Jesús ma, ni ndasavaꞌa ya in tee kuꞌu kueꞌe nani lepra
8
Te nuu ni nuu Jesús ma yuku ma,
te ni ka ndikin ñaꞌa kuaꞌa xeen ñayii.
2 Te ni kenda in tee ndóꞌo lepra,
te ni jinkoo jiti de nuu ya,
te saꞌa jikan‑taꞌvi de nuu ya:
―Iya Tátnuni,
nú kúni maa ni,
te ndasavii ñaꞌa ni kueꞌe ndóꞌo sa ya ―kúu de jiñaꞌa de.
3 Jesús ma,
ni sonee ya ndaꞌa ya siki de,
te jiñaꞌa ya:
―Kúni sa ja nduvaꞌa ni.
¡Kendoo vii ni!
―kúu ya jiñaꞌa ya.
Te ora yukan,
te ni nduvaꞌa tee kuꞌu kueꞌe lepra ma,
4 te Jesús ma,
saꞌa ni tatnuni ya:
―Másu ko kuñaꞌa ni ni‑in nuu ñayii ma,
suꞌva kuáꞌan ni,
te kaxtnuꞌu ni ñií ni a nuu sutu ma,
te kindaꞌa ni ja ni tatnuni Moisés ma ja ndakuaꞌa ni nuu Suꞌsi ma ja ndakuan‑taꞌvi ni nuu ya ja jâ ni nduvii ni a,
sukan‑vaꞌa ndaka i jin kuni ja jâ ni nduvii ni nuu kueꞌe ni ndoꞌo ni ma ―kúu ya jiñaꞌa ya.
Jesús ma, ni ndasavaꞌa ya in suchi jinukuechi nuu tee tátnuni nuu cientu soldado ma
5 Ni kivi Jesús ma ñuu Capernaum ma,
te ni kenda in tee tátnuni nuu cientu soldado ma,
te jikan‑taꞌvi de nuu ya,
6 te jiñaꞌa de:
―Señor,
suchi jinukuechi nuu sa ma,
kátuu i veꞌe sa ma,
te ñatuu kúu kanda‑ka i,
te ndóꞌo néni xen‑xeen i ―kúu de jiñaꞌa de.
7 Te Jesús ma,
jiñaꞌa ya:
―Nusaa,
te jín koo o,
te ndasavaꞌa sa i ―kúu ya jiñaꞌa ya.
8 Te ni ndakoneꞌe tee tátnuni nuu cientu soldado ma,
te jiñaꞌa de:
―Señor,
masu kaa masu iyo sa ja kivi ni ini veꞌe sa ma.
Vaꞌa‑ka onde yaꞌa‑ni te tatnuni ni nuu kueꞌe ma ja jin ndiyo i,
te nduvaꞌa suchi jinukuechi nuu sa ma.
9 Vaa suni saña chi tee tátnuni kúu sa,
te tátnuni sa nuu soldado ma.
Te nuna kuñaꞌa sa in de ma:
“Kuáꞌan ni”,
te kuaꞌan de,
te nuna kuñaꞌa sa in‑ka de ma:
“Neꞌe ni”,
te kii de.
Te nuna tátnuni sa nuu suchi jinukuechi nuu sa a:
“Saꞌa chaꞌa”,
te saꞌa i ―kúu de jiñaꞌa de.
10 Te ja ni jinisoꞌo Jesús ma,
kuaꞌan‑nka ini ya,
te jiñaꞌa ya ñayii ka ndikin ya ma:
―Ja ndaa káꞌan sa ja ni a maa ñuu Israel ya,
masu ni ndaniꞌi sa ñayii ka kukanu ini ñaꞌa sukan kúkanu ini ñaꞌa tee yaꞌa.
11 Te káꞌan sa ja ki koo kuaꞌa ñayii ichi nuu kána kandii ma jiꞌin ichi nuu kée kandii ma,
te jin kunukoo i jiꞌin Abraham ma jiꞌin Isaac ma jiꞌin Jacob ma nuu tatnuni Suꞌsi ma.
