Jesús ma, ni xnaa ya kuechi in tee ñatuu kúu kanda de, te ni nduvaꞌa de
9
Chukan kúu ja Jesús ma,
ni ndaa ya nuu barcu ma,
te ni ndayaꞌa ya onde in‑ka yuꞌu mar ma,
kuan noꞌo ya.
2 Te ni ka kenda koo ñayii jiꞌin in tee ñatuu kúu kanda de,
te ka ndiso i jito nuu yoxtnee de ma.
Te nuu ni jini Jesús ma ja ka kukanu ini xeen i ya ma,
te jiñaꞌa ya nuu tee kuꞌu ma:
―Saꞌya sa,
máko kuxii‑ka ini ni,
vaa ndaka kuechi ni ma jâ ni ka naa ―kúu ya jiñaꞌa ya.
3 Te jaku tee ka skuaꞌa tnuꞌu ni kaxtnuꞌu Moisés ma,
ka jani ini de:
“Tnuꞌu káꞌan tee yaꞌa chi ñatuu játna ini Suꞌsi ma”,
ka kuu de ka kaꞌan de.
4 Kovaa Jesús ma chi jâ ni jinitnuni ya ndaka ja ka jani ini de ma,
te ni jikan‑tnuꞌu ya de:
―¿Navaꞌa ka jani ini ni sukan?
5 ¿Nde a kúu ja yii‑ka?
¿Ja kuñaꞌa o tee kuꞌu a ja:
“Kuechi ni ma jâ ni ka naa”?
¿Xi ja kuñaꞌa o de:
“Ndakoo ni,
te ndakeꞌen ni nuu ni katuu ni a,
te kuán noꞌo ni”?
6 Te káxtnuꞌu sa saꞌa,
sukan‑vaꞌa jin kuni ni ja saña ja kúu sa iya vee ñayivi ñuu ñayivi a,
iyo sa ja tatnuni sa ñuu ñayivi a,
te sakanu ini sa kuechi ñayii ma,
te xnaa sa ―kúu ya jiñaꞌa ya.
Sani te jiñaꞌa ya tee kuꞌu ma:
―Ndakoo ni,
te ndakeꞌen ni nuu ni katuu ni a,
te kuán noꞌo ni veꞌe ni ma ―kúu ya jiñaꞌa ya.
7 Sani te ni ndakoo de,
te kuan noꞌo de.
8 Sani te ndaka ñayii ka iyo ma,
ni ka saꞌvi‑nka ini i ja sukan ni kuu ma,
te ni ka jakondee i ka ndachiñuꞌu i Suꞌsi ma,
vaa suu ya ni waꞌa tnuꞌu ndee tnuꞌu ndatnu ma ñayii ma.
Jesús ma, ni ndatnuꞌu ya jiꞌin ñayii ka saꞌa ja uꞌvi ma
9 Nuu ni yaꞌa Jesús ma ichi nuu kuaꞌan ya ma,
te ni jini ya tee kúu Mateo ma,
ja núkoo de ja ndákeꞌen yaꞌvi de xuꞌun noꞌo ñuu Roma ma nuu ndaka ñayii ka kivi koo ini ñuu ma ja jin xiko i ndatniñu i nuyaꞌvi ma.
Te jiñaꞌa ya:
―Kondikin ñaꞌa ni ―kúu ya jiñaꞌa ya de.
Te ni ndokuiñi tee kúu Mateo ma,
te ni ndikin de ya.
10 Sani te Jesús ma,
nuu ni jinkoo ya ini veꞌe ma ja kaa ya xita ma,
te ni ka kenda koo tna kuaꞌa tee ka ndakeꞌen yaꞌvi xuꞌun ja noꞌo Roma ma jiꞌin kuaꞌa tna ñayii ñatuu ka saꞌa ja vaꞌa ma.
Ka nukoo tna i nuu mesa nuu núkoo Jesús ma jiꞌin tee ka ndikin ya ma.
11 Te jaku tee ka kuu fariseo ma,
ni ka jini de Jesús ma ja núkoo ya neꞌun ndaka ñayii yukan ma,
te ka jiñaꞌa de nuu tee ka ndikin ya ma:
―¿Navaꞌa teskuaꞌa ni a,
ka nukoo kaa de ka jaa de ndeyu jiꞌin kuiꞌna ka ndakeꞌen yaꞌvi xuꞌun ma,
jiꞌin ndaka‑ka ñayii ñatuu ka saꞌa ja vaꞌa a?
―ka kuu de ka jiñaꞌa de.
12 Kovaa ni jinisoꞌo Jesús ma,
te jiñaꞌa ya:
―Ñayii ka iyo vaꞌa ma chi ñatuu ka jiniñuꞌu i tee tatna ma,
chi yika‑ni ja ñayii ka kuꞌu ma.
