Ni kaꞌan Suꞌsi Iya Tátnuni ma nuu tee nani Jonás ma sayii tee nani Amitai ma,

te jiñaꞌa ya:

2 ―Ndokuiñi ni,

te kuaꞌan ni ñuu Nínive ma ñuu kaꞌnu yukan,

te kaxtnuꞌu ni ja jin ndoꞌo jin tnaꞌa ñayii ñuu yukan,

vaa jâ ni kenda ja uꞌvi ja ka saꞌa ka kuu i ma onde nuu sa a ―kúu ya jiñaꞌa ya.

3 Te Jonás ma,

ni ndokuiñi de,

te kuaꞌan de ñuu Tarsis ma,

ja ni jinu ndee de nuu Suꞌsi o Iya Tátnuni ma.

Te nuu ni nuu de ñuu Jope ma,

te ni kaa de in nuu varku kiꞌin ñuu Tarsis ma,

te ni chuyaꞌvi de,

sukan-vaꞌa kondiso ñaꞌa tnu te kiꞌin de ñuu Tarsis ma.

Vaa jani ini de ja sukan,

te kujika de nuu Suꞌsi ma.

4 Kovaa Suꞌsi ma chi ni saꞌa ya ja ni kejaꞌa yiꞌi niniꞌi tachi nuu ndute mar ma,

te tee kuan koo ma,

ni ka jani ini de ja ndatnana varku ma.

5 Te tee ka jito varku ma chi ni ka yuꞌu xen-xeen de,

te maa maa de ka ndakuneꞌe suꞌsi de ma.

Sani te ni ka skana de ndaka ndatniñu ka ñuꞌu ini varku ma nuu ndute mar ma,

sukan-vaꞌa nduñama-ka tnu.

Kovaa Jonás ma chi suꞌva ni ndivi vavaꞌa de onde ini varku ma,

te ni jinkava tuu de ja kusu de.

6 Te tee tátnuni nuu varku ma,

ni jan tuꞌva de Jonás ma,

te jiñaꞌa de:

―¿Nawa ndoꞌo ni ja kixi kixi-ni ni?

Ndakoo ni,

te ndakuneꞌe ni suꞌsi ni ma,

na jini-nka xi sa kundaꞌvi ini ñaꞌa ya ndaka o,

te ma jin skenaa o maa o ―kúu de jiñaꞌa de.

7 Te ndi-in ndi-in de ni ka kaꞌan:

―Neꞌe koo ni,

te jín koto o tnuni na ndee o xi kuechi kúu ja ni kenda tnundoꞌo yaꞌa ―ka kuu de ka kaꞌan de.

Te ni ka jito de tnuni ma,

te sani te ni ka jini de ja kuechi Jonás ma kúu.

8 Sani te ka jiñaꞌa de nuu Jonás ma:

―Ndakaꞌan ndakachi ni navaꞌa ni kenda tnundoꞌo yaꞌa.

¿Na tniñu saꞌa ni?

¿Na ndende vee ni?

¿Na ndee kúu ñuu ni?

―ka kuu de ka jiñaꞌa de.

9 Te saꞌa ni ndakoneꞌe Jonás ma:

―Tee ñuu hebreo ma kúu sa,

te jinindija sa Suꞌsi Iya Tátnuni ma,

Suꞌsi iya iyo andivi ma iya ni saꞌa ñuꞌú ya jiꞌin ndute ñuꞌu nuu mar ya ―kúu de jiñaꞌa de.

10 Te ndaka tee yukan ni ka yuꞌu xen-xeen,

te ka jiñaꞌa de:

―¿Navaꞌa ni saꞌa ni saꞌa?

―ka kuu de ka jiñaꞌa de,

vaa ni ka jinitnuni de ja ni jinu ndee Jonás ma nuu Suꞌsi Iya Tátnuni ma,

vaa maa de ni ndakani sukan ma.

11 Te ka jiñaꞌa de:

―Ndijin,

¿nawa jin saꞌa ñaꞌa sa,

sukan-vaꞌa ndunañii nuu ndute ya?

―ka kuu de ka jiñaꞌa de,

vaa ndute ma chi ve kuniꞌi xen-xeen-ka de.

12 Te jiñaꞌa de:

―Jin tnii ñaꞌa ni,

te jin skee ñaꞌa ni nuu ndute a,

sukan-vaꞌa ndukuee ndute ñuꞌu nuu mar ya,

vaa jini sa ja kuechi maa sa kúu ja ni kenda tnundoꞌo tnuneni yaꞌa siki o ya ―kúu de jiñaꞌa de.

13 Te ni ka satniñu xen-xeen de,

sukan-vaꞌa jin kundee de jin ndeneꞌe de varku ma ichi yuꞌu ndute ma.

Kovaa masu ni ka kundee de,

vaa suꞌva ni kuniꞌi xeen-ka ja yiꞌi tachi ma.

14 Sani te ni ka ndakuneꞌe jajaa de Suꞌsi Iya Tátnuni ma,

te ka jiñaꞌa de ya:

―Iya Tátnuni ndija,

ndijin ja saꞌa ni sukan kúni maa ni ma,

ka jikan-taꞌvi sa nuu ni ja masu jin skenaa sa maa sa ja kuechi tee yaꞌa,

ni a jin kuisokuechi sa ja kûu in ñayii masu na kuechi ma ―ka kuu de ka jiñaꞌa de.

15 Te ni ka tnii de Jonás ma,

te ni ka skee de tee ma nuu ndute mar ma,

sani te ni ndunañii ndute ma.

16 Te tee yukan,

ni ka yuꞌu xen-xeen de,

te ni ka ndakunitnuni de ja Suꞌsi ndija kúu Iya Tátnuni ma,

te ni ka jaꞌmi de kiti nuu ya ja ni ka ndakuan-taꞌvi de,

te ni ka skuiso de ja jin kondikin de ya.

17 Kovaa Iya Tátnuni ma,

jâ ni satuꞌva ya in tiaka kaꞌnu kaꞌnu,

te ni kokon ti Jonás ma,

te ni ñunee Jonás ma uni kivi nduu ñuu chii tiaka ma.