12 Kovaa saꞌya ya ja ka iyo ja jin koo i nuu tatnuni ya ma nkuu,
chi keneꞌe ya i ichi keꞌe ma,
te chunee ya i nuu nee ma,
te yukan,
te jin ndandaꞌyu i,
te jin ndakandiꞌi jin ndakandiꞌi i nuꞌu i ma ja jin ndoꞌo jin neni i kuechi ja ñatuu ni ka kandija i ja káꞌan ya ma ―kúu ya jiñaꞌa ya.
13 Sani te jiñaꞌa Jesús ma nuu tee tátnuni nuu cientu soldado ma:
―Kuáꞌan ni.
Vaa ja ni kukanu ini ñaꞌa ni a,
te ko kuu sukan ni jikan‑taꞌvi ni ma ―kúu ya jiñaꞌa ya.
Te suchi jinukuechi nuu de ma,
ni nduvaꞌa i maa ora yukan‑ni.
Jesús ma, ni ndasavaꞌa ya siꞌi xiso Pedro ma
14 Sani te ni kivi Jesús ma ini veꞌe Pedro ma,
te ni jini ya ja siꞌi xiso Pedro ma,
kátuu ña in nuu jito,
te yiꞌi xeen ñaꞌa kaꞌni.
15 Te ni sonee ya ndaꞌa ya ma siki ndaꞌa ña ma,
te ni ndee ñaꞌa kaꞌni ma,
te ni ndakoo ña,
te ni satuꞌva ñukuun ña nawa kaa ya jiꞌin tee ka ndikin ya ma.
Jesús ma, ni ndasavaꞌa ya kuaꞌa ñayii ka kuꞌu
16 Nuu ve kunee ma,
ni jan koo ñayii ni ka jan xsiaꞌa i kuaꞌa ñayii ka yinee tachi ini anua i ma,
nuu Jesús ma,
ja na ndasavaꞌa ñaꞌa ya.
Te ni tatnuni ya nuu tachi ma,
te ni ndeneꞌe ya i ini anua ñayii ma,
te ni ndasavaꞌa ya ndaka ñayii ka kuꞌu ma,
17 sukan‑vaꞌa ko kuu sukan ni kaꞌan Isaías tee ni yo ndakaxtnuꞌu tnuꞌu ni yo waꞌa Suꞌsi ma:
“Maa ya ni jiso kueꞌe o ma jiꞌin ndenu uꞌvi o ma.”
Ñayii ka kuni ja jin kondikin i Jesús ma
18 Ni jini Jesús ma ja ni ka ndututu kuaꞌa xeen ñayii nuu iyo ya ma,
te chukan kúu ja ni tatnuni ya nuu tee ka ndikin ya ma ja na jin koo de jiꞌin ya onde in‑ka yuꞌu mar ma.
19 Te ni jan tuꞌva ñaꞌa in tee skuaꞌa tnuꞌu Moisés ma,
te jiñaꞌa de:
―Teskuaꞌa,
kúni sa ja kondikin ñaꞌa sa ndevaꞌa‑ni ndenu kiꞌin maa ni ―kúu de jiñaꞌa de.
20 Te Jesús ma,
ni ndakoneꞌe ya:
―Ñukuii ma,
ka iyo yavi ti,
te lasaa ma,
ka iyo taka ti,
kovaa saña ja kúu sa iya vee ñayivi ñuu ñayivi a chi ñatuu ndenu iyo in nuu ndatatu sa ―kúu ya jiñaꞌa ya.
21 In‑ka tee ka ndikin ya ma,
jiñaꞌa de ya:
―Señor,
kachi ni,
te xinañuꞌu chuꞌu vaꞌa sa yuva sa ma,
sana kii sa,
te kondikin ñaꞌa sa ―kúu de jiñaꞌa de.
22 Te Jesús ma,
ni ndakoneꞌe ya:
―Kondikin ñaꞌa ni,
te xndoo ni ñayii ñatuu ka kachi ja saꞌa Suꞌsi ma ja jin koteku i ma,
te jin chuꞌu maa i ñayii ni ka jiꞌi ma ―kúu ya jiñaꞌa ya.