13 Kuán koo ni,
te jin skuaꞌa ni nawa kúni kaꞌan tnuꞌu Suꞌsi a nuu káꞌan ma:
“Masu kúni sa ja jin kaꞌmi ni kiti jin ndataa ni nuu sa,
suꞌva ja kúni sa kúu ja na jin kundaꞌvi ini ni tnaꞌa ni ma.”
Te saña chi masu vee sa ja ndakana sa ñayii ka jani ini ja ñayii ka saꞌa ja vaꞌa ja ndaa ka kuu i ma,
chi vee sa ja ndakana sa ñayii ka ndakunitnuni i ja ka ndiso kuechi i ma ―kúu ya jiñaꞌa ya.
Ni kaxtnuꞌu Jesús ma navaꞌa ñatuu ka iyo ndite tee ka ndikin ya ma
14 Sani te tee ka ndikin Juan ma,
ni ka jan tuꞌva de Jesús ma,
te ka jiñaꞌa de:
―¿Navaꞌa saña jiꞌin tee ka kuu fariseo ma,
ka iyo ndite sa jiꞌin de te ka jikan‑taꞌvi sa nuu Suꞌsi ma,
te tee ka ndikin ñaꞌa ndijin a chi ñatuu ka saꞌa de sukan?
―ka kuu de ka jiñaꞌa de.
15 Te Jesús ma,
jiñaꞌa ya:
―¿Xi jin koo ndite ñayii ka iyo viko tnándaꞌa ma,
te vitna ja ka iyo‑ka i jiꞌin suchi yii tnándaꞌa ma?
Kovaa kenda kivi ja jin xtandiyo i suchi tnándaꞌa ma.
Te nuna kenda kivi yukan,
sana jin koo ndite ñayii ma.
Ni kaxtnuꞌu Jesús ma ja in ja jaa ma chi masu ndáketnaꞌa i jiꞌin ja tuꞌu ma
16 ’Ni‑in ñayii ndasaꞌa i in saꞌma tuꞌu te ndachuꞌun i in saꞌma jaa,
chi vaa saꞌma jaa ma chi ndatiyi i,
te kachi i ja tuꞌu ma,
te kaꞌvi‑ka teꞌnde i.
17 Te ni masu tnaa o ndute uva yika ni juꞌni o ma in nuu ñií kiti jâ ni kuu kii iyo ma,
vaa ndute uva ma chi saꞌa de ja teꞌnde ñií ma,
te skenaa o ndute uva ma jiꞌin ñií ma.
Chukan kúu ja tnaa o ndute uva yika ni juꞌni o ma in nuu ñií jaa ma,
te jin kendoo vaꞌa nduu nduu i ―kúu ya jiñaꞌa ya.
Ni ndaxteku Jesús ma sasiꞌi tee nani Jairo ma, te ni ndasavaꞌa ya in ñaꞌa
18 Yikuu‑ka Jesús ma káꞌan ya,
te ni kenda in tee tátnuni veñuꞌu luluu ma,
te ni jinkoo jiti de nuu ya,
te jiñaꞌa de:
―Sasiꞌi sa ma chi vitnañuꞌni ni jiꞌi i,
te vee sa.
Neꞌe ni,
te jín koo o,
te sonee ni ndaꞌa ni a siki i,
sukan‑vaꞌa ndateku i ―kúu de jiñaꞌa de.
19 Te ni ndokuiñi Jesús ma,
te ni ndikin ya de,
te suni sukan ni ka saꞌa tee ka ndikin ya ma.
20 Te iyo in ñaꞌa ja jâ ni kuu uxi uu kuiya ja kuꞌu ña ja jati ñaꞌa niñi.
Te ni jan tuꞌva ña ichi yata Jesús ma,
te ni keꞌe ña yuꞌu saꞌma ndii ya ma,
21 chi vaa jani ini ña:
“Visi yika ja na kakiꞌi o saꞌma ndii ya ma,
te nduvaꞌa o”,
jani ini ña.
22 Kovaa Jesús ma,
ni konenuu ya,
te ni jini ya ña,
te jiñaꞌa ya:
―Saꞌya sa,
koo sii ini ni.
Jâ ni nduvaꞌa ni,
vaa kuechi ja ni kukanu ini ñaꞌa ni ma ―kúu ya jiñaꞌa ya.
Te ora yukan‑ni,
te ni nduvaꞌa ña.
23 Te nuu ni kivi Jesús ma ini veꞌe tee tátnuni veñuꞌu luluu ma,
te ni jini ya ja ka kayuꞌu ñayii ma ja ka ndaꞌyu i ma.
