꞌa ja vaꞌa kuechi ja in tee saꞌa ja vaꞌa kúu de ma,
te ñayii yaꞌa,
inuu jin niꞌi i jiꞌin tee yaꞌa ja skutaꞌvi ñaꞌa Suꞌsi ma.
42 Te nú na in na kuaꞌa visi in vasu ndute vijin ja koꞌo in ñayii yaꞌa ja masu kanuu i ma vaa kuechi ja in ñayii ndikin ñaꞌa i maa sa kúu i,
ja ndaa káꞌan sa ja masu skenaa i taꞌvi i iyo nuu Suꞌsi ma ―kúu ya jiñaꞌa ya.