Jesús ma, ni ndasaꞌa nañii ya kajin yiꞌi ma jiꞌin ndute ma
23 Sani te ni kaa Jesús ma nuu barcu ma,
te tee ka ndikin ya ma,
suni ni ka ka koo tna de.
24 Nani ka yaꞌa de nuu ndute ma,
te ni kejaꞌa yiꞌi xeen tachi nuu ndute ma,
te barcu ma jâ ve jakuꞌun ndute,
te vala‑nka ja saꞌvi tnu nuu ndute ma.
Kovaa Jesús ma,
kixi ya.
25 Sani te ni ka xndoto kunu de Jesús ma,
te ka jiñaꞌa de:
―¡Señor!
¡Chindee ñaꞌa ni!
¡Nú ñaꞌa,
te jin saꞌvi o nuu ndute a!
―ka kuu de ka jiñaꞌa de.
26 Te Jesús ma,
jiñaꞌa ya:
―¿Navaꞌa ka yuꞌu ni?
¿Ñatuu jin kukanu ini‑ka ñaꞌa ni?
―kúu ya jiñaꞌa ya.
Sani te ni ndakoo ya,
te ni tatnuni ya nuu tachi yiꞌi ma jiꞌin nuu ndute ma ja na jin ndunañii i,
sani te nañii kuiti ni nduu nuu ndute ma.
27 Te tee ka ndikin ya ma,
ni ka saꞌvi‑nka ini de,
te ka kaꞌan de:
―¿Na tee kúu tee yaꞌa,
ja ka kandija ñaꞌa tachi yiꞌi a jiꞌin ndute a?
―ka kuu de ka kaꞌan de.
Ni ndasavaꞌa Jesús ma uu tee ja ka yinee ñaꞌa tachi
28 Sani te ni ka kenda koo de in‑ka yuꞌu mar ma ñuu ñayii gadareno ma.
Te ni ka ke koo uu tee ichi nuu ka chuꞌu i ndiyi ma,
te ka yinee tachi ini anua de ma,
te ni ka jan tuꞌva de Jesús ma.
Te îyo ka saꞌa de,
te chukan kúu ja ñatuu kúu jin ko yaꞌa ñayii ma ichi yukan ma.
29 Sani te ka kayuꞌu de ka jiñaꞌa de:
―¡Máko kivi nduu ni jiꞌin sa!
¿Vaa Saꞌya Suꞌsi ma kúu ni,
te vee ni ja xndoꞌo xneni ñaꞌa ni?
¡Te vitna ja ñatuu kenda‑ka kivi ja saꞌa ni sukan!
―ka kuu de ka jiñaꞌa de.
30 Te jika‑ka ka iyo kuaꞌa chikini ja ka jaa ti,
31 te chukan kúu ja tachi ma,
ka jiñaꞌa i:
―Nuna ndeneꞌe ñaꞌa ni,
te taa ni tnuꞌu,
te jin ndivi koo sa chikini ma ―ka kuu i ka jiñaꞌa i.
32 Te Jesús ma,
jiñaꞌa ya:
―¡Kuán koo,
nusaa!
―kúu ya jiñaꞌa ya.
Sani te tachi ma,
ni ka xndoo i tee yukan,
te ni ka ndivi koo i ini chikini ma,
te ndaka chikini ma,
te ka jinu ti ni ka nu koo ti onde nuu ndute mar ma,
te ni ka kê koo ti nuu ndute ma,
te ni ka kandee ti,
te ni ka jiꞌi ti.
33 Te tee ka jito chikini ma,
ni ka jinu de kuan koo de,
te ni ka ndivi koo de ini ñuu ma,
te ni ka ndakani de ndaka sukan ni kuu jiꞌin tee ni ka yo yinee ñaꞌa tachi ma.
34 Te ñayii ka iyo ñuu ma,
te ni ka ke koo i te kuan koo i kuan tnaꞌa i Jesús ma.
Te ja ni ka kenda koo i nuu iyo ya ma,
te ni ka jikan‑taꞌvi xeen i nuu ya ja na kiꞌin ya,
te máko koo‑ka ya ñuu yukan.