24 Te jiñaꞌa ya:
―Jin ke koo ni keꞌe ma.
Chi suchi siꞌi a chi masu ni jiꞌi i chi kixi i ―kúu ya jiñaꞌa ya.
Te ndaka ñayii ma chi ni ka jakundee i Jesús ma.
25 Kovaa Jesús ma chi nuu ni ka ke koo ñayii ma,
te ni kivi ya nuu kátuu suchi siꞌi ma,
te ni tnii ya ndaꞌa i ma,
te ni ndakoo i.
26 Te ni jitenuu tnuꞌu ja sukan ni saꞌa ya ma ni‑kaꞌnu ñuu ma.
Ni ndasavaꞌa Jesús ma nduchinuu uu tee inukuaa
27 Ni yaꞌa Jesús ma yukan,
te ni ka ndikin ñaꞌa uu tee inukuaa,
te ka kayuꞌu de ka jiñaꞌa de:
―¡Kundaꞌvi ini ñaꞌa ni,
Saꞌya tata David!
―ka kuu de ka jiñaꞌa de.
28 Te nuu ni kivi ya ini veꞌe ma,
te ni ka kenda koo tee inukuaa ma,
te Jesús ma,
jiñaꞌa ya:
―¿Ka kukanu ini ñaꞌa ni ja kuu ndasavaꞌa ñaꞌa sa?
―kúu ya jiñaꞌa ya.
Te ni ka ndakoneꞌe de:
―Ka kukanu ini ñaꞌa sa,
Señor ―ka kuu de ka jiñaꞌa de.
29 Sani te ni kiin ndaꞌa ya nuu de ma,
te jiñaꞌa ya:
―Sukan ka kukanu ini ñaꞌa ni a,
te ko kuu sukan ―kúu ya jiñaꞌa ya.
30 Te nuu ni ka ndanune nduchinuu tee yukan,
te Jesús ma,
ñukuun ni tatnuni ya nuu de ja ñatuu na in jin kuñaꞌa de.
31 Kovaa ni ka nde koo de yukan,
te ni ka kaxtnuꞌu de nuu ñayii ni‑kaꞌnu ñuu ma.
Ni saꞌa Jesús ma ja ni ndakaꞌan in tee ni ndasañiꞌi ñaꞌa in tachi ma
32 Nani ni ka nde koo de ma,
te ni ki koo i ni ki xsiaꞌa i in tee ja ni ndasañiꞌi ñaꞌa in tachi.
33 Te Jesús ma,
ni keneꞌe ya tachi ma,
te tee ñatuu kúu kaꞌan ma,
ni kuu ni ndakaꞌan de.
Te ñayii ma,
ni ka saꞌvi‑nka ini i,
te ka kaꞌan i:
―Masu nama uun ka jini o ja saꞌa ko kuu ñuu Israel ya ―ka kuu i ka kaꞌan i.
34 Kovaa tee ka kuu fariseo ma,
ka kaꞌan de:
―Ja maa tachi tátnuni‑ka nuu ndaka‑ka tachi ma te ni keneꞌe de tachi yaꞌa ―ka kuu de ka kaꞌan de,
kuechi ja ñatuu ka kandija de ya ma.
Ni kaꞌan Jesús ma ja kuaꞌa xeen tniñu iyo ja jin saꞌa o nuu Suꞌsi ma
35 Kovaa Jesús ma,
ni ndakonduu ya ni‑kaꞌnu yuꞌu ñuu Jerusalén ma,
te káxtnuꞌu ya ini veñuꞌu lilikin ka iyo in in ñuu ma tnuꞌu vii tnuꞌu vaꞌa sukan tatnuni Suꞌsi ma,
te ndásavaꞌa ya ñayii ma ndaka kueꞌe ka ndoꞌo i ma jiꞌin ndaka ndenu inu‑uꞌvi i ma.
36 Te ja ni jini ya kuaꞌa xeen ñayii ma,
te ni kundaꞌvi ini ya i,
vaa masu na in jito ñaꞌa,
te ni ka jitenuu i sukan ka kuu ndikachi kiti ñatuu na in jito ñaꞌa ma.
37 Sani te jiñaꞌa ya nuu tee ka ndikin ya ma:
―Kuaꞌa xeen ja jin ndaxtutu o iyo,
kovaa jaku‑ni ñayii jin satniñu ka iyo.
38 Chukan kúu ja jin kakan‑taꞌvi ni nuu Iya Tátnuni ma ja na tetniñu‑ka ya ñayii jin satniñu,
sukan‑vaꞌa kuu ndututu ndiꞌi ndaka ja kúu kuenda ya ma ―kúu ya jiñaꞌa ya.