Sukan ko saꞌa ko kuu tee kúu rey ma
31
Tnuꞌu yaꞌa ka kuu tnuꞌu ndichi ni kaꞌan rey Lemuel ma
ja ni ndakaxtnuꞌu siꞌi de ma.
2 Roꞌo kúu saꞌya maa ri ja ni ñunee ro chii ri ma,
te maa ri ni jikan ñaꞌa nuu Suꞌsi ma.
3 Máko ko saꞌa ndevaꞌa ro tnuꞌu ndee tnuꞌu ndatnu ro a,
vaa konaꞌa ro ja ñaꞌa ma chi ka saꞌa ña ja ka skenaa rey ma maa de.
4 Vaa konaꞌa ro,
vi Lemuel,
ja masu vaꞌa‑ni ja rey ma
te jin koꞌo de ndixi,
te suni tee ka netniñu ma,
masu vaꞌa‑ni ja jin koꞌo tna de ndixi.
5 Vaa nuna koꞌo de ndixi ma
chi saꞌa i ja ndunaa de sukan káꞌan ley ma
te ndaxsama de sukan káꞌan ma
te saꞌa ndevaꞌa de ñayii ndaꞌvi ma.
6 Xndoo ndixi ma,
te jin koꞌo maa ñayii ka kuxii ka kundaꞌvi‑nka ini
te ka jani ini i ja masu jin kuu‑ka i ma.
7 vaa ñayii yaꞌa chi ka jiꞌi i ndixi ma,
te ka ndunaa i ja ka kundaꞌvi ka kukee i ma
jiꞌin ndevaꞌa‑ni nawa ka ndoꞌo ka neni i ma.
8 Ndakune yuꞌu ro a,
te kaꞌan ro
te chindee ro ñayii ñatuu kúu jin kaꞌan ja jin kuu maa i ma.
9 Ndakune yuꞌu ro a,
te kaꞌnde ndaa ro tniñu ñayii ndaꞌvi ma
jiꞌin ñayii ñatuu na in chíndee ñaꞌa ma.
Ñaꞌa ndichi ma chi ndimaa ja vii ja vaꞌa saꞌa ña
10 Ñaꞌa tiñiꞌi ini ma te ndúku ña ja saꞌa ña ja vaꞌa ma,
masu ndenu iyo ndevaꞌa ñaꞌa yukan.
Vaa in ñaꞌa kúu sukan chi ja vaꞌa xeen‑ka kúu
sana yuu vivii ma ka ndee yaꞌvi xeen ma.
11 Vaa yii ña ma chi kúkanu ini xeen de ña,
te nduu de jiꞌin ña chi ndimaa jin ko niꞌi jin ko tnaꞌa de.
12 Ndimaa ja vaꞌa saꞌa ña ja kuu yii ña ma,
te ndaka kivi koteku de ma
chi masu saꞌa ña ja ko ndoꞌo ko neni de.
13 Vaa maa ña chi jaꞌan ña jan nduku ña ixi ndikachi
jiꞌin yuꞌva lino ma,
te sii ini‑ni satniñu ña jiꞌin ndaꞌa ña ma te saꞌa ña saꞌma.
14 Te sukan kúu in barcu tee ndakuaan te ndaxiko de ndatniñu ma,
sukan kúu ña,
vaa visi jika xi yatni,
te kuaꞌan ña kuan nduku ña ja jin kaa ndaka ña veꞌe ña ma.
15 Ndanee‑ka ndákoo ña xtnee neꞌe ma,
te waꞌa ña ja ka jaa saꞌya ña ma
jiꞌin ñaꞌa ka jinukuechi veꞌe ña ma.
16 Jaꞌan ña jan koto ña ñuꞌú ka ndaxiko i ma
te ndákuaan ña jiꞌin xuꞌun ni niꞌi maa ña ma,
te nuu ñuꞌú yukan chi súnkoo ña ja ni jaan ña
jiꞌin xuꞌun ni niꞌi ña ma.
17 Ûni tnuñu ña satniñu ña,
ûni ni‑yuꞌu ni‑ini ña satniñu ña,
te kúndee ña kéneꞌe ña tniñu ma,
18 te jito vaꞌa ña nú vaꞌa‑ni kuan koo ndaka tniñu saꞌa kúu ña ma
te ni masu kuita ña,
vaa visi jâ ni kunee ma te satniñu‑ka ña.
19 Jiꞌin ndaꞌa maa ña ma kéneꞌe ña yuꞌva ma,
te saꞌa ña saꞌma jin koneꞌnu ña veꞌe ña ma.
20 Te ndimaa chíndee ña ñayii ka kundaꞌvi ka kukee ma
nawa ka jiniñuꞌu i ma.
21 Maa ña chi másu ndí ini ña nawa jin kuu ñayii veꞌe ña ma
kivi kuvijin xeen ma,
vaa jâ ni satuꞌva ña saꞌma kokon jin koneꞌnu i.
22 Maa ña saꞌa saꞌma ka yoxtnee nuu jito ka kixi ñayii veꞌe ña ma,
te saꞌa ña saꞌma lino,
saꞌma vaꞌa neꞌnu ña.
23 Yii ña ma chi ka kaꞌan vii ka kaꞌan vaꞌa i ja kuu de
ora núkoo de neꞌun tee ka tatnuni‑ka ma
nuu kivi o ini ñuu ma.
24 Saꞌa ña saꞌma jiꞌin ja jin kiꞌi ñayii ma chii i ma,
te xiko ña nuu ñayii ka ndaxiko nuyaꞌvi ma.
25 Iyo xeen tnuꞌu ndee tnuꞌu ndatnu nuu ña,
te iyo jayiñuꞌu ña nuu ñayii ma ja sukan saꞌa ña ja vaꞌa ma,
te másu nde yuꞌu ña nawa ko kuu kivi kiꞌin o ma.
26 Te ora káꞌan ña ma,
ndimaa tnuꞌu ndichi káꞌan ña,
vaa ja káxtnuꞌu ña ma kúu ja ndimaa jín kutoo tnaꞌa ñayii ma
te jín kuaan mani tnaꞌa i.
27 Másu ñaꞌa kuxi kúu ña,
vaa ndí ini ña ja ndaka ja iyo veꞌe ña ma na jin koo vaꞌa,
te másu nama jaa ña xita nú masu onde satniñu ña.
28 Saꞌya ña ma chi ka jinkuiñi i,
te ka kaꞌan vii ka kaꞌan vaꞌa i ja kuu ña,
te yii ña ma ndáchiñuꞌu de ña,
te jiñaꞌa de:
29 “Kuaꞌa xeen ñaꞌa ka saꞌa ja vaꞌa,
kovaa roꞌo chi saꞌa vaꞌa xeen‑ka ro
sana ndaka‑ka ña ma”,
kúu de jiñaꞌa de.
30 Ja vivii kaa in ñaꞌa ma te vivii káꞌan ña ma
chi in ja xndaꞌvi‑ni ñaꞌa kúu,
nú chukan na kukanu ini o,
kovaa ñaꞌa yuꞌu Suꞌsi ma te ñatuu saꞌa ña ja uꞌvi ma
chi ja ndaa kúu ja iyo ña ja koo jayiñuꞌu ña.
31 Jin ndakuaꞌa ni jayiñuꞌu ñaꞌa saꞌa ja vaꞌa ma,
jin ndakunitnuni ni ndaka ja sukan sii ini satniñu ña ma.
Jin ndakaꞌan jin ndakachi ni ndaka ja vii ja vaꞌa saꞌa ña ma
te na jin kuni ndaka ñayii ma.